Hemɔ Oye Akɛ “Shikpɔŋ Lɛ Fɛɛ Kojolɔ Lɛ” Naa Mɔbɔ!

1. Mɛɛ sane ni shɛjeɔ mɔ mii Yehowa hã Abraham le?

AFII babaoo ni eho nɛ lɛ, Nyɔŋmɔ tsɔ ŋwɛibɔfo ko nɔ ekɛɛ Abraham akɛ, eyaakpãtã Sodom kɛ Gomora maji lɛ ahiɛ. Abraham heɔ Nyɔŋmɔ nɔ eyeɔ waa, shi no mli lɛ ewa kɛhã lɛ akɛ ebaanu nɔ hewɔ ni Yehowa baafee nɔ ko tamɔ nɛkɛ lɛ shishi. Ebi Yehowa akɛ: “Ani obaabɛɛ jalɔ kɛ mɔ fɔŋ fɛɛ oshwie lɛɛlɛŋ? . . . Ani shikpɔŋ lɛ fɛɛ Kojolɔ lɛ efeŋ nɔ ni ja?” Yehowa to etsui shi eye ebua enaanyo ni esumɔɔ esane waa nɛɛ ni enu sane ko ni he hiaa waa shishi, no ji, Nyɔŋmɔ kpãtãŋ jalɔi ahiɛ kɔkɔɔkɔ. Sane nɛɛ ni Yehowa hã Abraham le lɛ he yɛ sɛɛnamɔ waa, ni eshɛjeɔ wɔ fɛɛ wɔmii.—1 Mo. 18:​23-33.

2. Mɛni hewɔ wɔbaanyɛ wɔwie kɛ nɔmimaa akɛ, Yehowa kojoɔ yɛ jalɛ naa ni enaa mɔbɔ lɛ?

² Mɛni hewɔ wɔbaanyɛ wɔwie kɛ nɔmimaa akɛ, Yehowa kojoɔ yɛ jalɛ naa ni enaa mɔbɔ lɛ? Nɔ hewɔ lɛ ji, “Yehowa lɛ, enaa tsui lɛ mli.” (1 Sam. 16:7) Anɔkwa, ele “adesa fɛɛ adesa tsuiŋ.” (1 Maŋ. 8:39; 1 Kro. 28:9) Ani enɛ bɛ naakpɛɛ? Yehowa hiɛ kã shi kwraa fe wɔ, no hewɔ lɛ, jeee be fɛɛ be kɛ́ ekpɛ yiŋ ko lɛ, wɔnuɔ shishi jogbaŋŋ. Enɛ hewɔ lɛ, bɔfo Paulo wie yɛ Yehowa Nyɔŋmɔ he akɛ: “Eyiŋkpɛi lɛ, anyɛɛɛ naa ana.”—Rom. 11:33.

3-4. Bei komɛi lɛ, mɛɛ saji wɔbiɔ wɔhe? Ni mɛni he wɔbaasusu yɛ nikasemɔ nɛɛ mli? (Yohane 5:​28, 29)

³ Fɛɛ sɛɛ lɛ, bei komɛi lɛ, wɔbiɔ saji ni tamɔ nɔ ni Abraham bi lɛ nɔŋŋ. Akɛ nɔkwɛmɔnɔ lɛ, ekolɛ wɔbiɔ wɔhe akɛ: ‘Ani mɛi ni Yehowa diɛŋtsɛ kpãtã amɛhiɛ, tamɔ mɛi ni hi Sodom kɛ Gomora lɛ, baaba wala mli ekoŋŋ? Ani ebaanyɛ eba lɛ akɛ, amɛteŋ mɛi komɛi fata “mɛi ni ejaaa” ni abaatee amɛ shi lɛ ahe?’—Bɔf. 24:15.

