Nyɔŋmɔ kɛ Nyiɛmɔ—Shishijee Nibii Lɛ
“Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—YAKOBO 4:8.
1, 2. Mɛni hewɔ obaanyɛ okɛɛ akɛ, eji hegbɛ kpele akɛ ooosɔmɔ Yehowa?
NUU lɛ ena nɔ̃ yɛ tsuŋwoo mli afii babaoo. Kɛkɛ ni atsɛ lɛ koni ebapue yɛ maŋ lɛ nɔyelɔ lɛ hiɛ. Nibii tee nɔ oyayaayai. Trukaa kɛkɛ ni gboklɛfonyo lɛ na ehe yɛ maŋtsɛ ni yɔɔ hewalɛ fe fɛɛ yɛ shikpɔŋ nɔ yɛ nakai beaŋ lɛ sɔɔmɔ mli. Akɛ gbɛnaa nii ko ni tsii waa ni woo babaoo ni ekaaa yɔɔ mli wo tsutsu gboklɛfonyo lɛ dɛŋ. Yosef—nuu ni be ko lɛ akɛ gboklɛi ewo enaji lɛ—kɛ maŋtsɛ ko nyiɛ agbɛnɛ!—1 Mose 41:14, 39-43; Lala 105:17, 18.
2 Ŋmɛnɛ, gbɔmɛi ená hegbɛ akɛ amɛkɛ amɛhe aaawo mɔ ko ni nɔ kwɔ kwraa fe Mizraim Farao lɛ sɔɔmɔ mli. Mɔ ni Nɔ Kwɔ Fe Fɛɛ yɛ jeŋ muu fɛɛ lɛ miifɔ̃ wɔ fɛɛ nine koni wɔbasɔmɔ lɛ. Mɛɛ hegbɛ ni kanyãa mɔ waa nɛ akɛ aaafee nakai koni mɔ aná ekɛ Yehowa, Nyɔŋmɔ ofe lɛ teŋ wekukpaa ni bɛŋkɛ kpaakpa mli ŋɔɔmɔ! Akɛ lɛ toɔ agbojee kɛ hewalɛ kɛ nyam kɛ agbɛnɛ hu kpoofeemɔ, fɛo, kɛ ŋɔɔmɔ he yɛ Ŋmalɛi lɛ amli. (Ezekiel 1:26-28; Kpojiemɔ 4:1-3) Suɔmɔ boteɔ enifeemɔi fɛɛ mli. (1 Yohane 4:8) Emaleee kɔkɔɔkɔ. (4 Mose 23:19) Ni Yehowa haaa enɔkwafoi lɛ anine anyɛ shi kɔkɔɔkɔ. (Lala 18:16) Kɛji akɛ wɔhi shi yɛ ejalɛ taomɔ nii anaa lɛ, wɔbaanyɛ wɔná shihilɛ ni shishinumɔ kɛ miishɛɛ yɔɔ mli lɛ mli ŋɔɔmɔ bianɛ, kɛ naanɔ wala ni kã wɔhiɛ. (Yohane 17:3) Adesa nɔyelɔ ko bɛ ni kɛ nɔ̃ ko ni bɛŋkɛ jɔɔmɔi kɛ hegbɛi ni tamɔ nɛkɛ he bibioo po hãa.
3. Noa ‘kɛ anɔkwa Nyɔŋmɔ lɛ nyiɛ’ yɛ mɛɛ gbɛ nɔ?
3 Jeeŋmɔ beebe ni blematsɛ Noa kpɛ eyiŋ akɛ ebaahi shi yɛ Nyɔŋmɔ suɔmɔnaa nii kɛ eyiŋtoo lɛ kɛ gbeekpamɔ naa. Biblia lɛ wieɔ ehe akɛ: “Noa ji jalɔ, ni eye emuu yɛ eyinɔbii lɛ ateŋ; ni Noa kɛ Nyɔŋmɔ nyiɛ.” (1 Mose 6:9) Shi, Noa kɛ Yehowa enyiɛɛɛ pɔtɛɛ diɛŋtsɛ, ejaakɛ “Nyɔŋmɔ lɛ, mɔ ko enako lɛ pɛŋ.” (Yohane 1:18) Shi moŋ, Noa kɛ Nyɔŋmɔ nyiɛ, kɛ shishinumɔ akɛ efee nɔ ni Nyɔŋmɔ kɛɛ lɛ akɛ efee lɛ. Akɛni Noa tuu ewala eha Yehowa suɔmɔnaa nifeemɔ hewɔ lɛ, ená ekɛ Nyɔŋmɔ Ofe lɛ teŋ wekukpaa ni bɛŋkɛ kpaakpa ni miishɛɛ yɔɔ mli lɛ mli ŋɔɔmɔ. Taakɛ Noa ji lɛ, ŋmɛnɛ, gbɔmɛi akpekpei abɔ ‘kɛ Nyɔŋmɔ miinyiɛ’ kɛtsɔ Yehowa ŋaawoo kɛ gbɛtsɔɔmɔ ni amɛhiɔ shi yɛ naa lɛ nɔ. Te mɔ ko feɔ tɛŋŋ ejeɔ gbɛ ni tamɔ nɛkɛ shishi hu?
