Fã 8—Ní Wɔɔfee Biblia Mli Nikasemɔi ni Yaa Hiɛ

Ní Aaagbala Nikaselɔi Ajwɛŋmɔ Kɛba Asafo lɛ Nɔ

1. Mɛni hewɔ sɛɛnamɔ yɔɔ he akɛ aaagba Yehowa asafo lɛ he sane yɛ Biblia mli nikasemɔ mli daa otsi lɛ?

¹ Yiŋtoo hewɔ ni wɔkɛ mɛi feɔ Biblia mli nikasemɔ lɛ jeee ni wɔtsɔɔ amɛ tsɔɔmɔi ahe saji pɛ kɛkɛ, shi moŋ koni wɔye wɔbua nikaselɔi lɛ koni amɛbatsɔmɔ Kristofoi asafo lɛ mlibii. (Zak. 8:23) Wolo bibioo ni ji Yehowa Odasefoi—Namɛi Ni? Mɛni Amɛheɔ Amɛyeɔ? lɛ baanyɛ aye abua wɔ ni wɔfee enɛ. Okɛ eko aha Biblia mli nikaselɔi heei lɛ, ni owo amɛ hewalɛ koni amɛkane. Kɛfata he lɛ, okɛ minitii fioo ko atsu nii yɛ nikasemɔ lɛ mli daa otsi koni okɛ amɛ agba Yehowa asafo lɛ he sane.

2. Obaanyɛ owo Biblia mli nikaselɔi hewalɛ koni amɛba asafoŋ kpeei yɛ mɛɛ gbɛ nɔ?

² Asafoŋ Kpeei: Gbɛ titri ni Biblia mli nikaselɔi tsɔɔ nɔ amɛnáa hiɛsɔɔ amɛhaa Nyɔŋmɔ asafo lɛ ji kɛtsɔ bɔɔ ní amɛkɛ wɔ bɔɔ yɛ asafoŋ kpeei ashishi lɛ nɔ. (1 Kor. 14:24, 25) Enɛ hewɔ lɛ, obaanyɛ oje shishi oha amɛle bɔ ni wɔfeɔ kpeei lɛ wɔhaa lɛ kɛtsɔ daa otsi kpeei enumɔ lɛ ní ooogbála mli otsɔɔ amɛ ekomekomei lɛ nɔ. Tsɔɔmɔ amɛ maŋshiɛmɔ ni abaaha lɛ saneyitso. Okɛ saji ni abaakase yɛ Buu-Mɔɔ Nikasemɔ lɛ kɛ Asafo Woloŋ Nikasemɔ lɛ shishi lɛ atsɔɔ amɛ. Tsɔɔmɔ amɛ bɔ ni afeɔ Teokrase Sɔɔmɔ Skul kɛ Sɔɔmɔ Kpee lɛ ahaa. Kɛ́ oyɛ nifeemɔ yɛ skul lɛ mli lɛ, obaanyɛ ofee otsɔɔ amɛ. Okɛ amɛ agba saji otii ni sa kadimɔ ni awie he yɛ kpeei lɛ ashishi lɛ he sane. Okɛ wɔkpeei lɛ ahe mfonirii ni yɔɔ wɔwoji lɛ amli lɛ aye abua amɛ koni amɛna nɔ ni afeɔ yɛ jɛmɛ lɛ. Kɛ́ okɛ amɛ je nikasemɔ shishi nɔŋŋ lɛ, fɔ̃ɔ amɛ nine koni amɛba kpeei lɛ.

3. Mɛɛ saji ni kɔɔ asafo lɛ he wɔbaanyɛ wɔkɛ nikaselɔi lɛ asusu he?

³ Kɛ́ be kɛha Kaimɔ lɛ, kpokpaa nɔ kpeei, kɛ kpokpaa nɔkwɛlɔ lɛ saramɔ lɛ miibɛŋkɛ lɛ, okɛ minitii fioo ko atsu nii ni okɛgbála nibii amli otsɔɔ amɛ, ni oha amɛná hiɛsɔɔ amɛha gbɛjianɔtoi nɛɛ. Ha amɛ sanebimɔi ni nyiɛ sɛɛ nɛɛ ahetoo ekomekomei, tamɔ: Mɛni hewɔ atsɛɔ wɔ akɛ Yehowa Odasefoi? Mɛni hewɔ wɔtsɛɔ hei ni wɔkpeɔ yɛ lɛ akɛ Maŋtsɛyeli Asai lɛ? Mɛni ji onukpai lɛ kɛ asafoŋ sɔɔlɔi lɛ anitsumɔi? Te atoɔ shiɛmɔ nitsumɔ lɛ kɛ shikpɔŋkuku lɛ he gbɛjianɔ ahaa tɛŋŋ? Mɛɛ gbɛ nɔ atsɔɔ afeɔ wɔwoji lɛ? Nɛgbɛ anáa shika yɛ ni akɛfiɔ asafo lɛ nitsumɔ lɛ sɛɛ? Mɛɛ gbɛfaŋnɔ nitsumɔhe nine lɛ kɛ Nɔyeli Kuu lɛ tsuɔ he nii kɛkwɛɔ nitsumɔ lɛ nɔ?

4, 5. Wɔ vidioi lɛ baanyɛ aha mɛi aná hiɛsɔɔ kɛha asafo lɛ yɛ mɛɛ gbɛ nɔ?