⁴ Nyɛhãa wɔkaia wɔhe nɔ ni wɔle yɛ gbohiiashitee lɛ he. Nyɛsɛɛ nɛɛ, aye abua wɔ ni wɔnu nɔ ni atsɔɔ kɛ́ akɛɛ ‘abaatee mɛi ashi kɛya wala mli,’ kɛ nɔ ni atsɔɔ kɛ́ akɛɛ ‘abaatee mɛi ashi kɛya kojomɔ mli’ lɛ shishi jogbaŋŋ.a (Kanemɔ Yohane 5:​28, 29.) Enɛ ehã wɔná shishinumɔ hee yɛ bɔ ni Yehowa kojoɔ mɛi ehãa lɛ he, ni no ji nɔ ni wɔbaasusu he yɛ nikasemɔ nɛɛ kɛ nɔ ni nyiɛ sɛɛ lɛ mli. Yɛ nikasemɔ nɛɛ mli lɛ, wɔbaakwɛ akɛ, mɛni wɔleee yɛ Yehowa kojomɔi ni wɔle akɛ eja be fɛɛ be lɛ ahe. No sɛɛ lɛ, wɔbaakwɛ akɛ mɛni wɔle yɛ ekojomɔi lɛ ahe.

NƆ NI WƆLEEE

5. Be ko ni eho lɛ, mɛni wɔwoji lɛ wie yɛ mɛi ni Yehowa kpãtã amɛhiɛ yɛ Sodom kɛ Gomora lɛ ahe?

⁵ Be ko ni eho lɛ, wɔwoji lɛ tsɔɔ nɔ ni baa mɛi ni ejaaa ni Yehowa diɛŋtsɛ kojo amɛ lɛ anɔ. Wɔwie akɛ, ateŋ mɛi ni Yehowa diɛŋtsɛ kpãtã amɛhiɛ, tamɔ mɛi ni hi Sodom kɛ Gomora nɛkɛ lɛ shi. Shi be ni wɔsɔle ni wɔtao sane nɛɛ mli fitsofitso ekoŋŋ lɛ, wɔna akɛ wɔnyɛŋ wɔkɛɛ doo akɛ ateŋ amɛ shi. Mɛni hewɔ wɔkɛɔ nakai?

6. (a) Tsɔɔmɔ mɛi komɛi ni ejaaa ni Yehowa diɛŋtsɛ kojo amɛ ni ekpãtã amɛhiɛ. (b) Ani wɔnaa nɔ ko yɛ Biblia lɛ mli ni tsɔɔ faŋŋ akɛ Yehowa eteŋ mɛi nɛɛ ateŋ mɔ ko kwraa shi?

⁶ Bo lɛ, hã wɔsusu sane nɛɛ he wɔkwɛ. Biblia lɛ wieɔ bei srɔtoi ni Yehowa diɛŋtsɛ kojo mɛi ni ejaaa ni ekpãtã amɛhiɛ lɛ ahe. Eko ji mɛi babaoo ni aleee amɛyibɔ ni Nu Afua lɛ kpãtã amɛhiɛ lɛ, jeŋmaji kpawo ni no mli lɛ amɛyɔɔ Shiwoo Shikpɔŋ lɛ nɔ ni Yehowa hã ewebii lɛ kpãtã amɛhiɛ lɛ, kɛ Asiria asraafoi 185,000 ni Yehowa bɔfo ko kpãtã amɛhiɛ yɛ jenamɔ kome pɛ mli lɛ. (1 Mo. 7:23; 5 Mo. 7:​1-3; Yes. 37:​36, 37) Yɛ saji ni wɔwie he nɛɛ amli lɛ, ani wɔnaa nɔ ko yɛ Biblia lɛ mli ni tsɔɔ faŋŋ akɛ Yehowa ekpãtã mɛi nɛɛ fɛɛ ahiɛ kɛtee naanɔ, ni no hewɔ lɛ eteŋ amɛteŋ mɔ ko kwraa shi? Dabi. Mɛni hewɔ wɔwieɔ nakai?

7. Mɛni wɔleee yɛ mɛi ni hiɛ kpãtã yɛ Nu Afua lɛ mli loo Kanaanbii ni yɔɔ Shiwoo Shikpɔŋ lɛ nɔ ni Israelbii lɛ kpãtã amɛhiɛ lɛ ahe? (Kwɛmɔ mfoniri lɛ.)

