Nyɔmɔ ni Wɔhiɛ Mɛi Krokomɛi

¹ Bɔfo Paulo nu he akɛ sɔ̃ kã enɔ akɛ eshiɛ eha mɛi krokomɛi. Ele akɛ Yehowa eto gbɛjianɔ koni anyɛ ahere gbɔmɛi srɔtoi fɛɛ ayiwala kɛtsɔ E-Bi lɛ lá ni jara wa lɛ nɔ. (1 Tim. 2:3-6) No hewɔ lɛ, Paulo jaje akɛ: “Mihiɛ Helabii kɛ jekɔji, nilelɔi kɛ mɛi ni leee nii fɛɛ nyɔmɔ.” Etsɔ sanekpakpa lɛ ní ekɛ ekãa kɛ mɔdɛŋbɔɔ fɛɛ jaje etsɔɔ adesai krokomɛi lɛ nɔ ewo nyɔmɔ ni ehiɛ amɛ lɛ.—Rom. 1:14, 15.

² Taakɛ Paulo fee lɛ, ŋmɛnɛŋmɛnɛ beaŋ Kristofoi lɛ bɔɔ mɔdɛŋ koni amɛkɛ hegbɛ fɛɛ hegbɛ ni amɛbaaná lɛ atsu nii kɛjaje sanekpakpa lɛ amɛtsɔɔ amɛkutseiaŋbii. Akɛni be ni “amanehulu babaoo” lɛ baaba lɛ miibɛŋkɛ oyayaayai hewɔ lɛ, ehe ebahia ni wɔkɛ oyaiyeli atao mɛi ni tsui ja lɛ asɛɛ gbɛ. Eba akɛ, anɔkwa suɔmɔ ni wɔyɔɔ kɛha mɛi lɛ aaatsirɛ wɔ ni wɔkɛ mɔdɛŋbɔɔ fɛɛ atsu nɛkɛ yibaamɔ nitsumɔ nɛɛ.—Mat. 24:21; Ezek. 33:8.

³ Wɔnyɔmɔ lɛ Woo: Gbɛ titri ni wɔtsɔɔ nɔ wɔnine shɛɔ mɛi anɔ ji ni wɔshiɛ yɛ shia kɛ shia. Kɛ́ wɔmiitsu nii yɛ shikpɔŋkukuji ni afɔɔɔ mɛi anamɔ yɛ amɛshiai amli lɛ, amɛhe saji ni ja ni wɔɔŋmala wɔshwie shi, kɛ wɔsɛɛ ni wɔbaaku yɛ bei krokomɛi amli lɛ baaye abua wɔ koni wɔnine ashɛ amɛteaŋ mɛi babaoo anɔ. (1 Kor. 10:33) Wɔnine baanyɛ ashɛ mɛi anɔ hu kɛji wɔshiɛ yɛ shikpɔŋkukuji ni nitsumɔhei yɔɔ mli, yɛ gbɛjegbɛi anɔ, yɛ shwɛmɔhei, tsɔji amaamɔhei, kɛ agbɛnɛ kɛtsɔ tɛlifoŋ nɔ. Wɔteŋ mɔ fɛɛ mɔ baanyɛ abi ehe akɛ, ‘Ani miibɔ mɔdɛŋ ni mikɛ gbɛ̀i srɔtoi fɛɛ ni atsɔɔ nɔ ashiɛɔ lɛ atsu nii bɔni afee ni mikɛ naanɔ wala he sane lɛ aha?’—Mat. 10:11.

⁴ Gbɛgbalɔ ko nu he waa akɛ sɔ̃ kã enɔ akɛ enine ashɛ mɛi fɛɛ ni yɔɔ eshikpɔŋkuku lɛ mli lɛ anɔ. Yɛ shia lɛ ekome mli lɛ, be fɛɛ be ni ebaaya jɛmɛ lɛ aŋamɔ samfɛji lɛ, ni ekɛ mɔ ko ekpeko yɛ shia nɛɛ mli dã. Shi be ko beni enyiɛɛɛ shiɛmɔ nɔ lɛ, gbɛgbalɔ lɛ na akɛ tsɔne ko ma shia ni be fɛɛ be lɛ mɔ ko bɛ mli lɛ hiɛ. Akɛni esumɔɔɔ ni nɛkɛ hegbɛ nɛɛ ŋmɛɛɔ lɛ hewɔ lɛ, etswa shinaa lɛ naa ŋmɛlɛ lɛ. Nuu ko here nɔ, ni shishijee sane ni amɛgba lɛ ha nyɛmiyoo nɛɛ kɛ ewu ku sɛɛ amɛyasara nɛkɛ nuu nɛɛ shii abɔ. Yɛ sɛɛ mli lɛ, nuu lɛ kpɛlɛ koni akɛ lɛ akase Biblia lɛ, ni amrɔ nɛɛ, eji nyɛmi ni abaptisi lɛ. Eŋɔɔ enaa waa akɛ nyɛmiyoo nɛɛ nu he akɛ sɔ̃ kã enɔ akɛ eshiɛ eha mɛi krokomɛi.

⁵ Akɛni naagbee lɛ miibɛŋkɛ oyayaayai hewɔ lɛ, be nɛɛ ji be ni esa akɛ wɔkɛ wɔhe awo shiɛmɔ nitsumɔ lɛ mli kɛ ekãa, ní wɔtsɔ nakai feemɔ nɔ wɔwo nyɔmɔ ni wɔhiɛ mɛi krokomɛi lɛ.—2 Kor. 6:1, 2.

