Bɔ Ni Asafoŋ Onukpai Lɛ Hãa Mɛi Ni Efee Esha Lɛ Naa Akɛ Amɛsumɔɔ Amɛ Ni Amɛnaa Mɔbɔ

1. Mɛni mɛi ni efee esha ni yɔɔ hiɛdɔɔ lɛ ateŋ mɛi komɛi feɔ kɛ́ aye abua amɛ?

YƐ NIKASEMƆ ni tsɔ hiɛ lɛ mli lɛ, wɔna gbɛtsɔɔmɔi ni Paulo kɛhã Korinto asafo lɛ be ni nyɛmi nuu ko yafee esha ko ni yɔɔ hiɛdɔɔ lɛ. Nuu lɛ tsakeee etsui, ni no hewɔ lɛ, ajie lɛ kɛje asafo lɛ mli. Shi tamɔ wɔnaa yɛ ŋmalɛ ni nikasemɔ nɛɛ damɔ nɔ lɛ mli lɛ, mɛi ni efee esha ni yɔɔ hiɛdɔɔ lɛ ateŋ mɛi komɛi tsakeɔ amɛtsui kɛ́ aye abua amɛ. (Rom. 2:4) No hewɔ lɛ, mɛni asafoŋ onukpai lɛ baanyɛ afee kɛye abua mɔ ko ni efee esha ko ni yɔɔ hiɛdɔɔ lɛ koni etsake etsui?

2-3. Kɛ́ wɔná wɔle akɛ wɔnyɛmi Kristofonyo ko efee esha ko ni yɔɔ hiɛdɔɔ lɛ, mɛni esa akɛ wɔfee? Ni mɛni hewɔ?

² Kɛ́ asafoŋ onukpai lɛ leee akɛ mɔ ko efee esha ni yɔɔ hiɛdɔɔ lɛ, amɛnyɛŋ amɛye amɛbua lɛ. No hewɔ lɛ, kɛ́ wɔná wɔle akɛ wɔnyɛmi Kristofonyo ko efee esha ko ni yɔɔ hiɛdɔɔ ni baanyɛ ahã ajie lɛ kɛje asafo lɛ mli po lɛ, mɛni esa akɛ wɔfee? Esa akɛ wɔwo lɛ hewalɛ ni eyabɔ asafoŋ onukpai lɛ koni amɛye amɛbua lɛ.—Yes. 1:18; Bɔf. 20:28; 1 Pet. 5:2.

³ Shi kɛ́ mɔ ni efee esha lɛ eyabɔɔɔ asafoŋ onukpai lɛ hu? No lɛ, esa akɛ wɔ diɛŋtsɛ wɔyabɔ asafoŋ onukpai lɛ koni anyɛ aye abua lɛ. Kɛ́ wɔfee nakai lɛ, no tsɔɔ akɛ wɔsumɔɔ wɔnyɛmi lɛ ni wɔsumɔɔɔ ni ehiɛ kpãtãa. Kɛ́ asafoŋ onukpai lɛ náaa amɛle sane lɛ ni amɛbaaye amɛbua mɔ ni efee esha lɛ ni etsake egbɛi lɛ, ekɛ Yehowa teŋ baafite kwraa, ni ebaanyɛ efite gbɛ́i kpakpa ni asafo lɛ yɔɔ lɛ hu. No hewɔ lɛ, eyɛ mli akɛ efeemɔ wa moŋ, shi akɛni wɔsumɔɔ wɔnyɛmi lɛ kɛ Yehowa hewɔ lɛ, wɔbaayabɔ asafoŋ onukpai lɛ.—Lala 27:14.