⁷ Eyɛ mli akɛ Yehowa kpãtã mɛi nɛɛ fɛɛ ahiɛ moŋ, shi wɔleee bɔ ni ena amɛteŋ mɔ fɛɛ mɔ ehã. Agbɛnɛ hu, wɔleee kɛji amɛná hegbɛ amɛkase Yehowa he nii koni amɛfee tsakemɔi ni sa. Hã wɔkɛ mɛi ni gboi yɛ Nu Afua lɛ mli lɛ afee enɛ he nɔkwɛmɔnɔ. Biblia lɛ hãa wɔleɔ akɛ, ‘Noa shiɛ.’ (2 Pet. 2:5) Shi ewieee akɛ be ni Noa hiɛ edɔ eekpɛ adeka wulu lɛ, nakai beiaŋ nɔŋŋ lɛ, eeto gbɛjianɔ koni eshiɛ ehã mɔ fɛɛ mɔ ni yɔɔ shikpɔŋ lɛ nɔ lɛ ni ekɛbɔ lɛ kɔkɔ yɛ Nu Afua lɛ he. Ni Kanaanbii lɛ hu? Ani mɛi fɔji nɛɛ ateŋ mɔ fɛɛ mɔ ná hegbɛ akɛ ebaakase Yehowa he nii ni etsake ejeŋba? Wɔleee.

8. Mɛni wɔleee yɛ mɛi ni Yehowa kpãtã amɛhiɛ yɛ Sodom kɛ Gomora lɛ ahe?

⁸ Ni mɛi ni Yehowa kpãtã amɛhiɛ yɛ Sodom kɛ Gomora lɛ hu? Eyɛ mli akɛ no mli lɛ, Lot, ni ji jalɔ lɛ, yɛ amɛteŋ moŋ, shi ani eshiɛ ehã amɛ fɛɛ? Wɔleee. Nibii ni amɛfee lɛ ehiii kwraa. Shi ani no mli lɛ, amɛle nɔ ni ja kɛ nɔ ni ejaaa? Kɛ́ obaakai lɛ, Biblia lɛ kɛɛ hii ni yɔɔ nakai maŋ lɛ mli, “kɛjɛ gbekɛ nuu nɔ kɛyashi nuumo nɔ” bua amɛhe naa babaoo kɛtee Lot shĩa lɛ koni amɛyato egbɔi lɛ kabonaa. (1 Mo. 19:4; 2 Pet. 2:7) Enɛ hãa wɔnaa akɛ, mɛi ateŋ ni amɛda yɛ lɛ ajeŋba ekpɔtɔ, ni no hewɔ lɛ ekolɛ amɛnáaa hegbɛ amɛkase Yehowa he nii ni amɛle ejeŋba he mlai lɛ. Ani wɔbaanyɛ wɔkɛɛ akɛ Yehowa, wɔ-Nyɔŋmɔ ni naa mɔbɔ lɛ, kojo mɛi nɛɛ ateŋ mɔ fɛɛ mɔ akɛ esa naanɔ hiɛkpatamɔ, ni no hewɔ lɛ eteŋ amɛteŋ mɔ ko kwraa shi? Dabi, wɔnyɛŋ wɔwie nakai. Mɛi ni yɔɔ Sodom lɛ fee nibii ni ejaaa. Anɔkwa, anáaa jalɔi nyɔŋma po yɛ nakai maŋ lɛ mli. No hewɔ lɛ, eja gbɛ akɛ Yehowa kpãtã amɛhiɛ. (1 Mo. 18:32) Shi ani wɔbaanyɛ wɔwie kɛ nɔmimaa akɛ Yehowa eteŋ amɛteŋ mɔ ko kwraa shi efataŋ ‘mɛi ni ejaaa ni abaatee amɛ shi’ lɛ ahe? Dabi, wɔnyɛŋ wɔwie nakai!

