Nyɛkwɛa Maŋtsɛyeli Ekomefeemɔ Mli Jɔɔmɔi Lɛ!
“Mɛi fɛɛ ni aaana amɛ lɛ aaayoo amɛ akɛ amɛji seshi ni Yehowa ejɔɔ.”—YESAIA 61:9.
1. (a) Mɛɛ gbɛjianɔ ni Yehowa eto yɛ ŋmɛnɛŋmɛnɛ beaŋ tsɔɔ bɔ ni emli hi ha akpei abɔ ni leko lɛ lolo lɛ? (b) Mɛɛ gbɛ nɔ atsɔɔ ayooɔ lɛ diɛŋtsɛ ewebii ni ajɔɔ amɛ lɛ?
1 AKƐ ŋwɛi Maŋtsɛ lɛ ta sɛi nɔ ni akɛ hewalɛ wo edɛŋ koni eye nɔ kɛjɛ 1914. Ni áto gbɛjianɔ áha shikpɔŋ nɔ asafo ko yɛ “lumɛi” ni yeɔ jalɛsane lɛ ashishi. (Yesaia 32:1, 2) Yehowa ejie ehe kpo akɛ mɔ ni mli hi kɛha mɛi ni jalɛ he hɔmɔ kɛ kumai yeɔ amɛ lɛ fɛɛ. Ni mɛi ni hɔmɔ kɛ kumai yeɔ amɛ lɛ joɔ foi ni amɛkɛ amɛhe babɔɔ mɛi ni Yehowa ejɔɔ amɛ lɛ ahe. Shi mɛɛ gbɛ nɔ amɛtsɔɔ amɛyooɔ amɛ? Ani ale amɛ jogbaŋŋ yɛ maŋ, maŋkwramɔŋ loo yɛ shika gbɛfaŋ? Dabi, jeee nɛkɛ nibii nɛɛ ateŋ ekomɛi hewɔ ale amɛ nakai lɛ. No ji akɛ amɛjieɔ amɛ-Nyɔŋmɔ lɛ mlihilɛ su lɛ kpo amɛtsɔɔ kɛtsɔɔ suɔmɔ ni amɛyɔɔ akɛ amɛkɛ mɛi krokomɛi aaaja tsɔɔmɔi ni amɛnine eshɛ nɔ momo lɛ nɔ.
2. Yɛ Yesaia 32:8 kɛ gbeekpamɔ naa lɛ, mɛɛ su ji nɔ ni jeɔ kpo yɛ Yehowa tsuji ateŋ yɛ shikpɔŋ nɔ ŋmɛnɛ ni fɛɛ jɛ mɛɛ ŋaawoo ni jɛ amɛ-Hiɛnyiɛlɔ lɛ ŋɔɔ lɛ toi ni amɛbo hewɔ?
2 Nyɔŋmɔ mlihilɔ lɛ etsɔɔ etsuji ní amɛ hu amɛmli ahi. Yesaia 32:8 wieɔ mɔ ni yɔɔ mlihilɛ su lɛ he akɛ: “Yɛ mlihilɔ he lɛ, mlihilɛ nii ahe ŋaa ewoɔ; ni ebaate shi efi mlihilɛ nibii asɛɛ.” Taakɛ bɔ ni Yesu tsi lɛ diɛŋtsɛ esuɔmɔnaa nii eto sɛɛ ni ekwa ehe yɛ nibii pii amli koni enyɛ etsu nitsumɔ ni Nyɔŋmɔ kɛwo edɛŋ ni egba mɛi krokomɛi anunyam sanekpakpa ni kɔɔ Maŋtsɛyeli lɛ he lɛ, nakai nɔŋŋ hu esɛɛnyiɛlɔi lɛ etswa amɛfai shi akɛ amɛbaafee. Amɛboɔ Yesu ŋaawoo nɛɛ toi: “Nyɛhaa, ni aaahanyɛ; susumɔnɔ̃ kpakpa ni anyɛ nɔ ni áhoso ni eyi kɛteke nɔ mɛi aaaŋɔ shaka nyɛtsitsi; ejaakɛ nɔ susumɔnɔ ni nyɛkɛsusuɔ Iɛ, no nɔŋŋ aaaku sɛɛ aŋɔsusu ahanyɛ.” (Luka 6:38) Yehowa kɛ Kristo Yesu ji mɛi ni baanyɛ amɛto mlihilɛ loo ejurɔfeemɔ nɛɛ najiaŋ aha esɔɔlɔi kɛtsɔ tsui ni nyɔɔ mɔ mli, jwɛŋmɔŋ toiŋjɔlɛ kɛ miishɛɛ ni eeeha amɛ kɛ yibii ni amɛwoɔ yɛ amɛ anɔkwa sɔɔmɔ ni kɔɔ Maŋtsɛyeli lɛ he nibii ahe lɛ hewɔ.