Ní Wɔɔfee Biblia Mli Nikasemɔi ni Yaa Hiɛ

Fã 11: Ní Aaaye Abua Shiɛlɔi Heei Koni Amɛfee Sɛɛkuu-kɛsaramɔi

¹ Kɛ́ Biblia mli nikaselɔ ko bɔi shiɛmɔyaa lɛ, ebaaná mɛi komɛi kɛ̃ ní amɛyɔɔ sanekpakpa lɛ he miishɛɛ. Mɛɛ gbɛ nɔ wɔbaanyɛ wɔtsɔ wɔye wɔbua shiɛlɔ hee nɛɛ koni efee sɛɛkuu-kɛsaramɔ ni mɔɔ shi, ní etsu miishɛɛ ni ajie lɛ kpo lɛ hu he nii?

² Nɔ ni tee nɔ yɛ klɛŋklɛŋ gbi ni akɛ mɔ lɛ gba sane lɛ nɔ adamɔɔ asaa he kɛha sɛɛkuu-kɛsaramɔ. Wó shiɛlɔ hee lɛ hewalɛ koni ená mɔ ni ekɛwieɔ lɛ he miishɛɛ diɛŋtsɛ. (Fil. 2:4) Yaa nɔ otsɔɔ lɛ bɔ ni ebaafee eha mɛi ni eshiɛɔ ehaa lɛ atsɔɔ amɛjwɛŋmɔ, ebo amɛwiemɔi lɛ atoi, ní ekadi nibii ni haoɔ amɛ lɛ. Kɛ́ mɔ ko ná wiemɔ lɛ he miishɛɛ lɛ, ha shiɛlɔ hee lɛ aŋmala saramɔ lɛ he saji ni he hiaa lɛ eshwie shi. Okɛ nakai saji lɛ atsu nii kɛye abua lɛ koni eto gbɛjianɔ kɛha mɔ lɛ saramɔ yɛ be kroko mli.

³ Hesaamɔ Kɛha Mɔ lɛ Saramɔ Ekoŋŋ: Okɛ shiɛlɔ hee lɛ atĩ nibii ni tee nɔ yɛ klɛŋklɛŋ saramɔ lɛ mli lɛ amli, ni otsɔɔ lɛ bɔ ni ebaafee eto Maŋtsɛyeli shɛɛ sane lɛ mli wiemɔ ko ni shiatsɛ lɛ baaná he miishɛɛ lɛ he gbɛjianɔ. (1 Kor. 9:19-23) Nyɛfea ekome kɛtoa shiɛmɔ wiemɔ kuku ko ni damɔ Biblia mli ŋmalɛ kome kɛ woji ni akɛ mɛi kaseɔ lɛ eko mli kuku kome ko nɔ lɛ he gbɛjianɔ. Kɛfata he lɛ, nyɛsusua sane ko ni nyɛbaanyɛ nyɛbi yɛ sanegbaa lɛ naagbee ní kɛ́ nyɛba ekoŋŋ lɛ nyɛbaaha hetoo lɛ he. Tsɔɔmɔ shiɛlɔ hee lɛ bɔ ni ebaafee eha Nyɔŋmɔ Wiemɔ lɛ he nilee ni mɔ lɛ yɔɔ lɛ aya hiɛ yɛ saramɔ lɛ eko fɛɛ eko mli.

⁴ Ehe miihia hu ni otsɔɔ shiɛlɔ hee lɛ hiɛkpamɔ wiemɔ kuku ko. Kɛ́ eŋa shiatsɛ lɛ egbe naa lɛ, ebaanyɛ ekɛɛ akɛ: “Minyá sane ni wɔgba nyɛsɛɛ lɛ he jogbaŋŋ, ni ŋmɛnɛ lɛ misaa miba koni mikɛ bo abasusu Biblia mli sane kroko hu ni ji [tsĩi sane lɛ tã] lɛ he.” Ekolɛ, ehe baahia hu koni otsɔɔ shiɛlɔ hee lɛ nɔ ni esa akɛ efee kɛ́ eyanina mɔ kroko yɛ mɔ lɛ shinaa lɛ naa.

⁵ Okɛ Mɔdɛŋbɔɔ Aku Sɛɛ Kɛyasara Lɛ: Wó shiɛlɔ hee lɛ hewalɛ koni efee nɔkwɛmɔnɔ kpakpa akɛ mɔ ni kuɔ esɛɛ eyasaraa mɛi fɛɛ ni ená wiemɔ lɛ he miishɛɛ lɛ amrɔ nɔŋŋ. Ekolɛ, ebaabi ni aku sɛɛ ayasara mɛi lɛ shii abɔ dani nine ashɛ amɛnɔ yɛ shia. Tsɔɔmɔ shiɛlɔ hee lɛ bɔ ni akɛ mɔ toɔ gbɛjianɔ kɛha saramɔ ekoŋŋ ahaa, ní oha enu shishi akɛ ehe miihia ni eku sɛɛ eyasara mɔ lɛ taakɛ ewo lɛ shi lɛ. (Mat. 5:37) Ye obua shiɛlɔ hee lɛ koni efee mɔ ni mli hi, ni naa mli ehaa mɛi krokomɛi, ni jieɔ bulɛ kpo beni etaoɔ mɛi ni tamɔ gwantɛŋi lɛ, ní etsuɔ miishɛɛ ni amɛjie lɛ kpo lɛ he nii lɛ.—Tito 3:2.