Bɔ Ni Obaafee Oná Hiɛnɔkamɔ Yɛ Afi 2024 Mli​—Mɛni Biblia Lɛ Kɛɔ Yɛ He?

Mɛi babaoo nuɔ he akɛ anáŋ naagbai ni je lɛ kɛbaakpe yɛ afi 2024 lɛ anaa tsabaa. Kɛ̃lɛ, wɔbaanyɛ wɔná hiɛnɔkamɔ kɛhã wɔsɛɛ. Nɛgbɛ wɔbaaná yɛ?

Biblia lɛ hãa hiɛnɔkamɔ

Biblia lɛ ewo shi akɛ, Nyɔŋmɔ baatsu naagbai ni hãa wɔshihilɛ feɔ tamɔ hiɛnɔkamɔ ko bɛ lɛ ahe nii. Etsɛŋ kwraa, “[Nyɔŋmɔ baatsumɔ wɔhiŋmɛiiaŋ] yaafonui fɛɛ, ni gbele bɛ dɔŋŋ, ni awerɛhoyeli loo yaafo loo piŋmɔ ko hu bɛ dɔŋŋ.”​—Kpojiemɔ 21:4.

• Kɛ́ ootao ole Yehowa shiwoo kɛhã wɔsɛɛ lɛ he saji krokomɛi lɛ, kanemɔ sane ni ji “Hiɛnɔkamɔ Diɛŋtsɛ Ni Tsɔɔ Akɛ Nibii Baahi Wɔsɛɛ” lɛ.

Bɔ ni Biblia lɛ baanyɛ aye abua bo bianɛ

Hiɛnɔkamɔ ni Biblia lɛ kɛhãa lɛ baanyɛ aye abua bo ni okanu he akɛ hiɛnɔkamɔ ko kwraa bɛ, agbɛnɛ hu, ebaahã oná hiɛnɔkamɔ akɛ nibii baahi. (Romabii 15:13) Ŋaawoi kpakpai ni yɔɔ Biblia lɛ mli lɛ baanyɛ aye abua bo ni okpee naagbai ni okɛkpeɔ amrɔ nɛɛ, tamɔ ohia, jalɛsane ni ayeee, kɛ helai lɛ anaa.

• Kwɛmɔ vidio ni ji Juan Pablo Zermeño: Yehowa Ehã Mitsui Enyɔ Mimli Yɛ Shihilɛ Mli lɛ. Ebaahã ona bɔ ni Biblia hiɛnɔkamɔ lɛ hã nuu ko ná toiŋjɔlɛ ni emii shɛ ehe hu, eyɛ mli akɛ afɔ lɛ yɛ ohia shihilɛ mli.

• Kanemɔ sane ni ji “Can I Find Words of Comfort in the Bible? (Ani Manyɛ Maná Miishɛjemɔ Wiemɔi Yɛ Biblia Lɛ Mli?)” lɛ. Ebaahã ona bɔ ni Biblia lɛ baanyɛ aye abua bo kɛ́ onu fɔyeli he, onii fee mɔbɔ, ohao, loo osuɔlɔ ko gbo.

• Kwɛmɔ vidio ni ji I Put Down My Rifle lɛ koni ona bɔ ni Biblia lɛ ye ebua yoo ko ni be ko lɛ eji asraafonyo lɛ. Ewie akɛ, bei ko ni eho lɛ, “mikɛ mihe woɔ jeŋba shara mli ni minaaa mɛi mɔbɔ.” Shi amrɔ nɛɛ Biblia lɛ eye ebua lɛ ni ená hiɛnɔkamɔ.

Hã afi 2024 afee afi kpakpa kɛhã bo kɛ oweku lɛ. Kasemɔ bɔ ni Biblia lɛ baanyɛ aye abua bo lɛ he nibii babaoo. Kaa Biblia mli nikasemɔ ni wɔkɛ mɛi feɔ tamɔ sanegbaa ni wɔheee shika lɛ okwɛ. Ebaaye ebua bo ni ole bɔ ni Nyɔŋmɔ baanyɛ ehã oná ‘toiŋjɔlɛ jwɛŋmɔ ni ahi ahã bo wɔsɛɛ koni oná hiɛnɔkamɔ.’​—Yeremia 29:11.