Oblahii Kɛ Oblayei—Nyɛyaa Nyɛhiɛ Lolo Yɛ Nyɛbaptisimɔ Lɛ Sɛɛ

1. Mɛɛ nibii kpakpai komɛi oblahii kɛ oblayei babaoo enyɛ efee?

DAA afi lɛ, abaptisiɔ oblahii kɛ oblayei babaoo. Kɛ́ oblanyo loo oblayoo ji bo lɛ, ani abaptisi bo? Kɛ́ nakai lɛ, ohã onyɛmimɛi Kristofoi lɛ ená miishɛɛ waa, ni Yehowa hu ená miishɛɛ! (Abɛi 27:11) Bo lɛ, susumɔ nibii kpakpai komɛi ni onyɛ ofee lɛ ahe okwɛ. Akɛ nɔkwɛmɔnɔ lɛ, okase Biblia lɛ jogbaŋŋ. Ekolɛ, ofee enɛ afii abɔ po. Nibii ni okase lɛ hã ohe oye akɛ Biblia lɛ ji Nyɔŋmɔ Wiemɔ. Nɔ ni fe fɛɛ lɛ, ehã obale Yehowa, mɔ ni ŋma Biblia lɛ, ni obasumɔ lɛ. Obasumɔ lɛ aahu akɛ, ojɔɔ ohe nɔ ohã lɛ ni ohã abaptisi bo. Yiŋ ni okpɛ lɛ hi waa!

2. Mɛni he wɔbaasusu yɛ nikasemɔ nɛɛ mli?

² Akɛ oblanyo loo oblayoo lɛ, ŋwanejee ko bɛ he akɛ dani abaabaptisi bo lɛ okɛ shihilɛi ni hã ebawa kɛhã bo akɛ obaaye Yehowa anɔkwa lɛ kpe. Shi be ni odaa lɛ, okɛ kai krokomɛi hu baakpe. Satan baabɔ mɔdɛŋ ehã suɔmɔ ni oyɔɔ kɛhã Yehowa lɛ mli agbɔjɔ ni okpa Yehowa sɔɔmɔ. (Efe. 4:14) Shi esaaa akɛ ohãa ebaa lɛ nakai. Mɛni baaye abua bo ni oya nɔ oye Yehowa anɔkwa ni ohi shi yɛ ohenɔjɔɔmɔ lɛ naa? Esa akɛ ‘oya ohiɛ,’ ni tsɔɔ akɛ, owaje okɛ Yehowa teŋ wekukpaa lɛ. (Heb. 6:1) Shi te obaafee tɛŋŋ ofee nakai? Nikasemɔ nɛɛ baahã ona.

TE OBAAFEE TƐŊŊ OYA OHIƐ YƐ YEHOWA SƆƆMƆ LƐ MLI?

3. Mɛni akpaa gbɛ akɛ Kristofoi fɛɛ baafee yɛ amɛbaptisimɔ sɛɛ?

³ Esa akɛ wɔteŋ mɔ fɛɛ mɔ ni abaptisi lɛ lɛ abo ŋaa ni bɔfo Paulo wo Kristofoi ni yɔɔ Efeso lɛ toi. Ewo amɛ hewalɛ ni amɛtsɔmɔ Kristofoi ni ‘edara.’ (Efe. 4:13) Yɛ gbɛ ko nɔ lɛ, Paulo miikɛɛ amɛ akɛ amɛya amɛhiɛ. Paulo kɛ da ni mɔ ko daa akɛ Kristofonyo lɛ to bɔ ni gbekɛ daa ehãa lɛ he koni no aye abua wɔ ni wɔnu nɔ ni etsɔɔ lɛ shishi. Kɛ́ nuu ko kɛ eŋa fɔ bi ŋmɔŋ lɛ, amɛnáa miishɛɛ waa ni amɛsumɔɔ gbekɛ lɛ hu. Shi be ni be shwieɔ mli lɛ, amɛmiikpa gbɛ akɛ gbekɛ lɛ baada ni ‘eshɛrɛ gbekɛbii asui lɛ eshwie.’ (1 Kor. 13:11) Nakai nɔŋŋ eji yɛ Kristofoi hu agbɛfaŋ. Esa akɛ wɔya wɔhiɛ yɛ wɔbaptisimɔ lɛ sɛɛ. Nyɛhãa wɔkwɛa nibii komɛi ni baaye abua wɔ ni wɔnyɛ wɔfee nakai.

