Yehowa Gbi lɛ Ebɛŋkɛ

¹ Kristofoi haa Yehowa gbi, ní ekɛbaakpata ŋmɛnɛŋmɛnɛ beaŋ nibii agbɛjianɔtoo lɛ hiɛ ni ekɛ jalɛ jeŋ hee aba lɛ hiɔ amɛjwɛŋmɔ mli. (2 Pet. 3:12, 13) Akɛni wɔleee be pɔtɛɛ ni nakai gbi lɛ baaba hewɔ lɛ, esa akɛ wɔya nɔ wɔshi kpe ni wɔye wɔbua mɛi krokomɛi hu koni amɛfee nakai nɔŋŋ. (Ezek. 33:7-9; Mat. 24:42-44) Nyɔŋmɔ gbalɛ Wiemɔ lɛ nɔ ní wɔɔjwɛŋ lɛ baawo hekɛnɔfɔɔ ni wɔyɔɔ akɛ “Yehowa gbi wulu lɛ ebɛŋkɛ” lɛ mli hewalɛ.—Zef. 1:14.

² Jeŋ Hewalɛi ni Tsara Nɔ: Taakɛ sane ni aŋma yɛ Kpojiemɔ 17:9-11 lɛ tsɔɔ lɛ, bɔfo Yohane tsĩ “maŋtsɛmɛi kpawo,” ni damɔ shi kɛha jeŋ hewalɛi kpawo ni eko baanyiɛ eko sɛɛ lɛ tã. Yohane tsĩ ‘maŋtsɛ ni ji kpaanyɔ,’ ni amrɔ nɛɛ edamɔ shi kɛha Jeŋmaji Ekomefeemɔ lɛ hu tã. Ani esa akɛ wɔkpa jeŋ hewalɛi krokomɛi agbɛ? Dabi, ejaakɛ gbalɛ lɛ jajeɔ akɛ maŋtsɛ ni ji kpaanyɔ nɛɛ ‘miiya hiɛkpatamɔ mli,’ ni esɛɛ lɛ atsĩii shikpɔŋ lɛ nɔ maŋtsɛmɛi krokomɛi atã. Ani gbalɛ nɛɛ eye ebua bo koni ona he ni wɔshɛ yɛ be lɛ naa?

³ Daniel 2:31-45 lɛ yeɔ ebuaa wɔ koni wɔnu Yehowa gbi ni baa lɛ shishi. Amaga kpeteŋkpele ni Nebukadnezar na yɛ lamɔ ko mli lɛ damɔ shi kɛha jeŋ hewalɛi ni eko baanyiɛ eko sɛɛ. Nɔyelii nɛɛ ateŋ eko fɛɛ eko ebaye nɔ momo. Te nɔyelii lɛ ateŋ nɔ ni yeɔ nɔ ŋmɛnɛ lɛ? Wɔyɛ nɔyeli ni damɔ shi kɛha amaga lɛ naji lɛ be lɛ mli. Gbalɛ lɛ tsɔɔ nɔ ni baanyiɛ sɛɛ kɛba lɛ mli faŋŋ. Abaakpata adesai anɔyeli hiɛ kwraa, ni akɛ ‘maŋtsɛyeli ko ni fiteŋ dɔŋŋ kɛaatee naanɔ’ baaye najiaŋ. Ani ona bɔ ni enɛ tsɔɔ akɛ Yehowa gbi lɛ ebɛŋkɛ lɛ?

⁴ Odaseyeli Kroko: Wɔkɛ wɔhiŋmɛi miina odaseyeli kroko ni tsɔɔ akɛ Yehowa gbi lɛ ebɛŋkɛ. Wɔmiina akɛ gbalɛ ni bɔfo Paulo gba ni kɔɔ bɔ ni adesai baafee amɛnii amɛha yɛ “naagbee gbii lɛ” amli lɛ miiba mli. (2 Tim. 3:1-5) Ni wɔkɛ wɔhe miiwo odase ni abaaye jeŋ muu lɛ fɛɛ dani naagbee lɛ aba lɛ mli. (Mat. 24:14) Eba akɛ wɔshiɛmɔ nitsumɔ lɛ baaya nɔ ajie hehiamɔ henumɔ ni yɔɔ ŋwɛibɔfo lɛ wiemɔ ni ejaje lɛ mli lɛ kpo, akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ.”—Kpoj. 14:6, 7.

