Shiɛmɔ Yeɔ Ebuaa Wɔ Koni Wɔto Wɔtsui Shi

¹ Nyɔŋmɔ Wiemɔ lɛ woɔ wɔ hewalɛ koni “wɔkɛ tsuishitoo ada foi ni kã wɔhiɛ lɛ.” (Heb. 12:1) Taakɛ bɔ ni tsuishitoo he hiaa foidalɔ koni eye omanye yɛ akaŋshii mli lɛ, nakai nɔŋŋ hu tsuishitoo he hiaa wɔ koni wɔnine ashɛ naanɔ wala he jweremɔ nɔ̃ lɛ nɔ. (Heb. 10:36) Mɛɛ gbɛ nɔ Kristofoi asɔɔmɔ nitsumɔ lɛ baanyɛ aye abua wɔ koni wɔkɛ anɔkwayeli aŋmɛ wɔtsui shi kɛyashi naagbee?—Mat. 24:13.

² Ewoɔ Wɔ Hewalɛ yɛ Mumɔŋ: Jalɛ jeŋ hee ni miishɛɛ yɔɔ mli lɛ he shiwoo ni yɔɔ Biblia lɛ mli lɛ ni wɔjajeɔ wɔtsɔɔ lɛ yeɔ ebuaa wɔ koni wɔhiɛnɔkamɔ lɛ mli awa. (1 Tes. 5:8) Kɛ wɔkɛ wɔhe wo shiɛmɔ nitsumɔ lɛ mli daa lɛ, ehaa wɔnáa hegbɛ koni wɔha mɛi ale anɔkwalei ni wɔkase kɛjɛ Biblia lɛ mli lɛ. Ehaa wɔnáa hegbɛ hu koni wɔkɛfã wɔhemɔkɛyeli lɛ he, ni no yeɔ ebuaa wɔ koni wɔhe awa yɛ mumɔŋ.

³ Bɔni afee ni wɔtsɔɔ mɛi krokomɛi anii jogbaŋŋ kɛmɔ shi lɛ, esa akɛ wɔ diɛŋtsɛ lɛ wɔnu Biblia mli anɔkwalei lɛ ashishi jogbaŋŋ. Esa akɛ wɔtao saji amli ni wɔjwɛŋ nɔ. Hiɛmiamɔ babaoo ni wɔkɛtsuɔ he nii lɛ haa wɔnilee lɛ mli waa, ewajeɔ wɔhemɔkɛyeli lɛ, ni ehaa wɔhe waa yɛ mumɔŋ. (Abɛi 2:3-5) No hewɔ lɛ, yɛ be mli ni wɔbɔɔ mɔdɛŋ koni wɔye wɔbua mɛi krokomɛi lɛ, ebafeɔ hewalɛwoo kɛhaa wɔ diɛŋtsɛ wɔhe.—1 Tim. 4:15, 16.

⁴ Shiɛmɔ nitsumɔ lɛ ni wɔkɛ wɔhe aaawo mli kɛ ekãa lɛ ji “Nyɔŋmɔ tawuu nii lɛ fɛɛ” lɛ fã titri ko ni he hiaa wɔ bɔni afee ni wɔkɛ shiŋŋfeemɔ ate shi ashi Abonsam kɛ daimonioi lɛ. (Efe. 6:10-13, 15) Ekãafeemɔ ni wɔkɛtsuɔ wɔsɔɔmɔ ni yɔɔ krɔŋŋ lɛ he nii lɛ yeɔ ebuaa wɔ ní wɔkɛ wɔjwɛŋmɔ ama nibii ni tswaa mɔ emaa shi lɛ anɔ be fɛɛ be koni wɔkaha Satan je lɛ ye wɔ awui. (Kol. 3:2) Yɛ be mli ni wɔtsɔɔ mɛi krokomɛi Yehowa gbɛ̀i lɛ, belɛ akɛ nakai feemɔ miikai wɔ be fɛɛ be akɛ, esa akɛ wɔ diɛŋtsɛ hu wɔhiɛ jeŋba krɔŋkrɔŋ mli.—1 Pet. 2:12.

⁵ Nyɔŋmɔ Woɔ Wɔ Hewalɛ: Yɛ naagbee lɛ, sanekpakpa jajemɔ nitsumɔ lɛ ni wɔkɛ wɔhe woɔ mli lɛ haa wɔkɛ wɔhiɛ fɔ̃ɔ Yehowa nɔ. (2 Kor. 4:1, 7) Mɛɛ jɔɔmɔ po enɛ ji nɛkɛ! Hekɛnɔfɔɔ ni tamɔ nɛkɛ ni wɔɔná lɛ wajeɔ wɔ, jeee koni wɔtsu wɔsɔɔmɔ nitsumɔ lɛ he nii wɔgbe naa kɛkɛ, shi moŋ bɔni afee ni wɔnyɛ wɔdamɔ shihilɛ fɛɛ shihilɛ ni wɔkɛaakpe lɛ naa. (Fil. 4:11-13) Yɛ anɔkwale mli lɛ, wɔhiɛ ni wɔkɛaafɔ Yehowa nɔ jogbaŋŋ kɛmɔ shi lɛ ji nɔ̃ titri ni baaye ebua wɔ koni wɔto wɔtsui shi. (Lala 55:23) Shiɛmɔ yeɔ ebuaa wɔ yɛ gbɛ̀i srɔtoi babaoo nɔ koni wɔto wɔtsui shi.

