Nibii Ajara Miiya Ŋwɛi Oyayaayai Yɛ Jeŋ Fɛɛ​—Mɛni Biblia Lɛ Kɛɔ Yɛ He?

Kuu ko ni atsɛɔ lɛ World Bank Group lɛ hiɛnyiɛlɔ lɛ bɔ kɔkɔ yɛ kuu lɛ amaniɛbɔɔ ni je kpo yɛ June 2022 lɛ mli akɛ: “Kɛ́ wɔkwɛɛɛ ni ahi lɛ, shihilɛ lɛ mli bawa waa ekoŋŋ yɛ jeŋ fɛɛ. Ejaakɛ nibii ajara miiya ŋwɛi oyayaayai, shi mɛi bɛ shika bɔ ni fa ni amɛkɛbaahe nii.”

Kuu ko ni atsɛɔ lɛ International Monetary Fund lɛ tsɔɔ mli akɛ: “Pɛtro, gaasi, kɛ niyenii ajara miiya ŋwɛi oyayaayai yɛ jeŋ fɛɛ, ni mɛi ni yɔɔ maji ni bɛ shika tsɔ amli lɛ ji mɛi ni esa amɛhe waa.”

Biblia lɛ yeɔ ebuaa wɔ ni wɔnaa nɔ hewɔ ni shihilɛ lɛ mli ewa waa lɛ, etsɔɔ wɔ bɔ ni wɔbaafee wɔkpee naa, kɛ nɔ hewɔ ni esa akɛ wɔkpa gbɛ akɛ naagbai nɛɛ asɛɛ baafo kwraa lɛ.

Nɔ hewɔ ni nibii ajara miiya ŋwɛi oyayaayai yɛ “naagbee gbii” nɛɛ amli lɛ

• Biblia lɛ tsɛɔ bei ni wɔyɔɔ mli nɛɛ akɛ “naagbee gbii lɛ.”​—2 Timoteo 3:1.

• Yesu kɛɛ, yɛ naagbee bei nɛɛ amli lɛ, “abaana gbeyei nibii” loo shihilɛi ni woɔ mɔ he gbeyei. (Luka 21:11) Kɛ́ nibii ajara miiya ŋwɛi oyayaayai lɛ, mɛi sheɔ gbeyei loo amɛhaoɔ waa. Mɛi yeɔ amɛtsui waa yɛ bɔ ni amɛshihilɛ baaji wɔsɛɛ, kɛ bɔ ni amɛbaafee amɛkwɛ amɛwekui lɛ he.

• Kpojiemɔ wolo lɛ ni yɔɔ Biblia lɛ mli lɛ gba akɛ, nibii ajara baawa waa yɛ naagbee gbii nɛɛ amli. Aŋma yɛ mli akɛ: “Minu nɔ ko ni tamɔ gbee ko . . . miikɛɛ: ‘Wiiti susumɔnɔ kome lɛ, okɛ gbi muu fɛɛ nitsumɔ nyɔmɔwoo baahe.’”​—Kpojiemɔ 6:6, Easy-to-Read Version.

Kɛ́ ootao ole “naagbee gbii lɛ” kɛ Kpojiemɔ wolo lɛ mli gbalɛ lɛ ahe saji krokomɛi lɛ, kwɛmɔ vidio ni ji Je Lɛŋ Shihilɛ Etsake Kwraa Kɛjɛ Afi 1914 Kɛbaa lɛ, ni okane sane ni ji “Okpɔŋɔnɔtaralɔi Ejwɛ Lɛ—Namɛi Ni?” lɛ hu.

Wɔnaagbai lɛ fɛɛ asɛɛ baafo

• “Amɛbaamamɔ tsũi ni amɛbaahi mli, ni amɛbaafee wain ŋmɔji ni amɛbaaye amɛmli yibii lɛ. Amɛmamɔŋ tsũi ni mɔ kroko ahi mli, ni amɛduŋ nii hu ni mɔ kroko aye.”​—Yesaia 65:21, 22.

• “Shikpɔŋ lɛ nɔ baayi kɛ ŋmaa; ebaafa babaoo kɛteke nɔ yɛ gɔji lɛ ayiteŋ.”​—Lala 72:16.

• “Yehowa kɛɛ akɛ, ‘Akɛni aawa nɔnalɔi lɛ ayi hewɔ lɛ, akɛni ohiafoi lɛ miikɛ̃mɔ hewɔ lɛ, mate shi madamɔ shi.’”​—Lala 12:5.a

Etsɛŋ, Nyɔŋmɔ baafo shihilɛi fɛɛ ni hãaa mɛi aná amɛhiamɔ nii lɛ asɛɛ kwraa; enɛ baŋ yɛ maŋ kome pɛ mli, shi moŋ yɛ jeŋ fɛɛ. Kanemɔ sane ni ji “Ani Be Ko Baaba Ni Mɔ Fɛɛ Mɔ Baaná Ehiamɔ Nii?” lɛ koni ona gbɛ nɔ ni ebaatsɔ efee nakai.

Shi ŋmɛnɛ po lɛ, Biblia lɛ baanyɛ awa bo ni onyɛ odamɔ nibii ajara ni yaa ŋwɛi oyayaayai lɛ naa. Yɛ mɛɛ gbɛ nɔ? Ŋaawoi kpakpai yɛ Biblia lɛ mli ni kɛ́ okɛtsu nii lɛ ebaaye ebua bo ni ohiɛ shika jogbaŋŋ. (Abɛi 23:4, 5; Jajelɔ 7:12) Kɛ́ ootao ole enɛ he saji krokomɛi lɛ, kanemɔ sane ni ji “Protect Your Livelihood” lɛ kɛ “Bɔ Ni Obaafee Ohi Shi Kɛ́ Shika Ni Onáa Lɛ Faaa Po” lɛ.