Ehi Hã Wɔ Akɛ Wɔbaasumɔ Wɔnyɛmimɛi Lɛ Waa!

1-2. Mɛni ji nɔ kome ni he miihia Yehowa waa? Ni mɛni eesumɔ ni wɔfee?

BƆ NI wɔkɛ mɛi yeɔ wɔhãa lɛ he miihia Yehowa waa. Yesu kɛɛ esa akɛ wɔsumɔ wɔnyɛmi gbɔmɔ tamɔ wɔ diɛŋtsɛ wɔhe. (Mat. 22:​37-39) Enɛ tsɔɔ akɛ, esa akɛ wɔmli ahi ahã mɛi ni jáaa Yehowa lɛ po. Kɛ́ wɔfee nakai lɛ, belɛ wɔmiikase Yehowa Nyɔŋmɔ, mɔ ni hãa “ehulu teɔ shi yɛ mɛi fɔji kɛ mɛi kpakpai fɛɛ anɔ, ni ehãa nugbɔ nɛɔ shwieɔ jalɔi kɛ mɛi ni ejaaa fɛɛ anɔ” lɛ.—Mat. 5:45.

² Eyɛ mli akɛ Yehowa sumɔɔ gbɔmɛi fɛɛ moŋ, shi eshwɛɛɛ mɛi ni boɔ lɛ toi lɛ ahe kwraa. (Yoh. 14:21) Yehowa miisumɔ ni wɔkase lɛ. No hewɔ lɛ, ewoɔ wɔ hewalɛ ni wɔsumɔ wɔnyɛmimɛi lɛ kɛ “suɔmɔ ni mli wa.” (1 Pet. 4:8; Rom. 12:10) Yehowa miisumɔ ni wɔsumɔ wɔnyɛmimɛi Kristofoi lɛ tamɔ bɔ ni wɔsumɔɔ wɔwekunyo ko ni sane kã wɔtsui nɔ waa lɛ, loo wɔnaanyo ko ni bɛŋkɛ wɔ kpaakpa lɛ.

3. Mɛɛ gbɛ nɔ wɔbaanyɛ wɔkɛ suɔmɔ ato nɔ ko ni adu he?

³ Bɔ ni kɛ́ wɔdu nii lɛ wɔhuɔ he ni wɔshwieɔ nɔ nu koni enyɛ eda jogbaŋŋ lɛ, nakai nɔŋŋ nibii komɛi yɛ ni esa akɛ wɔfee koni wɔsuɔmɔ lɛ ada. Bɔfo Paulo wo Kristofoi ŋaa akɛ: “Nyɛyaa nɔ nyɛjiea nyɛmimɛi asuɔmɔ kpo.” (Heb. 13:1) Yehowa miisumɔ ni be fɛɛ be lɛ, wɔfee nibii ni baahã wɔsumɔ mɛi waa. Nikasemɔ nɛɛ baahã wɔna nɔ hewɔ ni esa akɛ wɔsumɔ wɔnyɛmimɛi lɛ waa, kɛ bɔ ni wɔbaafee wɔfee nakai daa.

NƆ HEWƆ NI ESA AKƐ WƆSUMƆ WƆNYƐMIMƐI LƐ WAA

4. Mɛni wɔbaanyɛ wɔfee koni wɔna ekomefeemɔ ni yɔɔ wɔ kɛ wɔnyɛmimɛi lɛ ateŋ, ni awie he yɛ Lala 133:1 lɛ, akɛ nɔ ko ni jara wa? (Kwɛmɔ mfonirii lɛ hu.)

⁴ Kanemɔ Lala 133:1. Wɔkɛ mɔ ni fo lala nɛɛ kpãa gbee, akɛ, “ehi” ni ‘eyɛ fɛo’ akɛ wɔkɛ mɛi ni sumɔɔ Yehowa lɛ baabɔ naanyo. Shi tamɔ bɔ ni kɛ́ mɔ ko naa tso wulu ko daa lɛ, eshɛɔ he ko ni enaaa lɛ nɔ ko dɔŋŋ ejaakɛ ejwɛŋŋ bɔ ni tso lɛ da hã lɛ he dɔŋŋ lɛ, nakai nɔŋŋ wɔ hu kɛ́ wɔkwɛɛɛ ni ahi lɛ, wɔnaŋ ekomefeemɔ ni yɔɔ wɔ kɛ wɔnyɛmimɛi Kristofoi lɛ ateŋ lɛ akɛ nɔ ko ni sa kadimɔ dɔŋŋ. Wɔnaa wɔnyɛmimɛi Kristofoi lɛ daa, ekolɛ shii abɔ po yɛ otsi mli. Mɛni wɔbaanyɛ wɔfee koni wɔya nɔ wɔna amɛ akɛ amɛjara wa? Suɔmɔ ni wɔyɔɔ kɛhã wɔnyɛmimɛi lɛ mli baawa kɛ́ wɔhe be kɛjwɛŋ bɔ ni amɛhe yɔɔ sɛɛnamɔ kɛhã wɔ kɛ asafo lɛ nɔ.