3. Yehowa anɔkwa sɔɔlɔi lɛ asubaŋ yɛ sɔrɔto yɛ mɛi ni yɔɔ Kristendom mli lɛ kɛ mɛi ni fiɔ esɛɛ lɛ anɔ he yɛ mɛɛ gbɛ nɔ?
3 Mɛi ni nine kpɔɔ ni gbɛɔ sanekpakpa lɛ amɛshwaa lɛ amlihilɛ kɛ nitsumɔ su lɛ yɛ sɔrɔto yɛ mɛi krokomɛi anɔ̃ he. Nyɔŋmɔ gbalɔ lɛ wieɔ oshara ni baaba yei ni ebuuu nɔ̃ ‘ni he ejɔ amɛ’ yɛ Yerusalem ni yeee anɔkwale yɛ emli lɛ anɔ lɛ he. (Yesaia 32:9-14) Amɛsubaŋ lɛ kaiɔ wɔ mɛi komɛi ni kɛɔ akɛ amɛji Nyɔŋmɔ kɛ Kristo sɔɔlɔi shi amɛtsuuu nii ní amɛbɛ ekaa kɛha Yehowa sɔɔmɔ lɛ. Yɛ anɔkwale mli lɛ, wɔbaasusu mɛi ni yɔɔ Kristendom kɛ mɛi ni hɔmɔ kɛ kumai ni yeɔ mɛi babaoo nɛɛ jeee amɛhe sane ko lɛ ahe. Bɔ ni amɛkɛ amɛhe ewo heloo gbɛfaŋ loo jeŋ saji amli, ni amɛsusuuu amɛhe ni amɛkɛ aaawo nitsumɔ ni Yehowa efa kɛha yinɔsane be nɛɛ diɛŋtsɛ mli yɛ naagbee be nɛɛ amli lɛ he lɛ baanyɛ atsɔ oshara aha amɛ, taakɛ bɔ ni oshara baa yɛ ŋmaa ni akpaaa hewɔ lɛ.
4. Mɛɛ wɔsɛɛ be mɛɔ mɛi fɛɛ ni yeee Nyɔŋmɔ Wiemɔ lɛ anɔkwale lɛ?
4 Nɔ ni ka Kristendom kɛ mɛi ni yeɔ buaa lɛ ni fiɔ esɛɛ lɛ ahiɛ pɛ ji awerɛho kɛ hiɛkpatamɔ. Mumɔŋ hɔmɔ kɛ mɛi ni baanyiɛ esɛɛ Iɛ ni baata yɛ emli lɛ ji nɔ ni baaba yɛ bɔ ni ebɛ mlihilɛ ni ewooo yibii yɛ Yehowa sɔɔmɔ mli lɛ hewɔ. Akɛni nakai yaka Kristofoi lɛ nyɛɛɛ amɛtɛo ni amɛshwɛ dumɔwu lɛ nɔ nu jogbaŋŋ, ni asaŋ amɛkɛ Nyɔŋmɔ Wiemɔ lɛ tsuuu nii yɛ anɔkwale mli hewɔ lɛ, gbɛnaa nii ko kaaa Yehowa nɔ akɛ ‘eha eshwere.’—Okɛto 1 Korintobii 3:6-9 he.
