Nilee ni Jɛ Nyɔŋmɔ Ŋɔɔ Haa Sanebimɔi Pii Ahetoo
1 Dani ooobaná anɔkwale lɛ he anɔkwa nilee lɛ, ekolɛ oyɛ sanebimɔi pii ni kɔɔ shihilɛ he, ni onyɛɛɛ oha hetoo. Kwɛ miishɛɛ ni oná nɛkɛ akɛ oná nakai sanebimɔi lɛ ahetooi ni damɔ Biblia nɔ! Amrɔ nɛɛ onyɛɔ oyeɔ obuaa mɛi krokomɛi koni amɛna hetooi ni tamɔ nakai nɔŋŋ. (Okɛto 2 Timoteo 2:2 he.) Obaanyɛ ogba amɛ Nyɔŋmɔ nilee ni kɛ mɔ yaa naanɔ wala mli lɛ he sane. (Yoh. 17:3) Shi mɛɛ gbɛ nɔ obaanyɛ oye obua mɔ ko ni ehiɛ asɔ bɔ ni nɛkɛ nilee nɛɛ he yɔɔ sɛɛnamɔ hã? Ojogbaŋŋ, susumɔ sanebimɔi ni anɔkwale lɛ ha bo hetoo lɛ he okwɛ. Mɛɛ nibii mɛi ni taoɔ anɔkwale lɛ sumɔɔ ni amɛle? Niiahesusumɔ yɛ nɛkɛ gbɛi anɔ lɛ baanyɛ aye abua bo koni okɛ Nilee Ni Kɛ Mɔ Yaa Naanɔ Wala Mli wolo lɛ aha. Gbɛtsɔɔmɔi ni nyiɛ sɛɛ nɛɛ baanyɛ aye abua bo beni osaa ohe kɛha odaseyeli yɛ June mli lɛ.
2 Akɛni mɛi pii susuɔ nɔ hewɔ ni amanehulu efa babaoo yɛ je lɛŋ lɛ he nɛkɛ hewɔ lɛ ekolɛ gbɛ ni tamɔ nɛkɛ baaha abo bo toi jogbaŋŋ:
◼ “Kɛ oshara ba aloo kɛ́ awuiyeli kɛ basabasa nifeemɔi fa babaoo lɛ, bei pii lɛ gbɔmɛi biɔ nɔ hewɔ ni nibii ni woɔ mɔ he gbeyei ni tamɔ nɛkɛ baa lɛ he sane. Te obaaha hetoo tɛŋŋ?” Ŋmɛɛ mɔ lɛ gbɛ ni eha hetoo, ni okpɛlɛ hetoo ni ekɛha lɛ nɔ. Agbɛnɛ gbelemɔ Nilee wolo lɛ yitso 8, ni ogbala jwɛŋmɔ kɛya nɔ ni aŋma yɛ kuku 2 lɛ mli lɛ nɔ. Tsɔɔmɔ akɛ nɛkɛ wolo nɛɛ kɛ Biblia mli sane mli tsɔɔmɔ ni tsɔɔ nɔ hewɔ ni nibii fɔji baa lɛ haa, ni okɛɛ akɛ: “Ebaaŋɔɔ minaa akɛ mashi enɛ maha bo.” Too gbɛjianɔ ni oku osɛɛ oba kɛha sanegbaa ekoŋŋ.
3 Kɛ ooku osɛɛ kɛya he ni okɛ “Nilee” wolo lɛ hã yɛ lɛ, obaanyɛ okɛɛ akɛ:
◼ “Miyɛ bɔ ni omu sane naa ni tsɔɔ nɔ hewɔ ni amanehulu babaoo yɔɔ lɛ he miishɛɛ. Ani okɛ Biblia mli hetoo ni atsɔɔ yɛ wolo lɛ mli lɛ kpãa gbee?” Ŋmɛɛ gbɛ ni ewie. Kanemɔ Nilee wolo lɛ baafa 77, kuku 17 lɛ, ni okɛɛ lɛ akɛ obaasumɔ ni okane Romabii 9:14 kɛjɛ shiatsɛ lɛ Biblia mli. No sɛɛ lɛ kɛɛmɔ akɛ: “Miishɛɛ sane ji akɛ, Nyɔŋmɔ kɛ amanehulu kɛ piŋmɔ baaa wɔnɔ yɛ gbɛ ni ejaaa nɔ. Ewo shi akɛ ekɛ naanɔ shihilɛ ni toiŋjɔlɛ kɛ miishɛɛ yɔɔ mli baaha wɔ. Klɛŋklɛŋ yitso ni yɔɔ wolo nɛɛ mli lɛ ji ‘Obaanyɛ Oná Wɔsɛɛ Shihilɛ ni Yɔɔ Miishɛɛ!’ Masumɔ ni matsɔɔ bo bɔ ni no baanyɛ afee anɔkwale kɛha bo kɛ osuɔlɔi.” Gbelemɔ yitso 1, ni ofee bɔ ni wɔkɛ mɛi kaseɔ nii wɔhaa lɛ he nɔkwɛmɔ nɔ otsɔɔ. Nyɛkasea yitso lɛ mli nii saŋŋ bɔ ni shihilɛi lɛ aaaŋmɛ gbɛ.