4. Mɛɛ su baaye abua bo ni oya ohiɛ yɛ Yehowa sɔɔmɔ lɛ mli? Mɛni hewɔ okɛɔ nakai? (Filipibii 1:9)

⁴ Hã suɔmɔ ni oyɔɔ kɛhã Yehowa lɛ mli awa. Osumɔɔ Yehowa waa, shi esa akɛ ohã suɔmɔ ni oyɔɔ kɛhã lɛ lɛ mli awa. Te obaafee tɛŋŋ ofee nakai? Bɔfo Paulo tsɔɔ wɔ gbɛ kome ni wɔbaanyɛ wɔtsɔ nɔ wɔfee nakai yɛ Filipibii 1:9 lɛ mli. (Kanemɔ.) Paulo sɔle ni suɔmɔ ni Filipibii lɛ yɔɔ lɛ “aya nɔ afa ni eteke nɔ fe tsutsu lɛ.” Enɛ hãa wɔnaa akɛ, nibii komɛi yɛ ni wɔbaanyɛ wɔfee koni suɔmɔ ni wɔyɔɔ kɛhã Yehowa lɛ mli awa. Eko ji, ni wɔbaaná “nilee krɔŋŋ kɛ sanesɛɛkɔmɔ ni hi kɛwula shi.” Kɛ́ wɔbale Yehowa jogbaŋŋ lɛ, suɔmɔ ni wɔyɔɔ kɛhã lɛ lɛ mli baawa, ni wɔbaaná esui lɛ kɛ bɔ ni efeɔ enii ehãa lɛ he miishɛɛ waa. Agbɛnɛ hu, wɔbaasumɔ waa ni wɔfee nibii ni sa ehiɛ, ni wɔsumɔŋ ni wɔfee nɔ ko ni baadɔ lɛ. Wɔbaabɔ mɔdɛŋ wɔyɔse nibii ni esumɔɔ kɛ bɔ ni wɔbaafee wɔfee nakai nibii lɛ.

5-6. Mɛni baahã suɔmɔ ni wɔyɔɔ kɛhã Yehowa lɛ mli awa? Mɛni hewɔ okɛɔ nakai?

⁵ Nɔ kome ni baaye abua wɔ ni wɔsumɔ Yehowa waa ji, ni wɔbaale e-Bi Yesu jogbaŋŋ ejaakɛ ejie e-Tsɛ lɛ sui akpo jogbaŋŋ. (Heb. 1:3) Gbɛ ni hi fe fɛɛ ni wɔbaanyɛ wɔtsɔ nɔ wɔle Yesu ji, ni wɔbaakase Sanekpakpai ejwɛ lɛ. Ani okaneɔ Biblia lɛ daa gbi? Kɛ́ ofeee nakai lɛ, obaanyɛ oto gbɛjianɔ ni okɛ Sanekpakpai ejwɛ lɛ akanemɔ aje shishi. Kɛ́ ookane woji nɛɛ, kadimɔ sui ni Yesu jie lɛ kpo lɛ jogbaŋŋ. Mɛi nyɛɔ amɛbɛŋkɛɔ lɛ. Akɛ nɔkwɛmɔnɔ lɛ, gbekɛbii komɛi tee eŋɔɔ ni eloo amɛ atuu. (Mar. 10:13-16) Emli hi ni esumɔɔ mɛi waa. No hewɔ lɛ, ewaaa kɛhãaa esɛɛnyiɛlɔi lɛ akɛ amɛbaagba lɛ amɛtsuiŋ saji. (Mat. 16:22) Enɛ hãa wɔnaa akɛ, Yesu kase eŋwɛi Tsɛ lɛ, ejaakɛ Yehowa hu lɛ, anyɛɔ abɛŋkɛɔ lɛ. Wɔbaanyɛ wɔsɔle wɔhã Yehowa be fɛɛ be ni wɔgba lɛ nibii ni gbaa wɔnaa fɛɛ. Wɔle akɛ ewieŋ wɔhiɛ nyanyaanya. Esumɔɔ wɔ ni ebaakwɛ wɔ.​—1 Pet. 5:7.

