Yitso 94

Bɔ ni Sɔlemɔ kɛ Heshibaa he Hiaa Ha

MRA mli, beni Yesu yɔɔ Yudea lɛ, efee nɔkwɛmɔ nɔ ko ekɛtsɔɔ bɔ ni ehe hiaa ni aya nɔ yɛ sɔlemɔ mli. Agbɛnɛ, yɛ enaagbee gbɛfaa kɛmiiya Yerusalem lɛ mli lɛ, ema bɔ ni ehe hiaa ni wɔnijiaŋ akaje wui yɛ sɔlemɔ mli lɛ hu nɔ mi. Ekolɛ Yesu yɛ Samaria loo Galilea lolo yɛ be mli ni egba ekaselɔi lɛ nɛkɛ nɔkwɛmɔ nɔ nɛɛ hu lɛ:

“Kojolɔ ko yɛ maŋ ko nɔ, ni esheee Nyɔŋmɔ gbeyei ni asaŋ ebuuu gbɔmɔ ko. Ni yoo okulafo ko yɛ nakai maŋ lɛŋ, ni eba eŋɔɔ ebakɛɛ: ‘Fã mihe yɛ mihenyɛlɔ lɛ dɛŋ!’ Ni ekpɛlɛɛɛ aahu. Shi fee sɛɛ lɛ ekɛɛ yɛ eyiŋ akɛ: ‘Yɛŋ akɛ misheee Nyɔŋmɔ gbeyei, ni mibuuu gbɔmɔ hu; shi akɛni nɛkɛ yoo okulafo nɛɛ miigba minaa hewɔ lɛ, mafã ehe, koni beni yi aaayawula shi lɛ, ekaba ni ebashwie mihiɛ ma.’ ”

Kɛkɛ ni Yesu tsɔɔ mɛi ni ebɛbua nɛɛ kɔɔ amɛhe lɛ mli ni ekɛɛ: “Nyɛboa nɔ ni kojolɔ shishitswalɔ lɛ kɛɛ toi! Ni kɛ Nyɔŋmɔ aaaku ehiɛ afɔ ehalamɔbii ni bolɔɔ tsɛɔ lɛ shwane kɛ nyɔɔŋ lɛ nɔ aahu tete lɛ, aso ebafaŋ amɛhe?”

Yesu etsɔɔɔ akɛ ekɛ enɛ miitsɔɔ akɛ Yehowa Nyɔŋmɔ tamɔ nakai kojolɔ ni ejaaa lɛ yɛ gbɛ ko gbɛ ko nɔ. Yɛ no najiaŋ lɛ, kɛji kojolɔ ni ejaaa lɛ po aaabo faikpamɔi babaoo lɛ atoi lɛ, sanebimɔ ko kwraa bɛ he akɛ Nyɔŋmɔ, ni ji jalɔ kɛ mlihilɔ yɛ nibii fɛɛ mli lɛ baaha ewebii ahetoo kɛji amɛnijiaŋ ejeee wui yɛ sɔlemɔ mli lɛ. No hewɔ lɛ Yesu tee nɔ akɛ: “Miikɛɛ nyɛ akɛ, [Nyɔŋmɔ] eeefa amɛhe oya.”

Yɛ bei pii amli lɛ ayeee jalɛsane ahaaa heshibalɔi kɛ ohiafoi lɛ, yɛ be mli ni akwɛɔ hewalɔi kɛ shikatsɛmɛi lɛ moŋ ahiɛ. Shi kɛlɛ, jeee akɛ Nyɔŋmɔ baakwɛ ni agbala mɛi fɔji lɛ atoi yɛ jalɛ naa kɛkɛ, shi moŋ ebaakwɛ koni akɛ ewebii lɛ hu aye yɛ jalɛ naa kɛtsɔ naanɔ wala ni eeeha amɛ lɛ nɔ. Shi mɛi enyiɛ heɔ yeɔ diɛŋtsɛ akɛ Nyɔŋmɔ baaha atsu jalɛsaneyeli he nii oya?

Yɛ be mli ni Yesu tsɔɔ bɔ ni hemɔkɛyeli kɛ hewalɛ ni sɔlemɔ yɔɔ lɛ tsa ha lɛ mli titri lɛ, ebi akɛ: “Shi beni gbɔmɔ Bi lɛ aaaba lɛ, ani eeebana hemɔkɛyeli yɛ shikpɔŋ lɛ nɔ?” Eyɛ mli akɛ ashi sanebimɔ lɛ ni ahaaa hetoo moŋ, shi nɔ ni etsɔɔ ji akɛ hemɔkɛyeli ni tamɔ nakai efeŋ nɔ ni mɛi fɛɛ yɔɔ eko yɛ be mli ni Kristo aaaba yɛ Maŋtsɛyeli hewalɛ mli lɛ.

