Yehowa Odasefoi lɛ ateŋ mɔ ko yatswa eshinaa gbi ko. Eŋɔɔ enaa waa akɛ ena yɛ Portuguese Biblia lɛ mli akɛ Nyɔŋmɔ yɛ gbɛi, ni ji Yehowa. (Lala 83:​18, Almeida) Ebi yɛ e-Biblia kasemɔ lɛ mli akɛ: “Mɛni esa akɛ mafee koni mikafee nii ni esaaa Yehowa hiɛ?” Odasefonyo lɛ kɛ enine tsɔɔ mfonirii ni tsotsoro egbogbo he lɛ, ni ekɛɛ lɛ akɛ ekane Lala 115:​4-8. Beni Emelia wu ba shia nakai gbɛkɛ lɛ, ekɛɛ lɛ akɛ eesumɔ ni efite ejamɔ he mfonirii lɛ fɛɛ. Ewu lɛ kpɛlɛ nɔ. Enɔ jetsɛremɔ lɛ, eha ebihii enyɔ, Tony kɛ Manuel jwara mfonirii lɛ fɛɛ ni amɛshã. Ŋmɛnɛ, yɛ afii 25 sɛɛ nɛɛ, ani Emelia shwaa ehe yɛ enɛ he? Dabi. Yɛ anɔkwale mli lɛ, ekɛ eweku lɛ eye ebua ekutseiaŋbii lɛ babaoo koni amɛtsɔmɔ Yehowa jalɔi ni yɔɔ miishɛɛ.

Ati niiashikpamɔi ni tamɔ nakai nɔŋŋ mli shii abɔ. Yɛ jeŋ muu fɛɛ Yehowa Odasefoi akaselɔ-feemɔ nitsumɔ lɛ hewɔ lɛ, akpekpei abɔ miikase bɔ ni akɛ “mumɔ kɛ anɔkwale” jaa Nyɔŋmɔ. Bo hu obaanyɛ ona jɔɔmɔi ni baa kɛjɛɔ jamɔ gbɛ ni nɔ kwɔ nɛɛ mli lɛ mli niiashikpamɔ, taakɛ Yesu kɛɛ lɛ, “ejaakɛ mɛi ni jaa lɛ nɛkɛ, Tsɛ lɛ hu taoɔ.”​—Yohane 4: 23, 24.

Ani Oobɔ Mɔdɛŋ Fɛɛ ni Ooonyɛ?

MAFEE bɔ fɛɛ bɔ ni manyɛ.” Shii enyiɛ po wiemɔ “shi” nyiɛɔ nɛkɛ wiemɔ nɛɛ sɛɛ kɛ naajiemɔi babaoo ni haaa mɔ anyɛ afee bɔ ní eeenyɛ lɛ! Ni wɔhenɔjɔɔmɔ kɛha Yehowa lɛ hu? Ani wɔmiiye wɔshiwoo akɛ wɔkɛ nɔ ni hi fe fɛɛ baaha lɛ lɛ nɔ?

Ni aaajɔɔ he nɔ lɛ tsɔɔ ‘he ni atuu kwraa aha mɔ krɔŋkrɔŋ ko jamɔ loo sɔɔmɔ loo kɛha nitsumɔi ni yɔɔ krɔŋkrɔŋ.’ Yesu fee babaoo koni ekɛtsɔɔ nɔ ni henɔjɔɔmɔ kɛha Yehowa lɛ tsɔɔ kɛtsɔ ewiemɔ nɛɛ nɔ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewo esɛŋmɔtso lɛ ni enyiɛ misɛɛ.” (Mateo 16:24) Mɔ ni ekwa ehe, ni ejɔɔ ehe nɔ eha Nyɔŋmɔ lɛ, kɛ ŋwɛi suɔmɔnaa nifeemɔ feɔ eshihilɛ mli nitsumɔ ni he hiaa lɛ fe fɛɛ.

