Mra Shitelɔ Lɛ

ALMOND loo ŋmɛtso ji tsei ni woɔ aduawai ni yɔɔ sɔrɔto waa yɛ Mediteranea niiaŋ lɛ ateŋ ekome. Yɛ January loo February naagbee mli lɛ​—etsɔɔ tsei krokomɛi lɛ fɛɛ ahiɛ​—eteɔ shi kɛjɛɔ efɛ̃i be gbɔjɔmɔ lɛ mli. Ni mɛɛ shitee enɛ ji nɛkɛ! Tso muu lɛ fɛɛ yiɔ obɔ kɛ afofro tsuji loo eyɛji ni ni egba, ni sɛɛkpee nɔ lɛ tamɔ nuumo yiteŋ tsɔi yɛŋ.​—Okɛto Jajelɔ 12:5 he.

Blema Hebribii lɛ tsɛ almond loo ŋmɛtso lɛ akɛ “mɔ ni teɔ shi lɛ,” ni akɛmiitsɔɔ afofro ni egbaa mra lɛ. Yehowa kɛ nɛkɛ su nɛɛ tsu nii koni ekɛtsɔɔ shɛɛ sane ko ni he hiaa lɛ mli. Akɛ almond loo ŋmɛtso ko ni etsɛ̃ he ninaa tsɔɔ Yeremia, yɛ esɔɔmɔ nitsumɔ lɛ shishijee mli. Mɛni no tsɔɔ? Yehowa tsɔɔ mli akɛ: “Miishi kpe yɛ miwiemɔ lɛ he ni mafee.”​—Yeremia 1:⁠12.

Taakɛ almond loo ŋmɛtso lɛ ‘teɔ shi’ mra lɛ, nakai nɔŋŋ Yehowa “teɔ shi leebi maaŋkpa” yɛ mfonirifeemɔ mli koni etsu egbalɔi lɛ ni amɛyabɔ ewebii lɛ kɔkɔ yɛ nɔ ni baajɛ toigbele mli aba lɛ he. (Yeremia 7:25) Ni ejɔŋ ehe hu​—‘ebaashi kpe’​—kɛyashi be mli ni egbalɛ wiemɔ lɛ aaaba mli. No hewɔ lɛ, nakai ebalɛ yɛ afi 607 D.Ŋ.B., yɛ be ni ato lɛ mli, ni Yehowa fɔbuu kojomɔ ba Yuda maŋ ni ekwa hemɔkɛyeli lɛ nɔ.

Nyɔŋmɔ Wiemɔ lɛ gbaa akɛ fɔbuu kojomɔ ni tamɔ nakai nɔŋŋ baaba yiwalɛ nibii agbɛjianɔtoo ni wɔyɔɔ mli nɛɛ nɔ. (Lala 37:​9, 10; 2 Petro 3:​10-13) Yɛ be mli ni ewieɔ kojomɔ nifeemɔ nɛɛ he lɛ, gbalɔ Habakuk maa nɔ mi kɛhaa wɔ akɛ: “Shi ninaa lɛ yɛ ha be ni ato lɛ kɛ̃, . . . mɛɛ lɛ kɛ̃; ejaakɛ ebaaba lɛlɛŋ, ekpeŋ sɛɛ.” (Habakuk 2: 3 ) Almond loo ŋmɛtso ni egba afofro fɛfɛo lɛ kaiɔ wɔ akɛ Yehowa baashi kpe yɛ ewiemɔ lɛ he koni etsu he nii ni eba mli.

[He ni Mfoniri ni yɔɔ baafa 32 lɛ Jɛ]

Pictorial Archive (Near Eastern History) Est.