Ani osusu he dã akɛ obaakane Biblia lɛ, shi okaneee akɛni onu he tamɔ mɛi ni awie amɛhe kɛtsɔ hiɛ lɛ hewɔ? Yɛ mɛi pii agbɛfaŋ lɛ, Biblia lɛ kanemɔ ji jatsu kɛhã amɛ. Shi kɛ́ oná ole akɛ Biblia lɛ baanyɛ aye abua bo ni oná miishɛɛ, ni otsui anyɔ omli waa hu? Ni kɛ́ oná ole akɛ gbɛi komɛi yɛ ni obaanyɛ otsɔ nɔ okane Biblia lɛ ni baahã onya he waa hu? Ani obaasumɔ ni ole nɔ ni Biblia lɛ baanyɛ ahã onine ashɛ nɔ?

Susumɔ nibii fioo komɛi ni mɛi komɛi ni na akɛ sɛɛnamɔ yɛ he akɛ amɛbaakane Biblia lɛ wie be ni amɛje ekanemɔ shishi lɛ he okwɛ.

Ezekiel, ni eye aaafee afii 22 lɛ wie akɛ: “Be ko ni eho lɛ, mitamɔ mɔ ko ni miikudɔ tsɔne ni bɛ he ko pɔtɛɛ ni eyaa. Shi Biblia lɛ ni mikaneɔ lɛ eye ebua mi ni miná miishɛɛ. Ŋaawoi kpakpai yɛ mli ni manyɛ mikɛtsu nii daa gbi.”

Frieda, ni lɛ hu eye aaafee afii 25 lɛ wie akɛ: “No mli lɛ, mitsui shaa mi waa. Shi akɛni mikaneɔ Biblia lɛ hewɔ lɛ, minyɛ miye mihe nɔ. Enɛ hewɔ lɛ, mɛi nyɛɔ amɛbɛŋkɛɔ mi, ni miná nanemɛi pii agbɛnɛ.”

Yoo ko ni atsɛɔ lɛ Eunice ni eye aaafee afii 55 lɛ wie yɛ Biblia lɛ he akɛ, “Eeye eebua mi ni miitsɔ gbɔmɔ kpakpa, ni ehã miitsake misui gbohii lɛ.”

Taakɛ mɛi nɛɛ kɛ mɛi akpekpei abɔ krokomɛi ni kaneɔ Biblia lɛ eyɔse lɛ, kɛ́ okaneɔ Biblia lɛ, obaaná miishɛɛ waa. (Yesaia 48:17, 18) Agbɛnɛ hu lɛ, ebaanyɛ eye ebua bo ni (1) okpɛ yiŋ kpakpai, (2) oná nanemɛi kpakpai, (3) onyɛ okpee naagbai anaa, kɛ (4) nɔ ni fe fɛɛ lɛ, ole anɔkwale ni kɔɔ Nyɔŋmɔ he. Ŋaawoo ni yɔɔ Biblia lɛ mli lɛ jɛ Nyɔŋmɔ ŋɔɔ, no hewɔ lɛ kɛ́ okɛtsu nii lɛ, ogbaŋ afã kɔkɔɔkɔ. Nyɔŋmɔ wooo ŋaa gbonyo kɔkɔɔkɔ.

Nɔ ni he hiaa ji, ni oje ekanemɔ shishi. Mɛɛ nibii baanyɛ aye abua bo koni onyɛ oje ekanemɔ shishi, ni onya he waa?

Mɛni obaanyɛ ofee koni onya Biblia lɛ kanemɔ he, ni oná he sɛɛ? Naa ŋaawoi enumɔ ni eye ebua mɛi babaoo.

Taomɔ he ko ni nɔ ko gbalaŋ ojwɛŋmɔ. Bɔɔ mɔdɛŋ ni oná he ko ni yɔɔ dioo. Jiemɔ nibii ni baanyɛ agbala ojwɛŋmɔ lɛ kɛjɛ jɛmɛ, koni ojwɛŋmɔ ahi nɔ ni okaneɔ lɛ nɔ. Kɛ́ kane ni yɔɔ he ni okaneɔ yɛ lɛ sa, ni kɔɔyɔɔ kpakpa hu yɛ jɛmɛ lɛ, ebaaye ebua bo ni oná nɔ ni okaneɔ lɛ he sɛɛ waa.

Saamɔ ojwɛŋmɔ kɛhã nɔ ni obaakane lɛ. Akɛni Biblia lɛ jɛ wɔŋwɛi Tsɛ lɛ ŋɔɔ hewɔ lɛ, kɛ́ ofee onii tamɔ gbekɛ ni miisumɔ ni efɔlɔ ni yɔɔ suɔmɔ lɛ atsɔɔ lɛ nii lɛ, obaaná he sɛɛ waa. Kɛ́ ohiɛ susumɔ ko ni ejaaa yɛ Biblia lɛ he momo lɛ, bɔɔ mɔdɛŋ ni ojie yɛ jɛmɛ, koni Nyɔŋmɔ anyɛ atsɔɔ bo nii.​—Lala 25:4.