NƆ NI ASAFOŊ ONUKPAI LƐ FEƆ KƐYEƆ AMƐBUAA MƐI NI EFEE ESHA NI YƆƆ HIƐDƆƆ LƐ

4. Kɛ́ asafoŋ onukpai lɛ kɛ mɔ ko ni efee esha ko ni yɔɔ hiɛdɔɔ lɛ kpe lɛ, mɛɛ oti esa akɛ amɛkɛma amɛhiɛ?

⁴ Kɛ́ nyɛmi ko yafee esha ni yɔɔ hiɛdɔɔ lɛ, onukpai akuu lɛ halaa amɛteŋ mɛi etɛ koni amɛkɛ mɔ lɛ akpe.a Esa akɛ mɛi ni abaahala lɛ aba amɛhe shi, ni amɛhã ehi amɛjwɛŋmɔ mli akɛ, eyɛ mli akɛ amɛbaafee bɔ fɛɛ bɔ ni amɛbaanyɛ koni amɛye amɛbua mɔ ni efee esha lɛ ni etsake etsui moŋ, shi amɛnyɛŋ amɛnyɛ enɔ ni etsake. (5 Mo. 30:19) Asafoŋ onukpai lɛ le akɛ, jeee mɛi fɛɛ ni efee esha lɛ baatsake amɛtsui, tamɔ bɔ ni Maŋtsɛ David tsake etsui lɛ. (2 Sam. 12:13) Mɛi ni efee esha lɛ ateŋ mɛi komɛi yɛ ni kɛ́ ajɛ Biblia lɛ mli aye abua amɛ po lɛ, amɛboŋ toi. (1 Mo. 4:​6-8) Fɛɛ sɛɛ lɛ, esa akɛ asafoŋ onukpai lɛ kɛma amɛhiɛ akɛ amɛyaaye amɛbua mɔ ni efee esha lɛ akɛ aleenɔ ebaatsake etsui lo. No hewɔ lɛ, kɛ́ ahala asafoŋ onukpai lɛ akɛ amɛkɛ mɔ ko ni efee esha lɛ ayakpe lɛ, mɛni esa akɛ amɛhã ehi amɛjwɛŋmɔ mli?

5. Kɛ́ asafoŋ onukpai lɛ kɛ mɔ ni efee esha lɛ kpe lɛ, mɛni esa akɛ amɛhã ehi amɛjwɛŋmɔ mli? (2 Timoteo 2:​24-26) (Kwɛmɔ mfoniri lɛ hu.)

⁵ Esa akɛ asafoŋ onukpai lɛ ahã ehi amɛjwɛŋmɔ mli akɛ, eyɛ mli akɛ nyɛmi lɛ efee esha ni yɔɔ hiɛdɔɔ moŋ, shi ejara wa hã Yehowa lolo. (Luka 15:​4, 6) No hewɔ lɛ, kɛ́ amɛkɛ lɛ kpe lɛ, esa akɛ amɛkɛ lɛ awie kɛ naajɔlɛ, ni esaaa akɛ amɛfeɔ lɛ hãihãi. Esaaa akɛ efeɔ tamɔ nɔ ni amɛba ni amɛbata mɔ lɛ daaŋ kɛkɛ koni amɛle nɔ ni tee nɔ. Moŋ lɛ, esa akɛ amɛjie sui ni atsĩ tã yɛ 2 Timoteo 2:​24-26 lɛ kpo. (Kanemɔ.) Esa akɛ asafoŋ onukpai lɛ amli ajɔ ni amɛwie kɛ naajɔlɛ koni amɛnyɛ amɛshɛ mɔ ni efee esha lɛ tsui he.