Akɛ gbɔmɛi ni wɔjɔɔ wɔhe nɔ lɛ, esa akɛ wɔpɛi wɔ diɛŋtsɛ wɔmli ni wɔkwɛ akɛ ani wɔmiihi shi yɛ wɔ henɔjɔɔmɔ lɛ naa lo. Petro tsɔɔ nɔ hewɔ ni esa akɛ wɔpɛi wɔ diɛŋtsɛ wɔmli wɔkwɛ yɛ be mli ni ewo Kristofoi ni afɔ amɛ mu lɛ hewalɛ lɛ: “Nyɛbɔa mɔdɛŋ ni nyɛwajea nyɛtsɛmɔ kɛ halamɔ lɛ; ejaakɛ kɛ nyɛfee enɛ lɛ, nyɛtɛrɛŋ gbi ko gbi ko.” (2 Petro 1:10) Hɛɛ, kɛ wɔbɔ mɔdɛŋ loo wɔfee bɔ fɛɛ bɔ ni wɔɔnyɛ lɛ, ebaŋ lɛ akɛ wɔnine baanyɛ shi yɛ mumɔŋ.

Wɔbaanyɛ Wɔha Mɔdɛŋ Fɛɛ ni Wɔbɔɔ lɛ Aya Hiɛ

Yɛ shishinumɔ ni mli lɛɛ naa lɛ, aakpa gbɛ akɛ Nyɔŋmɔ tsuji fɛɛ ni amɛjɔɔ amɛhe nɔ lɛ baabɔ mɔdɛŋ fɛɛ ni amɛaanyɛ, koni amɛsa Yehowa hiɛ. Shi mɔdɛŋ fɛɛ ni wɔbɔɔ yɛ Nyɔŋmɔ suɔmɔnaa nifeemɔ mli lɛ baanyɛ afa. Yɛ gbekɛnuu ni eye afii etɛ gbɛfaŋ lɛ, nɔ ni hi fe fɛɛ ni eeenyɛ efee ni ekɛye ebua enyɛ ji ni atsu lɛ kɛya-kɛba, shi yɛ be mli ni edaa ni etsɔɔ onukpa lɛ, ebaanyɛ efee babaoo. Nakai eji yɛ wɔmumɔŋ nɔyaa gbɛfaŋ—nɔ ni tsutsu lɛ eji fɛɛ ni wɔnyɛɔ wɔfeɔ lɛ jeee nakai dɔŋŋ. Nɔ ko kanyaa wɔ ni wɔfee babaoo wɔha Yehowa.

Hiɛsɔɔ babaoo ní wɔna wɔha Yehowa lɛ woɔ bɔ ni wɔsumɔɔ ni wɔfee pii lɛ mli hewalɛ. Hiɛsɔɔ kɛha nɔ ni efee kɛha wɔ lɛ yaa hiɛ kɛtsɔɔ e-Wiemɔ ni ji Biblia lɛ kasemɔ yɛ teemɔŋ nɔ. Akɛ nɔkwɛmɔ nɔ lɛ, kɛ wɔpɛi bɔ ní Yehowa tsu e-Bi lɛ koni ekɛ esusuma abaha ni ekɛkpɔ adesai kɛjɛ esha mli lɛ he ni wɔjwɛŋ nɔ jogbaŋŋ lɛ, etsirɛɔ wɔ koni wɔsɔmɔ kpɔmɔ nɔ gbɛjianɔtoo lɛ Shishijelɔ lɛ. (Yohane 3:​16,17;1 Yohane 4:​9-11) Babaoo ni ‘wɔsaa wɔnaa wɔkwɛɔ ni wɔnaa akɛ Yehowa hi lɛ,’ babaoo ni wɔtsuii tsirɛɔ wɔ ni wɔsɔmɔ lɛ ji no.​—Lala 34:⁠9.