Anɔkwa Nilee he Miihia
4. Yehowa tsɔɔ ewebii anii yɛ mɛɛ gbɛ nɔ?
4 Kɛji akɛ wɔkɛ Yehowa aaanyiɛ lɛ, klɛŋklɛŋ lɛ esa akɛ wɔle lɛ. Gbalɔ Yesaia gba fɔ̃ shi akɛ: “Ni aaaba mli akɛ naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ, ni aaawo enɔ fe gɔŋkpɔi lɛ; ni jeŋmaji fɛɛ aaaho kɛaaba he; ni majimaji pii aaatee ayakɛɛ akɛ: Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ! Ejaakɛ mla lɛ, Zion ebaajɛ, ni Yehowa wiemɔ lɛ, Yerusalem ebaajɛ.” (Yesaia 2:2, 3) Hɛɛ, wɔbaanyɛ wɔná hekɛnɔfɔɔ akɛ Yehowa baatsɔse mɛi fɛɛ ni taoɔ ni amɛnyiɛ yɛ egbɛ̀i anɔ lɛ. Yehowa kɛ e-Wiemɔ, ni ji Biblia lɛ eha, ni eyeɔ ebuaa wɔ koni wɔnu shishi. Gbɛ kome ni etsɔɔ nɔ efeɔ enɛ ji kɛtsɔ “tsulɔ anɔkwafo kɛ nilelɔ” lɛ nɔ. (Mateo 24:45-47) Yehowa kɛ “tsulɔ anɔkwafo” lɛ tsuɔ nii koni ekɛ mumɔŋ tsɔsemɔ aha kɛtsɔ woji ni adamɔ Biblia nɔ aŋmala, Kristofoi akpeei, kɛ shia Biblia mli nikasemɔ he gbɛjianɔtoo ni akɛhaa yaka lɛ nɔ. Nyɔŋmɔ yeɔ ebuaa ewebii lɛ hu koni amɛnu e-Wiemɔ lɛ shishi kɛtsɔ emumɔ krɔŋkrɔŋ lɛ nɔ.—1 Korintobii 2:10-16.
5. Mɛni hewɔ Ŋmalɛ mli anɔkwale lɛ jara wa waa nakai lɛ?
5 Eyɛ mli akɛ wɔwooo shika ko yɛ Biblia mli anɔkwale lɛ he moŋ, shi ejara wa. Yɛ be mli ni wɔkaseɔ Nyɔŋmɔ Wiemɔ lɛ, wɔbaleɔ Nyɔŋmɔ diɛŋtsɛ he sane—egbɛ́i, esu kɛ baŋ, eyiŋtoo, kɛ gbɛ ni etsɔɔ nɔ ekɛ gbɔmɛi yeɔ hãa. Wɔkaseɔ hetooi ni haa mɔ yeɔ ehe yɛ wala shihilɛ shishijee he sanebimɔi lɛ ahe: Mɛni hewɔ wɔyɔɔ biɛ? Mɛni hewɔ Nyɔŋmɔ ŋmɛɔ piŋmɔ gbɛ? Mɛni yɔɔ wɔsɛɛ be? Mɛni hewɔ wɔgbɔlɔɔ ni wɔgboiɔ? Ani wala yɛ gbele sɛɛ? Agbɛnɛ hu, wɔkaseɔ nɔ ni Nyɔŋmɔ suɔmɔnaa nii ji kɛha wɔ, ni ji akɛ, bɔ ni esa akɛ wɔnyiɛ koni wɔsa ehiɛ kwraa. Wɔkaseɔ akɛ, shishinumɔ yɛ etaomɔ nii lɛ amli ni amɛhe yɛ sɛɛnamɔ waa kɛ wɔkɛtsu nii. Kɛji akɛ Nyɔŋmɔ famɔ bɛ mli lɛ, wɔnyɛŋ wɔnu nibii ni tamɔ nɛkɛ shishi kɔkɔɔkɔ.
