Ani Biblia Lɛ Gbɛtsɔɔmɔi Ni Kɔɔ Nɔ Ni Ja Kɛ Nɔ Ni Ejaaa He Lɛ Ahe Miihia Lolo?

Mɛi babaoo, ni mɛi ni tsɛɔ amɛhe Kristofoi po fata he lɛ ateŋ mɛi komɛi heɔ amɛyeɔ akɛ Biblia jeŋba he mlai ni kɔɔ bɔlɛnamɔ kɛ gbalashihilɛ he lɛ be eho. Jamɔi komɛi etsake amɛtsɔɔmɔi ni kɔɔ jeŋba kpakpa kɛ jeŋba gbonyo he lɛ hiɛ koni ekɛ susumɔ ni mɛi hiɛ nɛɛ akpã gbee. Ani Biblia gbɛtsɔɔmɔi ni kɔɔ nɔ ni ja kɛ nɔ ni ejaaa he lɛ ahe miihia lolo? Hɛɛ! Sane nɛɛ baatsɔɔ wɔ nɔ hewɔ ni wɔkɛɔ akɛ ehe miihia lolo lɛ.

Nyɔŋmɔ gbɛtsɔɔmɔi ni kɔɔ nɔ ni ja kɛ nɔ ni ejaaa he lɛ he miihia adesai

Abɔ gbɔmɛi koni amɛhi shi yɛ amɛ-Bɔlɔ lɛ gbɛtsɔɔmɔi anaa. Biblia lɛ kɛɔ akɛ: “Bɔ ni gbɔmɔ ni nyiɛ lɛ baakudɔ lɛ diɛŋtsɛ enajifaamɔi ehã po lɛ, ebɛ edɛŋ.” (Yeremia 10:23) Eyɛ mli akɛ Yehowaa Nyɔŋmɔ bɔ wɔ bɔ ni baahã wɔ diɛŋtsɛ wɔkpɛ wɔyiŋ yɛ saji ahe moŋ nɛ, shi ehãaa wɔ hegbɛ lɛ ni wɔ diɛŋtsɛ wɔtsɔɔ nɔ ni ja kɛ nɔ ni ejaaa. Nyɔŋmɔ miisumɔ ni wɔkwɛ lɛ kɛhã gbɛtsɔɔmɔ yɛ nɔ ni ja kɛ nɔ ni ejaaa gbɛfaŋ.​—Abɛi 3:5.

Wɔnaa Nyɔŋmɔ mlai ni kɔɔ jeŋba he lɛ yɛ Biblia lɛ mli. Naa yiŋtoi enyɔ komɛi ahewɔ ni mlai nɛɛ ahe yɛ sɛɛnamɔ waa lolo lɛ.

• Nyɔŋmɔ ni bɔ wɔ. (Lala 100:3) Akɛ wɔ-Bɔlɔ lɛ, Yehowa Nyɔŋmɔ le nɔ tuuntu ni baahã wɔná miishɛɛ kɛ hewalɛ yɛ gbɔmɔtsoŋ, jwɛŋmɔŋ, kɛ henumɔŋ fɛɛ. Agbɛnɛ hu, ele nɔ ni kɛ́wɔku wɔhiɛ wɔshwie ejeŋba he mlai anɔ lɛ, ebaaba wɔnɔ. (Galatiabii 6:7) Kɛfata he lɛ, wɔhilɛkɛhamɔ kã Yehowa tsui nɔ waa. Enɛ hewɔ lɛ, Biblia lɛ wie yɛ Nyɔŋmɔ he akɛ, “Mɔ ni tsɔɔ bo nii koni oná he sɛɛ lɛ, Mɔ ni tsɔɔ bo gbɛ yɛ gbɛ ni esa akɛ onyiɛ nɔ lɛ nɔ lɛ.”​—Yesaia 48:17.

• Nibii ni wɔshweɔ lɛ baanyɛ alaka wɔ. Mɛi babaoo nuɔ he akɛ, amɛbaanyɛ amɛtsɔ bɔ ni amɛ amɛsumɔɔ ni amɛfee amɛnii amɛhã lɛ anɔ amɛtsɔɔ nɔ ni ja kɛ nɔ ni ejaaa, no ji ni amɛbaadi nibii ni amɛ amɛshweɔ lɛ asɛɛ. Shi Biblia lɛ kɛɔ akɛ, “tsui lakaa mɔ fe nɔ fɛɛ nɔ, ni ehe yɛ ahuntoo.” (Yeremia 17:9) Kɛ́wɔhãaa Nyɔŋmɔ wiemɔ lɛ loo ehiɛshikamɔ lɛ akudɔ wɔtsui lɛ, no lɛ wɔtsui baahã wɔfee nibii komɛi ni wɔbaashwã wɔhe sɛɛ mli.​—Abɛi 28:26; Jajelɔ 10:2.

