Ná Hesai Pii Yɛ Shiɛmɔ Nitsumɔ Lɛ Mli​—Bɔ Ni Ooofee Oye Mɔ Ko Ni Gbeleee Eshinaa Odase

NƆ HEWƆ NI EHE HIAA: Akɛni efɔŋfeemɔ efa hewɔ lɛ, mɛi pii sheɔ gbeyei akɛ amɛbaagbele amɛshinai ni amɛkɛ gbɔi awie. Yɛ maŋtiasei wuji komɛi amli lɛ, mɛi fioo komɛi yɛ vidio kamerai loo intercom yɛ amɛshinai anaa. Enɛ hãa amɛnyɛɔ amɛnaa gbɔi ni amɛkɛ amɛ wieɔ ni amɛgbeleee shinaa lɛ. Ekolɛ, wɔtsui baafã akɛ wɔbaashiɛ wɔtsɔɔ mɔ ko ni hɔ etsu mli ni miina wɔ, shi wɔ lɛ, wɔnaaa lɛ. Otii fioo ni nyiɛ sɛɛ nɛɛ baawa wɔ ni wɔnyɛ wɔye odase kɛ ekãa wɔtsɔɔ mɛi ni gbeleee amɛshinai ni amɛkɛ wɔ awie lɛ.

BƆ NI OBAAFEE LƐ OHÃ:

• Ná jwɛŋmɔ ni ja. Shiatsɛmɛi ni gbeleee amɛshinai lɛ ateŋ mɛi pii baasumɔ ni amɛkɛ wɔ agba sane

• Ná ole akɛ, dani wɔbaayatswa shinaa lɛ, ekolɛ shiatsɛ lɛ miikwɛ wɔ loo eebo nɔ ni wɔwieɔ lɛ toi

• Kɛ́ shiatsɛ lɛ here bo nɔ lɛ, okɛ lɛ awie oookɛɛ odamɔ ehiɛ diɛŋtsɛ okɛ lɛ miiwie. Tse ohiɛ, ni ofee onii tamɔ bɔ ni obaafee kɛ́ odamɔ mɔ ko hiɛ lɛ. Wiemɔ nɔ ni oto akɛ obaawie kɛji ebadamɔ ohiɛ lɛ nɔŋŋ. Kɛ́ kamera yɛ agbó lɛ loo shinaa he lɛ, kaabɛŋkɛ lɛ tsɔ

• Kɛ́ nyɛgba sane lɛ nyɛgbe naa lɛ, hã ehi ojwɛŋmɔŋ akɛ, ekolɛ, shiatsɛ lɛ miikwɛ nyɛ loo eebo nyɛ toi lolo. Kwɛmɔ jogbaŋŋ yɛ sane ni okɛ mɔ ni okɛnyiɛ shiɛmɔ nɔ lɛ baagba be ni nyɛdamɔ shinaa lɛ naa lolo lɛ he