9. Mɛni wɔleee yɛ Solomon he?

⁹ Biblia lɛ gbaa wɔ mɛi komɛi ni fee nibii kpakpai aahu, shi sɛɛ mli lɛ amɛfee nibii ni ejaaa lɛ hu ahe sane. Amɛteŋ mɔ kome ji Maŋtsɛ Solomon. Solomon le Yehowa mla lɛ jogbaŋŋ, ni Yehowa jɔɔ lɛ waa. Shi sɛɛ mli lɛ, ebɔi amale nyɔŋmɔi jamɔ. Eshai ni efee lɛ hã Yehowa mli fu lɛ waa, ni Israel maŋ muu lɛ fɛɛ na nɔ afii abɔ yɛ ehe eshai lɛ ahewɔ. Shi be ni Solomon gbo lɛ, Biblia lɛ kɛɛ, ‘ekɛ etsɛmɛi lɛ yawɔ,’ ni etsɛmɛi lɛ ateŋ mɔ kome ji Maŋtsɛ David, mɔ ni ye Yehowa anɔkwa lɛ. (1 Maŋ. 11:​5-9, 43, shn.; 2 Maŋ. 23:13) Ani wiemɔ ni Biblia lɛ wie akɛ, ‘ekɛ etsɛmɛi lɛ yawɔ’ lɛ tsɔɔ akɛ abaatee lɛ shi? Dabi, etsɔɔɔ nakai doo. Shi ekolɛ mɔ ko baasusu akɛ, akɛni Biblia lɛ kɛɛ kɛ́ mɔ ko gbo lɛ, “abuɔ lɛ bem kɛjeɔ ehe esha lɛ mli” hewɔ lɛ, abaatee Solomon shi. (Rom. 6:7) Eji anɔkwale akɛ Biblia lɛ ewie nakai, shi no etsɔɔɔ akɛ abaatee mɛi fɛɛ ni egboi lɛ shi, oookɛɛ nɔ ni kɛ́ mɔ ko gbo lɛ, doo lɛ esa akɛ akɛ lɛ aba wala mli ekoŋŋ. Gbohiiashitee lɛ ji nikeenii ni jɛ wɔ-Nyɔŋmɔ ni sumɔɔ wɔ lɛ ŋɔɔ, ni ekɛhãaa mɔ fɛɛ mɔ kɛkɛ. Ekɛdroɔ mɛi ni ele akɛ kɛ́ amɛná hegbɛ lɛ, amɛbaasɔmɔ lɛ kɛya naanɔ lɛ pɛ. (Hiob 14:​13, 14; Yoh. 6:44) Ani Yehowa kɛ nikeenii ni tamɔ nɛkɛ baadro Solomon? Wɔleee; Yehowa pɛ ni le. Nɔ pɛ ni wɔle ji akɛ, Yehowa baafee nɔ ni ja.

NƆ NI WƆLE

10. Ani Yehowa sumɔɔ ni ekpãtã mɛi ahiɛ? Tsɔɔmɔ mli. (Ezekiel 33:11) (Kwɛmɔ mfoniri lɛ hu.)

¹⁰ Kanemɔ Ezekiel 33:11. Yehowa ehã wɔle bɔ ni enuɔ he ehãa kɛ́ eekojo adesai. Ekɛ emumɔ lɛ tsirɛ bɔfo Petro ni ewie nɔ ko ni tamɔ nɔ ni gbalɔ Ezekiel ŋma yɛ ewolo lɛ mli lɛ, akɛ, ‘Yehowa sumɔɔɔ akɛ akpãtã mɔ ko mɔ ko hiɛ.’ (2 Pet. 3:9) Wiemɔi nɛɛ hãa wɔtsui nyɔɔ wɔmli waa, ejaakɛ ehãa wɔleɔ akɛ, Yehowa eteee shi kɛkɛ ni ebaakpãtã mɔ ko hiɛ kɛya naanɔ. Shi moŋ, be fɛɛ be ni ebaakpãtã mɔ ko hiɛ lɛ, efeɔ nakai yɛ yiŋtoo kpakpa ko hewɔ. Wɔ-Nyɔŋmɔ lɛ naa mɔbɔ waa. Be fɛɛ be ni ebaana akɛ ebaanyɛ ena mɔ ko mɔbɔ lɛ, enaa lɛ mɔbɔ.

