Nilee Ni Kɛ Mɔ Yaa Naanɔ Wala Mli Wolo lɛ Kɛhamɔ

¹ Wɔmii shɛ wɔhe beni ajie wolo hee, Nilee Ni Kɛ Mɔ Yaa Naanɔ Wala Mli lɛ kpo lɛ! Ato he gbɛjianɔ koni eye ebua ni mɛi abana anɔkwale lɛ he anɔkwa nilee oyayaayai. Wɔbaana hegbɛ klɛŋklɛŋ akɛ wɔkɛ wolo nɛɛ aaaha yɛ wɔ shikpɔŋkuku lɛ mli yɛ March mli. Mɛni wɔbaanyɛ wɔkɛɛ ni wɔkɛtee miishɛɛ shi?

² Naa shiɛmɔ wiemɔ ni ekolɛ mɔ ko ni Nyɔŋmɔ mli hemɔkɛyeli ni eyɔɔ lɛ eba shi kwraa lɛ baanya he:

◼ “Mɛi babaoo dara akɛ mɛi ni heɔ Nyɔŋmɔ nɔ amɛyeɔ, shi amrɔ nɛɛ amɛna akɛ amɛ hemɔkɛyeli lɛ tamɔɔɔ bɔ ni eji tsutsu ko lɛ. Mɛni osusuɔ akɛ ekolɛ no haa ebaa lɛ nakai? [Ŋmɛɛ gbɛ ni ewie.] Nibii ni yɔɔ naakpɛɛ yɛ jeŋ muu lɛ he lɛ hesusumɔ woɔ Nyɔŋmɔ mli hemɔkɛyeli ni wɔyɔɔ lɛ mli hewalɛ. [Kanemɔ Lala 19:2.] Mɔ ni emlai kudɔɔ ŋwɛi bɔɔ nii nɛɛ hu kɛ gbɛtsɔɔmɔ ni he yɔɔ sɛɛnamɔ eha wɔ. [Kanemɔ Lala 19:8-10.] Ŋmalɛi kukuji nɛɛ maa bɔ ni ehe hiaa ni wɔkase nɔ fɛɛ nɔ ni wɔɔnyɛ yɛ Nyɔŋmɔ kɛ eyiŋtooi ahe lɛ nɔ mi. [Gbalamɔ jwɛŋmɔ kɛya mfoniri ni yɔɔ baafai 4 kɛ 5 lɛ nɔ, ni okane eshishi niŋmaa lɛ.] Kɛ obaasumɔ ni ona nilee krɛdɛɛ nɛɛ he sɛɛ lɛ, no lɛ ebaaŋɔɔ minaa akɛ mashi wolo nɛɛ maha bo.”

³ Yɛ be mli ni nyɛsɛɛ nɛɛ adafitswaa sane mli nifeemɔ ni haoɔ mɔ waa lɛ yɔɔ ojwɛŋmɔ mli lɛ, obaanyɛ okɛɛ akɛ:

◼ “Ekolɛ onu [sane ni ba lɛ] he. Ani osusu kɛji Nyɔŋmɔ susuɔ jalɛsane ni ayeee kɛ nɔnaa ni wɔnaa ni ebɔle wɔ loo ni ebaa wɔ diɛŋtsɛ wɔnɔ po he lɛ he pɛŋ? [Ŋmɛɛ gbɛ ni ewie.] Biblia lɛ maa nɔ mi ehaa wɔ akɛ Nyɔŋmɔ sumɔɔ wɔ ni ákɛ ebaaye ebua wɔ yɛ haomɔ bei amli.” Kanemɔ Lala 72:12-17 fai komɛi. Gbelemɔ wolo lɛ baafa 70, ni otsɔɔ mli akɛ nɛkɛ wolo, Nilee Ni Kɛ Mɔ Yaa Naanɔ Wala Mli nɛɛ haa sane ni mɛi akpekpei abɔ ebi ni ji, Mɛni hewɔ Nyɔŋmɔ ŋmɛɔ piŋmɔ gbɛ? lɛ hetoo. “Obaana akɛ sanebimɔ lɛ hetoo ni Biblia lɛ kɛhaa lɛ shɛjeɔ mɔ mii waa. Masumɔ ni mashi wolo nɛɛ maha bo koni bo diɛŋtsɛ onyɛ okane enɛ he sane.”