Sanekpakpa Kɛha Anɔkwale Lɛ
5. Mɛni ágba afɔ shi yɛ Yesaia 32:15, ni mɛɛ naakpɛɛ nibii etee nɔ eba aahu kɛbashi wɔ afi 1984 nɛɛ mli?
5 Hewalɛwoo sane kɛha mɛi ni kɛ tsuishitoo mɛɔ Yehowa yɛ be mli ni amɛkɛ anɔkwayeli tsuɔ Maŋtsɛyeli lɛ he nibii ni akɛwo amɛdɛŋ lɛ ahe nii ji akɛ, sanekpakpa yɛ. Aŋma enɛ afɔ shi yɛ Yesaia 32:15 yɛ wiemɔi nɛɛ amli: “Kɛyashi beyinɔ ni aaafɔse mumɔ kɛaajɛ ŋwɛi ashwie wɔnɔ, ni ŋanɔ aaatsɔ abɔɔ, ni aaabu abɔɔ hu akɛ koo.” Afɔse Nyɔŋmɔ mumɔ krɔŋkrɔŋ lɛ ashwie eŋmɛnɛŋmɛnɛ beaŋ odasefoi lɛ anɔ tamɔ bɔ ni eba bɔfoi lɛ kɛ kaselɔi ni mɛɔ lɛ anɔ yɛ Pentekoste yɛ afi 33 Ŋ.B. lɛ. (Bɔfoi lɛ Asaji 2:1-4, 14-18; Yoel 3:1,2) Taakɛ eba yɛ nakai be lɛ mli lɛ, nakai nɔŋŋ hu ŋmɛnɛ Yehowa anɔkwa sɔɔlɔi ni yɔɔ shikpɔŋ nɔ lɛ kɛ amɛhe ewo kaselɔi afeemɔ nitsumɔ lɛ mli ni deka bɛ mli kwraa kɛha amɛ. Aaafee 1919 kɛ 1922 titri afɔse Yehowa mumɔ lɛ ashwie ewebii anɔ, ni kɛjɛ 1922 kɛbaa nɛɛ titri akɛ hewalɛ kpele wo Maŋtsɛyeli shiɛmɔ nitsumɔ lɛ mli. Nɛkɛ nitsumɔ nɛɛ etee nɔ ni emli egbele aahu kɛbashi afi nɛɛ, 1984, yɛ haomɔi ni ehà shikpɔŋ lɛ fɛɛ nɔ tamɔ kuŋtu lɛ fɛɛ sɛɛ. Sanekpakpa jajelɔi mlihilɔi ni amɛyibɔ ji 7,000 loo 8,000 yɛ 1922 mli lɛ ayi efa kɛyashɛ 2,652,323 ŋmɛnɛ.
6. Mɛɛ naakpɛɛ nibii krokomɛi hu eba kɛjɛ be mli ni afɔse mumɔ krɔŋkrɔŋ ashwie Yehowa gbɛjianɔtoo ni yɔɔ shikpɔŋ nɔ lɛ nɔ lɛ?
6 Nɔ ni ejɛ ‘mumɔ ni afɔse ashwie shi’ lɛ mli eba ji yibiiwoo. Wɔbɛ Satan je ni tamɔ ŋa nɔ lɛ mli dɔŋŋ, ni asaŋ mumɔŋ hɔmɔ ni jɛ Yehowa Wiemɔ lɛ wɔnuuu hewɔ lɛ yeee wɔ. (Ezekiel 36:29, 30) Kɛjɛ Pentekoste yɛ afi 33 Ŋ.B. kɛbaa nɛɛ, Nyɔŋmɔ etɛo “tsei wuji”—Kristofoi ni he wa ni yɔɔ shiŋŋ—yɛ ewebii lɛ amumɔŋ ŋmɔ lɛ mli. Nɛkɛ “tsei wuji” nɛɛ woɔ yibii, amɛji “Yehowa ŋmɔ,” amɛshwere ni amɛtsɔmɔ tamɔ koo yɛ be mli ni Yehowa gbɛjianɔtoo ni anaa lɛ jamɔ lɛ kɛ hɔɔŋ ni haa mɔ he jɔɔ lɛ kɛ mumɔŋ ŋmaa ni jɛ amɛnyɔŋmɔ lɛ ŋɔɔ haa mɛi fɛɛ ni sumɔɔ lɛ.—Yesaia 61:3, NW.
7. Mɛni etsirɛ asafo babaoo ko ni hiɛ tsuijurɔ koni amɛbua amɛhe naa yɛ Yehowa gbɛjianɔtoo loo asafo ni anaa lɛ he?
7 Mumɔŋ paradeiso lɛ feɔ gbɔmɛi ni yɔɔ tsuijurɔ ni amrɔ nɛɛ amɛhoɔ yuu kɛbaa Yehowa teokrase gbɛjianɔtoo ni anaa lɛ mli lɛ fɛo. He ko he ko bɛ shikpɔŋ nɛɛ nɔ ni amɛo na jalɛ kɛ jalɛsaneyeli yɛ. Osɔfoi ni yeee anɔkwale, maŋkwralɔi ni sɔmɔɔ amɛ diɛŋtsɛ amɛhe kɛ jarayeli mli pɛsɛmkunyatsɛmɛi hiɛjoolɔi eha eje amɛtsine. Amɛhiŋmɛi egbele ni amɛna asafo ko ni hii kɛ yei ni sheɔ Nyɔŋmɔ gbeyei yɔɔ mli ni ajieee kwashia kɛ shishiulɔ yi yɛ mli tamɔ oookɛɛ eji ablade ko; he ni akãa mɛi ni hiɛ subaŋ ni Nyɔŋmɔ gbeyeishemɔ bɛ mli akɛni ejeee Kristofoi asubaŋ hewɔ yɛ lɛ, ni akãa mɛi ni tsuɔ mujinitsumɔ kɛ yiwalɛ nii lɛ oya yɛ lɛ.