11. Namɛi ateŋ amɛ shi? Ni te wɔfeɔ tɛŋŋ wɔleɔ enɛ?

¹¹ Mɛni wɔle yɛ mɛi ni ateŋ amɛ shi lɛ ahe? Mɛi fioo ko pɛ Biblia lɛ ewie nɔ ko ni tsɔɔ akɛ, ateŋ amɛ shi.b Mɛi nɛɛ ateŋ mɔ kome ji, Yuda Iskariot. Yesu wie nɔ ko ni tsɔɔ akɛ, ateŋ Yuda shi. (Mar. 14:21; Yoh. 17:12)c Yuda hiɛ kã he waa ni efee esha ni efee lɛ, ejaakɛ ele faŋŋ akɛ nɔ ni eyaafee lɛ teɔ shi ewoɔ Yehowa Nyɔŋmɔ kɛ e-Bi lɛ, shi efee. (Mar. 3:29)d Agbɛnɛ hu, Yesu wie akɛ jamɔŋ hiɛnyiɛlɔi ni te shi amɛwo lɛ lɛ ateŋ mɛi komɛi yɛ ni kɛ́ amɛgboi lɛ, ateŋ amɛ shi. (Mat. 23:33; Yoh. 19:11)e Bɔfo Paulo hu wie akɛ, kɛ́ mɛi ni ekwa anɔkwa jamɔ lɛ tsakeee amɛtsui lɛ, no lɛ kɛ́ amɛgboi lɛ, ateŋ amɛ shi.—Heb. 6:​4-8; 10:29.

12. Mɛni Yehowa feɔ ni hãa wɔnaa akɛ enaa mɔbɔ waa? Okɛ enɛ he nɔkwɛmɔnɔ ahã.

¹² Shi tamɔ bɔ ni wɔwie kɛtsɔ hiɛ lɛ, Yehowa naa mɔbɔ waa, ni “esumɔɔɔ akɛ akpãtã mɔ ko mɔ ko hiɛ.” Biblia lɛ wieɔ mɛi komɛi ni fee eshai ni yɔɔ hiɛdɔɔ waa shi Yehowa na amɛ mɔbɔ lɛ ahe. Amɛteŋ mɔ kome ji, Maŋtsɛ David. David fee eshai ni yɔɔ hiɛdɔɔ waa. Ekomɛi ji, efite gbãla ni egbe gbɔmɔ. Shi be ni etsake etsui lɛ, Yehowa na lɛ mɔbɔ ni ekɛ ehe eshai lɛ ke lɛ. (2 Sam. 12:​1-13) Mɔ kroko hu ji, Maŋtsɛ Manase. Manase kɛ ewala afii lɛ pii fee nibii gbohii. Shi lɛ po be ni etsake etsui lɛ, Yehowa na lɛ mɔbɔ ni ekɛ ehe eshai lɛ ke lɛ. (2 Kro. 33:​9-16) Hii nɛɛ asane lɛ hãa wɔnaa akɛ, kɛ́ Yehowa na akɛ nɔ ko yɛ ni ebaanyɛ edamɔ nɔ ena mɔ ko mɔbɔ lɛ, enaa lɛ mɔbɔ. Yehowa baatee mɛi tamɔ David kɛ Manase shi, ejaakɛ amɛyɔse akɛ nibii ni amɛfee lɛ ehiii, ni amɛtsake amɛtsui.

13. (a) Mɛni hewɔ Yehowa na Ninivebii lɛ mɔbɔ? (b) Sɛɛ mli lɛ, mɛni Yesu wie yɛ Ninivebii lɛ ahe?