Mɛi ni fata mɛi ni boɔ Yesu toi lɛ ahe hu ji mɛi ni maa nɔ mi kɛhaa amɛhe akɛ amɛyɛ hemɔkɛyeli lɛ. Amɛheɔ amɛhe amɛyeɔ akɛ jalɔi ji amɛ, ni amɛbuuu mɛi krokomɛi. Ekolɛ Yesu kaselɔi lɛ ateŋ mɛi komɛi po fata nakai kuu lɛ he. No hewɔ ekɛ nɛkɛ nɔkwɛmɔ nɔ nɛɛ ha gbɔmɛi ni tamɔ nakai lɛ:

“Mɛi enyɔ yiŋ tee sɔlemɔ yɛ sɔlemɔ we lɛ; mɔ kome lɛ Farisifonyo ji lɛ, ni mɔ kroko lɛ, toohelɔ ni. Farisifonyo lɛ yadamɔ flɛŋŋ, ni esɔle nɛkɛ: ‘Nyɔŋmɔ, miidao shi akɛ mitamɔɔɔ mɛi krokomɛi lɛ, wieyelɔi, kutumpɔfoi, gbalafitelɔi, loo tamɔ nɛkɛ toohelɔ nɛɛ hu; miyeɔ buada shii enyɔ yɛ otsi mli; miŋɔɔ nibii fɛɛ ni minaa lɛ mlijaa nyɔŋma mihaa.’ ”

Ale Farisifoi lɛ jogbaŋŋ yɛ bɔ ni amɛtsɛɔ amɛhe jalɔi yɛ faŋŋ mli ni amɛkɛsa mɛi ahiɛ lɛ hewɔ. Gbii ni amɛfɔɔ ŋmaahilɛ ni amɛ diɛŋtsɛ amɛkɛfɔ amɛnɔ lɛ ji Ju kɛ Soo, ni amɛkɛ bɔ ni amɛbuɔ amɛhe jalɔi aahu lɛ woɔ mlijaa nyɔŋma lɛ kɛyashiɔ shwie baai po nɔ. Nyɔji fioo ni tsɔ hiɛ lɛ amli lɛ, bɔ ni amɛbuuu gbɔmɛi foji lɛ kwraa ha lɛ je kpo faŋŋ yɛ Asesei Agbijurɔ lɛ mli beni amɛkɛɛ akɛ: “Shi asafo ni leee Mla nɛɛ, [ni ji, bɔ ni Farisifoi lɛ tsɔɔ shishi lɛ] alomɔ amɛ.”

Beni Yesu yaa nɔ yɛ enɔkwɛmɔ nɔ lɛ mli lɛ, ewie nɛkɛ mɛi ni “alomɔ amɛ” nɛɛ ateŋ mɔ kome he akɛ: “Shi toohelɔ lɛ damɔ shɔŋŋ, ni emiii ni ehole ehiŋmɛii anɔ kɛya ŋwɛi tete; shi moŋ eshimɔ etsitsi ni ekɛɛ: ‘Nyɔŋmɔ, okɛ mi ni ji eshafeelɔ lɛ akpata!’ ” Akɛni toohelɔ lɛ kɛ heshibaa kpɛlɛ efatɔɔi lɛ anɔ hewɔ lɛ, Yesu kɛɛ: “Miikɛɛ nyɛ akɛ: Nɛkɛ nuu nɛɛ yiŋ etee ewe ni abu lɛ bem fe mɔ kome lɛ. Ejaakɛ mɔ fɛɛ mɔ ni woɔ ehe nɔ lɛ, aaaba lɛ shi; shi mɔ ni baa ehe shi lɛ, aaawo enɔ.”

No hewɔ lɛ Yesu ma bɔ ni ehe hiaa ni wɔba wɔhe shi lɛ nɔ mi ekoŋŋ. Akɛni atsɔse Yesu kaselɔi lɛ yɛ Farisifoi ni buɔ amɛhe jalɔi ni ale amɛ waa akɛ amɛmaa hegbɛ kɛ gbɛhe nɔ mi lɛ ateŋ hewɔ lɛ, ebɛ naakpɛɛ akɛ enɛ sa amɛ hu amɛhe. Shi kɛlɛ, mɛɛ heshibaa he nikasemɔ fɛfɛo Yesu tsɔɔ wɔ nɛkɛ! Luka 18:1-14; Yohane 7:49.

▪ Mɛni hewɔ ni kojolɔ ni ejaaa lɛ tsu yoo okulafo lɛ nibimɔ lɛ he nii lɛ, ni mɛɛ nikasemɔ Yesu nɔkwɛmɔ nɔ nɛɛ tsɔɔ?

▪ Mɛɛ hemɔkɛyeli Yesu baatao yɛ be mli ni eeeba lɛ?

▪ Namɛi Yesu gba enɔkwɛmɔ nɔ ni kɔɔ Farisifonyo lɛ kɛ toohelɔ lɛ he lɛ etsɔɔ?

▪ Mɛɛ Farisifoi lɛ asu esa akɛ wɔtsi wɔhe kɛjɛ he?