Be-fɛɛ sɔɔlɔ ko ni atsɛɔ lɛ Jetter yɔse enɛ. Bɔni afee ni ebote nɔ ni ekaseɔ lɛ mli vii lɛ, etao tsu bibioo ko yɛ eshia kɛha enɛ feemɔ. Eto gbɛjianɔ koni enyɛ ejwɛŋ yɛ be mli ni etaoɔ saji amli lɛ. Eyɛ Watchtower Publications Indexes lɛ eko kɛ Buu-Mɔɔ kɛ Awake! wolokpoi lɛ yɛ ewoji atoohe lɛ ni ebaanyɛ ekwɛ mli. Ekɛɔ akɛ: “Kɛ mina sane ko ni yɔɔ miishɛɛ waa lɛ, mihe tswaa shi akɛ magba mɛi krokomɛi.”

Shi, taakɛ niyenii ni ŋɔɔ ni ayeɔ lɛ shikome lɛ haaa mɔ ko afee mɔ ni daa gbi niyenii he ehiaaa lɛ dɔŋŋ lɛ, nakai nɔŋŋ Biblia lɛ mlipɛimɔ shikome lɛ etsɔɔɔ akɛ mumɔŋ niyenii ni aaaye daa gbi lɛ he ehiaaa. Ruth yɔse nɛkɛ hiamɔ nɛɛ, ejaakɛ kɛ eeekai yɛ tsutsu lɛ, eweku lɛ kaneɔ Biblia lɛ daa leebi kɛ gbɛkɛ yɛ niyeli sɛɛ. Amrɔ nɛɛ ni eye afii 81, ni ekɛ nɔ ni fe afii 60 ehi be-fɛɛ sɔɔmɔ lɛ mli lɛ, eyaa nɔ ekaneɔ Biblia lɛ daa gbi kɛ ete shi leebi 6:​00. Kɛ Ruth nine shɛ Buu-Mɔɔ kɛ Awake! woji tɛtrɛbii lɛ anɔ pɛ lɛ, etoɔ be ni ekaneɔ. Ekaneɔ sane lɛ nɔ kɛ hoo lɛ shii etɛ loo shii ejwɛ dani ekaseɔ yɛ asafo lɛ mli. Ekɛɛ: “Nyɔŋmɔ Wiemɔ lɛ ni oookase lɛ ji nɔ ni he hiaa bo koni ohe awa yɛ hemɔkɛyeli lɛ mli.” Eye ebua lɛ hu ni ekɛ afii pii ehi maŋsɛɛ sanekpakpa sɔɔmɔ lɛ mli.

Mɔdɛŋ Fɛɛ ni Wɔɔbɔ Koni Wɔye Wɔbua Mɛi Krokomɛi

Kɛ wɔkase Nyɔŋmɔ Wiemɔ lɛ waa daa lɛ, ehaa ekaa ni wɔkɛaasɔmɔ Nyɔŋmɔ lɛ yaa hiɛ, ni wɔmli gbɛ henumɔ ko woɔ wɔ hewalɛ ni wɔfee babaoo. (Okɛto Yeremia 20:9 he.) Ekaa ni tamɔ nɛkɛ tsirɛ Hirohisa koni egbe esɔɔmɔ lɛ naa kwraa. (2 Timoteo 4:⁠5) Ekɛ efɔlɔ kome kɛ enyɛmimɛi hii kɛ yei ejwɛ yɔɔ shia. Beni eji obalanyo fioo lɛ, no mli lɛ Hirohisa kɛ shika yeɔ buaa eweku lɛ kɛtsɔɔ shi ni eteɔ maŋkɛ ŋmɛji etɛ koni eyahɔɔ adafitswaa woji nɔ. Eesumɔ ni efee babaoo kɛtsɔ Yehowa he saji ni eeegba mɛi krokomɛi lɛ nɔ, no hewɔ lɛ Hirohisa kɛ gbɛgbamɔ, taakɛ atsɛɔ Yehowa Odasefoi abe-fɛɛ sɔɔmɔ lɛ, he gbɛbimɔ wolo ha. Yɛ obalanyo fioo ni eji lɛ fɛɛ sɛɛ lɛ, ena miishɛɛ akɛ eeeye ebua mɛi krokomɛi ni amɛbafata ehe ni amɛfee nɔ fɛɛ nɔ ni amɛaanyɛ ni amɛkɛjie Yehowa yi.