Sɔlemɔ dani obɔi kanemɔ. Nyɔŋmɔ susumɔi ni yɔɔ Biblia lɛ mli, no hewɔ lɛ, ebɛ naakpɛɛ mɔ akɛ ja eye ebua wɔ dani wɔbaanyɛ wɔnu shishi. Nyɔŋmɔ ewo shi akɛ ekɛ ‘mumɔ krɔŋkrɔŋ baahã mɛi ni biɔ lɛ lɛ.’ (Luka 11:13) Mumɔ krɔŋkrɔŋ lɛ baanyɛ eye ebua bo ni onu Nyɔŋmɔ susumɔi ashishi. Be ni be shwieɔ mli lɛ, ebaagbele ojwɛŋmɔ mli koni onu “Nyɔŋmɔ nibii ni mli kwɔlɔ lɛ po” ashishi.​—1 Korintobii 2:10.

Kanemɔ ni onu shishi. Kaakane saji babaoo kɛkɛ. Jwɛŋmɔ nɔ ni okaneɔ lɛ nɔ jogbaŋŋ. Bi ohe saji tamɔ nɔ ni nyiɛ sɛɛ nɛɛ: ‘Mɛɛ sui mɔ ni mikaneɔ ehe sane lɛ yɔɔ? Te mafee tɛŋŋ mikɛ nɔ ni mikaneɔ lɛ atsu nii?’

Okɛ otii pɔtɛi komɛi amamɔ ohiɛ. Kɛ́ ootao oná Biblia lɛ kanemɔ he sɛɛ lɛ, kɛfee oti ni ma ohiɛ akɛ obaakase nɔ ko ni obaaná he sɛɛ. Obaanyɛ okɛ otii tamɔ nɔ ni nyiɛ sɛɛ lɛ amamɔ ohiɛ: ‘Miisumɔ ni makase Nyɔŋmɔ diɛŋtsɛ he nii babaoo.’ ‘Miisumɔ ni matsɔ gbɔmɔ kpakpa, wu kpakpa loo ŋa kpakpa.’ No sɛɛ lɛ, kanemɔ Biblia lɛ mli hei ni baaye abua bo ni onyɛ oshɛ nakai otii lɛ ahe.a

Ŋaawoi enumɔ nɛɛ baaye abua bo ni oje shishi. Shi te obaafee tɛŋŋ ohã Biblia lɛ kanemɔ afee nɔ ni yɔɔ miishɛɛ waa lɛ? Sane ni nyiɛ sɛɛ lɛ kɛ ŋaawoi komɛi hãa.

Kɛ́ ookane Biblia lɛ, te onuɔ he tɛŋŋ? Ani ejeɔ otsine? Aloo ehãa omii shɛɔ ohe? Babaoo damɔ gbɛi ni otsɔɔ nɔ okaneɔ lɛ nɔ. Nyɛhãa wɔsusua nibii komɛi ni obaanyɛ ofee koni onya Biblia lɛ kanemɔ he lɛ he.

Halamɔ ŋmɛnɛŋmɛnɛ beiaŋ shishitsɔɔmɔ ko ni obaanyɛ okɛ ohe afɔ̃ nɔ. Kɛ́ ookane wolo ko, ni onuuu wiemɔi ni akɛtsu nii yɛ mli lɛ babaoo shishi loo amɛbe eho lɛ, ekã shi faŋŋ akɛ onaŋ he miishɛɛ akɛ obaakane. No hewɔ lɛ, taomɔ Biblia ni wiemɔi ni akɛtsu nii yɛ mli lɛ ashishinumɔ waaa ni baanyɛ ata otsuiŋ. Yɛ nakai beiaŋ nɔŋŋ lɛ, esa akɛ efee shishitsɔɔmɔ ni ja.a

Okɛ kɔmpiuta kɛ ehenɔi lɛ atsu nii. Ŋmɛnɛ lɛ, abɛ Biblia lɛ yɛ wolo nɔ pɛ, moŋ lɛ ayɛ ekomɛi hu yɛ Intanɛt lɛ nɔ. Abaanyɛ akane Bibliai komɛi yɛ Intanɛt lɛ nɔ, loo abaanyɛ adaunloodi awo kɔmpiuta, tablɛt, loo mobail foŋ nɔ ni akane. Ekomɛi yɛ ni obaanyɛ ogbele Biblia shishitsɔɔmɔi krokomɛi yɛ mli, loo okɛ kukuji lɛ ato shishitsɔɔmɔi krokomɛi anɔ he oya. Kɛ́ oosumɔ ni obo toi moŋ fe ni obaakane lɛ, arikɔdi Biblia lɛ ekomɛi ni obaanyɛ obo toi. Mɛi babaoo sumɔɔ ni amɛbo toi be ni amɛta trɔtrɔ mli, amɛmiifɔ nii ahe, loo amɛmiifee nibii krokomɛi ni amɛbaanyɛ amɛbo nii toi be ni amɛfeɔ lɛ. Mɛni hewɔ okaaa gbɛi nɛɛ ateŋ nɔ ni baahi kɛhã bo?

