Okɛ Biblia Lɛ Atsu Nii Tamɔ Ashwishwɛ

Yakobo kɛ Biblia lɛ to ashwishwɛ ko ni hãa wɔnaa bɔ ni wɔji diɛŋtsɛ lɛ he. (Yak. 1:22-25) Te wɔbaafee tɛŋŋ wɔkɛ Biblia lɛ atsu nii jogbaŋŋ tamɔ ashwishwɛ lɛ?

Too otsui shi ni okane lɛ jogbaŋŋ. Kɛ́ wɔkwɛ wɔhe oya yɛ ashwishwɛ mli lɛ, wɔnyɛŋ wɔna nɔ fɛɛ nɔ ni etɔ̃tɔ yɛ wɔhe lɛ ni wɔsaa. Nakai nɔŋŋ kɛ́ wɔkane Biblia lɛ oyayaayai lɛ, wɔnaŋ nibii ni esa akɛ wɔtsake yɛ wɔ diɛŋtsɛ wɔhe. Shi kɛ́ wɔmiitao wɔna nibii nɛɛ, belɛ esa akɛ wɔto wɔtsui shi ni wɔkane Biblia lɛ jogbaŋŋ.

Okɛ ojwɛŋmɔ aya bo diɛŋtsɛ onɔ, shi jeee mɔ kroko. Bei komɛi kɛ́ wɔmiikwɛ wɔhe yɛ ashwishwɛ mli lɛ, jeee wɔ pɛ wɔhe wɔnaa, shi wɔnaa mɛi krokomɛi hu ni yɔɔ jɛmɛ lɛ, ni ekolɛ wɔkɛ wɔjwɛŋmɔ baaya nibii ni ejaaa yɛ amɛhe lɛ moŋ anɔ. Nakai nɔŋŋ kɛ́ wɔmiikane Biblia lɛ, ewaaa akɛ wɔkɛ wɔjwɛŋmɔ baaya nibii ni esa akɛ mɛi krokomɛi afee tsakemɔi yɛ mli lɛ moŋ anɔ. Shi enɛ yeŋ ebuaŋ wɔ ni wɔna nibii ni esa akɛ wɔ diɛŋtsɛ wɔfee tsakemɔi yɛ mli lɛ.

Kaakpa babaoo gbɛ fe nine kɛmiijɛ odɛŋ. Kɛ́ wɔkwɛ ashwishwɛ mli ni wɔkɛ wɔjwɛŋmɔ tee nibii ni esa akɛ wɔfee tsakemɔi yɛ mli lɛ pɛ anɔ lɛ, ebaanyɛ eje wɔnijiaŋ wui. Kɛ́ wɔmiikane Biblia lɛ, esa akɛ wɔna wɔhe tamɔ bɔ ni Yehowa naa wɔ lɛ, ni wɔkakpa babaoo gbɛ fe nine kɛmiijɛ wɔdɛŋ.—Yak. 3:17.