14. Babilon baana ‘bii agbele kɛ okulafo tsɔmɔ’ mli amanehulu yɛ mɛɛ gbɛ̀i anɔ?

¹⁴ Mɛni baaba Babilon nɔ? Yehowa tee nɔ akɛ: “Shi nibii enyɔ nɛɛ aaaba onɔ trukaa yɛ gbi kome nɔ, aaakpakpaa obii yɛ ohe ni oootsɔ okulafo hu; enɛɛmɛi fɛɛ aaaba onɔ yɛ okunyaayelii ní fá lɛ kɛ okablɛfimɔi babaoo lɛ mli.” (Yesaia 47:9) Hɛɛ, Babilon hegbɛ ní nɔ kwɔ ákɛ jeŋ hewalɛ lɛ baaba naagbee trukaa. Yɛ blema Bokagbɛbii ashikpɔji anɔ lɛ, okulafo tsɔmɔ kɛ bii agbele ji amanehulu kɛ niiashikpamɔi ní mli wa fe fɛɛ ní baanyɛ aba yoo nɔ. Wɔleee Babilon “bii” abɔ ní hiɛ kpata yɛ gbi gbɛkɛ ní egbee shi lɛ.d Shi, yɛ be ko sɛɛ lɛ, abaashi maŋtiase lɛ afɔ̃ shi amaŋfɔ. (Yeremia 51:29) Ebaana amanehulu ákɛ okulafo hu ejaakɛ abaakpá emaŋtsɛmɛi lɛ kɛjɛ maŋtsɛsɛi lɛ nɔ.

15. Yɛ Babilon yitsoŋ ní wa yɛ Yudafoi lɛ anɔ lɛ sɛɛ lɛ, mɛɛ yiŋtoo kroko hewɔ ni Yehowa mli fũ lɛ lɛ?

¹⁵ Shi kɛlɛ, jeee bɔ ni Babilon wa Yudafoi lɛ ayi waa lɛ pɛ ji yiŋtoo hewɔ ní Yehowa mli fũ lɛ lɛ. ‘Ekunyaayeli ní fá babaoo lɛ’ hu woɔ emli la. Nyɔŋmɔ Mla ní ekɛha Israel lɛ buɔ mumɔi atsɛmɔ nifeemɔi fɔ́; ni kɛlɛ Babilon kɛ ehe woɔ ŋkunyaayeli nifeemɔi amli waa. (5 Mose 18:10-12; Ezekiel 21:21) Wolo ko ní atsɛɔ lɛ Social Life Among the Assyrians and Babylonians lɛ kɛɔ akɛ Babilonbii “hiɔ shi yɛ daimonioi babaoo ní amɛheɔ amɛyeɔ akɛ amɛbɔle amɛ kɛkpe lɛ ahe gbeyeishemɔ ni yaa nɔ daa mli.”