Wɔhe ni aaasa yɛ sɔɔmɔ nitsumɔ lɛ mli lɛ fata nɔ ni hi fe fɛɛ ni wɔɔfee ni wɔkɛye wɔbua mɛi krokomɛi lɛ he. Yesu wo ekaselɔi lɛ hewalɛ be ko akɛ: “Kɛji nyɛle nii nɛɛ ni nyɛye nɔ lɛ, ajɔɔ nyɛ.” (Yohane 13:17) Naomi ji mɔ ko ni feɔ nɔkwɛmɔ nɔ kpakpa yɛ ŋaawoo ni Yehowa gbɛjianɔtoo lɛ kɛhaa koni wɔsɔɔmɔ nitsumɔ lɛ aya hiɛ lɛ he nitsumɔ mli. Ewa waa kɛha lɛ akɛ ekɛ mɛi aaawie yɛ shia kɛ shia sɔɔmɔ lɛ mli, ni yɛ bei komɛi amli lɛ eleee nɔ ni ekɛɛ po yɛ be mli ni edamɔ shinaa naa lɛ. Onukpai ni yɔɔ asafo lɛ mli lɛ wo lɛ hewalɛ ni ekɛ ŋaawoo ni akɛha yɛ Reasoning From the Scriptures wolo lɛ mli, yɛ efa ni wieɔ ‘Hiɛkpamɔ Wiemɔi Kɛha Nitsumɔ yɛ Sɔɔmɔ Nitsumɔ lɛ Mli’ lɛ he lɛ atsu nii.a Ekase hiɛkpamɔ wiemɔi ni yɔɔ yitso, ‘Weku/Gbekɛbii’ shishi lɛ ewo eyitsoŋ ni etĩ mli shii abɔ. Nɔ ni jɛ mli ba ji akɛ, enyɛ ekɛ yoo ko ni ji biianyɛ ni eye afii 30 kɛyaa gba sane. Dani Noami aaaku esɛɛ ayasara lɛ po lɛ, yoo nɛɛ tsɔ hiɛ eba Maŋtsɛyeli Asa lɛ nɔ. Ato Biblia kasemɔ he gbɛjianɔ. Biianyɛ nɛɛ kɛ ewu fɛɛ etsɔmɔ Kristofoi ni abaptisi amɛ bianɛ, ni amɛkɛ amɛbii lɛ miina weku shihilɛ kpakpa mli ŋɔɔmɔ.

Mɔdɛŋ Fɛɛ ni Wɔɔnyɛ Wɔbɔ ni Wɔkɛna Mɛi Krokomɛi Ahe Miishɛɛ

Wɔbaanyɛ wɔkase bɔfo Paulo hu, mɔ ni kɛɛ akɛ: “Shi sanekpakpa lɛ hewɔ mifeɔ enɛɛmɛi fɛɛ, bɔni afee ni mi hu mana emli nii lɛ eko.”​—1 Korintobii 9:​22, 23.

Hatsumi jieɔ su ni tamɔ nɛkɛ kpo. Beni Hatsumi kɛ ehe ewo sɔɔmɔ nitsumɔ lɛ mli lɛ, yoo ko kɛ bulɛ wie kɛtsɔ tsu mli kɛ shinaa naa telefon lɛ nɔ akɛ ebɛ deka kwraa bɔ ni eeenyɛ ekɛ lɛ awie. Shiatsɛ lɛ gbee ni ekɛwie lɛ tsɔɔ mlijɔlɛ su, nɔ hewɔ lɛ Hatsumi tee nɔ esara lɛ. Telefon lɛ nɔ pɛ shiatsɛ lɛ wieɔ yɛ, ejeee kpo ni ekɛ Hatsumi abawie. Enɛ tee nɔ afii enyɔ kɛ fã.