4 Ekolɛ obaasumɔ ni okɛ hiɛkpamɔ wiemɔ ni yɔɔ “Bɔ ni Ajeɔ Biblia Mli Sanegbaa Shishi ni Atsaa Nɔ” wolo lɛ baafa 3, ni hiɛ saneyitso akɛ “Gbɔlɛ/Gbele” lɛ atsu nii:
◼ “Ani obi pɛŋ akɛ, ‘Ani gbele ji nɔ ni kɛ fɛɛ baa naagbee? Aloo nɔ kroko yɛ gbele sɛɛ?’ [Ŋmɛɛ gbɛ ni ewie.] Biblia lɛ tsɔɔ saji fɛɛ ni wɔɔbi yɛ gbele he lɛ mli etsɔɔ faŋŋ. [Kanemɔ Jajelɔ 9:5, 10.] Etsɔɔ hu akɛ hiɛnɔkamɔ diɛŋtsɛ yɛ kɛha mɛi ni yɔɔ hemɔkɛyeli lɛ. [Gbelemɔ Nilee wolo lɛ baafa 84 lɛ kuku 13; kanemɔ Yesu wiemɔi ni anaa yɛ Yohane 11:25 lɛ ni otsɔɔ mli.] Akɛ yitso muu nɛɛ fɛɛ eha koni eha sanebimɔ ni ji, Mɛni baa wɔsuɔlɔi ni egboi lɛ anɔ? lɛ hetoo. Masumɔ ni mashi enɛ maha bo.”
5 Kɛ oofee sɛɛsaramɔ lɛ, obaanyɛ ojie ohe shi ekoŋŋ ni okɛɛ akɛ:
◼ “Nyɛsɛɛ ko lɛ wɔwie nɔ ni baa gbɔmɔ nɔ kɛ́ egbo lɛ he. Mɛi pii heɔ yeɔ akɛ wala fɛɛ wala ni yɔɔ gbele sɛɛ lɛ baa yɛ ŋwɛi aloo hɛl. Shi ani osusu nyɛ́ ni eeenyɛ́ eba akɛ gbohii lɛ baahi shi ekoŋŋ yɛ biɛ yɛ shikpɔŋ lɛ nɔ lɛ he pɛŋ? [Ŋmɛɛ gbɛ ni ewie.] Taakɛ Biblia lɛ tsɔɔ lɛ, mɛi ni ateeɔ amɛ shi lɛ baafata heshibalɔi ni baahi shikpɔŋ lɛ nɔ lɛ ahe. [Kanemɔ Lala 37:11, 29, no sɛɛ lɛ nyɛgbaa Nilee wolo lɛ baafa 88, kuku 20 lɛ he sane.] Nakai hiɛnɔkamɔ lɛ kɛ miishɛjemɔ eha gbɔmɛi akpekpei abɔ ni sheɔ gbele gbeyei lɛ. Wolo nɛɛ baaye abua bo koni onu sane lɛ shishi jogbaŋŋ. Ani obaasumɔ ni mafee he nɔkwɛmɔ nɔ?”
6 Kɛ oosumɔ hiɛkpamɔ wiemɔ kuku lɛ, obaanyɛ oka enɛ okwɛ:
◼ “Masumɔ ni mikɛ mfoniri ko ni yɔɔ wolo ni ji Nilee Ni Kɛ Mɔ Yaa Naanɔ Wala Mli nɛɛ mli lɛ atsɔɔ bo. Ani enɛ jeee mfoniri ni yɔɔ fɛo?” Gbelemɔ wolo lɛ baafai 4-5 lɛ bɔni afee ni shiatsɛ lɛ anyɛ ana. Ŋmɛɛ gbɛ ni ewie. Agbɛnɛ kanemɔ wiemɔi ni yɔɔ baafa 5 lɛ. Wiemɔ enɛ ní okɛba naagbee akɛ: “Obaanyɛ ohe wolo nɛɛ ni bo diɛŋtsɛ okane.” Taomɔ be ni baahi koni oku osɛɛ oba ni obatsa miishɛɛ fɛɛ ni atee lɛ shi lɛ nɔ.
7 Wɔyɛ nilee ni jɛ Nyɔŋmɔ ŋɔɔ ni haa shihilɛ mli sanebimɔi ni he hiaa lɛ ahetoo. Saamɔ ohe jogbaŋŋ, ni Yehowa baajɔɔ mɔdɛŋ ni obɔɔ ni okɛ mɛi ni taoɔ anɔkwale lɛ aná yiwalaheremɔ he sane lɛ mli gbɛfaŋnɔ lɛ nɔ.