Ohiɛ Asɔ Yehowa Ejurɔfeemɔ Lɛ

YEHOWA NYƆŊMƆ feɔ ejurɔ waa. (Yakobo 1:17) Nibii ni ebɔ lɛ fɛɛ hãa wɔnaa akɛ, efeee kpɛkpɛɛ. Ebɔ ŋulamii pii yɛ ŋwɛi, ni ehã shikpɔŋ lɛ nɔ fɛɛ yi kɛ tsei kɛ fɔfɔi fɛfɛji.—Lala 65:13, 14; 147:7, 8; 148:3, 4.

Mɔ ni ŋma Lala 104 lɛ hiɛ sɔ nibii fɛɛ ni Yehowa ebɔ lɛ waa, ni no hewɔ efo nakai lala lɛ kɛjie eyi lɛ. Kɛ́ okane nakai lala lɛ, ani bo hu onuɔ he akɛ oda Yehowa shi yɛ nibii fɛɛ ni efee lɛ ahewɔ? Lalatsɛ lɛ wie akɛ: “Gbiiabɔ ni mihiɛ kã nɛɛ mala mahã Yehowa, gbiiabɔ ni miyɔɔ jeŋ lolo nɛɛ mala majie mi-Nyɔŋmɔ lɛ yi.” (Lala 104:33) Ani bo hu obaasumɔ ni ofee nakai?

EJURƆFEEMƆ HE NƆKWƐMƆNƆ NI FE FƐƐ

Yehowa miisumɔ ni wɔkase lɛ, ni wɔfee mɛi ejurɔ. Ni etsɔɔ wɔ nɔ hewɔ ni esa akɛ wɔfee mɛi ejurɔ. Ekɛ emumɔ lɛ tsirɛ bɔfo Paulo ni eŋma akɛ: “Wiemɔ otsɔɔ mɛi ni ji niiatsɛmɛi yɛ shihilɛ gbɛjianɔtoo ni yɔɔ amrɔ nɛɛ mli lɛ akɛ amɛkapupu amɛhe, ni amɛhiɛ akakã ninámɔ ní bɛ shweshweeshwe lɛ nɔ, shi moŋ Nyɔŋmɔ, mɔ ni ŋɔɔ nibii ní wɔnáa mli ŋɔɔmɔ lɛ fɛɛ ehãa wɔ ní etekeɔ nɔ lɛ nɔ. Kɛɛmɔ amɛ ni amɛtsu nitsumɔ kpakpa, amɛteke nɔ yɛ nitsumɔi kpakpai amli, amɛfee ejurɔ, amɛsumɔ nihãmɔ, ní amɛkɛbɔ jwetri shweshweeshwe amɛhã amɛhe ní efee faneshi kpakpa kɛhã wɔsɛɛ, koni amɛmɔ wala diɛŋtsɛ lɛ mli kpɛŋŋ.”—1 Timoteo 6:17-19.

Yɛ wolo ni ji enyɔ ni Paulo ŋma eyahã Kristofoi ni yɔɔ Korinto lɛ mli lɛ, etsɔɔ su ni esa akɛ Kristofoi ajie lɛ kpo kɛ́ amɛmiifee mɛi ejurɔ. Ewie akɛ: “Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ loo yɛ nɔnyɛɛ naa, ejaakɛ mɔ ni hãa nɔ kɛ miishɛɛ lɛ, lɛ Nyɔŋmɔ sumɔɔ.” (2 Korintobii 9:7) Kɛ́ wɔfee mɛi ejurɔ lɛ, namɔ náa he sɛɛ? Paulo wie akɛ, mɛi ni wɔfeɔ amɛ ejurɔ lɛ náa he sɛɛ, ejaakɛ wɔye wɔbua amɛ. Shi wɔ hu wɔnáa he sɛɛ, ejaakɛ kɛ́ wɔye wɔbua mɛi krokomɛi lɛ, Yehowa jɔɔ wɔ.—2 Korintobii 9:11-14.