5. Kɛ́ mɛi na suɔmɔ kɛ ekomefeemɔ ni yɔɔ wɔteŋ lɛ, mɛɛ gbɛ nɔ no baanyɛ aná amɛnɔ hewalɛ?

⁵ Bei komɛi lɛ, kɛ́ mɛi ba wɔkpeei klɛŋklɛŋ kwraa ni amɛna suɔmɔ ni yɔɔ wɔteŋ lɛ, amɛnaa kpɛɔ amɛhe. No pɛ po nyɛɔ ehãa amɛnuɔ he akɛ, amɛna anɔkwale lɛ. Yesu wie akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yoh. 13:35) Naa oblayoo ko ni atsɛɔ lɛ Chaithra lɛ niiashikpamɔ. No mli lɛ, wɔnyɛmimɛi lɛ ateŋ mɔ kome kɛ lɛ kaseɔ nii, ni efɔ̃ lɛ nine kɛtee wɔkpokpaa wulu nɔ kpee lɛ eko shishi. Be ni akpa kpee lɛ klɛŋklɛŋ gbi lɛ, Chaithra kɛɛ mɔ ni kɛ lɛ kaseɔ nii lɛ akɛ: “Mifɔlɔi efuako mi dã. Shi be ni miba nyɛkpee lɛ, klɛŋklɛŋ gbi lɛ pɛ nɔ lɛ, afua mi shii 52 sɔŋŋ! Mina akɛ, Yehowa miitsɔ ewebii ni efee ekome akɛ weku lɛ nɔ eetsɔɔ mi akɛ esumɔɔ mi. Miisumɔ ni mibafata weku nɛɛ he.” Chaithra tee ehiɛ ni abaptisi lɛ yɛ afi 2024 mli. Anɔkwa, kɛ́ mɛi ni ebɔi Biblia lɛ kasemɔ lɛ na wɔnitsumɔi kpakpai lɛ kɛ bɔ ni wɔsumɔɔ wɔhe lɛ, bei pii lɛ, etsirɛɔ amɛ ni amɛkpɛɔ amɛyiŋ akɛ amɛbaasɔmɔ Yehowa.—Mat. 5:16.

6. Kɛ́ wɔkɛ wɔnyɛmimɛi lɛ bɔ naanyo waa lɛ, mɛɛ gbɛ nɔ no baanyɛ abu wɔhe?

⁶ Kɛ́ wɔkɛ wɔnyɛmimɛi lɛ bɔ naanyo waa lɛ, no baanyɛ abu wɔhe. Paulo kɛɛ enyɛmimɛi Kristofoi lɛ akɛ: “Nyɛyaa nɔ nyɛwowoa nyɛhe hewalɛ gbi fɛɛ gbi . . . koni esha lakamɔ lɛ akahã nyɛteŋ mɔ ko kpiliŋ etsui.” (Heb. 3:13) Kɛ́ wɔnijiaŋ je wui aahu akɛ, ewa kɛhã wɔ akɛ wɔbaafee nɔ ni ja lɛ, ekolɛ wɔnyɛmi Kristofonyo ko baayɔse, ni Yehowa baanyɛ ata etsui he koni eye ebua wɔ. (Lala 73:​2, 17, 23) Yelikɛbuamɔ ni tamɔ nɛkɛ lɛ hi hã wɔ, aloo jeee nakai?