Okɛ dɛŋdadei ni akɛkaseɔ Biblia lɛ atsu nii. Dɛŋdadei ni akɛkaseɔ Biblia lɛ baanyɛ aye abua bo ni oná nɔ ni okaneɔ lɛ he sɛɛ waa. Afee shikpɔji ni yɔɔ Biblia lɛ mli lɛ ahe map, ni ebaaye ebua bo ni ona hei ni maji ni okɛkpeɔ be ni okaneɔ Biblia lɛ yɔɔ, koni onu nɔ ni okaneɔ lɛ shishi jogbaŋŋ. Saji tamɔ nɔ ni yɔɔ magazin nɛɛ mli lɛ, loo nɔ ni yɔɔ jw.org lɛ fã ni ji, “Biblia Tsɔɔmɔi” lɛ shishi lɛ, baanyɛ aye abua bo ni onu Biblia lɛ fãi babaoo shishi.

Tsakemɔ gbɛi ni otsɔɔ nɔ okaneɔ lɛ mli. Kɛ́ ewa kɛhã bo akɛ obaakane Biblia lɛ kɛjɛ shishijee kɛyashi naagbee lɛ, mɛni hewɔ ojeee shishi yɛ he ko ni onyaa he waa? Kɛ́ ootao ole mɛi ni ale amɛwaa yɛ Biblia lɛ mli lɛ ahe saji lɛ, obaanyɛ okane aŋkroaŋkroi ahe saji. Atsɔɔ gbɛi ni obaanyɛ otsɔ nɔ okane amɛhe saji lɛ yɛ akrabatsa ni yitso, “Kasemɔ Mɛi Ni Biblia Lɛ Wieɔ Amɛhe Lɛ Ahe Nii Koni Ole Biblia Lɛ Mli Jogbaŋŋ” lɛ mli. Aloo ekolɛ obaanyɛ okane nibii ni kɔɔ saji pɔtɛɛ komɛi ahe, loo obaanyɛ okane saji ni kɔɔ bɔ ni nibii komɛi tee nɔ ehã lɛ he. Mɛni hewɔ okaaa gbɛi nɛɛ ateŋ ekome okwɛɛɛ?

Biblia lɛ jeee wolo folo ko kɛkɛ. Ŋaawoi ni jɛ wɔ-Bɔlɔ lɛ ŋɔɔ yɛ mli. (2 Timoteo 3:16) Emli sane lɛ baanyɛ atsake wɔshihilɛ kwraa. Anɔkwa, Biblia lɛ kɛɔ akɛ: “Nyɔŋmɔ wiemɔ lɛ hiɛ kã ni eyɛ hewalɛ.” (Hebribii 4:12) Eyɛ hewalɛ ni ebaanyɛ ekɛtsake wɔshihilɛ yɛ gbɛi titrii enyɔ nɔ​—ekɛ gbɛtsɔɔmɔ hãa wɔ yɛ wɔdaa gbi shihilɛ mli amrɔ nɛɛ, ni eyeɔ ebuaa wɔ ni wɔle Nyɔŋmɔ kɛ eshiwoi lɛ ahe nii.​—1 Timoteo 4:8; Yakobo 4:8.

Ehãa onáa shihilɛ kpakpa bianɛ. Biblia lɛ baanyɛ aye abua aŋkroaŋkroi kɛ́ amɛmiikpɛ yiŋ. Ekɛ ŋaawoo hãa yɛ saji ni nyiɛ sɛɛ nɛɛ ahe:

• Wekukpaa ni yɔɔ wɔ kɛ mɛi krokomɛi ateŋ.—Efesobii 4:31, 32; 5:22, 25, 28, 33.

• Henumɔŋ kɛ gbɔmɔtsoŋ hewalɛnamɔ.—Lala 37:8; Abɛi 17:22.

• Jeŋba.​—1 Korintobii 6:9, 10.

