Kasemɔ Nii Kɛjɛ Shiɛlɔi ni he Esa lɛ Adɛŋ
Wɔhiɛ sɔɔ shiɛlɔi ni he esa ni yɔɔ wɔsafoi lɛ amli lɛ waa. Amɛteŋ mɛi komɛi kɛ afii babaoo esɔmɔ Yehowa. Mɛi komɛi hu etsɛko tsɔ, shi amɛná hesai yɛ shiɛmɔ nitsumɔ lɛ mli. Shiɛlɔi nɛɛ ena bɔ ni Yesu ekudɔ Kristofoi asafo lɛ yɛ naagbee gbii nɛɛ amli, ní ehã shiɛmɔ kɛ kaselɔfeemɔ nitsumɔ lɛ eshwere waa lɛ. (Mat. 28:19, 20) Amɛhe ni amɛkɛwoɔ shiɛmɔ nitsumɔ lɛ mli lɛ hãa amɛnáa “hewalɛ ni fa kɛteke nɔ” kɛ́ amɛkɛ kai kɛ jaramɔ shihilɛi miikpe. (2 Kor. 4:7) Nibii babaoo yɛ ni wɔbaanyɛ wɔkase kɛjɛ shiɛlɔi ni he esa nɛɛ adɛŋ. Kɛ́ amɛná hegbɛ lɛ, amɛkɛ miishɛɛ tsɔɔ mɛi krokomɛi nibii ni amɛkase lɛ. (Lala 71:18) No hewɔ lɛ, esa akɛ wɔtao gbɛi ni wɔɔtsɔ nɔ wɔkase nii kɛjɛ amɛdɛŋ. Te wɔɔfee tɛŋŋ wɔfee nakai?
Yɛ Shiɛmɔ Nitsumɔ lɛ Mli. Dani shiɛlɔi hei loo mɛi ni he esako tsɔ lɛ baanyɛ ashiɛ jogbaŋŋ lɛ, esa akɛ atsɔɔ amɛ nii. Kɛ́ amɛkwɛ gbɛ ni shiɛlɔi ni he esa lɛ tsɔɔ nɔ amɛshiɛɔ lɛ, amɛbaanyɛ amɛkase nibii babaoo kɛjɛ amɛdɛŋ. (Kwɛmɔ sane ni yitso ji “Okɛ Miishɛɛ kɛ Ekãa Atsu Shiɛmɔ Nitsumɔ lɛ Daa” ni yɔɔ February 15, 2015, Buu-Mɔɔ lɛ mli lɛ saneyitso fioo ni ji “Ye Obua Shiɛlɔi Hei” lɛ kuku etɛ lɛ.) Te oná shiɛlɔi ni he esa nɛɛ ni okɛtsu nii yɛ shiɛmɔ nitsumɔ lɛ mli he sɛɛ ohã tɛŋŋ?
Ani obaanyɛ okɛ shiɛlɔ ko ni he esa lɛ ato gbɛjianɔ ni okɛlɛ atsu nii yɛ shiɛmɔ nitsumɔ lɛ mli? Kɛ́ shiɛlɔ lɛ ji mɔ ko ni bɛ gbɔmɔtsoŋ hewalɛ lɛ, obaanyɛ oto gbɛjianɔ ni okɛ mɔ ni okɛkaseɔ Biblia lɛ ayafee nikasemɔ lɛ yɛ eshĩa lɛ. Kɛ́ nyɛgbe nikasemɔ lɛ naa lɛ, bi lɛ ni etsɔɔ bo bɔ ni ena nikasemɔ lɛ, kɛ nɔ ni obaanyɛ ofee koni oya ohiɛ.
Okɛ Amɛ Afɔ Bɔɔ: Kɛ́ okɛ shiɛlɔi ni he esa lɛ fɔɔ bɔɔ lɛ, obaaná ole amɛ jogbaŋŋ. Fɔ̃ɔ amɛteŋ mɔ kome nine kɛba nyɛweku jamɔ lɛ shishi ni nyɛbibii lɛ saji. Kɛ́ shiɛlɔ lɛ ji mɔ ko ni bɛ gbɔmɔtsoŋ hewalɛ lɛ, ani nyɛbaanyɛ nyɛto gbɛjianɔ ni nyɛyafee weku jamɔ lɛ yɛ eshĩa lɛ? Nyɛbia lɛ bɔ ni fee ni ebale anɔkwale lɛ. Mɛɛ jɔɔmɔi ená? Mɛɛ shweremɔ ena yɛ asafo lɛ mli? Mɛɛ gbɛ nɔ Yehowa sɔɔmɔ lɛ ehã ená miishɛɛ?
Nu amɛ shishi, ni kaakpa babaoo gbɛ kɛmiijɛ amɛdɛŋ. Wɔ kɛ mɛi ni kɛ afii babaoo etsu shiɛmɔ nitsumɔ lɛ fɛɛ yɛ nikeenii srɔtoi yɛ shiɛmɔ nitsumɔ lɛ mli. (Rom. 12:6-8) Amɛteŋ mɛi komɛi egbɔlɔ, ni no baanyɛ asa bei abɔ ni amɛbaanyɛ amɛkɛ wɔ ashara lɛ he. Shi fɛɛ sɛɛ lɛ, wɔbaanyɛ wɔkase nibii babaoo kɛjɛ amɛdɛŋ, ejaakɛ amɛkɛ anɔkwayeli esɔmɔ Yehowa afii babaoo.