7. Mɛɛ gbɛ nɔ suɔmɔ hãa ekomefeemɔ hiɔ wɔteŋ? (Kolosebii 3:​13, 14)

⁷ Wɔ, ni ji Yehowa webii lɛ, miaa wɔhiɛ waa akɛ wɔbaasumɔ wɔnyɛmimɛi lɛ, ni enɛ hewɔ lɛ, wɔnáa jɔɔmɔi pii. (1 Yoh. 4:11) Akɛ nɔkwɛmɔnɔ lɛ, suɔmɔ ni yɔɔ wɔteŋ lɛ hewɔ lɛ, ‘wɔyaa nɔ wɔnáa tsui wɔhãa wɔhe,’ ni enɛ hãa ekomefeemɔ hiɔ wɔteŋ. (Kanemɔ Kolosebii 3:​13, 14; Efe. 4:​2-6) Enɛ hewɔ lɛ, kɛ́ wɔtee wɔkpeei srɔtoi lɛ, wɔnyɛɔ wɔkɛ wɔnyɛmimɛi lɛ gbaa sane kɛ miishɛɛ fe bɔ ni jamɔi krokomɛi amli bii lɛ feɔ.

MƆ FƐƐ MƆ KƐ WOO AHÃ ENAANYO

8. Mɛɛ gbɛ nɔ Yehowa yeɔ ebuaa wɔ koni ekomefeemɔ ahi wɔ kɛ wɔnyɛmimɛi lɛ ateŋ?

⁸ Yehowa yelikɛbuamɔ naa lɛ, ekomefeemɔ yɛ wɔ kɛ wɔnyɛmimɛi lɛ ateŋ yɛ jeŋ fɛɛ eyɛ mli akɛ wɔyeee emuu. (1 Kor. 12:25) Biblia lɛ kɛɔ wɔ akɛ, ‘Nyɔŋmɔ tsɔɔ wɔ akɛ wɔsumɔ wɔhe.’ (1 Tes. 4:9) Kɛ́ wɔɔwie yɛ gbɛ kroko nɔ lɛ, Yehowa tsɔɔ Biblia lɛ nɔ etsɔɔ wɔ nɔ tuuntu ni esa akɛ wɔfee koni wɔsumɔ wɔhe waa ni ekomefeemɔ ahi wɔteŋ. Kɛ́ wɔhe be wɔjwɛŋ nibii ni yɔɔ Biblia lɛ mli lɛ anɔ ni wɔkɛtsu nii lɛ, no baatsɔɔ akɛ wɔmiihã Yehowa ‘miitsɔɔ wɔ nii.’ (Heb. 4:12; Yak. 1:25) Ni no tuuntu ji nɔ ni Yehowa Odasefoi miaa amɛhiɛ waa akɛ amɛbaafee.

9. Mɛɛ gbɛ nɔ Romabii 12:​9-13 lɛ yeɔ ebuaa wɔ ni wɔnaa nɔ ni kɛ́ wɔfee lɛ, no baatsɔɔ akɛ wɔteŋ mɔ fɛɛ mɔ kɛ woo miihã enaanyo?

⁹ Mɛɛ gbɛ nɔ Nyɔŋmɔ Wiemɔ lɛ yeɔ ebuaa wɔ ni wɔsumɔ wɔhe koni ekomefeemɔ ahi wɔteŋ? Naa nɔ ni Paulo wie yɛ sane nɛɛ he yɛ Romabii 12:​9-13 lɛ. (Kanemɔ.) Kadimɔ akɛ, ekɛɛ “mɔ fɛɛ mɔ kɛ woo ahã enaanyo klɛŋklɛŋ.” Mɛni enɛ tsɔɔ? Etsɔɔ akɛ, wɔ klɛŋklɛŋ esa akɛ wɔfee nibii ni baahã mɛi ana akɛ wɔsumɔɔ amɛ waa. Nibii nɛɛ ekomɛi ji, ni wɔkɛ amɛhe eshai baake amɛ, wɔfee amɛ gbɔ, loo wɔfee amɛ ejurɔ. (Efe. 4:32) Kaamɛ ni nyɛmimɛi lɛ jie suɔmɔ kpo amɛtsɔɔ bo dani bo hu ofee nɔ ko ni tsɔɔ akɛ osumɔɔ amɛ. Bo “klɛŋklɛŋ” jiemɔ suɔmɔ kpo otsɔɔ amɛ. Yesu kɛɛ: “Nɔhãmɔ hãa mɔ náa miishɛɛ fe hemɔ.”—Bɔf. 20:35.

10. Mɛni wɔbaanyɛ wɔfee kɛtsɔɔ akɛ wɔkɛ hiɛdɔɔ miitsu nitsumɔ ni akɛwo wɔdɛŋ akɛ wɔkɛ woo ahã wɔnaanyo klɛŋklɛŋ lɛ? (Kwɛmɔ mfoniri lɛ hu.)