6. Mɛɛ gbɛ Biblia mli anɔkwale nilee haa wɔnyɛɔ wɔdiɔ sɛɛ?
6 Biblia mli anɔkwale lɛ yɛ hewalɛ ni etsirɛɔ wɔ koni wɔfee tsakemɔi yɛ wɔshihilɛi amli. (Hebribii 4:12) Dani wɔɔná Ŋmalɛi lɛ ahe nilee lɛ, no mli lɛ “je nɛŋ su lɛ naa” wɔnyiɛ yɛ. (Efesobii 2:2) Shi Nyɔŋmɔ Wiemɔ lɛ he anɔkwale nilee lɛ tsɔɔ wɔ gbɛ kroko, koni wɔnyiɛ ‘bɔ ni sa Yehowa hiɛ, ni wɔsa ehiɛ kwraa.’ (Kolosebii 1:10) Mɛɛ miishɛɛ eji nɛkɛ akɛ wɔje shishi mra ni wɔkɛ Yehowa, Mɔ ni je agbo kɛ nyam fe fɛɛ yɛ jeŋ muu fɛɛ lɛ nyiɛ!—Luka 11:28.
Nifeemɔi Enyɔ ni He Hiaa —Henɔjɔɔmɔ kɛ Baptisimɔ
7. Yɛ be mli ni wɔkaseɔ Nyɔŋmɔ Wiemɔ lɛ, mɛɛ anɔkwale ni kɔɔ adesa hiɛnyiɛmɔ he bajeɔ kpo faŋŋ?
7 Kɛ wɔdara yɛ shishinumɔ ni wɔyɔɔ yɛ Biblia lɛ he lɛ mli lɛ, wɔjeɔ shishi wɔkɛ Nyɔŋmɔ Wiemɔ lɛ mli mumɔŋ la lɛ pɛiɔ adesai asaji kɛ wɔ diɛŋtsɛ wɔshihilɛi amli wɔkwɛɔ. Anɔkwale ko ni he hiaa bajeɔ kpo faŋŋ. Gbalɔ Yeremia wie nakai anɔkwale lɛ jeeŋmɔ ko, ni eŋma akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ.” (Yeremia 10:23) Adesai—wɔ fɛɛ lɛ—Nyɔŋmɔ gbɛtsɔɔmɔ he miihia wɔ.
8. (a) Mɛni kanyaa gbɔmɛi koni amɛjɔɔ amɛhe nɔ amɛha Nyɔŋmɔ? (b) Mɛni ji Kristofoi ahenɔjɔɔmɔ?
8 Anɔkwa sane ni he hiaa nɛɛ ni wɔɔnu shishi lɛ kanyaa wɔ koni wɔtao gbɛtsɔɔmɔ kɛjɛ Yehowa dɛŋ. Ni suɔmɔ kɛha Nyɔŋmɔ tsirɛɔ wɔ koni wɔjɔɔ wɔwala nɔ wɔha lɛ. Henɔjɔɔmɔ ni wɔɔfee wɔha Nyɔŋmɔ lɛ tsɔɔ akɛ wɔbaaya eŋɔɔ yɛ sɔlemɔ mli ni wɔkɛ hiɛdɔɔ awo shi akɛ wɔkɛ wɔwala baatsu nii ni wɔkɛsɔmɔ lɛ ni wɔnyiɛ yɛ egbɛ̀i anɔ yɛ anɔkwayeli mli. Yɛ enɛ feemɔ mli lɛ, wɔnyiɛɔ Yesu, ni kɛ ehe ha Yehowa kɛ faishitswaa ni ma shi shiŋŋ akɛ ebaatsu ŋwɛi suɔmɔnaa nii lɛ nɔkwɛmɔnɔ lɛ sɛɛ.—Hebribii 10:7.