⁴ Kɛ okɛ fɔlɔ ko kpe lɛ, obaanyɛ ogbala jwɛŋmɔ kɛya weku lɛ nɔ:

◼ “Fɔlɔi babaoo kpɛlɛɔ nɔ akɛ naagbai pii baa yɛ be mli ni abɔɔ mɔdɛŋ ni ahiɛ weku shihilɛ ni yɔɔ miishɛɛ mli lɛ. Mɛɛ nibii oyɔseɔ akɛ nomɛi ji gbɛtsii nii ni naa wa fe fɛɛ? [Ŋmɛɛ gbɛ ni ewie.] Wɔteŋ mɛi pii feɔ bɔ fɛɛ bɔ ni wɔɔnyɛ, shi bei pii lɛ wɔhiɛ sɔɔ yelikɛbuamɔ ni baaha nibii kpakpai ajɛ mli kɛbaha wɔ lɛ. Biblia lɛ kɛ ŋaawoo ni hi jogbaŋŋ haa. [Kanemɔ Kolosebii 3:12, 18-21.] Biblia lɛ yɛ nibii babaoo ni ebaakɛɛ yɛ sane nɛɛ he lolo, taakɛ atsɔɔ yɛ wolo nɛɛ yitso 15 lɛ mli lɛ, ni hiɛ yitso akɛ ‘Weku ni Woɔ Nyɔŋmɔ Hiɛ Nyam lɛ ni Aaatswa Ama Shi.’ Etĩɔ ŋaawoo ni akɛha yɛ Biblia lɛ mli, ni tsɔɔ bɔ ni aaafee ajie gbalashihilɛ mli nɔnyɛɛ kɛya kɛ bɔ ni aaadamɔ naagbai ni gbekɛbii kɛkpeɔ lɛ naa lɛ mli. Miheɔ miyeɔ akɛ obaana ekanemɔ he miishɛɛ.”

⁵ Kɛ oosumɔ nɔ ko kuku lɛ, obaanyɛ oka enɛ okwɛ:

◼ “Ani osusu nɔ hewɔ ni wɔgbɔlɔɔ ni wɔgboiɔ lɛ he pɛŋ? Wolo nɛɛ mli yitso 6 lɛ tsɔɔ nɔ ni kɛ gbele baa kɛ bɔ ni Nyɔŋmɔ baajie kɛya. Biblia lɛ kɛɔ wɔ akɛ Nyɔŋmɔ ewo shi akɛ ekɛ naanɔ wala baaha mɛi ni sumɔɔ lɛ lɛ. [Kanemɔ Yohane 17:3.] Kɛ obaasumɔ ni okane enɛ he sane lɛ, no lɛ obaana akɛ wolo nɛɛ haa mɔ nilee waa.”

⁶ Kɛ wɔsaa wɔhe ojogbaŋŋ lɛ, ekolɛ wɔbaanyɛ wɔkɛ wolo nɛɛ atsu nii ni ‘wɔkɛgbele Ŋmalɛi lɛ’ wɔha mɛi krokomɛi yɛ gbɛ ni baaha amɛmli afili amɛ babaoo nɔ!—Luka 24:32.

Kuu Osɛɛ Oya Mɛi ni Jie Miishɛɛ Kpo lɛ Aŋɔɔ

¹ Beni ajieɔ wolo hee, Nilee Ni Kɛ Mɔ Yaa Naanɔ Wala Mli lɛ kpo lɛ, kpee lɛ shishi wielɔ lɛ tsɔɔ mli akɛ “esa akɛ nikaselɔi ni hiɛ tsui kpakpa lɛ anyɛ akase nibii babaoo kɛtsɔ wolo lɛ kasemɔ nɔ koni amɛna shidaamɔ yɛ Yehowa hiɛ koni abaptisi amɛ.” Afee wolo lɛ koni etsɔɔ anɔkwale lɛ oyayaayai. Ekɛ saji kukuji pɔtɛɛ ni baanyɛ akanya nikaselɔi ni amɛya hiɛ yɛ mumɔŋ lɛ haa. Ekɛ anɔkwale lɛ haa yɛ gbɛ ni yɔɔ tɛɛ nɔ, ni ewieee apasa tsɔɔmɔi ahe babaoo. Esa akɛ wɔfee sɛɛsaramɔi yɛ mɛi ni jie miishɛɛ kpo lɛ aŋɔɔ, bɔni afee ni wɔye omanye yɛ dɛŋdade hee nɛɛ kɛ nitsumɔ mli.

² Kɛ okɛ mɔ ni naaa Nyɔŋmɔ mli hemɔkɛyeli ni kɛlɛ ejie miishɛɛ ko kpo lɛ wie lɛ, obaanyɛ oje shishi kɛtsɔ wolo lɛ ni ooogbele kɛya mfonirii ni yɔɔ baafai 4 kɛ 5 lɛ nɔ ni okɛɛ:

◼ “Beni miba biɛ nyɛsɛɛ lɛ, wɔkwɛ shihilɛ hei fɛfɛji he mfoniri fɛfɛo nɛɛ. Mfoniri niŋmaa lɛ biɔ akɛ, ‘Mɛni esa akɛ ofee ni ona amɛmli ŋɔɔmɔ?’ Te obaaha hetoo oha tɛŋŋ? [Ŋmɛɛ gbɛ ni ewie.] Biblia lɛ tsɔɔ taomɔ nii ni he hiaa fe fɛɛ lɛ ekome mli faŋŋ. [Kanemɔ Yohane 17:3.] Nilee he miihia kɛha hemɔkɛyeli ni wɔɔna yɛ Nyɔŋmɔ mli. Gbɛ ni hi jogbaŋŋ ni wɔɔtsɔ nɔ wɔkase nɔ ni ehe hiaa ni wɔle lɛ ji kɛtsɔ Biblia lɛ kasemɔ nɔ fiofio.” Gbelemɔ yitso 1 ni otsɔɔ saji komɛi ni asusu he ni woɔ mɔ hewalɛ, ni yɔɔ kukuji 1 kɛyashi 5 lɛ. Tsɔɔmɔ bɔ ni afeɔ Biblia mli nikasemɔ lɛ ahaa, ni okɛɛ lɛ akɛ obaaku osɛɛ oba kɛha sanegbaa babaoo.

