‘Suɔmɔ ni Nyɛkɛsumɔɔ Nyɛhe lɛ Miiya Nɔ Emli Miiwa’
YƐ AFI 2004 lɛ mli lɛ, adebɔɔ naa osharai babaoo ba Japan maŋ lɛ nɔ. Osharai nɛɛ ekomɛi ji lasuogbele, nu afuai, kɛ shikpɔŋhosomɔi. Osharai lɛ sa mɛi babaoo ní Yehowa Odasefoi hu fata he lɛ ashihilɛ he waa. (Jajelɔ 9:11) Ni kɛlɛ, amanehului nɛɛ ha Odasefoi lɛ ná hegbɛ koni amɛkɛjie nyɛmimɛi ahedɔɔ kpo amɛtsɔɔ amɛhe.—1 Petro 1:22.
Ákɛ nɔkwɛmɔnɔ lɛ, nugbɔ ko ni naa wa ni nɛ yɛ July mli lɛ ha faa ko ni yɔɔ Japan maŋ te-lɛŋ lɛ je ŋa. Nu afua ni enɛ kɛba lɛ fite Yehowa Odasefoi ashiai fe 20. Nu ni yata Maŋtsɛyeli Asa ko nɔ lɛ mlikwɔlɛ shɛɔ mita kome. Amrɔ nɔŋŋ kɛkɛ ni Odasefoi ni amɛsafoi yɔɔ nakai kpokpaa lɛ nɔ lɛ tee amɛyaye amɛbua. Mɛi ni jɛ amɛsuɔmɔ mli amɛba koni amɛbaye amɛbua lɛ ateŋ ohai abɔ jie ŋmɔtɔ ni ba shiai lɛ amli lɛ fɛɛ. Asaa Maŋtsɛyeli Asa lɛ nɔ nibii ní fite lɛ, ni asha emli kɛ ehewɔ fɛɛ fɛfɛo, ni atsu enɛ fɛɛ yɛ otsii enyɔ pɛ mli.
Yɛ October gbi ni ji 23 lɛ nɔ lɛ, shikpɔŋ hoso yɛ nakai kpokpaa lɛ nɔŋŋ nɔ, ni Richter tsɔne ni akɛbuɔ shikpɔŋhosomɔ naawalɛ lɛ jie lɛ kpo akɛ nakai shikpɔŋhosomɔ lɛ naawalɛ shɛɔ 6.8. Kɛ hooo kwraa lɛ, mɛi 40 awala ŋmɛɛ amɛ, ni ehe bahia ni aha mɛi fe 100,000 ashi amɛshiai kɛya he kroko. Nibii ni shikpɔŋhosomɔ lɛ fite lɛ ha nu, gas kɛ srawa hewalɛ ahe basɛ̃. Eyɛ mli akɛ hé tuuntu ní shikpɔŋhosomɔ lɛ ba yɛ lɛ kɛ nakai Maŋtsɛyeli Asa ní asaa lɛ jɛkɛmɔ ji kilomitai 50 pɛ moŋ, shi shikpɔŋhosomɔ lɛ esaaa Maŋtsɛyeli Asa lɛ he. Amrɔ nɔŋŋ lɛ, jɛmɛ batsɔ he ni akɛ nibii ni akɛyayeɔ abuaa mɛi ni oshara lɛ fite amɛnibii lɛ yatoɔ, ni akɛtsu nii nakai kɛyashi be ko. Kristofoi nɔkwɛlɔi kɛ oyaiyeli tao amɛnanemɛi heyelilɔi lɛ asɛɛ kɛkwɛ akɛ amɛ fɛɛ amɛyɛ shweshweeshwe lo, ni amɛmii shɛ amɛhe akɛ amɛaale akɛ amɛteŋ mɔ ko epilaaa, ni mɔ ko hu gbooo. Enɔ jetsɛremɔ leebi maŋkpa lɛ, Odasefoi ekpaa ní fata mɛi ni nu afua fite amɛnii yɛ July mli lɛ ahe lɛ jɛ amɛsuɔmɔ mli amɛkɛ amɛhe ha, ni amɛye amɛbua ni akɛ nu kɛ niyenii yaha mɛi ni yɔɔ he ni oshara lɛ ba yɛ lɛ. Shikpɔŋhosomɔ lɛ sɛɛ ŋmɛlɛtswai fioo kɛkɛ ni akɛ yelikɛbuamɔ nibii yaduro mɛi ni oshara lɛ ba amɛnɔ lɛ.
Asafoŋ onukpa ko bɔ amaniɛ akɛ: “Mɛi ni nibii fite yɛ nu afua lɛ mli lɛ bu gbɛfaŋnɔ ni amɛná yɛ yelikɛbuamɔ nibii ni akɛyaha mɛi ni shikpɔŋhosomɔ lɛ fite amɛnibii lɛ akɛ eji hegbɛ ni amɛná koni amɛkɛjie hiɛsɔɔ kpo yɛ yelikɛbuamɔ ni amɛ diɛŋtsɛ hu amɛnine shɛ nɔ lɛ he. Amɛtsu nii waa kɛjɛ leebi maŋkpa kɛyashi nyɔɔŋteŋ. Ní kwɛ bɔ ni amɛmii shɛ amɛhe ha!”
Nu afuai kɛ shikpɔŋhosomɔi nyɛɛɛ afite suɔmɔ ni haa Yehowa Odasefoi hiɔ shi akɛ Kristofoi nyɛmimɛi lɛ kɔkɔɔkɔ. Nɔ ni tamɔɔɔ nakai lɛ, kɛji osharai ni tamɔ enɛɛmɛi ba lɛ, ehaa Kristofoi asuɔmɔ lɛ yaa nɔ emli waa taakɛ eba lɛ yɛ Tesalonikabii lɛ agbɛfaŋ lɛ. Beni bɔfo Paulo wieɔ enɛ he lɛ, eŋma amɛ akɛ: “Nyɛteŋ mɔ fɛɛ mɔ suɔmɔ ni ekɛsumɔɔ enanemɛi lɛ miifá kɛmiiya nɔ hu.”—2 Tesalonikabii 1:3.