9. Mɛni hewɔ aŋkroaŋkroi jɔɔ amɛwala nɔ amɛhaa Yehowa?
9 Yehowa Nyɔŋmɔ enyɛɛɛ mɔ nɔ loo etsirɛɛɛ mɔ ko yisɛɛ koni mɔ lɛ ajɔɔ ehe nɔ eha lɛ. (Okɛto 2 Korintobii 9:7 he.) Agbɛnɛ hu, Nyɔŋmɔ kpaaa gbɛ ni mɔ ko ajɔɔ ewala nɔ kɛha Lɛ yɛ henumɔ ko ni hoɔ kɛyaa kɛkɛ hewɔ. Dani aaabaptisi mɔ ko lɛ, esa akɛ mɔ lɛ afee mɔ ni eji kaselɔ momo, ni enɛ biɔ mɔdɛŋbɔɔ diɛŋtsɛ dani aná nilee. (Mateo 28:19, 20) Paulo kpa mɛi ni abaptisi amɛ momo lɛ fai koni ‘amɛkɛ amɛgbɔmɔtsei aha akɛ afɔlei ni hiɛ kamɔ, ni yɔɔ krɔŋkrɔŋ, ni saa Nyɔŋmɔ hiɛ, sɔɔmɔ krɔŋkrɔŋ kɛ amɛjwɛŋmɔŋ nyɛmɔ.’ (Romabii 12:1) Wɔjwɛŋmɔŋ nyɛmɔ ni wɔkɛaatsu nii yɛ gbɛ ni tamɔ nakai nɔŋŋ nɔ wɔtsɔɔ wɔjɔɔ wɔhe nɔ wɔhaa Yehowa Nyɔŋmɔ. Beni wɔkase nɔ ni yɔɔ enɛ mli ni wɔsusu sane lɛ he jogbaŋŋ lɛ, wɔjɛɔ wɔsuɔmɔ kɛ miishɛɛ mli wɔjɔɔ wɔwala nɔ wɔhaa Nyɔŋmɔ—Lala 110:3.
10. Henɔjɔɔmɔ kɔɔ baptisimɔ he yɛ mɛɛ gbɛ nɔ?
10 Yɛ be mli ni wɔtee Nyɔŋmɔ ŋɔɔ yɛ teemɔŋ yɛ sɔlemɔ mli koni wɔtsɔɔ wɔfaishitswaa akɛ wɔbaanyiɛ yɛ egbɛ̀i lɛ anɔ lɛ sɛɛ lɛ, wɔyaa nifeemɔ ni nyiɛ sɛɛ lɛ nɔ. Wɔhaa aleɔ wɔ henɔjɔɔmɔ lɛ yɛ faŋŋ kɛtsɔɔ wɔ nu mli baptisimɔ nɔ. Enɛ ji sane jajemɔ yɛ faŋŋ akɛ wɔkã kitã akɛ wɔbaafee Nyɔŋmɔ suɔmɔnaa nii. Yohane baptisi Yesu yɛ eshikpɔŋ nɔ sɔɔmɔ lɛ shishijee mli, ni ekɛto okadi eha wɔ. (Mateo 3:13-17) Sɛɛ mli lɛ, Yesu kɛ nitsumɔ wo esɛɛnyiɛlɔi lɛ adɛŋ akɛ amɛyafee kaselɔi ni amɛbaptisi amɛ. No hewɔ lɛ, henɔjɔɔmɔ kɛ baptisimɔ ji nifeemɔi ni he hiaa kɛha mɔ fɛɛ mɔ ni sumɔɔ ni ekɛ Yehowa anyiɛ.
11, 12. (a) Abaanyɛ ni akɛ baptisimɔ ato yookpeemɔ he yɛ mɛɛ gbɛ nɔ? (b) Abaanyɛ ni akɛ wekukpaa ni kã wɔkɛ Yehowa teŋ lɛ ato nɔ ni kã wu kɛ ŋa teŋ lɛ he yɛ mɛɛ gbɛ nɔ?
11 Yesu Kristo kaselɔ ni ejɔɔ ehe nɔ ni abaptisi lɛ ni mɔ ko aaatsɔ lɛ tamɔ gbalashihilɛ mlibotemɔ. Maji pii yɛ ni nifeemɔi pii tsɔɔ yookpeemɔ gbi lɛ hiɛ. Nuu kɛ yoo kpeɔ, amɛleɔ amɛhe, ni amɛbasumɔɔ amɛhe. Nɔ ni nyiɛɔ sɛɛ ji yooshibimɔ. Yookpeemɔ lɛ haa mɔ fɛɛ mɔ leɔ nɔ ni akpɛ mli ato momo yɛ teemɔŋ lɛ—ákɛ abaakpee he ni ahi shi akɛ wu kɛ ŋa. Yookpeemɔ lɛ ji nɔ ni kadiɔ nakai wekukpaa krɛdɛɛ lɛ shishijee. Gbi lɛ kadiɔ gbalashihilɛ lɛ shishijee. Kɛ akɛto he lɛ, baptisimɔ kadiɔ shihilɛ ni atuu aha Yehowa yɛ henɔjɔɔmɔ wekukpaa mli.