³ Kɛ oku osɛɛ otee kɛha sanegbaa lɛ nɔtsamɔ ni tsɔɔ nɔ hewɔ ni Nyɔŋmɔ ŋmɛɔ piŋmɔ gbɛ lɛ, obaanyɛ okɛɛ akɛ:

◼ “Beni miba biɛ nyɛsɛɛ ko lɛ, wɔwie [sane ni ba lɛ] he. Sane ni abi lɛ kɔɔ nɔ hewɔ ni Nyɔŋmɔ ŋmɛɔ piŋmɔ babaoo gbɛ yɛ je lɛŋ lɛ he. Te omu sane naa oha tɛŋŋ? [Ŋmɛɛ gbɛ ni ewie.] Ákɛ aaale akɛ jeee Nyɔŋmɔ ji mɔ ni kɛ piŋmɔ shihilɛi ni tamɔ nɛkɛ baa lɛ woɔ mɔ hewalɛ.” Gbelemɔ Nilee Ni Kɛ Mɔ Yaa Naanɔ Wala Mli wolo lɛ baafai 71-2, ni nyɛgba Ŋmalɛ mli saji ni asusu he yɛ kukuji 3 kɛyashi 5 lɛ he sane. Kɛɛmɔ lɛ akɛ obaaba ekoŋŋ koni obatsɔɔ nɔ hewɔ ni wɔbaanyɛ wɔna nɔmimaa akɛ etsɛŋ ni piŋmɔ gbɛ ni Nyɔŋmɔ eŋmɛ lɛ baaba naagbee.

⁴ Kɛ ooku osɛɛ oyasara fɔlɔ ko ni susuɔ weku mli naagbai ahe lɛ, obaanyɛ okɛɛ nɛkɛ:

◼ “Mile akɛ bo, akɛ fɔlɔ lɛ, ootao nɔ ni hi fe fɛɛ oha obii. Akɛni onyɛŋ obu amɛhe kɛjɛ efɔŋ fɛɛ efɔŋ he hewɔ lɛ, esa akɛ otsɔɔ amɛ bɔ ni amɛaafee amɛdamɔ shihilɛ mli naagbai anaa. Mɛɛ gbɛ osusuɔ akɛ abaanyɛ atsɔ nɔ afee enɛ? [Ŋmɛɛ gbɛ ni ewie.] Nibii ni he hiaa fe fɛɛ ni fɔlɔ baanyɛ ekɛha lɛ ateŋ ekome ji tsɔsemɔ.” Gbelemɔ Nilee wolo lɛ baafai 145-6, ni ogbala jwɛŋmɔ kɛya Biblia mli ŋaawoo kpakpa lɛ nɔ, ni oma bɔ ni ehe hiaa ha, kɛ bɔ ni ekɛ nitsumɔ kɛ jɔɔmɔ baanyɛ aba lɛ nɔ mi. Kɛɛmɔ lɛ akɛ obaaku osɛɛ oba ekoŋŋ koni obatsɔɔ gbɛ ni atsɔɔ nɔ akɛ wolo nɛɛ tsuɔ nii ahaa koni ekase weku shihilɛ ni miishɛɛ yɔɔ mli ni nine baashɛ nɔ lɛ he nii babaoo.

⁵ Kɛ oosara mɔ ko yɛ he ko ni okɛ shiɛmɔ wiemɔ kuku tsu nii yɛ lɛ, obaanyɛ okɛɛ:

◼ “Ejeee Nyɔŋmɔ yiŋtoo kɔkɔɔkɔ akɛ wɔgbɔlɔ ni wɔgboi. Eto eyiŋ akɛ wɔhi shi yɛ paradeiso shikpɔŋ nɔ kɛya naanɔ.” Okɛ mfoniri ni yɔɔ baafai 188-9 lɛ atsɔɔ. Kanemɔ baafa 184 lɛ kuku 11. Too gbɛjianɔ kɛha sɛɛsaramɔ kroko.

⁶ Eka shi faŋŋ akɛ wolo hee nɛɛ ji nɔ kroko ni jɛ Yehowa ŋɔɔ koni akɛha henaabuamɔ nitsumɔ lɛ “afee oya” yɛ naagbee gbii nɛɛ amli. (Yes. 60:22) Kɛ wɔkɛtsu nii jogbaŋŋ kɛmɔ shi lɛ, wɔbaanyɛ wɔkɛ nilee ni baanyɛ aye abua koni mɔ ana naanɔ wala lɛ aha.