No sɛɛ lɛ, Paulo wie nibii ni hãa wɔnaa akɛ Nyɔŋmɔ feɔ ejurɔ lɛ ateŋ nɔ ni fe fɛɛ lɛ he. Ewie akɛ: “Shidaa ahã Nyɔŋmɔ yɛ eduromɔ keenɔ ní anyɛŋ naa atsɔɔ lɛ hewɔ.” (2 Korintobii 9:15) Ŋwanejee ko bɛ he akɛ, nibii kpakpai fɛɛ ni Yehowa kɛhãa wɔ kɛtsɔ Yesu Kristo nɔ lɛ fata ‘duromɔ keenɔ’ nɛɛ ni Paulo wie he lɛ he. Nɔkeenɔ nɛɛ jara wa aahu akɛ, wɔnyɛŋ naa wɔtsɔɔ.

Mɛni wɔbaanyɛ wɔfee kɛtsɔɔ Yehowa kɛ Yesu akɛ wɔhiɛ sɔɔ nibii fɛɛ ni amɛfee amɛhã wɔ momo, kɛ nibii ni amɛbaafee amɛhã wɔ wɔsɛɛ lɛ? Nɔ kome ni wɔbaanyɛ wɔfee ji, ni wɔbaajɛ wɔtsuiŋ wɔkɛ wɔbe, wɔhewalɛ, kɛ nibii ni wɔyɔɔ lɛ ashã afɔle kɛsɔmɔ Yehowa ni wɔkɛye wɔbua mɛi krokomɛi ni amɛbale lɛ. Fioo wɔyɔɔ jio, pii wɔyɔɔ jio, wɔbaanyɛ wɔfee enɛ.—1 Kronika 22:14; 29:3-5; Luka 21:1-4.

Gbɛi Ni Mɛi Komɛi Tsɔɔ Nɔ Amɛfi̇̃ɔ Jeŋ Muu Fɛɛ Nitsumɔ Lɛ Sɛɛ

Taakɛ eji yɛ Paulo beiaŋ lɛ, mɛi ‘ŋɔɔ nɔ ko amɛtoɔ’ ni amɛkɛyawoɔ oniatsumɔ adekai ni aŋma he akɛ “Jeŋ Muu Fɛɛ Nitsumɔ Lɛ” mli yɛ amɛsafo lɛ mli. (1 Korintobii 16:2) Daa nyɔɔŋ lɛ, asafoi fɛɛ kɛ onia ni atsu lɛ majeɔ Yehowa Odasefoi anitsumɔhe nine ni kwɛɔ maŋ ni amɛyɔɔ mli lɛ nitsumɔ lɛ nɔ lɛ. Obaanyɛ okɛ shika ni ootao okɛke lɛ hu amaje Watch Tower Bible and Tract Society of Ghana, Attention Accounts Department, P. O. Box GP 760, Accra, Ghana, aloo obaanyɛ okɛyawo fotro ni yɔɔ shikatoohei ni nyiɛ sɛɛ nɛɛ ateŋ ekome mli: Watch Tower, Barclays Bank, Accra High Street Branch, Account number 048/2746365, loo Watch Tower, Ghana Commercial Bank, Accra High Street Branch, Account number 1011130008990, aloo obaanyɛ okɛya Yehowa Odasefoi lɛ anitsumɔhe nine ni kwɛɔ maŋ ni oyɔɔ mli lɛ nitsumɔ lɛ nɔ lɛ. Obaanyɛ otsɔ gbɛi ni atsɔɔ nɔ atsuɔ onia ni atsĩ tã yɛ shishigbɛ lɛ hu nɔ okɛ nibii ni ootao okɛye obua lɛ amaje Yehowa Odasefoi anitsumɔhe nine ni kwɛɔ maŋ ni oyɔɔ mli lɛ nɔ lɛ.

NIBII NI AKƐKEƆ FAA

Kɛ́ akɛ tsɛk miihã kɛtsɔ adrɛs ni yɔɔ yiteŋgbɛ lɛ nɔ lɛ, esa akɛ aŋma “Watch Tower” yɛ nɔ akɛ mɛi ni aawo shika lɛ aahã.
Abaanyɛ akɛ jwinei loo ojarawa nibii krokomɛi hu ake.