⁶ Yesu nu he ehã mɛi waa. Mateo wie nɔ ko ni hãa wɔnaa nakai. Ewie akɛ: “Be ni ena mɛi babaoo lɛ, amɛnii fee lɛ mɔbɔ, ejaakɛ afee amɛ niseniianii, ni akpoo amɛ tamɔ gwantɛŋi ni bɛ kwɛlɔ.” (Mat. 9:36) Shi ani nakai nɔŋŋ Yehowa hu nuɔ he ehãa mɛi? Yesu wie akɛ: “Mi-Tsɛ ni yɔɔ ŋwɛi lɛ sumɔɔɔ akɛ bibii nɛɛ ateŋ mɔ kome po hiɛ kpãtãa.” (Mat. 18:14) Wiemɔi nɛɛ taa mɔ tsuiŋ waa, ejaakɛ ehãa wɔnaa akɛ Yehowa sumɔɔ wɔ waa diɛŋtsɛ. Kɛ́ wɔle Yesu jogbaŋŋ lɛ, suɔmɔ ni wɔyɔɔ kɛhã Yehowa lɛ mli baawa.

7. Kɛ́ okɛ Kristofoi ni bɔɔ mɔdɛŋ yɛ Yehowa asafo lɛ mli lɛ bɔ lɛ, mɛɛ gbɛ nɔ ebaaye ebua bo?

⁷ Nɔ kroko ni baaye abua bo ni osumɔ Yehowa waa ni oya ohiɛ ji, ni okɛ Kristofoi ni bɔɔ mɔdɛŋ yɛ asafo lɛ mli lɛ baabɔ ni ole amɛ jogbaŋŋ. Kɛ́ okɛ amɛ bɔ lɛ, obaana akɛ amɛyɛ miishɛɛ waa ni amɛshwako amɛhe akɛ amɛkpɛ amɛyiŋ akɛ amɛbaasɔmɔ Yehowa. Bi amɛ ni amɛgba bo niiashikpamɔi ni amɛná yɛ Yehowa sɔɔmɔ lɛ mli lɛ ekomɛi. Kɛ́ oyaakpɛ yiŋ ko ni he hiaa waa lɛ, bi amɛdɛŋ ŋaawoo. Kaimɔ akɛ, Biblia lɛ kɛɛ “kɛ́ ŋaawolɔi pii yɛ lɛ ayeɔ omanye.”​—Abɛi 11:14.