8. Yesaia 32:16 eba mli yɛ Yehowa webii anɔ ŋmɛnɛ yɛ mɛɛ gbɛ nɔ?
8 Gbalɔ lɛ tee nɔ kɛ eshɛɛ sane ni jɛ ŋwɛi lɛ akɛ: “Ni kojomɔ aaahi shi yɛ ŋa lɛ nɔ, ni jalɛ hu aaahe shi yɛ abɔɔ lɛŋ.” (Yesaia 32:16) Eka shi faŋŋ akɛ kojomɔ kɛ jalɛ hiɔ Yehowa teokrase gbɛjianɔtoo ni anaa lɛ mli. Yɛ anɔkwale mli lɛ, Nyɔŋmɔ anɔkwa sɔɔlɔi fɛɛ le akɛ nɔ fɛɛ nɔ ni amɛyɔɔ ni amɛnaa mli ŋɔɔmɔ, ni shidaamɔ kpakpa ni amɛyɔɔ yɛ Yehowa hiɛ lɛ fata he lɛ ba kɛha amɛ akɛ mlihilɛ ni esaaa amɛ. Amɛjalɛ lɛ jɛ Nyɔŋmɔ.
9. Yehowa anɔkwa odasefoi lɛ adeŋmegbomɔ nitsumɔi lɛ yɛ sɔrɔto yɛ Kristendom osɔfoi lɛ anitsumɔi kɛ amɛsubaŋ he yɛ mɛɛ gbɛ nɔ?
9 Enɛ yɛ sɔrɔto kwraa yɛ Kristendom abladei ni buɔ amɛhe jalɔi kɛ krɔŋkrɔŋbii lɛ ahe. Eji jalɛ ni nitsumɔi yeɔ he odase—nitsumɔi ni kɛ yijiemɔi bahaa Yehowa kɛ sɛɛnamɔi hu kɛha ebɔɔ nii ni feɔ toiboo ni jɛ maji kɛ wekui sɔrɔtoi amli lɛ. Nɔ ni jeee bibioo yɛ’ nakai nitsumɔi lɛ ateŋ hu ji Maŋtsɛ ni yeɔ nɔ bianɛ yɛ Nyɔŋmɔ suɔmɔnaa nii anaa lɛ ni ajajeɔ lɛ atsɔɔ lɛ. Gbɔmɛi agbɛjianɔtoo ko bɛ shikpɔŋ nɛɛ nɔ ni amɛkɛ amɛhe ewo nakai anɔkwasane ni haa mɔ tsui nyaa lɛ jajemɔ mli. Ni mɔ fɛɛ mɔ ni yɔɔ tsuijurɔ ni baanu lɛ miisumɔ ni eha enanemɛi anu Maŋtsɛyeli ekomefeemɔ lɛ mli jɔɔmɔi lɛ ahe.
Jɔɔmɔ Ni Ji Toiŋjɔlɛ
10. Mɛni Yesaia yaa nɔ etsɔɔ mli yɛ egbalɛ lɛ mli yɛ yitso 32, kuku 17?
10 Nɛkɛ jeŋ muu fɛɛ nitsumɔ ni gbɛɔ shwaa nɛɛ, nɛkɛ sɔɔmɔ krɔŋkrɔŋ nɛɛ yaa hiɛ yɛ toiŋjɔlɛ, kpoofeemɔ kɛ shweshweeshwe shihilɛ he gbɛjianɔtoo mli tamɔ nɔ ni Yesaia tee nɔ etsɔɔ mli yɛ egbalɛ lɛ mli yɛ yitso 32, kuku 17 lɛ, akɛ: “Ni nii ni jalɛ lɛ aaatsu ji hejɔlɛ, ni jalɛ lɛ mli sɛɛnamɔ ji hejɔɔmɔ kɛ toiŋjɔlɛ kɛaatee naanɔ.” Nɛkɛ anɔkwale jalɛ nɛɛ ji nɔ ni gbɔmɛi ni sheɔ Nyɔŋmɔ gbeyei ni jɛ wekui kɛ wiemɔi fɛɛ mli lɛ taoɔ, ni amɛ naa enɛ bianɛ yɛ Yehowa Odasefoi asafo lɛ mli. Toiŋjɔlɛ yɛ mli, ejaakɛ mɔ fɛɛ mɔ kɛ enyɛmi feɔ ekome, ni no haa “amɛtekeɔ nɔ yɛ Nuŋtsɔ lɛ nitsumɔ lɛ mli.”—1 Korintobii 15:58.
11. (a) Namɛi bɛ gbɛfaŋnɔ ko yɛ Yehowa gbɛjianɔtoo lɛ mli? (b) Abuaa amɛnaa kɛjɛɔ mli yɛ mɛɛ gbɛ nɔ, ni mɛni jɛɔ mli baa haa Yehowa anɔkwa sɔɔlɔi?
