5. Ye nibii ni hãaa okɛ ohe ahã ni abaptisi bo lɛ anɔ

Mɔ fɛɛ mɔ ni baakpɛ eyiŋ akɛ ebaajɔɔ ehe nɔ ehã Yehowa ni ehã abaptisi lɛ lɛ, ekɛ naagbai komɛi baakpe. Bɔ ni afee ni ona enɛ he nɔkwɛmɔnɔ lɛ, jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Suɔmɔ Ni Eyɔɔ Kɛhã Yehowa Lɛ Hã Eye Gbɛtsiinii Anɔ (5:22)

• Mɛɛ gbɛtsiinii ehe bahia ni Narangerel aye nɔ koni enyɛ esɔmɔ Yehowa?

• Mɛɛ gbɛ nɔ suɔmɔ ni eyɔɔ kɛhã Yehowa lɛ wa lɛ ni enyɛ eye nakai gbɛtsiinii lɛ anɔ?

Nyɛkanea Abɛi 29:​25 kɛ 2 Timoteo 1:7 lɛ, ni nyɛsusua sanebimɔ nɛɛ he:

• Mɛni hãa wɔnáa ekãa kɛyeɔ gbɛtsiinii anɔ?

Amrɔ nɛɛ, esa akɛ wɔfee nibii ni baahã wɔhe Yehowa wɔye waa. Too be ni okɛsɔle daa gbi, kɛ be ni okɛkane e-Wiemɔ lɛ fã ko hu daa gbi. Yaa asafoŋ kpeei daa. Nifeemɔi nɛɛ baahã oná hewalɛ ni baahã onyɛ ofee ekãa ni ofi shi shiŋŋ kɛ́ aawa bo yi, kɛ́ owekumɛi po ni waa bo yi lɛ. Bɔfo Paulo ni awa lɛ yi shii abɔ lɛ, ŋma akɛ: “Yehowa ji miyelikɛbualɔ; misheee gbeyei.”​—Hebribii 13:6.

Kɛ́ wɔfɔɔ shiɛmɔ lɛ, no hu baawa wɔ ni wɔfee ekãa waa. Kɛ́ wɔshiɛ lɛ, ehãa wɔkɛ wɔhiɛ fɔ̃ɔ Yehowa nɔ, ni kɛ́ wɔsheɔ gbɔmɔ gbeyei po lɛ, elaajeɔ. (Abɛi 29:​25) Kɛ́ ofee ekãa kɛshiɛ amrɔ nɛɛ, ebaasaa bo eto koni wɔsɛɛ ko kɛ́ amralofoi lɛ gu wɔnitsumɔ lɛ, onyɛ oya nɔ oshiɛ.​—1 Tesalonikabii 2:2.