8. Kɛ́ oyiŋ miifee bo kɔshikɔshi yɛ nibii ni Biblia lɛ tsɔɔ lɛ ekomɛi ahe lɛ, mɛni obaanyɛ ofee?

⁸ Kaahã oyiŋ fee bo kɔshikɔshi. Tamɔ awie yɛ kuku 2 lɛ, Satan baabɔ mɔdɛŋ efee nɔ fɛɛ nɔ ni ebaanyɛ koni ehã suɔmɔ ni oyɔɔ kɛhã Yehowa lɛ he ajɔ. Gbɛ kome ni ebaanyɛ etsɔ nɔ efee nakai ji, ni ebaahã oyiŋ afee bo kɔshikɔshi yɛ nibii ni okase yɛ Biblia lɛ mli lɛ ekomɛi ahe. Akɛ nɔkwɛmɔnɔ lɛ, ekolɛ mɛi komɛi baakɛɛ bo akɛ jeee Nyɔŋmɔ ni bɔ nibii fɛɛ, shi moŋ nibii nɛɛ fɛɛ ba shihilɛ mli kɛkɛ. Ekolɛ be ni odako lɛ, osusuko sane nɛɛ he pɛŋ, shi bianɛ lɛ, aatsɔɔ bo enɛ yɛ skul. Kɛ́ obo nɔ ni otsɔɔlɔi lɛ tsɔɔ yɛ enɛ he lɛ toi lɛ, efeɔ bo tamɔ nɔ ni nilee yɛ mli. Ekolɛ amɛ diɛŋtsɛ lɛ, amɛheko be kɛtaoko nii amli ni amɛbaakwɛ akɛ ani mɔ ko ni bɔ nibii fɛɛ loo nibii ba shihilɛ mli kɛkɛ. Kaimɔ nɔ ni Abɛi 18:17 lɛ kɛɛ lɛ. Ekɛɛ: “Mɔ ni jajeɔ esane klɛŋklɛŋ lɛ, efeɔ tamɔ nɔ ni esane ja, shi kɛ́ mɔ kroko lɛ ba lɛ, ebabibiɔ lɛ saji ni akɛnaa anɔkwale lɛ.” No hewɔ lɛ, nɔ najiaŋ ni obaahe nibii ni atsɔɔ bo yɛ skul lɛ oye kɛkɛ lɛ, kasemɔ Nyɔŋmɔ Wiemɔ lɛ ni ona anɔkwale lɛ. Agbɛnɛ hu, taomɔ nii amli kɛjɛ wɔwoji lɛ amli. Okɛ nyɛmimɛi ni be ko ni eho lɛ amɛheee amɛyeee akɛ Nyɔŋmɔ ni bɔ nibii fɛɛ lɛ agba sane.b Bi amɛ ni amɛgba bo nɔ ni hã amɛhe amɛye akɛ Nyɔŋmɔ ni bɔ nibii fɛɛ ni akɛ nibii baaa kɛkɛ. Kɛ́ ofee nakai lɛ, ebaaye ebua bo ni ona akɛ Nyɔŋmɔ ni bɔ nibii fɛɛ.

9. Mɛni okaseɔ yɛ Melissa niiashikpamɔ lɛ mli?

⁹ Nyɛmi yoo ko ni atsɛɔ lɛ Melissa lɛ tao nii amli koni ekwɛ akɛ, ani mɔ ko ni bɔ nibii fɛɛ loo nibii ba shihilɛ mli kɛkɛ, ni enɛ ye ebua lɛ waa.c Ewie akɛ: “Kɛ́ otee skul ni aatsɔɔ bo akɛ nibii fɛɛ ba shihilɛ mli kɛkɛ ni jeee Nyɔŋmɔ ni bɔ lɛ, kɛ́ okwɛɛɛ ni ahi lɛ obaahe oye. No mli lɛ misumɔɔɔ ni mitaoɔ nii amli yɛ sane nɛɛ he, ejaakɛ miyasusu akɛ kɛ́ mitao nii amli lɛ mayahe maye akɛ nɔ ni atsɔɔ mi yɛ skul lɛ moŋ ji anɔkwale. Shi mina akɛ, dani wɔbaahe nɔ ko wɔye lɛ, Yehowa miisumɔ ni wɔná nɔdaamɔnɔ dani wɔfee nakai. No hewɔ lɛ, mitao nii amli. Mikane wolo ni ji, Is There a Creator Who Cares About You? kɛ broshuɔi ni ji, Was Life Created? kɛ The Origin of Life​—Five Questions Worth Asking. Nɔ ni mikase yɛ woji nɛɛ amli lɛ ye ebua mi waa. Mile nɛkɛ kulɛ, mifee niiamlitaomɔ lɛ mra!”