11 Gbɛ ko bɛ kɛha mɛi ni wieɔ kɛkɛ ni amɛsumɔɔɔ nitsumɔ yɛ Yehowa Sɔɔmɔ mli yɛ Nyɔŋmɔ webii ateŋ lɛ. Yɛ anɔkwale mli lɛ, nɔ ni shiwoo ni yɔɔ Yesu abɛbua ni yɔɔ Mateo 13:24-30, 39, 41 lɛ mli lɛ tsɔɔ lɛ miiba mli bianɛ. Yɛ anɔkwale mli lɛ, ŋwɛibɔfoi ni ji ŋmaakpalɔi lɛ ‘miibua nibii ni tɔtɔ̃ɔ mɛi anaji kɛ gbɔmɛi ni tsuɔ mlakwamɔ nitsumɔi lɛ anaa kɛmiijɛ e-Maŋtsɛyeli gbɛjianɔtoo lɛ mli.’ Ŋwɛibɔfoi lɛ nyɛɔ amɛyooɔ mɛi ni ji Yehowa anɔkwa sɔɔlɔi kɛ mɛi ni ji apasafoi lɛ. Amɛnyɛɔ amɛkɛ shihilɛi komɛi baa ni no haa akpaa nitsulɔi fɔji lɛ ahe mama ni no haa ashwieɔ amɛ kɛjɛɔ anɔkwale Kristofoi lɛ kɛbɔɔ mli. Ni mɛni jɛɔ mli baa? Gbɛjianɔtoo loo asafo ni yɔɔ hewalɛ yɛ mumɔŋ, ni enitsumɔ jieɔ Yehowa yi, ni ehaa e-Maŋtsɛyeli ni yɔɔ Yesu Kristo shishi lɛ shwereɔ.
12. (a) Mɛɛ nɔmimaa ni mli wa Yehowa kɛhaa ewebii taakɛ atsɔɔ mli yɛ Yesaia 32:18 lɛ? (b) Mɛni nibii ni baa he okadi atsɔɔ hiɛ anaa lɛ, ni enɛ saa Yehowa anɔkwafoi lɛ ahe yɛ mɛɛ gbɛ nɔ?
12 Yesaia tee nɔ ejaje ekoŋŋ (32:18) akɛ: “Mimaŋ lɛ aaahi shi yɛ hejɔlɛ shia, kɛ shihilɛ he ni yɔɔ shweshweeshwe, kɛ hejɔɔmɔ he ni yɔɔ kpoo.” Yehowa eha esɔɔlɔi anɔkwafoi ni yɔɔ shikpɔŋ nɔ lɛ shihilɛ he kɛ nitsumɔ ni mɔ ko mɔ ko nyɛŋ ashwie amɛ kɛjɛ he. Amɛbaahi biɛ aahu kɛyashi be mli ni Yehowa aaatsu eyiŋtoo kɛha amɛ yɛ Harmagedon afa gbɛ biɛ nɛɛ he nii amɛgbe naa. (Kpojiemɔ 16:14, 16) Yɛ amɛgbɛfaŋ lɛ, Babilon kpeteŋkpele lɛ, jeŋ apasa jamɔ maŋtsɛyeli lɛ egbee shi momo. Hewalɛ ni enaa yɛ mɛi anɔ lɛ miita yɛ oyaiyeli mli. Amrɔ nɛɛ po, kooloo ni atsɔɔ mli yɛ Kpojiemɔ yitso 17 lɛ henii komɛi kɛ hiŋmɛi fɔŋ miikwɛ lɛ, amɛmiisaa amɛhe koni amɛye eheloo ni amɛkɛ la asha lɛ kwraa. (Kpojiemɔ 17:16) Shi nibii ni teɔ shi ni amɛnaa akɛ eeba nɛɛ gbaaa Maŋtsɛyeli lɛ he odasefoi lɛ anaa kwraa. Amɛsheee gbeyei, taakɛ je lɛŋ bii sheɔ ni no eha amɛhiɛ efee amɛ yaa lɛ. Akɛni Yehowa kɛ nibii ni baaba lɛ ahe nilee eha wɔ hewɔ lɛ, wɔnyɛɔ wɔkɛ wɔsɛɛ be kpeɔ yɛ hekɛnɔfɔɔ mli ni wɔleɔ nɔ ni baajɛ mli aba. “Mɛi ni sumɔɔ [Yehowa] omla lɛ yɛ hejɔlɛ babaoo, ni nɔ ko nɔ ko bɛ ni woɔ amɛnajiaŋ.”—Lala 119:165.