6. Mɛni esa akɛ asafoŋ onukpai lɛ afee kɛsaa amɛtsui dani amɛkɛ mɔ ni efee esha lɛ ayakpe? (Romabii 2:4)

⁶ Esa akɛ asafoŋ onukpai lɛ asaa amɛtsui. Nɔ ni enɛ tsɔɔ ji, esa akɛ amɛfee nibii ni baaye abua amɛ ni amɛkase Yehowa yɛ bɔ ni amɛkɛ mɔ ni efee esha lɛ baaye amɛhã lɛ mli, ni amɛhã Paulo wiemɔi nɛɛ hu ahi amɛjwɛŋmɔ mli. Ewie akɛ: “Nyɔŋmɔ miibɔ mɔdɛŋ ni enyiɛ ohiɛ kɛya tsuitsakemɔ mli yɛ emlihilɛ lɛ naa.” (Kanemɔ Romabii 2:4.) Asafoŋ onukpai lɛ ji nɔkwɛlɔi, ni esa akɛ amɛnyiɛ Kristo gbɛtsɔɔmɔ sɛɛ ni amɛkase lɛ yɛ bɔ ni amɛkwɛɔ asafo lɛ nɔ amɛhãa lɛ mli. (Yes. 11:​3, 4; Mat. 18:​18-20) Dani onukpai ni ahala lɛ kɛ mɔ ni efee esha lɛ baakpe lɛ, esa akɛ amɛfee ekome ni amɛsɔle amɛhã Yehowa koni amɛnyɛ amɛye amɛbua mɔ lɛ ni etsake etsui. Nɔ ni baawa amɛ ji, ni amɛbaatao nii amli amɛkwɛ akɛ mɛni Biblia lɛ kɛ asafo lɛ woji lɛ ewie yɛ sane ni amɛyaatsu he nii lɛ he, ni agbɛnɛ hu, amɛsɔle amɛbi Yehowa ni eye ebua amɛ ni amɛnyɛ amɛnu mɔ lɛ kɛ sane ni eba lɛ shishi jogbaŋŋ. Esa akɛ amɛkwɛ hu akɛ, mɛɛ nibii eeenyɛ efee akɛ nomɛi hã mɔ lɛ ná susumɔ ni ehiɛ lɛ loo eyafee nɔ ni efee lɛ.—Abɛi 20:5.

7-8. Kɛ́ asafoŋ onukpai lɛ kɛ mɔ ni eyafee esha lɛ kpe lɛ, mɛni amɛbaanyɛ amɛfee kɛtsɔɔ akɛ amɛtoɔ amɛtsui shi tamɔ Yehowa?

⁷ Esa akɛ asafoŋ onukpai lɛ akase bɔ ni Yehowa toɔ etsui shi lɛ. Esa akɛ asafoŋ onukpai lɛ ahã bɔ ni Yehowa kɛ mɛi ni fee esha yɛ blema lɛ ye ehã lɛ ahi amɛjwɛŋmɔ mli. Akɛ nɔkwɛmɔnɔ lɛ, Yehowa to etsui shi ehã Kain ni ekɛ lɛ susu nii ahe; etsɔɔ lɛ nɔ ni baaba kɛ́ eyafee esha, ni ehã ele akɛ kɛ́ etsake etsui lɛ, ebaahi ehã lɛ. (1 Mo. 4:​6, 7) Yehowa tsu gbalɔ Natan ni eyawo David ŋaa. Natan kɛ nɔkwɛmɔnɔ ko tsu nii kɛye ebua David ni etsake etsui. (2 Sam. 12:​1-7) Be ni Israelbii lɛ hu gbo Yehowa nɔ toi lɛ, ‘etee nɔ etsu egbalɔi lɛ kɛtee amɛŋɔɔ daa gbi.’ (Yer. 7:​24, 25) Yehowa emɛɛɛ ni ewebii lɛ atsake dani eye ebua amɛ. Moŋ lɛ, be ni amɛtsakeko amɛtsui beebe lɛ, ebɔ mɔdɛŋ akɛ ebaaye ebua amɛ.

⁸ Kɛ́ asafoŋ onukpai lɛ kɛ mɔ ko ni eyafee esha ni yɔɔ hiɛdɔɔ lɛ kpe ni amɛmiibɔ mɔdɛŋ ni amɛye amɛbua lɛ lɛ, esa akɛ amɛkase Yehowa. Tamɔ bɔ ni awie yɛ 2 Timoteo 4:2 lɛ, esa akɛ amɛjɛ ‘tsuishitoo fɛɛ’ mli amɛkɛ mɔ lɛ asusu nii ahe. Nɔ ni enɛ tsɔɔ ji, esa akɛ amɛná tsui amɛhã mɔ lɛ ni amɛkɛ lɛ aye yɛ mlijɔlɛ mli koni no ahã ená he miishɛɛ akɛ ebaajaje egbɛi. Kɛ́ mɔ lɛ nu he akɛ asafoŋ onukpai lɛ amli efu lɛ loo ehe miiwo amɛmli la lɛ, ekolɛ eboŋ ŋaa ni amɛbaawo lɛ lɛ toi, aloo ebaakpiliŋ etsui.