10-11. Mɛni kɛ́ ofee lɛ, ebaaye ebua bo ni okɛ ohe akayawo jeŋba sha mli? (1 Tesalonikabii 4:3, 4)

¹⁰ Okɛ ohe akawo jeŋba sha mli. Kɛ́ oná kɛjɛ afii 13 kɛmiiya lɛ, bei komɛi lɛ, obaanu he waa akɛ oná bɔlɛ, ni mɛi komɛi po baawo oyiŋ ni ofee nakai, ni nakai Satan hu miisumɔ ni ofee. Mɛni baaye abua bo ni okɛ ohe akawo jeŋba sha mli? (Kanemɔ 1 Tesalonikabii 4:3, 4.) Sɔlemɔ ohã Yehowa ni ogba lɛ bɔ ni onuɔ he ohãa. Kɛɛmɔ lɛ nɔ fɛɛ nɔ ni obi lɛ ni ewaje bo. (Mat. 6:13) Kaimɔ be fɛɛ be akɛ Yehowa miisumɔ ni eye ebua bo, no hewɔ lɛ, ebuŋ bo akɛ gbekɛ gbonyo. (Lala 103:13, 14) Kɛ́ okane Biblia lɛ, no hu baanyɛ aye abua bo waa. No mli lɛ, ewa kɛhã Melissa ni wɔwie ehe kɛtsɔ hiɛ lɛ akɛ ebaajie susumɔi gbohii kɛje ejwɛŋmɔ mli. Ewie akɛ: “Biblia lɛ ni mikaneɔ daa lɛ ye ebua mi ni mijie susumɔi gbohii kɛje mijwɛŋmɔ mli. Ehã mina akɛ Yehowa nii ji mi ni lɛ esa akɛ majá.”​—Lala 119:9.

¹¹ Kaaka akɛ bo diɛŋtsɛ obaatsu onaagba lɛ he nii. Okɛ ofɔlɔi agba he sane. Bei pii lɛ, nibii ni tamɔ nɛkɛ lɛ ahe wiemɔ wa shi ehe miihia ni ofee nakai. Melissa wie akɛ: “Misɔle mihã Yehowa ni ehã mi ekaã, ni no sɛɛ lɛ, mikɛ mipapa gba minaagba lɛ he sane. Enɛ hã mitsui nyɔ mimli waa, ni mile akɛ eŋɔɔ Yehowa naa akɛ mifee nakai.”

12. Mɛni baaye abua bo ni okpɛ yiŋ kpakpai?

¹² Hã Biblia mli shishitoo mlai akudɔ bo. Be ni odaa lɛ, ofɔlɔi baaŋmɛ bo gbɛ ni bo diɛŋtsɛ okpɛ oyiŋ yɛ nibii pii ahe. Shi hã ehi ojwɛŋmɔ mli akɛ, nibii pii yɛ ni oleee. No hewɔ lɛ, mɛni baaye abua bo ni okakpɛ yiŋ gbonyo ni baafite okɛ Yehowa teŋ? (Abɛi 22:3) Nyɛmi yoo ko ni atsɛɔ lɛ Kari lɛ tsɔɔ nɔ ko ni ye ebua lɛ koni ekpɛ yiŋ kpakpai. Ebayɔse akɛ Kristofonyo kpakpa lɛ, ehe ehiaaa ni awoɔ lɛ mla yɛ nɔ fɛɛ nɔ he. Ewie akɛ: “Yɛ nɔ najiaŋ ni matao mla yɛ saji fɛɛ ahe lɛ, ehe bahia moŋ ni male Yehowa Nyɔŋmɔ susumɔi yɛ saji ahe ni mahi shi yɛ naa.” Be ni okaneɔ Biblia lɛ, bi ohe akɛ: ‘Mɛni ŋmalɛ nɛɛ hãa mileɔ yɛ bɔ ni Yehowa susuɔ nii ahe ehãa lɛ he? Ani shishitoo mlai yɛ mli ni baanyɛ aye abua mi ni mafee nɔ ni ja? Kɛ́ mikɛ shishitoo mlai nɛɛ tsu nii lɛ, mɛɛ gbɛ nɔ maná he sɛɛ?’ (Lala 19:7; Yes. 48:17, 18) Kɛ́ okane Biblia lɛ ni ojwɛŋ shishitoo mlai ni yɔɔ mli lɛ anɔ lɛ, ewaŋ kɛhãŋ bo akɛ obaakpɛ yiŋ kpakpai ni baasa Yehowa hiɛ. Be ni oyaa nɔ okaseɔ nii lɛ, obayɔseɔ akɛ ehe ehiaaa ni awoɔ bo mla yɛ sane fɛɛ sane he ejaakɛ obanaa Yehowa susumɔ yɛ saji ahe.