13. Mɛɛ nɔyaa ni anaa famɔ Yehowa kɛba egbɛjianɔtoo ni anaa lɛ mli, ni enɛ ena ewebii lɛ asubaŋ kɛ nitsumɔ nɔ hewalɛ yɛ mɛɛ gbɛ nɔ?
13 Gbalɔ lɛ gba yɛ Yesaia 60:17 akɛ nɔyaa babaoo baaba teokrase gbɛjianɔtoo kɛ nifeemɔ mli yɛ Yehowa sɔɔlɔi ni yɔɔ shikpɔŋ nɔ lɛ ateŋ. Ni efee enɛ he mfoniri kɛtsɔ nibii ni shãa kɛ dadei ni ehiii ni akɛ nibii tamɔ akɔɔble, jwiɛtɛi kɛ shika aaato najiaŋ lɛ nɔ. Ni wɔyaa nɔ wɔkaneɔ akɛ: “Ni maŋɔ hejɔlɛ mafee onɔyelɔi, ni maŋɔ jalɛ mafee o-nukpai.” Mɛi fɛɛ ni yɔɔ Maŋtsɛyeli jajemɔ gbɛjianɔtoo nɛɛ mli lɛ yɛ miishɛɛ akɛ amɛbaasɔmɔ kutuu yɛ toiŋjɔlɛ mli, ejaakɛ, amɛnitsumɔi lɛ fɛɛ, ni he ni amɛsɔmɔɔ yɛ lɛ kɔɔɔ he eko lɛ kɔɔ Maŋtsɛyeli lɛ jajemɔ yɛ shikpɔŋ muu lɛ fɛɛ nɔ lɛ he. Amɛ fɛɛ amɛmiina nɔ fɛɛ nɔ yɛ faŋŋ mli, ni nɔ ni amɛ fɛɛ amɛsusuɔ he ji nitsumɔ lɛ ni amɛaatsu amɛgbe naa. Kwɛ bɔ ni amɛyɔɔ sɔrɔto kwraa yɛ pɛsɛmkunya ta ni yaa nɔ daa yɛ nitsulɔi kɛ nitsumɔtsɛmɛi ateŋ ni kɛ naagbai baa yɛ jeŋ ni ebɔle wɔhe kɛkpe lɛ mli lɛ! Yehowa tsɔɔ mɛi fɛɛ ni yɔɔ egbɛjianɔtoo lɛ mli lɛ nii ni gbɛhe mli ni amɛyɔɔ lɛ kɔɔɔ he eko, no hewɔ lɛ amɛnyɛɔ amɛyaa nɔ yɛ amɛnitsumɔ mli yɛ toiŋjɔlɛ kɛ gbɛjianɔtoo kpakpa mli.—Yesaia 54:13.
14. Mɛɛ wɔsɛɛ be ni yɔɔ sɔrɔto kwraa ka (a) Yehowa webii ni tsuɔ nii waa lɛ ahiɛ? (b) Kristendom kɛ emaŋkwramɔŋ hemɛi lɛ fɛɛ ahiɛ?
14 Nɛkɛ gbɔmɛi nitsulɔi ni ajɔɔ amɛ nɛɛ baaya nɔ ni mɔ ko gbaŋ amɛnaa yɛ be mli ni Satan nibii agbɛjianɔtoo lɛ naagbee baa trukaa yɛ naakpɛɛ gbɛ nɔ lɛ. Yehowa fɔbuu kojomɔ, ni tamɔ nyɔŋmɔŋtɛi ni tsiitsii lɛ baanɛ ashwie Kristendom kɛ jeŋ muu lɛ fɛɛ nɔ, ni ebaakpata henyɛlɔ lɛ hiɛ kwraa. Shi Nyɔŋmɔ webii lɛ baahi shi shweshweeshwe yɛ ehebuu shishi yɛ be mli ni Satan tai ni tamɔ “koo” agbo lɛ aaagbee shi kwraa, tamɔ bɔ ni Yesaia 32:19 gba lɛ: “Shi beni koo lɛ aaagbee shi lɛ, nyɔŋmɔŋtɛi aaanɛ, ni aaaba maŋ lɛ shi kwrakwra.” Yehowa sɔɔlɔi lɛ baahi shi kpoo kɛtsɔ nifeemɔ ni hosoɔ jeŋ muu fɛɛ nɛɛ mli yɛ hekɛnɔfɔɔ mli, ejaakɛ “Yehowa bɔfo lɛ bɔɔ ŋsra yɛ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ.”—Lala 34:8.