Ní Wɔɔfee Biblia Mli Nikasemɔi ni Yaa Hiɛ

Fã 10: Ní Aaatsɔse Nikaselɔi lɛ yɛ Shia kɛ Shia Nitsumɔ lɛ Mli

¹ Kɛ onukpai lɛ kpɛlɛ Biblia mli nikaselɔ ko nɔ akɛ shiɛlɔ ni abaptisiko lɛ lɛ, no lɛ nikaselɔ lɛ baanyɛ ekɛ asafo lɛ abɔi shiɛmɔyaa. (Kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii, bf. 79-81.) Mɛɛ gbɛ nɔ wɔɔtsɔ wɔye wɔbua nikaselɔ lɛ koni enyɛ etsu shia kɛ shia shiɛmɔ nitsumɔ lɛ he nii?

² Okɛ Lɛ Afee Ekome Kɛsaa Nyɛhe: Hesaamɔ he miihia jogbaŋŋ. Tsɔɔmɔ nikaselɔ lɛ he ni ebaanyɛ ená shiɛmɔ wiemɔi ni akɛha lɛ yɛ Wɔ Maŋtsɛyeli Sɔɔmɔ lɛ kɛ Reasoning wolo lɛ mli lɛ, ní oye obua lɛ koni ehala shiɛmɔ wiemɔ kuku ko ni ebaanyɛ ekɛtsu nii yɛ nyɛshikpɔŋkuku lɛ mli. Wó lɛ hewalɛ kɛjɛ shishijee koni ekɛ Biblia lɛ atsu nii yɛ shiɛmɔ nitsumɔ lɛ mli.—2 Tim. 4:2.

³ Ebaafee nɔ ni he yɔɔ sɛɛnamɔ babaoo kɛha shiɛlɔ hee lɛ akɛ eeefee enɛɛmɛi ahe nɔkwɛmɔnii etsɔɔ bo. Yɛ be mli ni nikaselɔ lɛ feɔ shiɛmɔ wiemɔ lɛ he nɔkwɛmɔnii lɛ etsɔɔ bo lɛ, tsɔɔmɔ lɛ bɔ ni eeefee etsɔ ŋaa gbɛ nɔ etsu saji ni afɔɔ he wiemɔ yɛ nyɛshikpɔŋkuku lɛ mli lɛ he nii. (Kol. 4:6) Maa nɔ mi oha lɛ akɛ, ejeee doo akɛ shiɛlɔi ni ji Kristofoi lɛ aaale saji fɛɛ ni shiatsɛ ko aaabi lɛ ahetoo. Bei pii lɛ, eji nɔ ni hi jogbaŋŋ akɛ aaakɛɛ mɔ lɛ akɛ abaayatao saji amli koni asaa aba kɛha sane lɛ hesusumɔ ni yaa hiɛ.—Abɛi 15:28.

⁴ Okɛ Lɛ Afee Ekome Kɛshiɛ: Klɛŋklɛŋ be ni nikaselɔ lɛ kɛ ehe aaawo shia kɛ shia nitsumɔ lɛ mli lɛ, ha ekwɛ bo yɛ be mli ni okɛ shiɛmɔ wiemɔ ni nyɛyi enyɔ lɛ fɛɛ nyɛfee ekome kɛkase lɛ haa lɛ. No sɛɛ lɛ ha ekɛ ehe awo mli. Yɛ shihilɛi komɛi amli lɛ, ebaafee nɔ ni hi jogbaŋŋ akɛ aaaha shiɛlɔ hee lɛ kɛ shiɛmɔ wiemɔ lɛ fã ko pɛ aha, tamɔ ŋmalɛ ko kanemɔ kɛ ehe wiemɔ. Ha nikaselɔ lɛ nifeemɔ kɛ enyɛmɔi ahi ojwɛŋmɔ mli. (Fil. 4:5) Fɔɔ eyijiemɔ yɛ be mli ni otsɔseɔ lɛ fiofio yɛ shiɛmɔ nitsumɔ lɛ fãi srɔtoi lɛ amli lɛ.

⁵ Ehe miihia koni aye abua shiɛlɔ hee koni ená be he gbɛjianɔtoo ni baaha ekɛ ehe awo shiɛmɔ nitsumɔ lɛ mli daa, ni kɛ eeehi lɛ efee nakai daa otsi. (Fil. 3:16) Too gbɛjianɔ jogbaŋŋ koni okɛ lɛ afee ekome kɛtsu nii yɛ shiɛmɔ nitsumɔ lɛ mli, ní owo lɛ hewalɛ koni ekɛ mɛi krokomɛi hu ni yɔɔ ekãa lɛ atsu nii. Amɛnɔkwɛmɔnɔ lɛ kɛ ekɛ amɛ teŋ naanyobɔɔ lɛ baaha ehe asa ni ená miishɛɛ yɛ shia kɛ shia shiɛmɔ nitsumɔ lɛ mli.