9-10. Mɛɛ gbɛ nɔ asafoŋ onukpai lɛ baanyɛ aye abua mɔ ni efee esha lɛ ni ena nibii ni hã wekukpaa ni yɔɔ ekɛ Yehowa teŋ lɛ mli gbɔjɔ ni eyafee esha?

⁹ Esa akɛ asafoŋ onukpai lɛ akwɛ akɛ mɛni hã mɔ lɛ yafee esha lɛ. Akɛ nɔkwɛmɔnɔ lɛ, ani eku ehiɛ eshwie aŋkro nikasemɔ kɛ shiɛmɔyaa nɔ ni no hã fiofio lɛ wekukpaa ni yɔɔ ekɛ Yehowa teŋ lɛ mli gbɔjɔ? Ani ejɛɔ etsui mli esɔleɔ ehãa Yehowa daa? Kɛ́ enu he akɛ eyafee nɔ ko ni Yehowa sumɔɔɔ lɛ, ani emiaa ehiɛ eyeɔ ehe nɔ? Namɛi ekɛbɔɔ, ni mɛni ekɛjieɔ ehiɛtserɛ? Ni mɛɛ gbɛ nɔ eeenyɛ efee akɛ enɛ ená enɔ hewalɛ? Ani eena akɛ nɔ ni efee lɛ edɔ e-Tsɛ, Yehowa waa?

¹⁰ Asafoŋ onukpai lɛ baanyɛ abi mɔ lɛ saji ni baaye abua lɛ ni esusu nibii ni hã ekɛ Yehowa teŋ wekukpaa lɛ mli gbɔjɔ ni eyafee esha lɛ ahe. Shi esaaa akɛ amɛbiɔ lɛ saji lɛ oookɛɛ amɛmli efu lɛ, ni esaaa akɛ amɛbiɔ lɛ eteemɔŋ saji ni kɔɔɔ sane ni eba lɛ he eko. (Abɛi 20:5) Agbɛnɛ hu, tamɔ bɔ ni Natan kɛ nɔkwɛmɔnɔ ye ebua David lɛ, asafoŋ onukpai lɛ baanyɛ amɛkɛ nɔkwɛmɔnii aye abua mɔ lɛ koni esusu nɔ ni eyafee lɛ he ni ena nɔ hewɔ ni nɔ ni efee lɛ ejaaa lɛ. Ekolɛ klɛŋklɛŋ shitamɔ lɛ mli nɔŋŋ lɛ, mɔ lɛ baana akɛ nɔ ni efee lɛ ehiii kwraa, ni ekolɛ ebaatsake etsui po.

11. Te Yesu kɛ eshafeelɔi ye ehã tɛŋŋ?

¹¹ Esa akɛ asafoŋ onukpai lɛ abɔ mɔdɛŋ amɛkase Yesu. Yesu bi Saul, mɔ ni sɛɛ mli lɛ ebatsɔ bɔfo Paulo lɛ, sane ko ni hã esusu nii ahe kɛtee shɔŋŋ. Ebi lɛ akɛ: “Saul, Saul, mɛni hewɔ owaa mi yi lɛ?” Yesu tsɔ sanebimɔ nɛɛ nɔ eye ebua Saul ni ena akɛ, gbɛ ni ekɔ lɛ ejaaa. (Bɔf. 9:​3-6) Yesu hã “nakai yoo Yezebel” lɛ hu “be koni ekɛtsake etsui.”—Kpo. 2:​20, 21.