13. Mɛɛ gbɛ nɔ nanemɛi kpakpai baanyɛ aye abua bo? (Abɛi 13:20)

¹³ Okɛ mɛi ni sumɔɔ Yehowa abɔ. Tamɔ bɔ ni awie yɛ kuku 7 lɛ mli lɛ, kɛ́ okɛ mɛi ni sumɔɔ Yehowa bɔ lɛ, amɛbaaye amɛbua bo ni oya ohiɛ. (Kanemɔ Abɛi 13:20.) Nyɛmi yoo ko ni atsɛɔ lɛ Sara lɛ yɔse akɛ ebɛ miishɛɛ yɛ Yehowa sɔɔmɔ lɛ mli tamɔ tsutsu lɛ. Shi nɔ ko ba ni ye ebua lɛ ni ená nakai miishɛɛ lɛ ekoŋŋ. Ewie akɛ: “Miná nanemɛi kpakpai komɛi yɛ nakai be lɛ mli. Nyɛmi yoo ko ni ji mitipɛŋfonyo lɛ kɛ mi fee ekome kɛkase Buu-Mɔɔ lɛ daa otsi. Minaanyo kroko ye ebua mi ni mibɔi saji ahetoo hãmɔ yɛ asafoŋ kpeei ashishi. Minanemɛi lɛ ye amɛbua mi koni mikɛ aŋkro nikasemɔ kɛ sɔlemɔ akashwɛ kwraa. Enɛɛmɛi ni mifee lɛ hã wekukpaa ni yɔɔ mi kɛ Yehowa teŋ lɛ mli bawa ni ehã miná miishɛɛ ekoŋŋ.”

14. Te Julien fee tɛŋŋ ebaná nanemɛi kpakpai?

¹⁴ Te obaafee tɛŋŋ oná nanemɛi kpakpai ni baanyɛ aye abua bo? Nyɛmi nuu ko ni atsɛɔ lɛ Julien ni amrɔ nɛɛ eesɔmɔ akɛ asafoŋ onukpa lɛ wie akɛ: “Be ni miji oblanyo lɛ, nyɛmimɛi ni mikɛtee shiɛmɔ lɛ ateŋ mɛi pii batsɔmɔ nanemɛi kpakpai kɛhã mi. Nanemɛi nɛɛ ni mibaná lɛ yɛ ekãa waa ni amɛhã mibanya shiɛmɔ nitsumɔ lɛ he waa. Enɛ hewɔ lɛ, mikɛma mihiɛ akɛ matsɔ daa gbɛgbalɔ. Mina hu akɛ, nɔ hewɔ ni mináaa nanemɛi kpakpai pii lɛ ji, no mli lɛ, mitipɛŋfoi pɛ mikɛbɔɔ naanyo. Sɛɛ mli be ni mibɔi sɔɔmɔ yɛ Betel lɛ, mibaná nanemɛi kpakpai pii yɛ jɛmɛ hu. Minanemɛi nɛɛ ye amɛbua mi ni mina nibii ni manyɛ mikɛjie mihiɛtsɛrɛ ni no hã mibɛŋkɛ Yehowa kpaakpa.”