¹⁰ Kadimɔ akɛ, be ni Paulo wie akɛ wɔteŋ mɔ fɛɛ mɔ kɛ woo ahã enaanyo klɛŋklɛŋ lɛ sɛɛ nɔŋŋ ni ewo wɔ hewalɛ ni ‘wɔhiɛ adɔ wɔnitsumɔ he ni wɔkafee anihao.’ Mɔ ni hiɛ dɔɔ enitsumɔ he lɛ tsuɔ nii waa, ni ekɛ enitsumɔ shwɛɛɛ kwraa. Kɛ́ akɛ nitsumɔ wo edɛŋ lɛ, etsuɔ lɛ jogbaŋŋ. Abɛi 3:​27, 28 lɛ kɛɔ akɛ: “Mɛi ni ekpakpafeemɔ he miihia amɛ lɛ, kaaku ohiɛ oshwie amɛnɔ kɛ́ eyɛ ohewalɛ mli akɛ oooye obua amɛ.” No hewɔ lɛ, kɛ́ ona akɛ yelikɛbuamɔ he miihia mɔ ko lɛ, ye obua lɛ oya nɔŋŋ. Kaashashao shi kwraa; ni kaamu sane naa hu akɛ mɔ kroko baaye abua lɛ.—1 Yoh. 3:​17, 18.

11. Mɛni ji nɔ kroko ni baanyɛ ahã naanyobɔɔ ni yɔɔ wɔ kɛ wɔnyɛmimɛi lɛ ateŋ lɛ mli awa?

¹¹ Nɔ kroko ni wɔbaanyɛ wɔfee kɛtsɔɔ akɛ wɔkɛ woo miihã mɛi ji, ni wɔkɛ amɛhe eshai baake amɛ oya nɔŋŋ kɛ́ amɛtɔ̃ wɔnɔ. Efesobii 4:26 lɛ kɛɔ akɛ: “Nyɛkahãa hulu nyɔa shi be mli ni nyɛmli efu lolo.” Mɛni hewɔ? Tamɔ bɔ ni awie yɛ kuku 27 lɛ mli lɛ, kɛ́ wɔbooo ŋaawoo nɛɛ toi lɛ, belɛ ‘wɔmiihã Abonsam gbɛ.’ Yehowa kɛɔ wɔ shii abɔ yɛ e-Wiemɔ lɛ mli akɛ, wɔkɛ wɔnyɛmimɛi atɔmɔi ake amɛ. Kolosebii 3:13 lɛ woɔ wɔ hewalɛ ni ‘wɔya nɔ wɔkɛkekee wɔhe tswaa.’ Kɛ́ wɔmiitao wɔ kɛ wɔnyɛmimɛi lɛ ateŋ naanyobɔɔ lɛ mli awa waa lɛ, nɔ kome ni he hiaa waa ni esa akɛ wɔfee ji, ni wɔbaaku wɔhiɛ wɔshwie amɛtɔmɔi anɔ. Kɛ́ wɔkɛ mɛi atɔmɔi keɔ amɛ lɛ, eyeɔ ebuaa ni ‘wɔhiɛɔ ekomefeemɔ ni wɔtsɔ mumɔ lɛ nɔ wɔná lɛ mli, yɛ toiŋjɔlɛ ni tamɔ kpãa ni fiɔ wɔ efeɔ wɔ ekome lɛ mli.’ (Efe. 4:3) Yɛ kukufoo mli lɛ, kɛ́ wɔkɛ wɔnyɛmimɛi lɛ atɔmɔi keɔ amɛ lɛ, eyeɔ ebuaa ni ekomefeemɔ kɛ toiŋjɔlɛ hiɔ wɔteŋ.

12. Mɛni Yehowa feɔ kɛyeɔ ebuaa wɔ koni wɔkɛ mɛi atɔmɔi ake amɛ?

¹² Ekolɛ, jeee be fɛɛ be wɔbaaná lɛ mlɛo akɛ wɔkɛ mɛi ni etɔ̃ wɔnɔ lɛ ahe baake amɛ. Shi Nyɔŋmɔ mumɔ lɛ baanyɛ aye abua wɔ. Be ni Biblia lɛ wo wɔ hewalɛ ni ‘wɔsumɔsumɔɔ wɔhe’ ni ‘wɔhiɛ adɔ wɔnitsumɔ he’ lɛ sɛɛ lɛ, ekɛfata he akɛ: “Nyɛfea ekãa yɛ mumɔ lɛ naa.” (Rom. 12:11) Enɛ hãa wɔnaa akɛ, Yehowa mumɔ krɔŋkrɔŋ lɛ baanyɛ aye abua wɔ ni wɔsumɔ wɔhe ni wɔkɛ wɔnyɛmimɛi lɛ ahe eshai ake amɛ. No hewɔ lɛ, esa akɛ wɔkɛ hiɛdɔɔ asɔle wɔbi Yehowa ni edro wɔ mumɔ krɔŋkrɔŋ lɛ.—Luka 11:13.

