Nɔ Ko Ni Obaanyɛ Okase

Taomɔ Yehowa Sui Kɛ́ Ookane Biblia Lɛ

Kɛ́ wɔkane Biblia lɛ, nibii pii yɛ ni wɔbaanyɛ wɔkɛtao nɔ ni wɔkane lɛ mli koni wɔnu shishi jogbaŋŋ. Kɛ́ wɔtao nii amli lɛ, ebaahã wɔle nibii pii yɛ Biblia lɛ mli. Shi jeee no pɛ nɔ esa akɛ wɔkɛ wɔjwɛŋmɔ ama. Esa akɛ wɔkɛ wɔjwɛŋmɔ ama nibii ni baaye abua wɔ ni wɔle Yehowa sui lɛ jogbaŋŋ lɛ hu anɔ. Kɛ́ wɔfee nakai lɛ, no baahã wɔsumɔ lɛ waa. No hewɔ lɛ, kɛ́ wɔkane nɔ ko yɛ Biblia lɛ mli lɛ, wɔbaanyɛ wɔbi wɔhe akɛ, ‘Mɛni sane nɛɛ tsɔɔ mi yɛ Yehowa he?’

Akɛ nɔkwɛmɔnɔ lɛ, obaanyɛ okwɛ akɛ, mɛɛ gbɛ nɔ sane lɛ ni okane lɛ hãa onaa akɛ Yehowa yɛ suɔmɔ, ehiɛ kã shi, eyeɔ jalɛ sane, ni eyɛ hewalɛ. Shi Yehowa yɛ sui krokomɛi hu ni wɔbaanyɛ wɔkase he nii. Nɛgbɛ obaanyɛ ona esui lɛ ahe saji yɛ?

Kɛ́ okwɛ Niiamlitaomɔ Wolo Kɛhã Yehowa Odasefoi lɛ mli lɛ, obaana ni ato sui nɛɛ ekomɛi anaa yɛ jɛmɛ. Eyɛ saneyitso fioo ni ji, “Yehowa Sui” ni yɔɔ saneyitso ni ji, “Yehowa Nyɔŋmɔ” lɛ shishi lɛ shishi. Taomɔ su ni kɛ Biblia mli sane ni okaneɔ lɛ yɔɔ tsakpaa, ni okane woji ni atsɛ yisɛɛ yɛ nakai su lɛ he lɛ.