“Nɛkɛ Wiemɔi Nɛɛ . . . Akã Otsui Nɔ”

Fɔlɔi tamɔ tookwɛlɔi. Esa akɛ amɛkwɛ amɛbii lɛ jogbaŋŋ, ejaakɛ amɛbaanyɛ amɛje amɛŋɛlɛ nɔ ni no baahã amɛyaje oshara mli. (Abɛi 27:23) Te fɔlɔi aaafee tɛŋŋ amɛtsu amɛnitsumɔ nɛɛ he nii lɛ? Esa akɛ daa gbi lɛ amɛná be ni amɛkɛ amɛbii lɛ agba sane koni amɛle nɔ ni amɛjwɛŋɔ kɛ nɔ ni kã amɛtsui nɔ lɛ jogbaŋŋ. (Abɛi 20:5) Agbɛnɛ hu, esa akɛ fɔlɔi kɛ nibii ni la nyɛɛɛ ashã atswa amɛbii lɛ ahemɔkɛyeli lɛ ama shi. (1 Kor. 3:10-15) Vidio ni yitso ji, “Nɛkɛ Wiemɔi Nɛɛ . . . Akã Otsui Nɔ” lɛ maa bɔ ni ehe hiaa akɛ afee weku jamɔ daa lɛ nɔ mi. Nyɛfea ekome akɛ weku kɛkwɛa vidio nɛɛ, koni no sɛɛ lɛ nyɛsusua sanebimɔi ni nyiɛ sɛɛ nɛɛ ahe.

(1) Mɛni hã Nyɛminuu Roman weku lɛ mumɔŋ shidaamɔ fite lɛ? (2) Mɛni hewɔ be ni Nyɛminuu Roman ka klɛŋklɛŋ kwraa akɛ ebaafee weku jamɔ lɛ, eyeee omanye lɛ? (3) Mɛɛ gbɛtsɔɔmɔ Ŋmalɛ lɛ kɛhãa ni baanyɛ ahã mɔ ko aye omanye yɛ bii atsɔsemɔ mli? (5 Mose 6:6, 7) (4) Mɛni baanyɛ ahã weku lɛ mli bii lɛ kɛ amɛhe afɔ sane gbaa? (5) Mɛni bii kpaa gbɛ akɛ amɛfɔlɔi kɛbaashã afɔle? (6) Mɛɛ gbɛ nɔ Nyɛminuu Barrow kɛ Nyɛmiyoo Barrow ye amɛbua Nyɛminuu Roman weku lɛ? (Abɛi 27:17) (7) Mɛni esa akɛ weku yitso ko atsɔ hiɛ afee koni ehã weku jamɔ lɛ aya nɔ jogbaŋŋ? (8) Mɛni Nyɛminuu Roman fee kɛjaje nibii yɛ eweku lɛ mli? (9) Mɛni hewɔ ehi akɛ afee weku jamɔ daa? (Efe. 6:4) (10) Mɛni ji ŋaawoi komɛi ni sa ni abaanyɛ akɛtsu nii kɛ́ aafee weku jamɔ? (11) Mɛɛ gbɛ nɔ Nyɛminuu Roman fee shiŋŋ, shi yɛ nakai beiaŋ nɔŋŋ lɛ eto etsui shi be ni eyeɔ ebuaa Marcus koni ena nɔ hewɔ ni esa akɛ efee nɔ ni ja lɛ? (Yer. 17:9) (12) Mɛɛ gbɛ nɔ Nyɛminuu Roman kɛ Nyɛmiyoo Roman tsɔ amɛkɛ Rebecca susu nii ahe koni eye ebua lɛ ni ekpɛ yiŋ ni ja yɛ ekɛ Justin naanyobɔɔ lɛ he? (Mar. 12:30; 2 Tim. 2:22) (13) Mɛɛ gbɛ nɔ Nyɛminuu Roman kɛ Nyɛmiyoo Roman tsɔ amɛjie hemɔkɛyeli kpo be ni amɛfeɔ tsakemɔi yɛ amɛshihilɛ mli lɛ? (Mat. 6:33) (14) Mɛɛ gbɛ nɔ vidio nɛɛ hãa wɔnaa nɔ hewɔ ni ehe hiaa ni weku yitsei ahã amɛweku lɛ amɛmumɔŋ hiamɔ nii lɛ? (1 Tim. 5:8) (15) Akɛ weku yitso lɛ, mɛni otswa ofai shi akɛ obaafee?

WEKU YITSEI, NYƐKADIA ENƐ: Afee nɛkɛ ŋmɛnɛŋmɛnɛ beiaŋ drama nɛɛ yɛ kpokpaa wulu nɔ kpee ni afee yɛ 2011 lɛ shishi. Yɛ nakai kpee lɛ shishi lɛ, ani oyɔse nɔ ko ni esa akɛ ojaje yɛ bɔ ni ofeɔ weku jamɔ ohãa lɛ mli? Ni amrɔ nɛɛ hu? Kɛ́ ehe miihia ni ofee tsakemɔi komɛi lolo lɛ, ofainɛ sɔlemɔ yɛ he ni ofee nakai tsakemɔi lɛ koni eye ebua oweku lɛ kɛya naanɔ.​—Efe. 5:15-17.