12-13. Mɛni kɛ́ asafoŋ onukpai lɛ fee lɛ, no baatsɔɔ akɛ amɛmiihã mɔ ni efee esha lɛ be ni etsake etsui? (Kwɛmɔ mfoniri lɛ hu.)

¹² Asafoŋ onukpai lɛ kaseɔ Yesu, no hewɔ lɛ, amɛyeee amɛhe oyai amɛmuuu sane naa akɛ mɔ ni efee esha lɛ tsakeŋ etsui. Mɛi komɛi tsakeɔ amɛtsui yɛ klɛŋklɛŋ shitamɔ lɛ mli nɔŋŋ, shi mɛi komɛi hu yɛ ni eheɔ amɛ be fioo. No hewɔ lɛ, asafoŋ onukpai lɛ baanyɛ ato gbɛjianɔ ni amɛkɛ mɔ ni efee esha lɛ akpe fe shi kome. Ekolɛ klɛŋklɛŋ shitamɔ lɛ sɛɛ lɛ, mɔ lɛ baasusu nibii ni akɛɛ lɛ lɛ ahe jogbaŋŋ ni ekolɛ ebaajɛ heshibaa mli esɔle ebi Yehowa ni ekɛ ehe esha lɛ ake lɛ. (Lala 32:5; 38:18) Enɛ hewɔ lɛ, kɛ́ onukpai lɛ kɛ lɛ kpe ekoŋŋ lɛ, ekolɛ amɛbaana akɛ bɔ ni efeɔ enii ehãa lɛ etsake kwraa kɛ́ akɛto bɔ ni efee enii ehã be ni akɛ lɛ kpe klɛŋklɛŋ lɛ he.

¹³ Asafoŋ onukpai lɛ nuɔ he amɛhãa mɔ ni efee esha lɛ ni amɛkɛ lɛ yeɔ yɛ mlijɔlɛ mli. Amɛsɔlemɔ ji, Yehowa ajɔɔ amɛmɔdɛŋbɔi lɛ anɔ, ni agbɛnɛ hu, amɛnyɛmi lɛ ni egba afã lɛ hiɛ aba ehe nɔ ni etsake etsui.—2 Tim. 2:​25, 26.

14. Kɛ́ mɔ ko ni efee esha lɛ tsake etsui lɛ, namɔ shi esa akɛ ada? Ni mɛni hewɔ?

¹⁴ Kɛ́ mɔ ni efee esha lɛ tsake etsui lɛ, wɔnáa miishɛɛ waa! (Luka 15:​7, 10) Shi namɔ shi esa akɛ wɔda? Asafoŋ onukpai lɛ lo? Dabi. Kɛ́ obaakai lɛ, Paulo wie yɛ mɛi ni efee esha lɛ ahe akɛ: “Ekolɛ aleenɔ, Nyɔŋmɔ baahã amɛná tsuitsakemɔ.” (2 Tim. 2:25) Enɛ hãa wɔnaa faŋŋ akɛ, kɛ́ Kristofonyo ko ni efee esha lɛ tsake etsui lɛ, Yehowa shi esa akɛ ada, jeee adesa ko. Paulo wie nibii kpakpai ni jɛɔ tsuitsakemɔ nɛɛ mli kɛbaa lɛ hu ahe. Ekomɛi ji, mɔ lɛ nuɔ anɔkwale lɛ shishi jogbaŋŋ, ehiɛ baa ehe nɔ, ni ejeɔ Abonsam tsɔne lɛ mli.—2 Tim. 2:26.