12 Susumɔ nɔ kroko ni tamɔ enɛ lɛ he. Yɛ amɛ kpeemɔ lɛ sɛɛ lɛ, esa akɛ suɔmɔ ni kã wu kɛ ŋa lɛ teŋ lɛ mli akwɔ ni eda. Bɔni afee ni amɛtsi amɛbɛŋkɛ amɛhe kpaakpa lɛ, esa akɛ gbalashihilɛ mli hefatalɔi lɛ fɛɛ abɔ mɔdɛŋ ni amɛhiɛ amɛ gbalashihilɛ wekukpaa lɛ mli ni amɛwaje lɛ yɛ gbɛ ni pɛsɛmkunya bɛ mli nɔ. Eyɛ mli akɛ wɔkɛ Nyɔŋmɔ boteee gbalashihilɛ mli moŋ, shi yɛ wɔbaptisimɔ lɛ sɛɛ lɛ, esa akɛ wɔtsu nii ni wɔha wekukpaa ni bɛŋkɛ kpaakpa ahi wɔkɛ Yehowa teŋ. Enaa, ni ehiɛ sɔɔ mɔdɛŋ ni wɔbɔɔ koni wɔfee esuɔmɔnaa nii lɛ, ni ebɛŋkɛɔ wɔ. Kaselɔ Yakobo ŋma akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—Yakobo 4:8.
Yesu Nanemaahei Asɛɛnyiɛmɔ
13. Namɔ nɔkwɛmɔnɔ esa akɛ wɔnyiɛ sɛɛ yɛ Nyɔŋmɔ ni wɔkɛ lɛ nyiɛɔ lɛ mli?
13 Kɛ wɔkɛ Yehowa aaanyiɛ lɛ, belɛ esa akɛ wɔnyiɛ nɔkwɛmɔnɔ ni Yesu Kristo kɛfɔ̃ shi lɛ sɛɛ. Bɔfo Petro ŋma akɛ: “Enɛ nɔŋŋ hewɔ atsɛ nyɛ, ejaakɛ Kristo hu na amanehulu eha nyɛ, ni ekɛto okadi efɔ̃ shi eha nyɛ, koni nyɛnyiɛ enanemaahei lɛ asɛɛ.” (1 Petro 2:21) Akɛni Yesu yeɔ emuu, ni wɔ lɛ wɔyeee emuu hewɔ lɛ, wɔnyɛŋ wɔnyiɛ enɔkwɛmɔnɔ lɛ sɛɛ ni tɔ̃mɔ baŋ he. Shi kɛlɛ, Yehowa miikpa wɔ gbɛ ni wɔfee nɔ ni hi fe fɛɛ ni wɔɔnyɛ. Nyɛhaa wɔsusua Yesu shihilɛ kɛ esɔɔmɔ nitsumɔ lɛ he nibii enumɔ ko ni esa akɛ Kristofoi ni amɛjɔɔ amɛhe nɔ lɛ abɔ mɔdɛŋ ni amɛkase lɛ ahe wɔkwɛa.
14. Mɛni fata Nyɔŋmɔ Wiemɔ lɛ ni wɔɔle lɛ he?
14 Yesu yɛ Nyɔŋmɔ Wiemɔ lɛ he anɔkwale nilee ni mɔɔ shi kwraa. Yesu fɔɔ wiemɔi asɛɛ tsɛmɔ kɛjɛɔ Hebri Ŋmalɛi lɛ amli yɛ esɔɔmɔ be lɛ mli. (Luka 4:4, 8) Kɛlɛ, nakai gbii lɛ amli jamɔ mli hiɛnyiɛlɔi yiwalɔi lɛ hu tsɛ́ wiemɔi kɛjɛ Ŋmalɛi lɛ amli. (Mateo 22:23, 24) Srɔtofeemɔ lɛ ji akɛ, Yesu nu nɔ ni Ŋmalɛi lɛ tsɔɔ lɛ shishi, ni ekɛtsu nii yɛ eshihilɛ mli. Jeee akɛ ele Mla lɛ mli wiemɔi lɛ kɛkɛ, shi shishinumɔ ni yɔɔ sɛɛ lɛ hu. Yɛ be mli ni wɔnyiɛɔ Kristo nɔkwɛmɔnɔ lɛ sɛɛ lɛ, esa akɛ wɔ hu wɔbɔ mɔdɛŋ ni wɔnu Nyɔŋmɔ Wiemɔ lɛ shishi, wɔyoo sɛɛ, loo wɔyoo mumɔ ni yɔɔ sɛɛ lɛ. Kɛtsɔ nakai feemɔ nɔ lɛ, ekolɛ wɔbaatsɔmɔ nitsulɔi ni Nyɔŋmɔ kpɛlɛɔ amɛnɔ ni nyɛɔ ‘amɛkɛ anɔkwale wiemɔ lɛ tsuɔ nii yɛ gbɛ ni ja nɔ.’—2 Timoteo 2:15.