¹³ Wɔle hu akɛ, Yehowa na Ninivebii lɛ mɔbɔ. Nyɔŋmɔ kɛɛ Yona akɛ, Ninivebii lɛ ‘anɔfɔŋfeemɔ lɛ ebashɛ ehiɛ.’ Shi be ni amɛkpa nibii fɔji ni amɛfeɔ lɛ ni amɛtsake amɛtsui lɛ, Yehowa na amɛ mɔbɔ ni ekɛ amɛhe ke amɛ. Anɔkwa, ena amɛ mɔbɔ waa diɛŋtsɛ, shi Yona eyanaaa amɛ mɔbɔ nakai. Moŋ lɛ, emli fu waa, ni ehe bahia ni Nyɔŋmɔ akai lɛ akɛ Ninivebii lɛ “leee nɔ ni ja kɛ nɔ ni ejaaa.” (Yona 1:​1, 2; 3:10; 4:​9-11) Sɛɛ mli be ni Yesu ba shikpɔŋ lɛ nɔ lɛ, ekɛ Ninivebii lɛ asane lɛ fee nɔkwɛmɔnɔ kɛtsɔɔ akɛ, Yehowa yeɔ jalɛsane ni enaa mɔbɔ. Ewie akɛ, Ninivebii ni tsake amɛtsui lɛ “baate shi yɛ kojomɔ lɛ mli.”—Mat. 12:41.

14. Be ni Yesu wie akɛ Ninivebii lɛ “baate shi yɛ kojomɔ lɛ mli” lɛ, no mli lɛ te etsɔɔ tɛŋŋ?

¹⁴ Be ni Yesu wie akɛ Ninivebii lɛ “baate shi yɛ kojomɔ lɛ mli” lɛ, no mli lɛ te etsɔɔ tɛŋŋ? Yesu wie akɛ, wɔsɛɛ lɛ, mɛi komɛi “baate shi kɛya kojomɔ mli.” (Yoh. 5:29) Enɛ baaba mli yɛ Kristo Afii Akpe Nɔyeli lɛ shishi, be ni “abaatee jalɔi kɛ mɛi ni ejaaa fɛɛ shi” lɛ. (Bɔf. 24:15) Mɛi ni ejaaa lɛ “baate shi kɛya kojomɔ mli.” Mɛni enɛ tsɔɔ? Nɔ ni etsɔɔ ji, Yehowa kɛ Yesu baakwɛ kɛji mɛi nɛɛ baabo nibii ni abaatsɔɔ amɛ lɛ toi ni amɛkɛtsu nii lo. Kɛ́ Ninivebii ni abaatee amɛ shi lɛ ateŋ mɔ ko jáaa Yehowa yɛ nibii ni abaatsɔɔ lɛ lɛ fɛɛ sɛɛ lɛ, Yehowa hãŋ eya nɔ ehi wala mli. (Yes. 65:20) Shi amɛteŋ mɛi ni baajá Yehowa ni amɛye lɛ anɔkwa lɛ baaná hegbɛ ni amɛhi shi kɛya naanɔ!—Dan. 12:2.

15. (a) Mɛni hewɔ esaaa akɛ wɔwieɔ akɛ ateŋ mɛi ni Yehowa kpãtã amɛhiɛ yɛ Sodom kɛ Gomora lɛ ateŋ mɔ ko kwraa shi lɛ? (b) Ani nɔ ni Yuda wie yɛ Yuda 7 lɛ teɔ shi ewoɔ Yesu wiemɔi lɛ? (Kwɛmɔ akrabatsa ni ji, “Mɛni No Mli Lɛ Yuda Tsɔɔ Lɛ?”)

