Awieɔ “mumɔ krɔŋkrɔŋ lɛ gbɛi” he yɛ Mateo 28:​19. Shi wiemɔ, “gbɛi” lɛ etsɔɔɔ gbɔmɔ gbɛi yɛ be fɛɛ mli yɛ Hela loo Ŋleshi wiemɔ mli. Kɛ wɔkɛɛ, “yɛ mla lɛ gbɛi amli” lɛ, jeee gbɔmɔ ko he wɔwieɔ lɛ. Wɔmiitsɔɔ nɔ ni mla lɛ damɔ shi kɛha, ehewalɛ. Robertson Word Pictures in the New Testament lɛ kɛɔ akɛ: “Gbɛi (onoma) ni akɛtsuɔ nii yɛ biɛ lɛ jeɔ kpo babaoo yɛ Septuagint lɛ kɛ papyri lɛ mli kɛha hewalɛ loo hegbɛ.” No hewɔ lɛ baptisimɔ ‘yɛ mumɔ krɔŋkrɔŋ lɛ gbɛi amli’ lɛ haa ayɔseɔ hewalɛ ni mumɔ lɛ yɔɔ, akɛ ejɛ Nyɔŋmɔ ŋɔɔ ni etsuɔ nii yɛ ŋwɛi suɔmɔnaa nifeemɔ shishi.

WOLO New Catholic Encyclopedia lɛ kɛ “ŋmalɛi ni akɛmaa nɔ mi” nɛɛ etɛ haa shi ekpɛlɛɔ nɔ hu akɛ: “Atsɔɔɔ Triniti Krɔŋkrɔŋ tsɔɔmɔ lɛ yɛ Kpaŋmɔ Momo lɛ mli. Ni yɛ Kpaŋmɔ Hee lɛ mli hu lɛ, anaa odaseyeli ni etsɛ fe fɛɛ lɛ yɛ Paulo woji lɛ amli, titri lɛ yɛ 2 Kor. 13:​13 [kuku 14 yɛ Bibliai komɛi amli], kɛ 1 Kor. 12:​4-⁠6. Yɛ Sanekpakpai lɛ amli lɛ anaa Triniti lɛ he odaseyeli yɛ baptisimɔ he sane ni yɔɔ Mat. 28:​19 lɛ pɛ mli.”

Atoɔ “mɛi” etɛ lɛ anaa yɛ nakai kukuji lɛ amli yɛ The New Jerusalem Bible lɛ mli yɛ nɛkɛ gbɛ nɔ. 2 Korintobii 13:​13 (14) kɛ etɛ lɛ fɛɛ baa yɛ nɛkɛ gbɛ nɔ: “Nuŋtsɔ Yesu Kristo duromɔ lɛ kɛ Nyɔŋmɔ suɔmɔ lɛ kɛ Mumɔ Krɔŋkrɔŋ naanyobɔɔ lɛ kɛ nyɛ fɛɛ ahi shi.” Klɛŋklɛŋ Korintobii 12:​4-⁠6 kɛɔ akɛ: “Shi duromɔ keenii sɔrɔtoi yɛ, shi Mumɔ kome lɛ nɔŋŋ ni; ni sɔɔmɔ nitsumɔi sɔrɔtoi hu yɛ, shi Nuŋtsɔ kome lɛ nɔŋŋ ni; ni nitsumɔi sɔrɔtoi hu yɛ, shi Nyɔŋmɔ kome lɛ nɔŋŋ ji mɔ ni tsuɔ fɛɛ yɛ mɛi fɛɛ mli.” Ni Mateo 28:​19 kaneɔ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi; nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ Krɔŋkrɔŋ lɛ gbɛi amli.”

Ani nakai kukuji lɛ tsɔɔ akɛ Nyɔŋmɔ, Kristo kɛ mumɔ krɔŋkrɔŋ lɛ feɔ Triniti ni ji Nyɔŋmɔ-su kome, ni akɛ mɛi etɛ lɛ yeɔ egbɔ yɛ gbɔmɔtso, hewalɛ kɛ naanɔ shihilɛ mli? Dabi, amɛfeee nakai, tamɔ bɔ ni mɛi etɛ tamɔ Tom, Dick, kɛ Harry gbɛi ni aaato naa lɛ etsɔɔɔ akɛ amɛji mɛi etɛ yɛ gbɔmɔ kome mli lɛ.

McClintock kɛ Strong Cyclopedia of Biblical, Theological, and Ecclesiastical Literature lɛ kpɛlɛɔ nɔ akɛ nɔ ni awieɔ nɛɛ, “maa nɔ mi akɛ, mɛi etɛ ni atsi amɛ ta lɛ yɛ, . . . shi ejeee odaseyeli ni tsɔɔ diɛŋtsɛ akɛ, mɛi etɛ lɛ fɛɛ hɔ Nyɔŋmɔ-su kome mli, ni ŋwɛi woo sa amɛ fɛɛ pɛpɛɛpɛ.”

Eyɛ mli akɛ wolo nɛɛ fiɔ Triniti lɛ sɛɛ moŋ, shi ekɛɔ yɛ 2 Korintobii 13:​13 (14) he akɛ: “Wɔnyɛŋ wɔkɛ enɛ atsɔɔ yɛ gbɛ ni ja nɔ akɛ amɛhewalɛ yeɔ egbɔ, aloo amɛhiɛ gbɔmɔtso kome.” Ni ekɛɔ yɛ Mateo 28:​18-20 he akɛ: “Kɛ asusu ŋmalɛ nɛɛ diɛŋtsɛ he lɛ, enyɛŋ ema mɛi etɛ ni atsi amɛta lɛ asu kɛ baŋ, aloo amɛ egbɔyeli loo nyɔŋmɔyeli nɔ mi yɛ faŋŋ mli.”