15. Yesu to okadi yɛ Nyɔŋmɔ ni ewie ehe lɛ mli yɛ mɛɛ gbɛ nɔ?
15 Kristo Yesu wie eŋwɛi Tsɛ lɛ he etsɔɔ mɛi krokomɛi. Yesu haaa Nyɔŋmɔ Wiemɔ lɛ he nilee ni eyɔɔ lɛ afee ekome pɛ enɔ̃. Ehenyɛlɔi lɛ po tsɛ lɛ akɛ “Tsɔɔlɔ,” ejaakɛ ewieɔ Yehowa kɛ E-yiŋtoi ahe etsɔɔ mɛi krokomɛi yɛ he fɛɛ he ni eyaa. (Mateo 12:38) Yesu shiɛ yɛ faŋŋ yɛ he ni sɔlemɔtsu lɛ ma lɛ, yɛ kpeehei, yɛ maŋtiasei amli, ni agbɛnɛ yɛ akrowai amli. (Marko 1:39; Luka 8:1; Yohane 18:20) Ekɛ musuŋtsɔlɛ kɛ mlihilɛ tsɔɔ nii, ni ejie suɔmɔ kpo etsɔɔ mɛi ni eye ebua amɛ lɛ. (Mateo 4:23) Mɛi ni nyiɛɔ Yesu nɔkwɛmɔnɔ lɛ sɛɛ lɛ hu taoɔ hei kɛ gbɛ̀i pii ni amɛaatsɔ nɔ amɛtsɔɔ mɛi krokomɛi Yehowa Nyɔŋmɔ kɛ eyiŋtoi ni yɔɔ naakpɛɛ lɛ ahe nii.
16. Te wekukpaa ni kã Yesu kɛ nanemɛi Yehowa jálɔi lɛ ateŋ lɛ bɛŋkɛ kpaakpa ha tɛŋŋ?
16 Yesu kɛ mɛi krokomɛi ni já Yehowa lɛ hi shi yɛ ekomefeemɔ ni bɛŋkɛ kpaakpa mli. Yɛ be mli ni Yesu wieɔ etsɔɔ asafoi lɛ yɛ be ko mli lɛ, enyɛ kɛ enyɛmimɛi ni heee yeee lɛ ba eŋɔɔ koni amɛkɛ lɛ abawie. Biblia mli sane lɛ kɛɔ akɛ: “Mɔ ko bakɛɛ lɛ akɛ: Naa, onyɛ kɛ onyɛmimɛi lɛ damɔ agbo lɛ naa miitao amɛkɛo awie. Shi ehere nɔ ekɛɛ mɔ ni bakɛɛ lɛ lɛ akɛ: Namɔ ji minyɛ, ni namɛi ji minyɛmimɛi? Ni ekpa enineŋ etsɔɔ ekaselɔi lɛ ekɛɛ: Naa, minyɛ kɛ minyɛmimɛi nɛ! Ejaakɛ mɔ fɛɛ mɔ ni aaafee mitsɛ ni yɔɔ ŋwɛi lɛ suɔmɔnaa nii lɛ, lɛ nɔŋŋ ji minyɛmi nuu kɛ minyɛmi yoo kɛ minyɛ.” (Mateo 12:47-50) Enɛ etsɔɔɔ akɛ Yesu kpoo eweku lɛ, ejaakɛ saji krokomɛi ni nyiɛ sɛɛ ba lɛ tsɔɔ akɛ efeee nakai. (Yohane 19:25-27) Kɛlɛ, sane nɛɛ maa suɔmɔ ni Yesu yɔɔ kɛha nanemɛi heyelilɔi lɛ nɔ mi. Nakai nɔŋŋ hu ŋmɛnɛ, mɛi ni kɛ Nyɔŋmɔ nyiɛɔ lɛ taoɔ amɛkɛ Yehowa tsuji krokomɛi ateŋ naanyobɔɔ, ni amɛdaraa yɛ suɔmɔ babaoo ni amɛyɔɔ kɛha amɛ lɛ mli.—1 Petro 4:8.