¹⁵ Yesu wie hu akɛ, “Kojomɔ Gbi lɛ nɔ lɛ,” ebaawa ehã mɛi ni heee enɔ amɛyeee ni amɛbooo etsɔɔmɔi lɛ toi lɛ, fe mɛi ni hi Sodom kɛ Gomora lɛ. (Mat. 10:​14, 15; 11:​23, 24; Luka 10:12) Mɛni nɔ ni ewie nɛɛ tsɔɔ? Ani no mli lɛ, eewo sane he kɛkɛ? Kɛ́ obaakai lɛ, be ni Yesu wie akɛ Ninivebii lɛ baate shi lɛ, no mli lɛ jeee sane he ewoɔ; eetsɔɔ akɛ amɛbaate shi lɛɛlɛŋ. No hewɔ lɛ, etamɔ nɔ ni sane ni ewie yɛ Sodom kɛ Gomorabii lɛ ahe lɛ hu jeee sane hewoo, shi moŋ eji nɔ ko ni baaba lɛɛlɛŋ. “Kojomɔ lɛ” ni Yesu tsĩ tã be ni ewieɔ Ninivebii lɛ ahe lɛ, kɛ “Kojomɔ Gbi” ni etsĩ tã be ni ewieɔ Sodom kɛ Gomorabii lɛ ahe lɛ fɛɛ kɔɔ be kome too lɛ nɔŋŋ he. Ani okaiɔ nɔ ni Yesu wie yɛ mɛi ni baate shi kɛya kojomɔ mli lɛ ahe lɛ? Ewie akɛ amɛfee nibii gbohii. Ninivebii lɛ kɛ mɛi ni hi Sodom kɛ Gomora lɛ fɛɛ “fee nibii gbohii.” (Yoh. 5:29) Ashiɛ ahã Ninivebii lɛ ni amɛtsake amɛtsui. Shi mɛi ni hi Sodom kɛ Gomora lɛ náaa nakai hegbɛ lɛ. No hewɔ lɛ, etamɔ nɔ ni hiɛnɔkamɔ yɛ kɛhã mɛi ni hi Sodom kɛ Gomora lɛ. Wɔbaanyɛ wɔhe wɔye akɛ, kɛ́ hooo kwraa lɛ, abaatee amɛteŋ mɛi komɛi ashi, ni wɔbaaná hegbɛ wɔtsɔɔ amɛ Yehowa kɛ Yesu Kristo he nii.

16. Yɛ nɔ ni aŋma yɛ Yeremia 17:10 lɛ naa lɛ, mɛni nɔ Yehowa baadamɔ ekpɛ eyiŋ kɛji ebaatee mɔ ko shi aloo eteŋ lɛ shi?

¹⁶ Kanemɔ Yeremia 17:10. Etamɔ nɔ ni nɔ fɛɛ nɔ ni wɔle yɛ bɔ ni Yehowa kojoɔ mɛi ehãa lɛ he lɛ jeɔ kpo yɛ ŋmalɛ nɛɛ mli. Be fɛɛ be lɛ, Yehowa ‘taoɔ tsui lɛ mli ni epɛiɔ mligbɛ susumɔi amli.’ Wɔsɛɛ kɛ́ eetee mɛi ashi lɛ, ‘ebaahã mɔ fɛɛ mɔ nɔ ni sa egbɛi lɛ,’ tamɔ bɔ ni efeɔ daa lɛ. Kɛ́ Yehowa na akɛ esaaa akɛ eteɔ mɔ ko shi lɛ, eteŋ lɛ shi; shi kɛ́ nɔ ko yɛ ni ebaanyɛ edamɔ nɔ ena mɔ ko mɔbɔ lɛ, ebaana lɛ mɔbɔ. No hewɔ lɛ, esaaa akɛ wɔmuɔ sane naa oya akɛ ateŋ mɔ ko shi, ja Biblia lɛ ehã wɔle faŋŋ akɛ ateŋ mɔ lɛ shi lɛɛlɛŋ!

“SHIKPƆŊ LƐ FƐƐ KOJOLƆ LƐ” BAAFEE “NƆ NI JA”