15. Kɛ́ mɔ lɛ tsake etsui lɛ, mɛɛ gbɛjianɔ asafoŋ onukpai lɛ baato koni amɛnyɛ amɛya nɔ amɛye amɛbua mɔ lɛ?

¹⁵ Kɛ́ mɔ ni efee esha lɛ tsake etsui lɛ, asafoŋ onukpai lɛ baato gbɛjianɔ ni amɛya nɔ amɛsara lɛ ni amɛye amɛbua lɛ ni ehemɔkɛyeli lɛ mli awa koni enyɛ ejo Satan kai anaa foi ni efee nɔ ni ja. (Heb. 12:​12, 13) Onukpai akuu lɛ egbaŋ mɔ ko mɔ ko sane lɛ he nɔ ko nɔ ko. Shi mɛni ekolɛ ehe baahia ni amɛhã asafo lɛ ale?

“JAJEMƆ AMƐ YƐ MƐI FƐƐ AHIƐ”

16. Namɛi ji “mɛi fɛɛ” ni Paulo tsĩ tã yɛ 1 Timoteo 5:20 lɛ?

¹⁶ Kanemɔ 1 Timoteo 5:20. Paulo kɛɛ Timoteo, ni lɛ hu eji asafoŋ onukpa lɛ, akɛ ejaje “mɛi ni yaa nɔ amɛfeɔ esha lɛ” yɛ mɛi fɛɛ ahiɛ. Ani no mli lɛ, Paulo miitsɔɔ akɛ ajaje mɛi ni feɔ esha lɛ yɛ asafo muu lɛ fɛɛ hiɛ? Dabi, etsɔɔɔ nakai doo. “Mɛi fɛɛ” lɛ ni Paulo tsĩ tã yɛ biɛ lɛ ji mɛi fioo ni ekolɛ amɛle nɔ ni ba lɛ he sane momo lɛ. Mɛi nɛɛ baanyɛ afee mɛi ni kɛ amɛhiŋmɛii na nɔ ni tee nɔ lɛ loo mɛi ni mɔ ni efee esha lɛ yabɔ amɛ nɔ ni efee lɛ. Asafoŋ onukpai lɛ baahã mɛi fioo nɛɛ pɛ ale akɛ atsu sane lɛ he nii.

17. Mɛɛ be esa akɛ atswa asafo lɛ adafi akɛ ajaje mɔ ko? Ni mɛni hewɔ?

¹⁷ Ni kɛ́ asafoŋbii lɛ ateŋ mɛi pii le nɔ ni eba lɛ, loo etamɔ nɔ ni amɛbaaná amɛle hu? Yɛ shihilɛ ni tamɔ nakai mli lɛ, wɔbaanyɛ wɔwie akɛ, wiemɔ ni ji “mɛi fɛɛ” lɛ baakɔ asafo muu lɛ fɛɛ he. No hewɔ lɛ, asafoŋ onukpai lɛ ateŋ mɔ kome baatswa asafo lɛ adafi akɛ ajaje nyɛmi lɛ. Mɛni hewɔ? Paulo kɛɛ: “Koni no afee kɔkɔbɔɔ kɛhã mɛi ni eshwɛ lɛ” ni amɛkayagbee esha mli.

18. Kɛ́ mɔ ko ni abaptisi lɛ ni eji gbekɛ yɛ mla naa lɛ yafee esha ko ni yɔɔ hiɛdɔɔ lɛ, te asafoŋ onukpai lɛ tsuɔ he nii amɛhãa tɛŋŋ? (Kwɛmɔ mfoniri lɛ hu.)