15. Mɛɛ kɔkɔ Paulo bɔ Timoteo yɛ naanyobɔɔ he? (2 Timoteo 2:20-22)

¹⁵ Mɛni obaanyɛ ofee kɛ́ ona akɛ nyɛmi ko ni okɛbɔɔ yɛ asafo lɛ mli lɛ baanyɛ afite okɛ Yehowa teŋ wekukpaa lɛ? Paulo na akɛ, Kristofoi komɛi ni hi shi yɛ ebeiaŋ lɛ baaa amɛjeŋ jogbaŋŋ. No hewɔ lɛ, ebɔ Timoteo kɔkɔ ni etsi ehe kɛje amɛhe. (Kanemɔ 2 Timoteo 2:20-22.) Naanyobɔɔ ni kã wɔ kɛ Yehowa teŋ lɛ jara wa waa diɛŋtsɛ, ni wɔgbo he deŋme. No hewɔ lɛ, esaaa akɛ wɔkɛ mɔ ko ni baanyɛ afite nakai naanyobɔɔ lɛ bɔɔ.​—Lala 26:4.

KƐ́ OKƐ OTII KPAKPAI MAMƆ OHIƐ LƐ, MƐƐ GBƐ NƆ EBAAYE EBUA BO NI OYA OHIƐ YƐ YEHOWA SƆƆMƆ LƐ MLI?

16. Mɛɛ otii obaanyɛ okɛmamɔ ohiɛ?

¹⁶ Okɛ otii kpakpai amamɔ ohiɛ. Okɛ otii ni baahã ohemɔkɛyeli lɛ mli awa ni otsɔ Kristofonyo kpakpa lɛ amamɔ ohiɛ. (Efe. 3:16) Akɛ nɔkwɛmɔnɔ lɛ, obaanyɛ okɛma ohiɛ akɛ ohãŋ nɔ ko afite gbɛjianɔ ni oto kɛhã Biblia lɛ kanemɔ kɛ ekasemɔ lɛ. (Lala 1:2, 3) Aloo obaanyɛ okɛma ohiɛ akɛ obaafɔ sɔlemɔ waa fe bɔ ni ofeɔ bianɛ lɛ ni osɔle kɛjɛ otsuiŋ. Agbɛnɛ hu, obaanyɛ okɛma ohiɛ akɛ okɛ obe baatsu nii jogbaŋŋ ni ohã ohiɛ ahi ohe nɔ waa yɛ nibii ni okɛjieɔ ohiɛtsɛrɛ lɛ ahe. (Efe. 5:15, 16) Kɛ́ Yehowa na akɛ oobɔ mɔdɛŋ waa ni oya ohiɛ lɛ, ebaaná miishɛɛ.