• Bɔ ni wɔɔfee wɔtsu wɔheloonaa hiamɔ nii ahe nii.​—Abɛi 10:4; 28:19; Efesobii 4:28.a

Wu ko kɛ eŋa ni amɛbote gbalashihilɛ mli etsɛko ni yɔɔ Asia lɛ nya bɔ ni Biblia mli ŋaawoo lɛ he yɔɔ sɛɛnamɔ lɛ he waa. Taakɛ eji yɛ mɛi ni boteɔ gbalashihilɛ mli ehee lɛ pii agbɛfaŋ lɛ, amɛ hu amɛnáaa lɛ mlɛo kwraa yɛ shishijee mli akɛ amɛbaanu amɛhe shishi, ni amɛkɛ amɛhe agba sane. Shi amɛkɛ nɔ ni amɛkaneɔ yɛ Biblia lɛ mli lɛ bɔi nitsumɔ. Mɛni jɛ mli kɛba? Vicent, ni ji wu lɛ kɛɛ akɛ: “Nɔ ni mikane yɛ Biblia lɛ mli lɛ ye ebua mi ni mikɛ suɔmɔ tsu naagbai ni wɔkɛkpeɔ yɛ wɔgbala lɛ mli lɛ ahe nii. Biblia lɛ naa ni wɔhiɔ shi yɛ lɛ ehã wɔná miishɛɛ waa.” Eŋa Annalou hu wie nɔ ko tamɔ nakai nɔŋŋ akɛ: “Mɛi anɔkwɛmɔnii ni wɔkane yɛ Biblia lɛ mli lɛ ye ebua wɔ. Amrɔ nɛɛ, miyɛ miishɛɛ yɛ wɔgbala lɛ mli, ni minyaa otii ni wɔkɛmamɔ wɔhiɛ lɛ hu ahe.”

Ehãa oleɔ Nyɔŋmɔ. Yɛ nɔ ni Vicent wie kɛkɔ bɔ ni Biblia lɛ eye ebua lɛ yɛ gbalashihilɛ mli lɛ he lɛ sɛɛ lɛ, ewie hu akɛ: “Akɛni mikaneɔ Biblia lɛ hewɔ lɛ, minuɔ he akɛ mibɛŋkɛ Yehowa waa amrɔ nɛɛ fe be ko ni eho.” Nɔ ni Vicent wie lɛ gbalaa jwɛŋmɔ kɛyaa sane ko ni he hiaa waa nɔ​—Biblia lɛ baanyɛ aye abua bo ni ole Nyɔŋmɔ. Biblia lɛ ni obaakane lɛ baaye abua bo ni oná ŋaawoi ni Nyɔŋmɔ kɛhãa lɛ ahe sɛɛ, ni obaale lɛ akɛ onaanyo. Obaana hu akɛ, Nyɔŋmɔ hãa wɔleɔ shihilɛ kpakpa ni baaba wɔsɛɛ lɛ he saji babaoo, ni ji be ni obaaná “wala diɛŋtsɛ,” ni baahi shi kɛya naanɔ lɛ. (1 Timoteo 6:19) Onyɛŋ oná enɛ yɛ wolo ko wolo ko mli.

Kɛ́ obɔi Biblia lɛ kanemɔ, ni onijiaŋ ejeee wui lɛ, bo hu obaaná sɛɛnamɔi nɛɛ eko​—ebaatsake oshihilɛ bianɛ, ni ebaahã ole Nyɔŋmɔ hu. Shi be ni okaneɔ Biblia lɛ, sanebimɔi pii baaba ojwɛŋmɔ mli. Ni kɛ́ ebalɛ nakai lɛ, kaimɔ nɔkwɛmɔnɔ kpakpa ni Etiopia piafonyo ni hi shi aaafee afii 2,000 ni eho nɛ lɛ fee lɛ. No mli lɛ, sanebimɔi pii ni kɔɔ Biblia lɛ he yɛ ejwɛŋmɔ mli. Be ni abi lɛ kɛji enuɔ nɔ ni ekaneɔ lɛ shishi lɛ, ejie naa akɛ: “Anɔkwa, te mafee tɛŋŋ manyɛ manu shishi akɛ ja mɔ ko tsɔɔ mi?”b Kɛkɛ ni ekpɛlɛ ni Filipo, ni ji Yesu kaselɔi lɛ ateŋ mɔ kome, ni le Biblia lɛ mli jogbaŋŋ lɛ ye ebua lɛ. (Bɔfoi 8:30, 31, 34) Kɛ́ bo hu oosumɔ ni ole saji babaoo ni kɔɔ Biblia lɛ he lɛ, ofainɛ ni oya intanɛt lɛ nɔ, yɛ www.pr418.com/gaa, loo ŋmaa kɛya adrɛs ni atsɔɔ yɛ wolo nɛɛ mli lɛ eko, ni obi ni aye abua bo. Obaanyɛ obi Yehowa Odasefoi ni yɔɔ he ni oyɔɔ lɛ hu, loo yaa Maŋtsɛyeli Asa ko ni bɛŋkɛ bo lɛ nɔ. Mɛni hewɔ otaooo Biblia lɛ eko ŋmɛnɛ, koni eye ebua bo ni oná shihilɛ kpakpa?