Fã 9—Ní Wɔɔfee Biblia Mli Nikasemɔi ni Yaa Hiɛ

Ní Aaaye Abua Nikaselɔi lɛ Koni Amɛye Trukaa Odase

¹ Beni Andrea kɛ Filipo yɔse akɛ Yesu ji shiwoo Mesia lɛ, amɛshashaooo shi akɛ amɛaagba mɛi krokomɛi miishɛɛ sane nɛɛ. (Yoh. 1:40-45) Nakai nɔŋŋ ŋmɛnɛ lɛ, kɛ́ Biblia mli nikaselɔi bɔi hemɔkɛyeli námɔ yɛ nɔ ni amɛkaseɔ lɛ mli lɛ, ekanyaa amɛ koni amɛwie he. (2 Kor. 4:13) Mɛɛ gbɛ nɔ wɔbaanyɛ wɔtsɔ wɔwo amɛ hewalɛ koni amɛye trukaa odase, ni wɔye wɔbua amɛ koni amɛfee nakai kɛmɔ shi jogbaŋŋ?

² Ekolɛ obaanyɛ obi nikaselɔ lɛ kɛji akɛ ekɛ mɛi krokomɛi gbaa nɔ ni ekaseɔ kɛjɛɔ Biblia lɛ mli lɛ he sane. Ekolɛ eyɛ nanemɛi kɛ wekumɛi ni ebaanyɛ efɔ amɛ nine koni amɛbafata ehe kɛkase nii lɛ. Bi lɛ kɛji akɛ enanemɛi nitsulɔi, enanemɛi skulbii, loo mɛi krokomɛi ni ele amɛ lɛ ená anɔkwale lɛ he miishɛɛ. Enɛɛmɛi ni eeefee lɛ baaye abua lɛ koni ebɔi odaseyeli. Ye obua lɛ koni enu bɔ ni ehe hiaa ni ekɛ sɛɛyoomɔ atsu nii, ni ejie bulɛ kɛ mlihilɛ kpo beni ekɛ mɛi gbaa Yehowa Nyɔŋmɔ kɛ eyiŋtoi ahe sane lɛ shishi.—Kol. 4:6; 2 Tim. 2:24, 25.

³ Amɛhemɔkɛyeli lɛ He Saji ní Amɛkɛ Mɛi Aaagba: Ehe miihia jogbaŋŋ ní atsɔse Biblia mli nikaselɔi lɛ koni amɛkɛ Nyɔŋmɔ Wiemɔ lɛ atsu nii beni amɛkɛ mɛi gbaa amɛhemɔkɛyeli lɛ he saji lɛ. Yɛ nikasemɔ lɛ hei pɔtɛɛ komɛi lɛ, bi nikaselɔ lɛ akɛ: “Mɛɛ gbɛ nɔ obaatsɔ okɛ Biblia lɛ atsu nii kɛgbála anɔkwale nɛɛ mli oha oweku lɛ?” loo “Mɛɛ Biblia mli ŋmalɛ okɛbaatsu nii ni okɛha onaanyo ko ana akɛ enɛ ji anɔkwale?” Kadimɔ bɔ ni ehaa hetoo ehaa lɛ, ni otsɔɔ lɛ bɔ ni ebaafee eha etsɔɔmɔi lɛ adamɔ Ŋmalɛi lɛ anɔ. (2 Tim. 2:15) Nakai ni ooofee lɛ baaha osaa nikaselɔ lɛ koni eye odase trukaa, koni kɛ́ ehe sa lɛ, efata asafo lɛ he kɛtsu shiɛmɔ nitsumɔ ni ato he gbɛjianɔ lɛ.

⁴ Nilee yɛ mli akɛ aaaye abua Biblia mli nikaselɔi lɛ koni amɛnyɛ amɛkpee shitee-kɛwoo naa. (Mat. 10:36; Luka 8:13; 2 Tim. 3:12) Kɛ́ mɛi krokomɛi bi saji loo amɛwie Yehowa Odasefoi ahe saji lɛ, enɛ baanyɛ agbele gbɛ kɛha nikaselɔi lɛ koni amɛye odase. Wolo bibioo ni ji Yehowa Odasefoi—Namɛi Ni? Mɛni Amɛheɔ Amɛyeɔ? lɛ baanyɛ awaje amɛ koni ‘amɛná hetoo amɛha mɔ fɛɛ mɔ.’ (1 Pet. 3:15) Saji ni ja yɛ mli ní mɛi heei lɛ baanyɛ amɛkɛye amɛbua nanemɛi kɛ wekumɛi ni kɛ jwɛŋmɔ kpakpa teɔ shi woɔ amɛ lɛ, koni amɛnu wɔhemɔkɛyeli kɛ nifeemɔi ni damɔ Biblia lɛ nɔ lɛ shishi.