Gbi ko lɛ Hatsumi tsake be ni ekɛyaa jɛmɛ lɛ, etee jɛmɛ shwane mli kwraa. Mɔ ko mɔ ko hereee nɔ. Shi beni efee akɛ ebaashi ni eya lɛ, gbee ko ni ele jogbaŋŋ bi akɛ, “Bo namɔŋ?” Yoo lɛ jɛ he ko eba shia lɛ mli etsɛko. Beni enu Hatsumi gbɛi lɛ, eha hetoo amrɔ nɔŋŋ akɛ: “Oh, bo obasaraa mi lɛ. Miidao shi akɛ osusuɔ mihe be fɛɛ be.” Akɛni yoo lɛ ekpa nikasemɔ ni ekɛ Yehowa Odasefoi feɔ yɛ maŋ lɛ afa kroko hewɔ lɛ, eefee lɛ hiɛgbele akɛ eeegbele shinaa lɛ eha Hatsumi. Aje Biblia lɛ kasemɔ shishi ekoŋŋ, ni shianyɛ nɛɛ miibɔ mɔdɛŋ jogbaŋŋ. Ani wɔsusuɔ mɛi ni wɔkɛ amɛ kpeɔ yɛ shia kɛ shia sɔɔmɔ lɛ mli lɛ ahe babaoo?

Bɔɔ Mɔdɛŋ ni Ofee Bɔ Fɛɛ Bɔ ni Ooonyɛ

Yehowa hiɛ sɔɔ mɔdɛŋ ni wɔbɔɔ akɛ wɔɔfee bɔ fɛɛ bɔ ni wɔɔnyɛ ni wɔkɛsɔmɔ lɛ lɛ. Etamɔ tsɛ ko ni ebinuu kɛ nikeenii eba ehiɛ. Nikeenii lɛ baafee sɔrɔtoi yɛ afii ni gbekɛ lɛ eye kɛ nɔ ni eyɔɔ lɛ naa. Bɔ ni tsɛ lɛ yɔɔ miishɛɛ akɛ eeehe nikeenii fɛɛ ni ebi lɛ jɛ etsuiŋ ekɛhaa lɛ lɛ, nakai nɔŋŋ hu Yehowa kpɛlɛɔ sɔɔmɔ ni jɛ wɔtsui muu fɛɛ mli ni wɔkɛhaa lɛ yɛ wɔmumɔŋ dalɛ lɛ naa lɛ nɔ amrɔ nɔŋŋ.

Shi, esaaa akɛ wɔkɛ mɔdɛŋ fɛɛ ni wɔbɔɔ lɛ toɔ mɛi krokomɛi anɔ he. Taakɛ Paulo kɛɔ lɛ, wɔyɛ nɔ ni wɔbaadamɔ ni wɔmli afili wɔ yɛ wɔ diɛŋtsɛ wɔ nɔ he, shi “jeee mɔ kroko nɔ lɛ nɔ.” (Galatabii 6:⁠4) Eba akɛ wɔɔya nɔ wɔbo bɔfo Petro ŋaawoo nɛɛ toi: “Nyɛbɔa mɔdɛŋ ni ana nyɛ ni muji loo kpa ko bɛ nyɛhe yɛ ehiɛ, yɛ hejɔlɛ mli.”​—2 Petro 3:⁠14.

[Shishigbɛ niŋmai]

[Mfoniri ni yɔɔ baafa 29]

Ani oofee bɔ fɛɛ bɔ ni ooonyɛ koni okɛ ŋaawoo ni akɛhaa yɛ sɔɔmɔ nitsumɔ lɛ he lɛ atsu nii?