2023: Afi Ko Ni Hã Mɛi Babaoo Ye Amɛtsui Waa​—⁠Mɛni Biblia Lɛ Kɛɔ Yɛ He?

Yɛ afi 2023 mli lɛ, nibii babaoo ni tee nɔ yɛ jeŋ fɛɛ lɛ hã efee faŋŋ akɛ, wɔyɛ bei ni Biblia lɛ tsɛɔ lɛ akɛ “naagbee gbii lɛ” amli lɛɛlɛŋ. (2 Timoteo 3:1) Kadimɔ bɔ ni nibii ni yaa nɔ amrɔ nɛɛ kɛ nɔ ni Biblia lɛ egba efɔ̃ shi akɛ ebaaba lɛ yɛ wɔbei nɛɛ amli lɛ yaa pɛpɛɛpɛ.

Biblia lɛ kɛ nibii ni yaa nɔ yɛ je lɛ mli

“Tai kɛ tai amaniɛbɔi.”​—Mateo 24:6.

• “Tai miiya nɔ eefa yɛ je lɛŋ hei babaoo.”a

“Shikpɔŋhosomɔi baaba yɛ heihei.”​—Marko 13:8.

• “Kɛjɛ be ni afi 2023 je shishi lɛ, shikpɔŋhosomɔi 13 ni naa walɛ shɛɔ magnitude 7 eba yɛ jeŋ fɛɛ, ni enɛ ji yibɔ ni fe fɛɛ yɛ afi kome mli kɛjɛ be ni abɔi shikpɔŋhosomɔi ni baa lɛ ahe akɔntaabuu.”b

“Abaana gbeyei nibii.”​—Luka 21:11.

• “Tsutsu ko lɛ wɔkɛɔ akɛ jeŋ dɔɔ waa; shi amrɔ nɛɛ wɔbaakɛɛ akɛ jeŋ miidɔ aahu akɛ eehe eŋala.”​—António Guterres, Jeŋmaji Ekomefeemɔ lɛ hiɛnyiɛlɔ.c

“Hɔmɔ.”​—Mateo 24:7.

• “2023: Mɛi ni ewa kɛhã amɛ akɛ amɛbaaná niyenii kɛhã amɛwekui lɛ anine nyɛ shi ekoŋŋ, ejaakɛ afi nɛɛ hu lɛ hɔmɔ ye amɛwekui lɛ waa.”d

“Bei krɛdɛi ni mli shihilɛ wa.”​—2 Timoteo 3:1.

• “Yɛ jeŋ fɛɛ lɛ, kɛ́ ohala mɛi kpaanyɔ lɛ, amɛteŋ mɔ kome yɛ jwɛŋmɔŋ naagba ko.”e

Mɛni wɔbaanyɛ wɔkpa gbɛ yɛ afi 2024?

Mɔ ko mɔ ko nyɛŋ atsɔɔ nɔ tuuntu ni baaba yɛ afi 2024 mli. Shi nibii ni yaa nɔ yɛ je lɛ mli lɛ tsɔɔ akɛ, etsɛŋ Nyɔŋmɔ Maŋtsɛyeli lɛ, loo ŋwɛi nɔyeli lɛ baaye adesai anɔyelii fɛɛ najiaŋ, ni ebaafo nibii fɛɛ ni hãa adesai naa nɔ kɛ nibii ni hãa amɛyeɔ amɛtsui lɛ asɛɛ.​—Daniel 2:44; Kpojiemɔ 21:4.

Shi dani nakai be lɛ baashɛ lɛ, kɛ́ nɔ ko ehã wɔmiiye wɔtsui lɛ, wɔbaanyɛ wɔkɛ wɔhiɛ afɔ̃ Yehowa nɔ kɛhã yelikɛbuamɔ. Biblia lɛ kɛɔ akɛ:

“Kɛ́ gbeyei mɔ mi lɛ, mikɛ mihiɛ fɔ̃ɔ onɔ.”​—Lala 56:3.

Mɛni wɔbaanyɛ wɔfee kɛtsɔɔ akɛ wɔkɛ wɔhiɛ fɔ̃ɔ Nyɔŋmɔ nɔ? Wɔmiifɔ̃ bo nine koni okase shi ni Biblia lɛ ewo akɛ wɔsɛɛ lɛ, nɔnaa ehiŋ shi dɔŋŋ lɛ he nii babaoo. Kaa wɔ-Biblia kasemɔ ni aheee nɔ ko, ni atsɔɔ sanegbaa nɔ afeɔ lɛ okwɛ koni ona bɔ ni bo kɛ oweku lɛ baafee aná Biblia mli shiwoi lɛ ahe sɛɛ.