“MLIGBÁLAMƆI AKAHI NYƐTEŊ”

13. Mɛni baanyɛ ekɛ mligbálamɔi aba asafo lɛ mli?

¹³ ‘Gbɔmɛi srɔtoi’ ni jɛ hei srɔtoi kɛ shihilɛi srɔtoi amli ni feɔ asafo. (1 Tim. 2:​3, 4) Enɛ hewɔ lɛ, ebaanyɛ esoro yiŋ ni wɔbaakpɛ yɛ saji tamɔ atadewoo kɛ hesaamɔ, helatsamɔ, loo hiɛtserɛjiemɔ he lɛ yɛ wɔnyɛmi nɔ he, ni kɛ́ wɔkwɛɛɛ ni ahi lɛ, enɛ baanyɛ ekɛ mligbálamɔi aba asafo lɛ mli. (Rom. 14:4; 1 Kor. 1:10) Shi ‘Nyɔŋmɔ etsɔɔ wɔ akɛ wɔsumɔ wɔhe.’ No hewɔ lɛ, esa akɛ wɔkwɛ jogbaŋŋ ni wɔkahã wɔnyɛmimɛi lɛ nu he akɛ yiŋ ni wɔkpɛ lɛ hi fe amɛnɔ lɛ, ni doo lɛ, esa akɛ amɛnyiɛ sɛɛ.—Fip. 2:3.

14. Mɛni esa akɛ wɔkɛma wɔhiɛ akɛ wɔbaafee be fɛɛ be? Ni mɛni hewɔ?

¹⁴ Nɔ kroko ni wɔbaanyɛ wɔfee koni mligbálamɔi akaba asafo lɛ mli ji, ni wɔbaawo wɔnyɛmimɛi lɛ hewalɛ ni wɔhã amɛná miishɛɛ be fɛɛ be. (1 Tes. 5:11) Nyɛsɛɛ nɛɛ, aye abua mɛi pii ni kpa asafoŋ kpeei baa kɛ shiɛmɔyaa lɛ ni amɛbɔi baa ekoŋŋ, ni ahe mɛi komɛi ni ajie kɛje asafo lɛ mli lɛ kɛba mli ekoŋŋ. Esa akɛ wɔkɛ miishɛɛ ahere mɛi nɛɛ fɛɛ atuu! (2 Kor. 2:8) Naa nɔ ni nyɛmi yoo ko ni kpa asafoŋ kpeei baa kɛ shiɛmɔyaa afii nyɔŋma sɔŋŋ lɛ wie yɛ bɔ ni nyɛmimɛi lɛ here lɛ be ni eku esɛɛ lɛ he. Ewie akɛ: “Nyɛmimɛi lɛ fɛɛ baŋa mi kɛ amɛhiɛ ŋmɔlɔŋmɔlɔ.” (Bɔf. 3:19) Te enɛ ná enɔ hewalɛ ehã tɛŋŋ? Ewie akɛ: “Nɔ ni amɛfee lɛ hã minu he tamɔ nɔ ni Yehowa kɛ enine miikudɔ mi kɛmiiya he ni maná miishɛɛ yɛ ekoŋŋ.” Kɛ́ wɔkɛma wɔhiɛ akɛ wɔbaatswa wɔnyɛmimɛi lɛ fɛɛ wɔma shi ni wɔwo amɛ hewalɛ lɛ, Kristo baanyɛ etsɔ wɔnɔ ehã ‘mɛi ni eetɔ amɛ, ni amɛtere jatsui ni tsii’ lɛ ahe ajɔ amɛ.—Mat. 11:​28, 29.

