Okɛ wɔ-Wɛb Saiti lɛ Atsu Nii yɛ Shiɛmɔ Nitsumɔ lɛ Mli​—“Sanebimɔi ni Biblia lɛ Ehã Hetoo”

Kɛ́ otee jw.org lɛ nɔ fã ni ji “Biblia Tsɔɔmɔi” lɛ, obaana fã kroko ni ji “Sanebimɔi ni Biblia lɛ Ehã Hetoo.” Kɛ́ wɔle sanebimɔi ni yɔɔ jɛmɛ lɛ, wɔbaanyɛ wɔgbala wɔshiatsɛmɛi ni miitao ale sanebimɔi nɛɛ ahetoo lɛ ajwɛŋmɔ kɛya wɔ-Wɛb saiti lɛ nɔ koni amɛna hetoi ni Biblia lɛ kɛhãa. Abaanyɛ akɛ sanebimɔi nɛɛ atsu nii kɛje sanegbaa shishi yɛ shiɛmɔ nitsumɔ lɛ mli. Wɔbaanyɛ wɔhala sanebimɔ ni mɛi ni yɔɔ wɔshikpɔŋkuku lɛ mli lɛ baanya he, wɔbi shiatsɛ lɛ susumɔ yɛ he, ni wɔjɛ nɔ ni wɔkase kɛjɛ jw.org lɛ nɔ lɛ mli wɔhã ele nɔ ni Biblia lɛ kɛɔ yɛ sanebimɔ lɛ he. No sɛɛ lɛ, wɔbaanyɛ wɔkɛɛ lɛ loo wɔtsɔɔ lɛ he ni wɔná hetoo lɛ yɛ. Gbɛ kroko hu ji, ni wɔhã ekane hetoo lɛ tɛ̃ɛ kɛjɛ Wɛb saiti lɛ nɔ. Nɔkwɛlɔ gbɛfalɔ ko ŋa kɛ gbɛ ni nyiɛ sɛɛ nɛɛ tsuɔ nii, ni eyeɔ omanye waa. Ekɛɔ akɛ: “Mɛi pii biɔ amɛhe akɛ, ‘Ani esa akɛ wɔshwa Nyɔŋmɔ yɛ amanehului ni wɔnaa lɛ ahe?’ Ani obaasumɔ ni ole hetoo lɛ yɛ sɛkɛnsii 51 pɛ mli?” Kɛkɛ lɛ etswa nɔ ni arikɔdi ni ekɛwo mobail foŋ he nɔ ni ehiɛ lɛ nɔ lɛ ehã mɔ lɛ. Egbalaa mɔ lɛ jwɛŋmɔ kɛyaa Biblia lɛ Tsɔɔ wolo lɛ yitso 11 lɛ nɔ kɛmuɔ sane lɛ naa.