Yesu Shihilɛ kɛ Esɔɔmɔ Nitsumɔ

Gbohiiashitee He Hiɛnɔkamɔ Lɛ

YƐ NAAGBEE Iɛ Yesu bashɛ Betania, akrowa ko ni ekɛ Yerusalem teŋ jɛkɛmɔ aaafee shitoi enyɔ lɛ sɛɛ. Gbii fioo ko nɛ ni Lazaro gbo ni afu lɛ, ni enyɛmimɛi yei Maria kɛ Marta miifee eyara lolo, ni mɛi pii eba amɛshia lɛ koni amɛbashɛje amɛmii.

Yɛ be mli ni amɛfeɔ yara lɛ, mɔ ko ba jɛmɛ ebakɛɛ Marta akɛ Yesu miiba jɛmɛ. No hewɔ lɛ eshi shia Iɛ ni ehe fee oya ni ekɛ Iɛ yakpe, eka shi faŋŋ akɛ ekɛɛɛ enyɛmi yoo Iɛ. Beni eba Yesu ŋɔɔ lɛ, Marta ti nɔ ni Iɛ kɛ enyɛmiyoo Iɛ fɛɛ ekɛɛ shii abɔ yɛ gbii ejwɛ ni eho lɛ mli Iɛ ta: “Nuŋtsɔ, eji oyɛ biɛ kulɛ, minyɛmi Iɛ naaa agbo”

Shi Marta jie hiɛnɔkamɔ kpo, ekɛtsɔɔ akɛ Yesu baanyɛ afee nɔ ko aha enyɛminuu Iɛ. Ekɛɛ: “Shi agbɛnɛ hu tete po mile akɛ nɔ fɛɛ nɔ ni ooobi Nyɔŋmɔ Iɛ, Nyɔŋmɔ aaahao.”

Yesu wo Iɛ shi akɛ: “Onyɛminuu Iɛ baate shi.”

Marta nu Yesu shishi akɛ eewie wɔsɛɛ be shikpɔŋ nɔ shitee ni Abraham kɛ Nyɔŋmɔ tsuji krokomɛi hu kpa gbɛlɛ he. No hewɔ Iɛ eha lɛ hetoo akɛ: “Mile akɛ ebaate shi yɛ gbohiiashitee Iɛ mli yɛ naagbee gbi Iɛ nɔ.”

Shi Yesu kɛ amrɔ kpɔmɔ he hiɛnɔkamɔ ha, ni eha lɛ hetoo akɛ: “Mi Iɛ mi ji shitee lɛ kɛ wala Iɛ.” Ekai Marta akɛ Nyɔŋmɔ eha lɛ gbele nɔ hewalɛ, akɛ: “Mɔ ni heɔ minɔ eyeɔ lɛ, kɛji egbo tete lɛ, ehiɛ aaaka; ni mɔ fɛɛ mɔ ni hiɛ ka ni eheɔ minɔ eyeɔ Iɛ egboŋ gbi ko gbi ko kɛaatee naanɔ.”

Jeee akɛ Yesu kɛ nakai kɛɛmɔ miiha Marta ale akɛ anɔkwafoi ni no mli lɛ amɛyɔɔ wala mli lɛ gboiŋ gbi ko gbi ko. Dabi, shi moŋ sane ni etaoɔ ema nɔ mi Iɛ ji akɛ emli hemɔkɛyeli ni aaana lɛ baanyɛ ni ekɛ mɔ aya naanɔ wala mli. Mɛi pii baana wala ni tamɔ nɛkɛ mli ŋɔɔmɔ akɛni ateɔ amɛ shi yɛ naagbee gbi lɛ nɔ hewɔ. Shi mɛi krokomɛi hu ni yeɔ anɔkwale lɛ baaje nibii agbɛjianɔtoo ni yɔɔ shikpɔŋ nɛɛ nɔ Iɛ naagbee Iɛ mli, ni Yesu wiemɔi Iɛ baaba mli anɔkwale diɛŋtsɛ yɛ nɛkɛ gbɔmɛi nɛɛ ahe. Amɛgboiŋ gbi ko gbi ko! Yɛ wiemɔi ni yɔɔ naakpɛɛ nɛɛ sɛɛ Iɛ, Yesu bi Marta akɛ, “Oheɔ enɛ oyeɔ lo?”

Eha hetoo akɛ: “Hɛɛ, Nuŋtsɔ; miihe miiye akɛ bo ji Kristo, Nyɔŋmɔ Bi lɛ ni baa je Iɛ mli Iɛ.”

Kɛkɛ ni Marta he fee oya ni eyatsɛ enyɛmiyoo lɛ ni ekɛɛ lɛ yɛ teemɔŋ akɛ: “Nuŋtsɔ lɛ eba, ni eetsɛo.” Amrɔ nɔŋŋ pɛ kɛkɛ ni Maria shi shia lɛ. Beni mɛi krokomɛi na ni eeya Iɛ, amɛnyiɛ esɛɛ, ni amɛmiisusu akɛ eeya gbonyobu lɛ he.

Beni ebana Yesu Iɛ, Maria gbee enajiashi ni eefo. Ekɛɛ Yesu akɛ: “Nuŋtsɔ, eji oyɛ biɛ kulɛ minyɛmi lɛ naaa agbo.” Beni Yesu na Maria kɛ asafoi Iɛ ni nyiɛ esɛɛ Iɛ akɛ amɛmiifo lɛ, enɛ sa Yesu he waa ni ekpokpo. Ebi akɛ: “Nɛgbɛ nyɛto Iɛ yɛ?”

Amɛha hetoo akɛ: “Nuŋtsɔ ba ni obakwɛ.”

Kɛkɛ ni Yesu hu fo, ni eha Yudafoi Iɛ kɛɛ: “Kwɛ. bɔ ni edɔɔ ehe!”

Amɛteŋ mɛi komɛi kai akɛ Yesu tsa obalanyo ko ni afɔ Iɛ shwilafo yɛ Asesei Agbijurɔ ni tsɔ hiɛ ba yɛ nyɔji fioo ko mli Iɛ nɔ, no hewɔ Iɛ amɛbi akɛ: “Nuu nɛɛ ni gbele shwilafo lɛ hiŋmɛii lɛ, aso enyɛŋ efee ni kulɛ nuu nɛɛ akagbo?” Yohane 5:​21; 6:​40; 9:​1-7; 11:​17-37.

◆ Mɛɛ be Yesu bashɛ Betania yɛ naagbee kwraa. ni mɛɛ shihilɛ yɔɔ jɛmɛ?

◆ Mɛni nɔ Marta baanyɛ adamɔ ni ehe gbohiiashitee eye?

◆ Te Lazaro gbele lɛ sa Yesu eha tɛŋŋ?