15. Mɛni ji nɔ kroko ni wɔbaanyɛ wɔfee kɛbaa ekomefeemɔ ni yɔɔ asafo lɛ mli lɛ yi? (Kwɛmɔ mfoniri lɛ hu.)

¹⁵ Naa nɔ kroko ni wɔbaanyɛ wɔfee kɛbaa ekomefeemɔ ni yɔɔ asafo lɛ mli lɛ yi; no ji, ni wɔbaakwɛ wɔwiemɔ jogbaŋŋ. Hiob 12:11 lɛ kɛɔ akɛ: “Ani toi ekaaa wiemɔi ekwɛɛɛ tamɔ bɔ ni lilɛi hu saa niyenii naa lɛ?” Mɛi ni le nihoomɔ lɛ, be fɛɛ be ni amɛbaahoo nɔ ko lɛ, amɛsaa amɛnaa amɛkwɛɔ akɛ eŋɔɔ lo dani amɛkɛhãa mɛi ni baaye lɛ. Nakai nɔŋŋ esa akɛ wɔ hu wɔsusu nɔ ni wɔtaoɔ wɔwie lɛ he jogbaŋŋ dani wɔgbele wɔnaa. (Lala 141:3) Be fɛɛ be lɛ, esa akɛ wɔkwɛ akɛ, ani nɔ ni wɔyaawie lɛ tswaa mɔ emaa shi, ehãa mɔ mii shɛɔ ehe, ni ‘ehe yɛ sɛɛnamɔ’ lo, dani wɔwie.—Efe. 4:29.

16. Namɛi titri esa akɛ amɛwie wiemɔi ni tswaa mɔ emaa shi ni woɔ mɔ hewalɛ?

¹⁶ Ehe miihia waa ni wɔwie wiemɔi ni tswaa mɔ emaa shi ni woɔ mɔ hewalɛ, titri lɛ, kɛ́ wumɛi loo fɔlɔi ji wɔ. (Kol. 3:​19, 21; Tito 2:4) Esa akɛ asafoŋ onukpai hu awie wiemɔi ni baahã amɛsafoŋbii lɛ atsui anyɔ amɛmli ni amɛmii ashɛ amɛhe. (Yes. 32:​1, 2; Gal. 6:1) Biblia mli abɛ ko kɛɔ akɛ: “Wiemɔ ni awieɔ yɛ be ni sa mli lɛ—ehi waa diɛŋtsɛ!”—Abɛi 15:23.

ESA AKƐ WƆSUMƆ WƆNYƐMIMƐI LƐ “YƐ NIFEEMƆ KƐ ANƆKWALE MLI”

17. Mɛni baaye abua wɔ ni wɔsumɔ wɔnyɛmimɛi lɛ kɛ wɔtsui muu fɛɛ?

¹⁷ Bɔfo Yohane wie akɛ, “esaaa akɛ wɔsumɔɔ mɛi yɛ wiemɔ mli loo lilɛi nɔ, shi moŋ yɛ nifeemɔ kɛ anɔkwale mli.” (1 Yoh. 3:18) Nɔ ni enɛ tsɔɔ ji akɛ, esa akɛ wɔsumɔ wɔnyɛmimɛi lɛ kɛ wɔtsui muu fɛɛ. Mɛni baaye abua wɔ ni wɔnyɛ wɔfee nakai? Nɔ ni baaye abua wɔ ji, ni wɔkɛ wɔnyɛmimɛi lɛ baabɔ waa. Kɛ́ wɔfee nakai lɛ, naanyobɔɔ ni yɔɔ wɔ kɛ amɛ teŋ lɛ mli baawa, ni wɔbaasumɔ amɛsane waa. No hewɔ lɛ, kɛ́ wɔtee asafoŋ kpeei loo wɔkɛ wɔnyɛmimɛi lɛ nyiɛ shiɛmɔ nɔ lɛ, esa akɛ wɔkɛ amɛ agba sane koni wɔle amɛ jogbaŋŋ. Agbɛnɛ hu, esa akɛ wɔto be ni wɔyasara amɛ. Kɛ́ wɔfee nibii nɛɛ, no baatsɔɔ akɛ wɔmiihã ‘Nyɔŋmɔ miitsɔɔ wɔ nii koni wɔsumɔ wɔhe.’ (1 Tes. 4:9) Ni no dani wɔbaanu nɔ ni lalatsɛ lɛ wie lɛ shishi jogbaŋŋ, akɛ, “Kwɛ bɔ ni ehi, kwɛ bɔ ni eyɔɔ fɛo akɛ nyɛmimɛi baafee ekome kɛhi shi!”—Lala 133:1.