Ani esa akɛ jamɔŋ hiɛnyiɛlɔi aku amɛhiɛ amɛshwie nɔ ni Biblia lɛ kɛɛ eja kɛ nɔ ni ekɛɛ ejaaa lɛ anɔ?

Dabi! Biblia lɛ tsɔɔ wɔ Nyɔŋmɔ he anɔkwalei kɛ bɔ ni eesumɔ ni wɔhi shi wɔhã. (1 Korintobii 6:9-11; Galatiabii 5:19-23) Nyɔŋmɔ miisumɔ ni adesai ale anɔkwalei ni kɔɔ nɔ ni ja kɛ nɔ ni ejaaa lɛ ahe. (1 Timoteo 2:3, 4) Esa akɛ Kristofoi ni ji tsɔɔlɔi lɛ atsɔɔ nibii ni Nyɔŋmɔ Wiemɔ lɛ kɛɔ lɛ.​—Tito 1:7-9.

Mɛi babaoo ni sumɔɔɔ ni amɛhiɔ shi yɛ Biblia mli jeŋba he mlai anaa lɛ, nyiɛɔ jamɔŋ tsɔɔlɔi ni “baakɛɛ amɛ nɔ ni amɛtaoɔ amɛnu lɛ asɛɛ.” (2 Timoteo 4:3, shishigbɛ niŋmaa) Kɛl̃ɛ, Nyɔŋmɔ Wiemɔ lɛ kɛ kɔkɔbɔɔ ni yɔɔ hiɛdɔɔ nɛɛ hãa akɛ: “Kpoo hã mɛi ni tsɛɔ ekpakpa akɛ efɔŋ, kɛ efɔŋ akɛ ekpakpa lɛ.” (Yesaia 5:20) Eyɛ faŋŋ akɛ, Nyɔŋmɔ baagbala jamɔŋ hiɛnyiɛlɔi ni etsɔɔɔ mɛi nɔ ni Nyɔŋmɔ kɛɛ eja kɛ nɔ ni ejaaa lɛ atoi.

Ani Biblia mli jeŋba he mlai lɛ hãaa mɛi akpɛlɛ mɛi krokomɛi asusumɔi anɔ?

Dabi. Mɛi ni miitao amɛsa Nyɔŋmɔ hiɛ lɛ nyiɛɔ Yesu Kristo nɔkwɛmɔnɔ lɛ kɛ etsɔɔmɔi lɛ asɛɛ. Yesu tsɔɔ esɛɛnyiɛlɔi lɛ akɛ amɛkakojo mɔ ko, moŋ lɛ, amɛjie suɔmɔ kɛ bulɛ kpo amɛtsɔɔ mɔ fɛɛ mɔ.​—Mateo 5:43, 44; 7:1.

Yesu tsɔɔ esɛɛnyiɛlɔi lɛ akɛ amɛkɛ Nyɔŋmɔ jeŋba he mlai atsu nii yɛ amɛshihilɛ mli nɔ fɛɛ nɔ mli. Kɛl̃ɛ, ehã amɛnu shishi akɛ, mɛi komɛi hu baasumɔ ni amɛhi shi yɛ shishitoo mlai krokomɛi anaa. (Mateo 10:14) Yesu fãaa esɛɛnyiɛlɔi lɛ ni amɛtsɔ pɔlitis loo gbɛi krokomɛi anɔ amɛkɛ Nyɔŋmɔ susumɔi afĩ mɛi krokomɛi anɔ.​—Yohane 17:14, 16; 18:36.

Kɛ́wɔhi shi yɛ Biblia jeŋba he mlai anaa lɛ, mɛɛ sɛɛnamɔi komɛi wɔnáa?

Mɛi ni bɔɔ mɔdɛŋ amɛhiɔ shi yɛ Nyɔŋmɔ jeŋba he mlai ni kɔɔ nɔ ni ja kɛ nɔ ni ejaaa lɛ he lɛ anaa lɛ, baaná he sɛɛ amrɔ nɛɛ kɛ wɔsɛɛ hu. (Lala 19:8, 11) Sɛɛnamɔi lɛ ekomɛi nyiɛ sɛɛ nɛɛ:

• Amɛmii baashɛ amɛhe waa.​—Abɛi 29:6.

• Amɛbaatsɔmɔ Nyɔŋmɔ nanemɛi kpaakpa.​—Abɛi 3:32.

• Nyɔŋmɔ baaye ebua amɛ yɛ fimɔ beiaŋ.​—Abɛi 11:8.

• Amɛbaaná hiɛnɔkamɔ akɛ amɛbaahi shi yɛ shikpɔŋ lɛ nɔ kɛya naanɔ.​—Lala 37:29.