Sanebimɔhe

◼ Nɛgbɛ esa akɛ wɔkɛ Biblia mli nikaselɔ ko ni miiya ehiɛ lɛ akase nii kɛyashi?

Ehi jogbaŋŋ akɛ wɔɔya nɔ wɔkɛ Biblia mli nikaselɔ ko ni miiya ehiɛ lɛ akase nii kɛyashi eeegbe woji enyɔ, ni ji Mɛni Biblia lɛ Tsɔɔ Diɛŋtsɛ? kɛ ‘Nyɛhia Nyɔŋmɔ Suɔmɔ lɛ Mli’ lɛ kasemɔ naa. Ni esa akɛ afee nakai kɛji abaptisi nikaselɔ lɛ be mli ni egbeko woji enyɔ lɛ fɛɛ kasemɔ naa po. Yɛ ebaptisimɔ lɛ sɛɛ lɛ, wɔbaanyɛ wɔya nɔ wɔbu be, sɛɛkuu-kɛsaramɔi, kɛ nikasemɔ lɛ he akɔntaa. Kɛ́ shiɛlɔ ko fata wɔhe kɛtee ni ekɛ ehe wo nikasemɔ lɛ mli lɛ, lɛ hu ebaanyɛ ebu be lɛ he akɔntaa.—Kwɛmɔ March 2009 Wɔ Maŋtsɛyeli Sɔɔmɔ lɛ, baafa 2 lɛ.

Ehe miihia ni mɛi hei lɛ aná shishitoo kpakpa yɛ anɔkwale lɛ mli dani akɛ amɛ akpa nikasemɔ. Esa akɛ ‘amɛshishifãi amɔmɔ shi’ yɛ Kristo mli, ni ‘amɛfĩ shi yɛ hemɔkɛyeli lɛ mli’ koni amɛnyɛ amɛdamɔ shihilɛi ni mli wawai ni amɛkɛaakpe lɛ anaa. (Kol. 2:6, 7; 2 Tim. 3:12; 1 Pet. 5:8, 9) Kɛfata he lɛ, esa akɛ “amɛshɛ anɔkwale lɛ lee mli” bɔni afee ni amɛnyɛ amɛtsɔɔ nii jogbaŋŋ. (1 Tim. 2:4) Kɛ́ wɔkɛ amɛ kase woji enyɔ lɛ wɔgbe naa lɛ, belɛ wɔmiiye wɔmiibua amɛ koni amɛnane amɔ shi jogbaŋŋ yɛ ‘gbɛ ni kɛ mɔ yaa wala mli’ lɛ nɔ.—Mat. 7:14.

Dani onukpai lɛ aaakpɛlɛ mɔ ko nɔ kɛha baptisimɔ lɛ, esa akɛ amɛkwɛ akɛ enuɔ Biblia mli shishijee tsɔɔmɔi lɛ ashishi jogbaŋŋ ni ehiɔ shi yɛ naa lo. Esa akɛ onukpai lɛ akwɛ jogbaŋŋ, titri lɛ, kɛ́ amɛmiisusu nikaselɔ ko ni egbeko klɛŋklɛŋ wolo lɛ naa lɛ he. Kɛ́ mɔ ko shɛɛɛ taomɔnii kɛha baptisimɔ he lɛ, esa akɛ onukpai lɛ akwɛ ni aye abua lɛ koni enyɛ efee mɔ ni sa kɛha baptisimɔ be kroko.—Kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ baafa 217-218 lɛ.

[Wiemɔ ni akɔ ni akɛmiitsu nii ni yɔɔ baafa 2]

Ehe miihia ni mɛi hei lɛ aná shishitoo kpakpa yɛ anɔkwale lɛ mli