Nitsumɔ Agbo Ni Esa Akɛ Agbe Naa
15. Mɛɛ nitsumɔ yɔɔ lolo ni Yehowa webii baatsu?
15 Dani enɛ aaaba lɛ, nitsumɔ agbo ko ka shi ni esa akɛ atsu agbe naa yɛ be mli ni Yehowa kɛ hegbɛ lɛ haa mɛi babaoo ni yɔɔ jeŋmaji fɛɛ mli lolo lɛ koni amɛhiŋmɛii agbele ni amɛtoii hu anu nɔ ni yiwalaheremɔ sane lɛ tsɔɔ lɛ shishi. Miishɛɛ diɛŋtsɛ ji mɛi ni kɛ amɛhe haa Maŋtsɛyeli sɔɔmɔ ni tamɔ nɛkɛ ni amɛshiii nɔ ko nɔ ko yɛ sɛɛ, ni amɛkɛ amɛhe woɔ Maŋtsɛyeli anɔkwale lɛ dumɔwui ataomɔ mli yɛ shikpɔŋ nɔ jeŋmaji fɛɛ ateŋ ni deka bɛ mli kwraa lɛ. Nɛkɛ jɔɔmɔ nɛɛ tamɔ nɔ ni atsɔɔ mli yɛ Yesaia 32 naagbee kuku lɛ mli ni kaneɔ nɛkɛ lɛ: “Ajɔɔnyɛ, nyɛ mɛi ni nyɛduɔ nii yɛ faai fɛɛ naa, ni nyɛŋmɛɔ tsina kɛ teji nane gbɛ lɛ.” Nɛkɛ kooloi nɛɛ ji jatsuterelɔi ni Nyɔŋmɔ blema webii kɛ amɛ tsu nii koni amɛhu shikpɔŋ lɛ nɔ ni amɛtɛo dumɔwui. Kɛ akɛto he ŋmɛnɛ lɛ, Yehowa hu kɛ nitsumɔ dadei ni he hiaa eŋmɛnɛŋmɛnɛ beaŋ Odasefoi lɛ koni amɛkɛtɛo Maŋtsɛyeli anɔkwale lɛ, ni anyɛ atsu he nii oya bɔ ni sɛɛnamɔ yɔɔ he eha, kɛ hekɛnɔfɔɔ kɛ hiɛnɔkamɔ akɛ Yehowa kɛ ejɔɔmɔ baafata he ni akpa ŋmaa babaoo.
16. Mɛɛ odaseyeli wɔyɔɔ ni tsɔɔ akɛ Yehowa miijɔɔ e-Maŋtsɛyeli lɛ he odasefoi lɛ babaoo yɛ shikpɔŋ lɛ fɛɛ nɔ?
16 Yɛ be mli ni wɔkwɛɔ bɔ ni shikpɔŋ ni ji je lɛ yɔɔ lɛ, ani wɔnaaa odaseyeli ni tsɔɔ Yehowa jɔɔmɔ yɛ wɔ mɔdɛŋbɔɔi anɔ, yɛ be mli ni wɔshiɛɔ Maŋtsɛyeli lɛ he sane lɛ kɛ ekaa daa lɛ? Nitsumɔ he niji wuji kɛ shihilɛ hei kpakpai ni nitsulɔi kɛ sɔɔlɔi ni ataoɔ ni amɛtsu Betel nitsumɔ babaoo kɛ ehewɔ nibii krokomɛi yɛ jɛmɛ yɛ shikpɔji babaoo nɔ lɛ miifa. Ŋmɛnɛŋmɛnɛ beaŋ tsɔnei ni akɛkalaa woji oya yɛ be kukuoo mli he gbɛjianɔtoo yɛ, yɛ maji sɔrɔtoi anɔ, no hewɔ lɛ Bibliai, Biblia kasemɔ he woji kɛ woji tɛtrɛbii afeemɔ efa babaoo diɛŋtsɛ. Nyɔŋmɔ sɔɔlɔi ni amɛjɔɔ amɛhe nɔ ni abaptisi amɛ lɛ ateŋ mɛi pii jɛɔ amɛsuɔmɔ mli amɛkɛ amɛhe haa akɛ amɛaasɔmɔ akɛ daa kɛ gbɛgbalɔi awalɔi, ni amɛkɛ be tsuɔ nii daa gbi yɛ Maŋtsɛyeli anɔkwale lɛ ni amɛtɛoɔ yɛ gbɔmɛi pii atsuii amli lɛ mli. Maŋtsɛyeli shiɛlɔi ni yɔɔ asafoi fɛɛ mli lɛ miibɔ mɔdɛŋ ni amɛha amɛsɔɔmɔ lɛ aya hiɛ, ni amɛfeɔ enɛ yɛ hiɛsɔɔ babaoo ni amɛyɔɔ kɛhaa jɔɔmɔi ni Yehowa efɔse eshwie amɛnɔ momo lɛ hewɔ.
