Nibii ni Wɔkɛtsuɔ Nii Kɛtsɔɔ Mɛi Anii
1. Mɛɛ gbɛ nɔ Kristofoi shiɛlɔi tamɔ ŋaa nitsulɔi?
1 Ŋaa nitsulɔi kɛ dɛŋdadei srɔtoi tsuɔ nii. Amɛyɛ dɛŋdadei lɛ ekomɛi ni amɛkɛtsuɔ nitsumɔi krɛdɛi komɛi pɛ, ni amɛyɛ ekomɛi hu ni amɛkɛfɔɔ nitsumɔ waa. Ŋaa nitsulɔi ni he ekpɔ waa lɛ hãa dɛŋdadei ni amɛkɛfɔɔ nitsumɔ nɛɛ hiɔ amɛhe be fɛɛ be, ni amɛle bɔ ni akɛ nomɛi tsuɔ nii lɛ jogbaŋŋ fe ekrokomɛi lɛ. Biblia lɛ woɔ Kristofonyo fɛɛ Kristofonyo hewalɛ koni etsu sɔɔmɔ nitsumɔ lɛ jogbaŋŋ ni etsɔ “nitsulɔ ni hiɛ gbooo yɛ nɔ ko ni etsu he.” (2 Tim. 2:15) Mɛɛ dɛŋdade he hiaa fe fɛɛ yɛ dɛŋdadei ni wɔkɛtsuɔ nii be fɛɛ be lɛ ateŋ? No ji Nyɔŋmɔ Wiemɔ lɛ—dɛŋdade titri ni wɔkɛtsuɔ nii ‘kɛfeɔ mɛi kaselɔi’ lɛ. (Mat. 28:19, 20) Enɛ hewɔ lɛ, esa akɛ wɔbɔ mɔdɛŋ wɔhã wɔhe asa akɛ mɛi ni “hiɛɔ anɔkwale lɛ wiemɔ lɛ mli pɛpɛɛpɛ.” Ni kɛ̃lɛ, dɛŋdadei krokomɛi hu yɛ ni wɔkɛfɔɔ nitsɔɔmɔ, ni esa akɛ Kristofoi fɛɛ ale bɔ ni akɛ nomɛi hu tsuɔ nii jogbaŋŋ kɛtsɔɔ mɛi anɔkwale lɛ.—Abɛi 22:29.
2. Mɛɛ dɛŋdadei wɔkɛfɔɔ nitsɔɔmɔ?
2 Dɛŋdadei ni Wɔkɛfɔɔ Nitsɔɔmɔ: Yɛ Biblia lɛ sɛɛ lɛ, mɛɛ dɛŋdadei krokomɛi esa akɛ wɔkɛtsu nii? Dɛŋdade titri ni wɔkɛtsɔɔ mɛi Biblia mli anɔkwalei lɛ ji Mɛni Biblia lɛ Tsɔɔ Diɛŋtsɛ? wolo lɛ. Kɛ́ wɔkɛ nikaselɔ ko kase wolo nɛɛ wɔgbe naa lɛ, wɔkɛ ‘Nyɛhia Nyɔŋmɔ Suɔmɔ lɛ Mli’ wolo lɛ tsuɔ nii kɛtsɔɔ lɛ bɔ ni ebaafee ekɛ Biblia mli shishitoo mlai atsu nii yɛ eshihilɛ mli. No hewɔ lɛ, esa akɛ wɔle bɔ ni akɛ woji enyɔ nɛɛ tsuɔ nii ahãa lɛ jogbaŋŋ. Esa akɛ wɔkɛ broshuɔi komɛi hu afɔ nitsɔɔmɔ. Sanekpakpa ni Jɛ Nyɔŋmɔ Ŋɔɔ! lɛ fata dɛŋdadei titrii ni wɔtsuɔ nii kɛjeɔ Biblia mli nikasemɔi ashishi lɛ he. Kɛ́ mɛi yɛ wɔshikpɔŋkuku lɛ mli ni nyɛɛɛ nii akane jogbaŋŋ loo woji fioo ko pɛ wɔyɔɔ yɛ amɛmaŋ wiemɔ mli loo wɔbɛ eko kwraa lɛ, no lɛ wɔbaanyɛ wɔkɛ Bo Nyɔŋmɔ Toi loo Bo Nyɔŋmɔ Toi Koni Ohi Shi Kɛya Naanɔ woji lɛ atsu nii. Nitsɔɔmɔ dɛŋdade titri ni wɔkɛtsuɔ nii kɛgbalaa nikaselɔi ajwɛŋmɔ kɛbaa asafo lɛ nɔ ji Namɛi Feɔ Yehowa Suɔmɔnaa Nii Ŋmɛnɛ? wolo lɛ. Esa akɛ wɔkase bɔ ni akɛ vidioi tamɔ Mɛni Hewɔ Esa akɛ Okase Biblia Lɛ?, Mɛni Yaa Nɔ yɛ Maŋtsɛyeli Asa lɛ Nɔ?, kɛ Ani Nyɔŋmɔ yɛ Gbɛ́i? lɛ tsuɔ nii jogbaŋŋ, ejaakɛ amɛyeɔ amɛbuaa kɛfeɔ mɛi kaselɔi.
3. Mɛni saji komɛi ni baaje kpo wɔsɛɛ yɛ Wɔ Maŋtsɛyeli Sɔɔmɔ lɛ mli lɛ baaye abua wɔ ni wɔfee?
3 Saji komɛi ni baaje kpo wɔsɛɛ yɛ Wɔ Maŋtsɛyeli Sɔɔmɔ lɛ mli lɛ baawa wɔ koni wɔle bɔ ni akɛ dɛŋdadei ni wɔkɛfɔɔ nitsɔɔmɔ lɛ tsuɔ nii jogbaŋŋ. Kɛ́ wɔbɔ mɔdɛŋ wɔkɛ dɛŋdadei nɛɛ tsu nii jogbaŋŋ lɛ, ebaatsɔɔ akɛ wɔmiibo ŋaa ni ajɛ mumɔŋ awo lɛ toi akɛ: “Ohiɛ ahi ohe nɔ kɛ onitsɔɔmɔ lɛ nɔ be fɛɛ be. Kã he ofee nibii nɛɛ, ejaakɛ kɛ́ ofee nakai lɛ, obaahere bo diɛŋtsɛ kɛ mɛi ni boɔ bo toi lɛ fɛɛ yiwala.”—1 Tim. 4:16.