⁴ Vidioi ni Tsɔɔ Mɔ Nii: Wɔ vidioi lɛ akwɛmɔ ji gbɛ kroko ni Biblia mli nikaselɔi baanyɛ atsɔ nɔ ale Yehowa asafo ni yɔɔ naakpɛɛ lɛ. Vidio ni ji To the Ends of the Earth lɛ wieɔ wɔjeŋ muu fɛɛ shiɛmɔ nitsumɔ lɛ he; Our Whole Association of Brothers lɛ wieɔ wɔjeŋ muu fɛɛ nyɛmifeemɔ lɛ he; ni United by Divine Teaching lɛ wieɔ ekomefeemɔ ni yɔɔ Yehowa Odasefoi ateŋ lɛ he. Beni yoo ko ni ahaa lɛ wɔwoji tɛtrɛbii kɛ woji bibii lɛ kwɛ vidio ni ji Jehovah’s Witnesses—The Organization Behind the Name lɛ, ehiŋmɛiiaŋ kpala nu. Eheɔ Odasefoi ni basaraa lɛ lɛ eyeɔ, shi beni ekwɛ vidio lɛ egbe naa lɛ, enu he akɛ ebaanyɛ ekɛ ehe afɔ̃ asafo lɛ hu nɔ. Akɛ lɛ je nikasemɔ diɛŋtsɛ shishi, ni otsi ni nyiɛ sɛɛ lɛ mli lɛ, etee kpee yɛ Maŋtsɛyeli Asa lɛ nɔ.

⁵ Kɛ́ wɔkɛ wɔ Biblia mli nikaselɔi lɛ ye bei fioo daa otsi yɛ nikasemɔ lɛ mli, ni wɔkɛ dɛŋdadei ni akɛha lɛ tsu nii lɛ, wɔbaanyɛ wɔgbala amɛjwɛŋmɔ fiofio kɛba asafo kome pɛ ni Yehowa kɛtsuɔ nii ŋmɛnɛ lɛ nɔ.

Nɔ ni Esa akɛ Owie yɛ Woji Tɛtrɛbii lɛ Ahe

Buu-Mɔɔ Apr. 1

“Ani onu pɛŋ ni aawie akɛ jeŋ nilee kɛ Biblia lɛ kpãaa gbee? [Ŋmɛɛ gbɛ ni eha hetoo.] Wolo tɛtrɛɛ nɛɛ gbálaa yinɔsane ni tsɔɔ béi ni bakã jeŋ nilee kɛ jamɔ teŋ lɛ mli. Shi ekɛ odaseyeli hu ni tsɔɔ akɛ jeŋ nilee ni ja kɛ Biblia lɛ kpãa gbee lɛ haa.” Okɛ baafa 6-7 lɛ atsɔɔ lɛ. No sɛɛ lɛ kanemɔ Jajelɔ 1:7.

Awake! Apr. 8

“Mɛni osusuɔ akɛ fɔlɔi baanyɛ afee kɛye amɛbua amɛbii koni amɛtsi amɛhe kɛjɛ naagbai ni amɛkɛkpeɔ beni amɛji oblahii kɛ oblayei bibii lɛ ahe? [Ŋmɛɛ gbɛ ni eha hetoo. No sɛɛ lɛ kanemɔ Yesaia 48:17, 18.] Wolo tɛtrɛɛ nɛɛ tsɔɔ bɔ ni Biblia mli ŋaawoo ni akɛaatsu nii lɛ baanyɛ aye abua fɔlɔi koni amɛha sanegbaa kpakpa ahi amɛkɛ amɛbii lɛ ateŋ, ní amɛtsɔɔ amɛ he ni esa akɛ amɛfee nii kɛyashɛ.”

Buu-Mɔɔ Apr. 15

“Ani abɛ saji akpekpei abɔ ŋmɛnɛ? [Ŋmɛɛ gbɛ ni eha hetoo.] Shi kɛlɛ, eko kwraa bɛ ni he yɔɔ sɛɛnamɔ waa tamɔ nɔ ni awie he yɛ ŋmalɛ nɛɛ mli lɛ. [Kanemɔ Yohane 17:3.] Wolo tɛtrɛɛ nɛɛ tsɔɔ wiemɔ ni ji ‘naanɔ wala’ lɛ shishi, kɛ bɔ ni wɔɔfee ni wɔnine ashɛ nilee ni kɛ mɔ yaa naanɔ wala mli lɛ nɔ.”

Awake! Apr. 22

“Eyɛ mli akɛ ekolɛ ale Yesu Kristo fe mɔ fɛɛ mɔ ni ehi shi pɛŋ moŋ, shi mɛi babaoo ayiŋ feɔ amɛ kɔshikɔshi yɛ mɔ diɛŋtsɛ ni eji lɛ he. Ani ole akɛ Yesu diɛŋtsɛ kaselɔi lɛ po susu enɛ he? [Ŋmɛɛ gbɛ ni eha hetoo. No sɛɛ lɛ kanemɔ Marko 4:41.] Wolo tɛtrɛɛ nɛɛ pɛiɔ nɔ ni Biblia lɛ kɛɔ yɛ nɔ̃ gbɔmɔ diɛŋtsɛ ni Yesu ji lɛ mli.”