NIBII NI AKƐHÃ SHI AKƐKEKO LƐ AHE GBƐJIANƆTOO

Abaanyɛ akɛ shika ahã Watch Tower Bible and Tract Society of Ghana koni akɛtsu jeŋ fɛɛ nitsumɔ lɛ he nii. Shi kɛ́ mɔ ni kɛ shika lɛ hã lɛ miitao lɛ, akɛbaahã lɛ. Kɛ́ ootao ole sane nɛɛ mli jogbaŋŋ lɛ, ofainɛ ŋmaa Accounts Department lɛ kɛtsɔ adrɛs ni atsɔɔ yɛ yiteŋgbɛ lɛ nɔ, loo obaanyɛ otswa amɛ tɛlifoŋ yɛ (030) 2712456 nɔ.

EJURƆFEEMƆ HE GBƐJIANƆTOO

Kɛfata shika ni akɛkeɔ kwraa lɛ he lɛ, ayɛ gbɛi krokomɛi hu ni atsɔɔ nɔ akeɔ nii koni akɛtsu Maŋtsɛyeli nitsumɔ lɛ yɛ jeŋ fɛɛ. Ekomɛi ji:

Ŋshuɔransi: Mɔ ko baanyɛ aŋma Watch Tower Bible and Tract Society of Ghana gbɛ́i awo ŋshuɔransi ko nɔ akɛ mɛi ni akɛ ŋshuɔransi lɛ ahã yɛ mɔ lɛ gbele sɛɛ.

Shika ni Akɛto Shikatoohe: Mɔ ko baanyɛ eŋma yɛ shika ni ekɛto shikatoohe, shika ko ni ekɛhã shikatoohe ko be kukuoo ko, loo epɛŋshɛŋ shika he woji lɛ anɔ ákɛ akɛ shika nɛɛ ahã Watch Tower Bible and Tract Society of Ghana yɛ egbele sɛɛ, ni ebaafee enɛ yɛ mlai ni maŋ ni eyɔɔ nɔ lɛ ewo yɛ saji ni tamɔ nakai lɛ ahe lɛ naa.

Shika ni Akɛwo Nitsumɔ ko mli loo Akɛfa Shikatoohe: Mɔ ko baanyɛ ekɛ shika ni ekɛwo nitsumɔ ko mli loo ekɛfa shikatoohe ko lɛ ahã Watch Tower Bible and Tract Society of Ghana.

Shikpɔji kɛ Tsũi: Mɔ ko baanyɛ ekɛ shikpɔji kɛ tsũi ni baahi hɔ̃ɔmɔ ake kwraa, loo ekɛ lɛ diɛŋtsɛ eshĩa ko ni eyɔɔ mli lɛ ahã akɛ ekɛmiike kwraa shi ebaahi shĩa lɛ mli kɛyashi ebaagbo. Hã nitsumɔhe nine ni kwɛɔ maŋ ni oyɔɔ mli lɛ nitsumɔ lɛ nɔ lɛ ale dani okɛ shikpɔŋ loo tsũ ko ahã.

Shamaŋsheo: Abaanyɛ akɛ nibii ni ayɔɔ loo shika ake Watch Tower Bible and Tract Society of Ghana kɛtsɔ shamaŋsheo ni aŋma yɛ mla naa lɛ nɔ.

Taakɛ wiemɔ ni ji “ejurɔfeemɔ he gbɛjianɔtoo” lɛ tsɔɔ lɛ, ebaabi ni mɔ ko ni miitao ni ekɛ nibii ni atsi tã kɛtsɔ hiɛ lɛ eko ake lɛ ato he gbɛjianɔ.

Kɛ́ mɔ ko miisumɔ ni eye ebua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ gbɛjianɔtoi nɛɛ ateŋ eko nɔ, loo eetao ele amɛteŋ eko he saji babaoo lɛ, ebaanyɛ etswa Accounts Department lɛ loo eŋma amɛ wolo kɛtsɔ adrɛs ni yɔɔ shishigbɛ nɛɛ nɔ.