Ná Hesai Pii yɛ Shiɛmɔ Nitsumɔ lɛ Mli—Tsɔsemɔ Mɛi Hei

Nɔ Hewɔ ni Ehe Hiaa: Esa akɛ mɛi fɛɛ ni batsɔmɔɔ Yesu kaselɔi lɛ akase bɔ ni amɛbaafee amɛye “nii fiaa” ni efã lɛ nɔ, ni nɔ ni fata enɛ he ji, anɔkwale lɛ ni amɛbaatsɔɔ mɛi krokomɛi lɛ. (Mat. 28:19, 20) Mɛi hei nɛɛ ateŋ mɛi babaoo kɛ amɛhe ewo Teokrase Sɔɔmɔ Skul lɛ mli momo, ni ekolɛ amɛbɔi amɛwekumɛi loo amɛnanemɛi odaseyeli momo tsɛbelɛ amɛjeee shiɛlɔi. Shi be ni amɛnuɔ nibii ni amɛkaseɔ lɛ ashishi jogbaŋŋ, ní amɛnáa amɛleɔ akɛ Yehowa miisumɔ ni mɛi fɛɛ anu sane kpakpa lɛ, ekolɛ amɛbaabi ni ahã amɛkɛ amɛhe awo shiɛmɔ nitsumɔ lɛ mli. (Rom. 10:13, 14) Kɛ́ akpɛlɛ mɛi hei lɛ anɔ akɛ shiɛlɔi ni abaptisiko amɛ lɛ, ehe baahia ni atsɔse amɛ jogbaŋŋ koni amɛná ekãa kɛtsu amɛhiɛ ni amɛtee yɛ hemɔkɛyeli lɛ mli nɛɛ he nii.—Luka 6:40.

Bɔ ni Obaafee lɛ Ohã:

Ye obua shiɛlɔ hee lɛ koni ená woji kɛ nibii ni ekɛbaatsu nii yɛ shiɛmɔ nitsumɔ lɛ mli kɛ nɔ ni ekɛbaatsɔɔ mɛi nii. Tsɔɔmɔ lɛ woji kɛ nibii ni okɛwoɔ oshiɛmɔyaa baagi lɛ mli, kɛ nɔ ni okɛ woji kɛ nibii ni okɛyaa shiɛmɔ lɛ ateŋ eko fɛɛ eko tsuɔ.
Nyɛhalaa shiɛmɔ wiemɔ ko kɛjɛa Wɔ Maŋtsɛyeli Sɔɔmɔ lɛ mli, ní nyɛka bɔ ni nyɛbaafee nyɛkɛtsu nii yɛ shiɛmɔ nitsumɔ lɛ mli lɛ nyɛkwɛ. Wo shiɛlɔ hee lɛ hewalɛ ni ekɛ shiɛmɔ wiemɔ lɛ awo lɛ diɛŋtsɛ ewiemɔ mli. Nyɛhalaa shihilɛi ni atsɔɔ yɛ Sɔɔmɔ Skul wolo lɛ baafa 82 lɛ mli lɛ ateŋ nɔ ni nyɛkɛ fɔɔ kpee yɛ nyɛshikpɔŋkuku lɛ mli, ni nyɛfea nyɛkwɛa shii abɔ. Tsɔɔmɔ lɛ nɔ hewɔ ni ehe miihia ni etadewoo kɛ ehesaamɔ afee nɔ ni yɔɔ hiŋmɛi nɔ.—2 Kor. 6:3, 4.
Ye obua lɛ fiofio ni eya ehiɛ. Okɛ shikpɔŋkuku he kaadi lɛ eko atsɔɔ shiɛlɔ hee lɛ, ni otsɔɔ lɛ bɔ ni akɛ house-to-house wolo lɛ tsuɔ nii ahãa. Tsɔɔmɔ lɛ bɔ ni aŋmalaa mɛi ni ená wiemɔ lɛ he miishɛɛ lɛ ahe saji awoɔ nɔ. Tsɔɔmɔ lɛ bɔ ni akɛ jw.org lɛ kɛ Good News for People of All Nations wolo bibioo lɛ tsuɔ nii ahãa yɛ shiɛmɔ nitsumɔ lɛ mli. Ye obua lɛ ni eku esɛɛ eya mɛi ni jie miishɛɛ kpo yɛ wiemɔ lɛ he lɛ aŋɔɔ.—1 Kor. 3:6.
Too otsui ohã lɛ, ni ojie oyi. (Abɛi 25:11) Feemɔ nɔkwɛmɔnɔ kpakpa. Ekãa ni okɛshiɛɔ kɛ miishɛɛ kpo ni ojieɔ yɛ ehe lɛ baaná enɔ hewalɛ afii babaoo.

Kaa Enɛ Okwɛ yɛ Nyɔɔŋ nɛɛ Mli:

Kɛ́ okɛ mɔ ko ni ebatsɔ shiɛlɔ miikase Biblia lɛ, hã efata ohe yɛ shĩa fɛɛ shĩa shiɛmɔ nitsumɔ lɛ mli, ni ohã efata ohe hu kɛ́ oyaafee sɛɛkuukɛsaramɔ loo okɛ mɔ ko yaakase Biblia lɛ. Kɛ́ obɛ shiɛlɔ hee ko ni okɛ lɛ kaseɔ Biblia lɛ, fɔ̃ɔ shiɛlɔ ko ni bɛ niiashikpamɔ tsɔ lɛ nine koni ebafata ohe kɛya shiɛmɔ.