Kɔŋtso lɛ Teremɔ yɛ Gbekɛbiiashi

OBALAHII kɛ obalayei bibii kɛ nɔnyɛɛi ni mli wa waa kpeɔ yɛ nɛkɛ “jaramɔ bei” nɛɛ amli. (2 Timoteo 3:1) Akɛ lakamɔ wiemɔi ni woɔ jeŋba shara, tawa shɛremɔ, kɛ subaŋi krokomɛi ni kpataa mɔ hiɛ lɛ ahe hewalɛ lɛ tutuaa amɛ daa gbi. Ekolɛ ayeɔ mɛi ni nyiɛɔ tɛi ni Biblia lɛ efolɔ eshwie shi lɛ asɛɛ lɛ ahe fɛo, akɛni amɛfeee nɔ ni mɛi fɛɛ feɔ lɛ hewɔ, ni ekolɛ Kristofoi komɛi nuɔ he akɛ ebaafee mlɛo akɛ amɛaaŋmɛɛ amɛhe amɛha nɔnyɛɛ nɛɛ.

Kɛbaa afii ohai kpawo D.Ŋ.B. lɛ naagbee gbɛ lɛ, Yeremia ŋma akɛ: “Ehi hã nuu akɛ etereɔ ekɔŋtso yɛ ebalahiiaŋ.” (Yaafo 3:27) Mɛni etsɔɔ lɛ? Etsɔɔ akɛ, kasemɔ ni aaakase bɔ ni aaakpee kaai anaa yɛ gbekɛbiiashi lɛ yeɔ ebuaa mɔ, ni esaa ehe koni enyɛ ekpee kaai ni baa beni mɔ lɛ eda yɛ afii amli lɛ anaa. Eyɛ mli akɛ anáaa jaramɔ shihilɛi ahe miishɛɛ moŋ, shi eji nii ni Kristofoi gbekɛbii kɛ onukpai fɛɛ nyɛŋ ajo naa foi. (2 Timoteo 3:12) Shi sɛɛnamɔi ni jɛɔ anɔkwayeli mli baa lɛ nɔ kwɔ kwraa fe be kukuoo mli heyeli ni ekolɛ saji aheŋmɛɛmɔ koni akɛsaa lɛ kɛaaba.

Kɛ́ gbekɛ ji bo lɛ, bɔɔ mɔdɛŋ ni okpee hemɔkɛyeli he kaai ni okɛkpeɔ lɛ anaa kɛ ekãa. Kɛ́ aaka bo ni okɛ ohe awo jeŋba fɔŋ ko mli lɛ, kaakpɛlɛ akɛ oooŋmɛɛ saji ahe ni okɛsaa. Eyɛ mli akɛ amrɔ nɛɛ enɛ feemɔ baawa kɛha bo moŋ, shi yɛ naagbee lɛ, ebaaha oyeyeeye-feemɔi anɔ agbɔ kwraa wɔsɛɛ. Yesu wo shi akɛ: “Nyɛwoa mipã lɛ nyɛfɔ̃a nyɛnɔ . . . , ni nyɛaaná hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.”—Mateo 11:29, 30.

Kpɛlɛmɔ kaa ni Biblia shishitoo mlai ni ohiɔ shi yɛ naa lɛ kɛbaa lɛ anɔ. Nakai feemɔ baaha ona shihilɛ gbɛ ni hi fe fɛɛ bianɛ, kɛ hiɛnɔkamɔ ni mã shi shiŋŋ hu kɛha wɔsɛɛ. Taakɛ Biblia lɛ kɛɔ lɛ, “je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.