17. Mɛni baaba adesai akpekpe toi akpei abɔ ni egboi lɛ anɔ?

¹⁷ Kɛjɛ be ni Adam kɛ Hawa yafata Satan he kɛtse Yehowa Nyɔŋmɔ hiɛ atua lɛ nɔ kɛbaa nɛɛ, adesai akpekpe toi akpei abɔ egboi. Gbele, ni ji wɔhenyɛlɔ lɛ, eye awui waa diɛŋtsɛ! (1 Kor. 15:26) Mɛni baaba mɛi akpekpe toi akpei abɔ ni egboi nɛɛ fɛɛ anɔ? Abaatee amɛteŋ mɛi fioo ko, ni ji Kristo sɛɛnyiɛlɔi anɔkwafoi ni amɛyibɔ ji 144,000 lɛ shi kɛya ŋwɛi, ni abaahã amɛ wala ni sɛɛ nyɛŋ afo. (Kpo. 14:1) Hii kɛ yei anɔkwafoi babaoo ni sumɔɔ Yehowa ni egboi lɛ hu baate shi be ni ‘ateɔ mɛi ni ja lɛ ashi’ lɛ, ni amɛbaahi shi kɛya naanɔ kɛji amɛye Yehowa anɔkwa yɛ Afii Akpe lɛ mli ni amɛfo naagbee kaa lɛ. (Dan. 12:13; Heb. 12:1) Agbɛnɛ hu, yɛ Afii Akpe lɛ mli lɛ, abaatee “mɛi ni ejaaa” lɛ hu shi. Mɛi ni ejaaa nɛɛ ateŋ mɛi komɛi jáaa Yehowa be ni amɛyɔɔ wala mli lɛ, ni amɛteŋ mɛi komɛi po “fee nibii gbohii.” Amɛbaaná hegbɛ amɛkase Yehowa he nii, amɛtsake amɛtsui, ni amɛbasɔmɔ lɛ. (Luka 23:​42, 43) Shi mɛi ni egboi lɛ ateŋ mɛi komɛi yɛ ni be ni amɛyɔɔ wala mli lɛ, amɛje gbɛ amɛtse Yehowa hiɛ atua ni amɛkɛ lɛ tswa. Enɛ hewɔ lɛ, Yehowa ekpɛ eyiŋ akɛ eteŋ amɛ shi.—Luka 12:​4, 5.

18-19. (a) Mɛni hewɔ wɔbaanyɛ wɔhe wɔye akɛ, kɛ́ Yehowa kpɛ eyiŋ akɛ ebaatee mɔ ko shi jio, eteŋ lɛ shi jio, yiŋ ni ebaakpɛ lɛ baafee yiŋ ni ja lɛ? (Yesaia 55:​8, 9) (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁸ Ani wɔbaanyɛ wɔhe wɔye akɛ, kɛ́ Yehowa kpɛ eyiŋ akɛ ebaatee mɔ ko shi jio, eteŋ lɛ shi jio, yiŋ ni ebaakpɛ lɛ baafee yiŋ ni ja be fɛɛ be? Hɛɛ! Tamɔ Abraham wie lɛ, Yehowa ji “shikpɔŋ lɛ fɛɛ Kojolɔ,” ni wɔle akɛ, Yehowa eye emuu, ehiɛ kã shi fe mɔ fɛɛ mɔ, ni enaa mɔbɔ. Etsɔse e-Bi lɛ, ni ekɛ kojomɔ lɛ fɛɛ ewo edɛŋ. (Yoh. 5:22) Yehowa kɛ e-Bi lɛ le nɔ ni yɔɔ adesa fɛɛ adesa tsui mli. (Mat. 9:4) No hewɔ lɛ, kɛ́ amɛmiikojo lɛ, amɛbaafee “nɔ ni ja” be fɛɛ be!

¹⁹ Nyɛhãa wɔhea wɔyea kɛ wɔtsui muu fɛɛ akɛ, Yehowa baakojo yɛ jalɛ naa be fɛɛ be. Wɔle akɛ, wɔnyɛŋ wɔkojo mɛi; shi Yehowa lɛ, ebaanyɛ! (Kanemɔ Yesaia 55:​8, 9.) No hewɔ lɛ, esa akɛ wɔshi kojomɔ lɛ fɛɛ wɔhã lɛ kɛ e-Bi Yesu. Wɔle akɛ, Yesu, ni ji wɔ-Maŋtsɛ lɛ, yeɔ jalɛsane ni enaa mɔbɔ tamɔ e-Tsɛ lɛ pɛpɛɛpɛ. (Yes. 11:​3, 4) Shi yɛ amanehulu kpeteŋkpele lɛ mli lɛ, mɛni nɔ Yehowa kɛ Yesu baadamɔ akojo mɛi ni yɔɔ wala mli yɛ nakai beiaŋ lɛ? Mɛni wɔleee yɛ sane nɛɛ he? Ni mɛni wɔle yɛ he? Abaahã sanebimɔi nɛɛ hetoo yɛ nikasemɔ ni nyiɛ sɛɛ lɛ mli.