¹⁸ Kɛ́ mɔ ko ni abaptisi lɛ ni eji gbekɛ yɛ mla naa, ni tsɔɔ akɛ eyeko afii 18 lɛ, yafee esha ni yɔɔ hiɛdɔɔ lɛ, te asafoŋ onukpai lɛ tsuɔ he nii amɛhãa tɛŋŋ? Onukpai akuu lɛ toɔ gbɛjianɔ ni asafoŋ onukpai enyɔ kɛ gbekɛ lɛ kɛ efɔlɔi ni ji Odasefoi lɛ kpeɔ.b Asafoŋ onukpai lɛ baabi fɔlɔi lɛ nɔ ni amɛfee momo kɛye amɛbua gbekɛ lɛ koni etsake etsui. Kɛ́ gbekɛ lɛ miibo ŋaa ni efɔlɔi lɛ woɔ lɛ lɛ toi ni eetsake ejeŋba lɛ, no lɛ asafoŋ onukpai enyɔ lɛ baanyɛ amɛkpɛ amɛyiŋ akɛ, fɔlɔi lɛ aya nɔ amɛye amɛbua gbekɛ lɛ. Ehe ehiaaa ni ahalaa asafoŋ onukpai etɛ ni amɛkɛ gbekɛ lɛ kɛ efɔlɔi lɛ akpe. Asafoŋ onukpai lɛ le akɛ, Yehowa kɛ nitsumɔ ewo fɔlɔi adɛŋ akɛ amɛjɛ suɔmɔ mli amɛjaje amɛbii. (5 Mo. 6:​6, 7; Abɛi 6:20; 22:6; Efe. 6:​2-4) Yɛ be kɛ beiaŋ lɛ, asafoŋ onukpai lɛ kɛ fɔlɔi lɛ baagba sane amɛkwɛ akɛ amɛmiiya nɔ amɛmiiye amɛmiibua gbekɛ lɛ lo. Shi kɛ́ gbekɛ lɛ ni abaptisi lɛ lɛ kpaaa nɔ fɔŋ ni efeɔ lɛ hu? Yɛ shihilɛ ni tamɔ nɛkɛ mli lɛ, abaahala asafoŋ onukpai etɛ ni amɛkɛ gbekɛ lɛ kɛ efɔlɔi ni ji Odasefoi lɛ akpe.

“YEHOWA MUSUŊ TSƆƆ LƐ WAA, NI ENAA MƆBƆ HU”

19. Kɛ́ asafoŋ onukpai lɛ kɛ mɔ ko ni efee esha ko ni yɔɔ hiɛdɔɔ lɛ kpe lɛ, mɛɛ gbɛ nɔ amɛbɔɔ mɔdɛŋ akɛ amɛkase Yehowa?

¹⁹ Yehowa kɛ nitsumɔ ewo asafoŋ onukpai lɛ adɛŋ akɛ, amɛkwɛ ni asafo lɛ he atse. (1 Kor. 5:7) Eesumɔ ni amɛye amɛbua mɛi ni efee esha lɛ hu akɛ aleenɔ amɛbaatsake amɛtsui lo. Enɛ hewɔ lɛ, kɛ́ asafoŋ onukpai lɛ kɛ mɔ ni efee esha lɛ kpe ni amɛmiiye amɛmiibua lɛ lɛ, amɛshwelɛ ji mɔ lɛ atsake etsui. Mɛni hewɔ? Ejaakɛ amɛmiisumɔ ni amɛkase Yehowa, mɔ ni “musuŋ tsɔɔ lɛ waa, ni enaa mɔbɔ hu” lɛ. (Yak. 5:11) Bɔfo Yohane kase Yehowa sui nɛɛ. Ewie akɛ: “Mibii bibii, miiŋma nyɛ nibii nɛɛ koni nyɛkafee esha. Ni kɛ̃lɛ, kɛ́ mɔ ko fee esha ko lɛ, wɔyɛ yelikɛbualɔ ko yɛ Tsɛ lɛ ŋɔɔ, Yesu Kristo, jalɔ lɛ.”—1 Yoh. 2:1.

20. Mɛni he wɔbaasusu yɛ nikasemɔ ni nyiɛ sɛɛ lɛ mli?

²⁰ Dɔlɛ sane ji akɛ, mɛi komɛi yɛ ni kɛ́ aye abua amɛ po lɛ, amɛtsakeee amɛtsui. Kɛ́ eba lɛ nakai lɛ, ajieɔ amɛ kɛjeɔ asafo lɛ mli. Te asafoŋ onukpai lɛ tsuɔ enɛ he nii amɛhãa tɛŋŋ? Wɔbaasusu sanebimɔ nɛɛ he yɛ nikasemɔ ni nyiɛ sɛɛ lɛ mli.