Mɛni Hewɔ Hetsɛ̃ Efa Nɛkɛ?​—⁠Mɛni Biblia Lɛ Kɛɔ Yɛ He?

Wiemɔi ni awieɔ ashiɔ mɛi kɛ efɔŋ ni afeɔ mɛi yɛ hetsɛ̃ hewɔ, kɛ yiwalɛ nii ni afeɔ mɛi yɛ wiemɔ kroko ni amɛwieɔ loo maŋ kroko nɔ amɛjɛ lɛ hewɔ lɛ ahe amaniɛbɔi eyi adafitswai amli obɔ̃.

• “Ta kɛ béi ni miiya nɔ yɛ Israel kɛ Gaza teŋ lɛ, kɛ bɔ ni mɛi pii sumɔɔ yiwalɛ nifeemɔ ni amɛhe tsɛ̃ɔ mɛi hewɔ lɛ, hetsɛ̃ wiemɔi efa waa yɛ soshia midia nɔ fe bei fɛɛ ni eho.”​—The New York Times, November 15, 2023.

• “Kɛjɛ October 7 kɛ baa nɛɛ, nyɛɛ loo hetsɛ̃ wiemɔi, kɛ yiwalɛ nii ni afeɔ mɛi yɛ maŋ kroko nɔ ni amɛjɛ loo wiemɔ kroko ni amɛwieɔ hewɔ lɛ amli ewo wu waa diɛŋtsɛ.”​—Dennis Francis, United Nations General Assembly lɛ sɛinɔtalɔ lɛ, November 3, 2023.

Hetsɛ̃ wiemɔi, yiwalɛ nifeemɔi, kɛ ta jeee nɔ ko hee. Anɔkwa, Biblia lɛ wie mɛi komɛi ni hi shi yɛ blema lɛ ahe akɛ ‘amɛkɛ amɛwiemɔi ni naa wa lɛ maa mɛi anɔ tamɔ atáa gãimlibii lɛ,’ amɛwuɔ tai, ni amɛfeɔ yiwalɛ nii. (Lala 64:3; 120:7; 140:1) Kɛ̃lɛ, Biblia lɛ tsɔɔ mli akɛ hetsɛ̃ ni wɔnaa ŋmɛnɛ lɛ jeee hetsɛ̃ folo ko kɛkɛ.

Hetsɛ̃​—Eji nɔ ko ni kadiɔ wɔbei nɛɛ

Biblia lɛ tsɔɔ yiŋtoi enyɔ komɛi ahewɔ ni hetsɛ̃ efa waa ŋmɛnɛ lɛ.

1. 1. Biblia lɛgba akɛ, be ko baaba ni “mɛi pii asuɔmɔ lɛ he baajɔ.” (Mateo 24:12) Mɛi ejieŋ suɔmɔ kpo, moŋ lɛ, amɛbaajie sui ni hãa mɛi ahe tsɛ̃ɔ mɛi lɛ akpo.​—2 Timoteo 3:1-5.

2. 2. Satan Abonsam ni mɛi kaseɔ lɛ ehã hetsɛ̃ efa babaoo yɛ je lɛ mli ŋmɛnɛ. Biblia lɛ kɛɛ “jeŋ muu lɛ fɛɛ kã mɔ fɔŋ lɛ hewalɛ mli.”​—1 Yohane 5:19; Kpojiemɔ 12:9, 12.

Shi Biblia lɛ tsɔɔ akɛ etsɛŋ Nyɔŋmɔ baafo nibii ni hãa mɛi ahe tsɛ̃ɔ mɛi lɛ sɛɛ kwraa. Nɔ ni fe fɛɛ lɛ, ebaatsa mɛi fɛɛ ni hetsɛ̃ ehã amɛna nɔ lɛ. Biblia lɛ ewo shi akɛ:

• Nyɔŋmɔ baatsumɔ “amɛhiŋmɛiiaŋ yaafonui fɛɛ, ni gbele bɛ dɔŋŋ, ni awerɛhoyeli loo yaafo loo piŋmɔ ko hu bɛ dɔŋŋ. Tsutsu nibii lɛ eho etee.”​—Kpojiemɔ 21:4.