17. Te Yesu nu eŋwɛi Tsɛ lɛ suɔmɔnaa nii ni efeɔ lɛ he eha tɛŋŋ, ni te esa akɛ enɛ asa wɔhe aha tɛŋŋ?
17 Yesu jie suɔmɔ ni eyɔɔ kɛha eŋwɛi Tsɛ lɛ kpo etsɔɔ kɛtsɔ ŋwɛi suɔmɔnaa nifeemɔ nɔ. Yesu bo Yehowa toi yɛ nɔ fɛɛ nɔ mli. Ekɛɛ: “Miŋmãa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.” (Yohane 4:34) Kristo kɛɛ hu akɛ: ‘Nɔ ni sa Nyɔŋmɔ hiɛ mifeɔ daa.’ (Yohane 8:29) Yesu sumɔɔ eŋwɛi Tsɛ lɛ aahu akɛ “eba ehe shi ni ebo toi kɛtee gbele mli, kɛtee sɛŋmɔtso nɔ gbele mli tete.” (Filipibii 2:8) Yehowa hu jɔɔ Yesu, ni ewo enɔ kɛtee gbɛhe ni kwɔ gojoo kɛ woo ni haa ebafeɔ mɔ ni baa yɛ Yehowa diɛŋtsɛ pɛ sɛɛ lɛ mli. (Filipibii 2:9-11) Taakɛ Yesu ji lɛ, wɔjieɔ suɔmɔ ni wɔyɔɔ kɛha Nyɔŋmɔ lɛ kpo kɛtsɔɔ ekitãi anɔ ni wɔyeɔ lɛ kɛ agbɛnɛ kɛtsɔɔ esuɔmɔnaa nifeemɔ nɔ lɛ nɔ.—1 Yohane 5:3.
18. Yesu to okadi efɔ̃ shi yɛ sɔlemɔ mli yɛ mɛɛ gbɛ nɔ?
18 Yesu ji gbɔmɔ ni sumɔɔ sɔlemɔ. Esɔle yɛ be mli ni abaptisiɔ lɛ lɛ. (Luka 3:21) Dani eeehala ebɔfoi 12 lɛ, eshi kpe esɔle nyɔɔŋnyɔɔŋ fɛɛ. (Luka 6:12, 13) Yesu tsɔɔ ekaselɔi lɛ bɔ ni asɔleɔ. (Luka 11:1-4) Gbɛkɛ ni enɔ jetsɛremɔ egbo lɛ, ekɛ ekaselɔi lɛ sɔle ni esɔle eha amɛ. (Yohane 17:1-26) Sɔlemɔ ji Yesu shihilɛ lɛ fã ni he hiaa, ni nakai esa akɛ eba lɛ yɛ wɔshihilɛi amli, ejaakɛ esɛɛnyiɛlɔi ji wɔ. Mɛɛ nyam po eji ákɛ akɛ Jeŋ Muu Fɛɛ Maŋtsɛ lɛ aaawie yɛ sɔlemɔ mli! Agbɛnɛ hu, Yehowa haa sɔlemɔi ahetoo, ejaakɛ Yohane ŋma akɛ: “Enɛ ji ekãa ni wɔyɔɔ yɛ ehiɛ lɛ, akɛ, kɛji wɔba nɔ̃ ko yɛ esuɔmɔnaa lɛ, eboɔ wɔ toi. Ni kɛji wɔle akɛ nɔ fɛɛ nɔ ni wɔɔba lɛ lɛ eboɔ wɔ toi lɛ, belɛ wɔle akɛ nii ni wɔba lɛ lɛ, wɔnine eshɛ nɔ.”—1 Yohane 5:14, 15.
19. (a) Mɛɛ Yesu sui kpakpai esa akɛ wɔkase? (b) Yesu shihilɛ kɛ esɔɔmɔ lɛ ni wɔkaseɔ lɛ he baa sɛɛnamɔ kɛhaa wɔ yɛ mɛɛ gbɛ̀i anɔ?
19 Nibii babaoo yɛ ni wɔɔkase kɛjɛ Yesu Kristo shikpɔŋ nɔ shihilɛ kɛ esɔɔmɔ lɛ ni wɔɔpɛi mli jogbaŋŋ lɛ mli! Susumɔ sui ni ejie lɛ kpo lɛ ahe okwɛ: suɔmɔ, musuŋtsɔlɛ, mlihilɛ, hewalɛ, pɛpɛɛpɛ-ŋmɛɛ, hiɛshikamɔ, heshibaa, ekãafeemɔ, kɛ pɛsɛmkunya ni efeee. Babaoo ni wɔkaseɔ yɛ Yesu he lɛ, babaoo ni wɔsumɔɔ ni wɔfee esɛɛnyiɛlɔi anɔkwafoi. Yesu he nilee hu gbalaa wɔ kɛbɛŋkɛɔ Yehowa he kpaakpa. Ejaakɛ Yesu ji eŋwɛi Tsɛ lɛ su lɛ kpojiemɔ yɛ gbɛ ni yeɔ emuu nɔ. Bɔ ni ebɛŋkɛ Yehowa he kpaakpa ha hewɔ lɛ enyɛ ekɛɛ akɛ: “Mɔ ni ena mi lɛ, ena tsɛ lɛ.”—Yohane 14:9.