17. Mɛni yɔɔ sɔrɔto yɛ Yehowa Odasefoi lɛ anitsumɔ he yɛ wɔ gbii nɛɛ amli?
17 Yehowa Odasefoi pɛ ji mɛi ni amɛkɛ amɛhe ewo Nyɔŋmɔ Maŋtsɛyeli nɔyeli lɛ nitsumɔ ni haa wala nɛɛ mli. Amɛ pɛ ji mɛi ni mli filiɔ amɛ yɛ ŋmaakpamɔ babaoo ni baa bianɛ lɛ hewɔ. Agbɛnɛ ahalaa dumɔwui ni Yehowa kɛhaa enitsulɔi ni jɛɔ amɛsuɔmɔ mli amɛtsuɔ nii lɛ amli jogbaŋŋ! Afeɔ Biblia kasemɔ he woji lɛ koni akɛkanya mɛi pii ni abaabua amɛnaa lolo ni akɛ amɛ aba Yehowa toiŋjɔlɛ gbɛjianɔtoo lɛ, Kristofoi asafo lɛ ni akɛtoɔ e-Bi lɛ “aboŋo” lɛ he lɛ mli lɛ atsuii.
18. Mɛni hewɔ esa akɛ wɔtswa wɔfai shi akɛ wɔbaaya nɔ yɛ wɔ-Maŋtsɛyeli sɔɔmɔ lɛ mli kɛ miishɛɛ kɛ tsui ni nyɔɔ mɔ mli?
18 Yɛ anɔkwale mli lɛ, Yehowa gbi lɛ mli wɔyɔɔ nɛɛ gbi ni abaayoo “shiwooi kpelekpelei ni jara wa lɛ” ni ekɛha ewebii ni ámɛtu amɛhe amɛha lɛ lɛ. (2 Petro 1:4) Toiŋjɔlɛ kɛ ekomefeemɔ miishwere yɛ wɔteŋ. Akɛ wɔnyɔŋmɔ lɛ yiŋtooi ahe shishinumɔ ni mli ka shi faŋŋ eha wɔ. Wɔyɛ jwɛŋmɔŋ toiŋjɔlɛ yɛ je ni gbeyeishemɔ emɔmɔ emlibii ateŋ. Wɔsɛɛ be ni jɔɔmɔi wuji yɔɔ mli lolo miimɛ wɔ. Ani eŋɔɔɔ wɔnaa fe nine akɛ wɔji mɛi ni wɔnine eshɛ nɛkɛ Maŋtsɛyeli ekomefeemɔ mli jɔɔmɔi nɛɛ fɛɛ nɔ lɛ? Ni ani wɔtswako wɔfai shi akɛ wɔbaaya hiɛ yɛ wɔ-Maŋtsɛyeli nitsumɔ lɛ mli kɛha Yehowa naanɔ yijiemɔ?a
[Shishigbɛ niŋmai]
a Ajie kɛjɛ May 15, 1984 Watchtower lɛ mli.
Mɛni Ji Ohetoo?
◻ Esoro Yehowa sɔɔlɔi asubaŋ yɛ mɛi ni yɔɔ Kristendom lɛ anɔ̃ he yɛ mɛɛ gbɛ nɔ?
◻ Mɛni ejɛ Nyɔŋmɔ mumɔ lɛ ni afɔse ashwie shi lɛ mli eba?
◻ Yɛ Yesaia 32:17, 18 kɛ gbeekpamɔ naa lɛ, mɛɛ jɔɔmɔi Yehowa webii naa mli ŋɔɔmɔ bianɛ?
◻ Mɛɛ odaseyeli wɔyɔɔ ni tsɔɔ akɛ Yehowa miijɔɔ e-Maŋtsɛyeli odasefoi lɛ?
[Mfoniri ni yɔɔ baafa 17]
Ama bɔ ni ehe hiaa akɛ ‘atswa Maŋtsɛ lɛ kɛ Maŋtsɛyeli’ lɛ he adafi lɛ nɔ mi yɛ 1922 kpee ni Yehowa webii fee yɛ Cedar Point, Ohio lɛ shishi
[Mfoniri ni yɔɔ baafa 20]
Yehowa kɛ jeŋ fɛɛ toiŋjɔlɛ kɛ ekomefeemɔ ejɔɔ ewebii
[Akrabatsa ni yɔɔ baafa 21]
“Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ! Etamɔ Hermon bɔ ni nyɔɔ Zion gɔji lɛ anɔ lɛ. Ejaakɛ Yehowa ewo jɔɔmɔ kɛ wala shi eha jɛi kɛaashi naanɔ.”—Lala 133:1-3.