17. Kɛ́ oye obua mɛi lɛ, mɛɛ gbɛ nɔ obaaná he sɛɛ?

¹⁷ Kɛ́ okɛfee osu akɛ obaaye obua mɛi lɛ, obaaya ohiɛ yɛ Yehowa sɔɔmɔ lɛ mli. Yesu kɛɛ: “Nɔhamɔ hãa mɔ náa miishɛɛ fe hemɔ.” (Bɔf. 20:35) Kɛ́ okɛ obe kɛ ohewalɛ ye obua mɛi lɛ, obaaná miishɛɛ waa. Akɛ nɔkwɛmɔnɔ lɛ, obaanyɛ okɛma ohiɛ akɛ obaaye obua mɛi ni edara yɛ nyɛsafo lɛ mli lɛ. Obaanyɛ oye obua amɛ ni amɛkɛ amɛfoŋ kɛ tablɛtii lɛ atsu nii jogbaŋŋ, aloo kɛ́ amɛyɛ nɔ ko feemɔ yɛ maŋ lɛ mli lɛ, obaanyɛ ohã amɛtsu bo ni oyafee ohã amɛ. Kɛ́ nyɛmi nuu ji bo lɛ, obaanyɛ okɛma ohiɛ akɛ obaaya ohiɛ ni obatsɔ asafoŋ sɔɔlɔ koni onyɛ otsu babaoo kɛye obua onyɛmimɛi Kristofoi lɛ. (Fip. 2:4) Agbɛnɛ hu, obaanyɛ ojie suɔmɔ kpo otsɔɔ mɛi ni jeee Yehowa tsuji lɛ kɛtsɔ Maŋtsɛyeli lɛ he sane kpakpa lɛ ni obaashiɛ ohã amɛ lɛ nɔ. (Mat. 9:36, 37) Ni kɛ́ oshihilɛ baaŋmɛ bo gbɛ lɛ, obaanyɛ okɛ ohe awo be fɛɛ sɔɔmɔ nitsumɔ lɛ mli.

18. Mɛɛ gbɛ nɔ be fɛɛ sɔɔmɔ nitsumɔ lɛ baanyɛ aye abua bo ni oya ohiɛ yɛ Yehowa sɔɔmɔ lɛ mli?

¹⁸ Be fɛɛ sɔɔmɔ nitsumɔ lɛ baanyɛ aye abua bo ni obɛŋkɛ Yehowa kpaakpa. Akɛ nɔkwɛmɔnɔ lɛ, kɛ́ osɔmɔ akɛ gbɛgbalɔ lɛ, ekolɛ obaaná hegbɛ oya Skul Kɛhã Maŋtsɛyeli Sane Kpakpa Jajelɔi lɛ eko, oyasɔmɔ yɛ Betel, loo oyaye obua kɛmamɔ asafo lɛ tsũi. Nyɛmi yoo gbɛgbalɔ ko ni atsɛɔ lɛ Kaitlyn ni eye afii 21 lɛ wie akɛ: “Yɛ mibaptisimɔ lɛ sɛɛ lɛ, nɔ kome ni ye ebua mi waa ni mitee mihiɛ ji, mikɛ nyɛmimɛi ni bɔɔ mɔdɛŋ yɛ asafo lɛ mli lɛ tsu nii yɛ shiɛmɔ nitsumɔ lɛ mli. Amɛnɔkwɛmɔnɔ kpakpa lɛ hã mina akɛ, esa akɛ makase Biblia lɛ waa ni maya mihiɛ yɛ bɔ ni mitsɔɔ nii mihãa lɛ mli.”

19. Kɛ́ otee ohiɛ yɛ Yehowa sɔɔmɔ lɛ mli lɛ, mɛɛ jɔɔmɔi obaaná?

¹⁹ Kɛ́ otee ohiɛ yɛ Yehowa sɔɔmɔ lɛ mli lɛ, ebaajɔɔ bo waa. Ofiteŋ obe kɛ ohewalɛ yɛ nibii ni sɛɛnamɔ bɛ he lɛ ahe. (1 Yoh. 2:17) Agbɛnɛ hu, onáŋ naagbai ni mɛi ni kpɛɔ yiŋ gbonyo yɛ shihilɛ mli lɛ náa lɛ eko. Moŋ lɛ, nɔ fɛɛ nɔ ni ofeɔ lɛ baaye omanye ni obaaná miishɛɛ. (Abɛi 16:3) Kɛfata he lɛ, onɔkwɛmɔnɔ kpakpa lɛ baawo onyɛmimɛi Kristofoi lɛ fɛɛ hewalɛ. (1 Tim. 4:12) Nɔ ni fe fɛɛ lɛ, otoiŋ baajɔ bo ni otsui baanyɔ omli, ejaakɛ oofee nɔ ni Yehowa Nyɔŋmɔ sumɔɔ, ni okɛ lɛ teŋ wekukpaa lɛ hu mli wa.​—Abɛi 23:15, 16.