Okɛ Ohiɛ Afɔ̃ Nyɔŋmɔ nɔ Koni Ewaje Bo
20. Te wɔɔfee tɛŋŋ wɔná hekɛnɔfɔɔ yɛ Yehowa ni wɔkɛ lɛ nyiɛɔ lɛ mli?
20 Kɛ gbekɛbii je nyiɛmɔ kasemɔ shishi lɛ, amɛnajifamɔi damɔɔɔ shi shiŋŋ. Te amɛfeɔ tɛŋŋ amɛkaseɔ nyiɛmɔ yɛ hekɛnɔfɔɔ mli? Kɛtsɔ hekãmɔ kɛ hiɛmiamɔ pɛ nɔ. Ojogbaŋŋ, mɛi ni kɛ Yehowa nyiɛɔ lɛ bɔɔ mɔdɛŋ ni amɛkɛ najifamɔi ni yɔɔ shiŋŋ anyiɛ. Enɛ hu biɔ be, kɛ hiɛmiamɔ. Paulo tsɔɔ bɔ ni ehe hiaa ni akɛ Nyɔŋmɔ anyiɛ yɛ mɔdɛŋbɔɔ mli lɛ mli beni eŋma akɛ: “Agbɛnɛ nɔ ni eshwɛ lɛ, anyɛmimɛi, wɔmiikpa nyɛ fai ni wɔmiiwo nyɛ ŋaa yɛ Nuntsɔ Yesu mli, ákɛ bɔ ni nyɛná kɛjɛ wɔdɛŋ bɔ ni sa akɛ nyɛba nyɛjeŋ nyɛha ni nyɛsa Nyɔŋmɔ hiɛ, kɛ bɔ ni nyɛbaa hu lɛ, ni nyɛteke nɔ fe tsutsu lɛ.”—1 Tesalonikabii 4:1.
21. Mɛɛ jɔɔmɔi wɔbaanyɛ wɔná mli ŋɔɔmɔ, yɛ be mli ni wɔkɛ Yehowa nyiɛɔ lɛ?
21 Kɛji akɛ wɔtuu wɔhe fɛɛ wɔha Nyɔŋmɔ lɛ, ebaaye ebua wɔ ni wɔya nɔ wɔkɛ lɛ anyiɛ. (Yesaia 40:29-31) Je nɛɛ bɛ nɔ ko nɔ ko ni ekɛbaaha ni abaanyɛ akɛto jɔɔmɔi ni efɔseɔ eshwieɔ mɛi ni nyiɛɔ egbɛi anɔ lɛ anɔ lɛ he. Lɛ ji ‘Mɔ ni tsɔɔ wɔ nii ni hi ha wɔ, Mɔ ni tsɔɔ wɔ gbɛ ni esa akɛ wɔnyiɛ nɔ. Ni kɛji wɔbo ekitãi atoi lɛɛlɛŋ lɛ, wɔ toiŋjɔlɛ baatamɔ faa, ni wɔjalɛ hu baatamɔ ŋshɔkei.’ (Yesaia 48:17, 18) Kɛ wɔkpɛlɛ nine ni afɔ̃ɔ wɔ akɛ wɔkɛ Nyɔŋmɔ abanyiɛ lɛ nɔ, ni wɔfee nakai yɛ anɔkwayeli mli lɛ, wɔbaanyɛ wɔná wɔkɛ lɛ teŋ toiŋjɔlɛ mli ŋɔɔmɔ kɛya naanɔ.
Te Obaaha Hetoo Oha Tɛŋŋ?
◻ Mɛni hewɔ eji woo ákɛ akɛ anɔkwa Nyɔŋmɔ lɛ aaanyiɛ lɛ?
◻ Mɛni hewɔ nikasemɔ, henɔjɔɔmɔ, kɛ baptisimɔ ji shishijee nifeemɔi yɛ Yehowa ni akɛ lɛ aaanyiɛ lɛ mli lɛ?
◻ Te wɔɔfee tɛŋŋ wɔnyiɛ Yesu nanemaahei asɛɛ?
◻ Te wɔfeɔ tɛŋŋ wɔleɔ akɛ Yehowa baawaje wɔ yɛ be mli ni wɔkɛ lɛ nyiɛɔ lɛ?
[Mfoniri ni yɔɔ baafa 13]
Nikasemɔ, henɔjɔɔmɔ, kɛ baptisimɔ ji nifeemɔi ni he hiaa yɛ Nyɔŋmɔ ni wɔkɛ lɛ nyiɛɔ lɛ mli