Fã 7—Ní Wɔɔfee Biblia Mli Nikasemɔi ni Yaa Hiɛ

Ní Aaasɔle yɛ Nikasemɔ lɛ Shishi

1. (a) Mɛni hewɔ ehi ákɛ akɛ sɔlemɔ aje Biblia mli nikasemɔ ko shishi ni akɛgbe naa lɛ? (b) Mɛɛ gbɛ nɔ wɔbaanyɛ wɔtsɔ wɔsɔle klɛŋklɛŋ kwraa yɛ Biblia mli nikasemɔ ko shishi?

¹ Kɛ́ Biblia mli nikaselɔi lɛ aaaya amɛhiɛ yɛ mumɔŋ lɛ, no lɛ Yehowa jɔɔmɔ he miihia amɛ. (1 Kor. 3:6) No hewɔ lɛ ehi ákɛ aaaje nikasemɔ ko ni ato he gbɛjianɔ lɛ shishi kɛ sɔlemɔ, ni akɛ sɔlemɔ agbe naa. Bei pii lɛ wɔbaanyɛ wɔfee enɛ yɛ klɛŋklɛŋ nikasemɔ ni wɔkɛ mɛi ni nyaa jamɔ he lɛ feɔ lɛ mli. Yɛ mɛi krokomɛi agbɛfaŋ lɛ, ekolɛ ehe baahia ni wɔyoo be ni sa ni wɔkɛaasɔle klɛŋklɛŋ kwraa lɛ. Obaanyɛ okɛ Lala 25:4, 5 kɛ 1 Yohane 5:14 lɛ atsu nii kɛye obua nikaselɔ lɛ koni ena nɔ hewɔ ni esa akɛ asɔle, koni agbɛnɛ hu okɛ Yohane 15:16 lɛ atsu nii kɛtsɔɔ lɛ bɔ ni ehe hiaa akɛ asɔle aha Yehowa kɛtsɔ Yesu Kristo nɔ lɛ mli.

2. Kɛ́ nyɛmi yoo kɛ nyɛmi nuu ko ni abaptisi lɛ loo abaptisiko lɛ tee koni amɛkɛ mɔ ko ayafee Biblia mli nikasemɔ lɛ, namɔ baasɔle?

² Namɔ esa akɛ esɔle yɛ Biblia mli nikasemɔ ko shishi? Eyɛ mli akɛ kɛ́ nyɛmi nuu ko ni abaptisi lɛ lɛ kɛ nyɛmi yoo ko tee koni amɛkɛ mɔ ko ayafee nikasemɔ lɛ, nyɛmi yoo lɛ baanyɛ akwɛ nikasemɔ lɛ nɔ kɛ́ ekɛ nɔ ko hà eyi nɔ moŋ, shi nyɛmi nuu lɛ ji mɔ ni baasɔle. (1 Kor. 11:5, 10) Yɛ gbɛ kroko nɔ lɛ, kɛ́ nyɛmi nuu ko ni ji Maŋtsɛyeli shiɛlɔ ni abaptisiko lɛ lɛ kɛ nyɛmi yoo ko tee koni amɛkɛ mɔ ko ayafee nikasemɔ lɛ, nyɛmi yoo lɛ ji mɔ ni baasɔle. Yɛ shihilɛ ni tamɔ nɛkɛ mli lɛ, esa akɛ nyɛmi yoo lɛ ahà eyi nɔ beni esɔleɔ lɛ, kɛ agbɛnɛ hu beni ekwɛɔ nikasemɔ lɛ nɔ lɛ.

3. Mɛni ji saji ni hi ni esa akɛ atsĩ tã yɛ sɔlemɔi ni asɔleɔ yɛ Biblia mli nikasemɔ ko shishi lɛ mli?

³ Nɔ ni Abaanyɛ Atsĩ Tã yɛ Sɔlemɔ lɛ Mli: Esaaa akɛ sɔlemɔ ni asɔleɔ yɛ Biblia mli nikasemɔ ko shishi lɛ sɛɛ kɛɔ, shi esa akɛ efee nɔ ni kɔɔ nɔ ko pɔtɛɛ he. Kɛfata Nyɔŋmɔ ni aaabi lɛ koni ejɔɔ nikasemɔ lɛ nɔ, ni ada lɛ shi yɛ anɔkwalei ni akase lɛ ahewɔ lɛ he lɛ, ehi akɛ ajie Yehowa yi ákɛ nitsɔɔmɔ lɛ Jɛɛhe. (Yes. 54:13) Wɔbaanyɛ wɔkɛ saji ni tsɔɔ akɛ wɔyɛ nikaselɔ lɛ he miishɛɛ diɛŋtsɛ, kɛ nɔ ni tsɔɔ akɛ wɔhiɛ sɔɔ gbɛjianɔtoo ni Yehowa kɛtsuɔ nii lɛ afata he. (1 Tes. 1:2, 3; 2:7, 8) Yehowa ni wɔɔbi lɛ koni ejɔɔ mɔdɛŋ ni nikaselɔ lɛ bɔɔ koni ekɛ nɔ ni ekaseɔ lɛ atsu nii lɛ nɔ lɛ baanyɛ aye abua nikaselɔ lɛ koni ena bɔ ni ehe hiaa akɛ efee ‘wiemɔ lɛ nɔyelɔ.’—Yak. 1:22.

4. Mɛɛ sɛɛnamɔi sɔlemɔ ni akɛjeɔ Biblia mli nikasemɔ shishi ni akɛgbeɔ naa lɛ haa anáa?

⁴ Sɛɛnamɔi babaoo yɛ sɔlemɔ he. Ehaa anáa Nyɔŋmɔ jɔɔmɔ. (Luka 11:13) Emaa hiɛdɔɔ ni yɔɔ Nyɔŋmɔ Wiemɔ lɛ kasemɔ he lɛ nɔ mi. Kɛ́ nikaselɔ lɛ bo wɔsɔlemɔi lɛ atoi lɛ, ehaa lɛ hu ekaseɔ bɔ ni asɔleɔ. (Luka 6:40) Nɔ ni fe fɛɛ lɛ, sɔlemɔ ni jɛ tsui ni mli eyi obɔ kɛ suɔmɔ kɛha Nyɔŋmɔ, kɛ hiɛsɔɔ kɛha esui ni nɔ bɛ lɛ baanyɛ aye abua nikaselɔ lɛ diɛŋtsɛ koni ená ekɛ Yehowa teŋ wekukpaa.

Nɔ ni Esa akɛ Owie yɛ Woji Tɛtrɛbii lɛ Ahe

The Watchtower Mar. 1

“Ani osusuɔ akɛ je lɛŋ baafee he ko kpakpa kɛji ákɛ mɔ fɛɛ mɔ kɛ ŋaawoo nɛɛ tsu nii? [Kanemɔ Romabii 12:17, 18. No sɛɛ lɛ, ŋmɛɛ gbɛ ni eha hetoo.] Mɔbɔ sane ji akɛ, bei pii lɛ béi baa mɛi ateŋ. Wolo tɛtrɛɛ nɛɛ tsɔɔ bɔ ni Biblia mli ŋaawoo ni wɔkɛaatsu nii lɛ baanyɛ aye abua wɔ koni wɔsaa béi ni wɔha toiŋjɔlɛ ahi shi ekoŋŋ.”

Awake! Mar. 8

“Bɔ ni ataoɔ adebɔɔ mli hewalɛ nibii ahaa lɛ yaa hiɛ daa afi. Ani obaanyɛ otsɔɔ nɔ ni baaba kɛji ákɛ adebɔɔ mli hewalɛ nibii ni he hiaa wɔ lɛ tã? [Ŋmɛɛ gbɛ ni eha hetoo.] Wolo tɛtrɛɛ nɛɛ tsɔɔ bɔ ni atee hiɛ yɛ adebɔɔ mli hewalɛ nibii ni kɛ mujiwoo baaa lɛ afeemɔ mli. Etsɔɔ mɔ ni ji adebɔɔ mli hewalɛ nibii fɛɛ Jɛɛhe lɛ hu mli.” Kanemɔ Yesaia 40:26.

The Watchtower Mar. 15

“Gbɔmɛi ni yɔɔ je lɛŋ he fɛɛ he lɛ jieɔ Yesu tsɔɔmɔi lɛ ayi. [Kanemɔ wiemɔ ni atsɛ yisɛɛ ni yɔɔ baafa 3, kuku 1 lɛ.] Shi ani osusuɔ akɛ abaanyɛ akɛ nakai tsɔɔmɔi ni enɛ fata he lɛ atsu nii ŋmɛnɛ? [Kanemɔ Mateo 5:21, 22a. No sɛɛ lɛ, ŋmɛɛ gbɛ ni eha hetoo.] Wolo tɛtrɛɛ nɛɛ wieɔ nɔ ni Yesu tsɔɔ, kɛ gbɛ nɔ ni wɔbaanyɛ wɔtsɔ koni ehe aba sɛɛnamɔ kɛha wɔ lɛ he.”

Awake! Mar. 22

“Akɛni gɔji yɛ fɛo hewɔ lɛ, mɛi babaoo náa amɛhe miishɛɛ, shi ani ole akɛ amɛhe miihia koni anyɛ ahi wala mli yɛ shikpɔŋ lɛ nɔ? [Ŋmɛɛ gbɛ ni eha hetoo.] Wolo tɛtrɛɛ nɛɛ tsɔɔ nɔ hewɔ ni gɔji ahe hiaa wɔ, kɛ nɔ ni baa amɛnɔ ŋmɛnɛ lɛ mli. Etsɔɔ bɔ ni Bɔlɔ lɛ baabaa bɔɔ nii ni he yɔɔ sɛɛnamɔ nɛɛ ayi hu lɛ mli.” Kanemɔ Lala 95:4.