Maŋtsɛyeli Shiɛmɔ Nitsumɔ Lɛ—Eji Hegbɛ Kpele

¹ Gbɔmɛi akpekpei toi akpei abɔ ni yɔɔ shikpɔŋ lɛ nɔ lɛ náa nibii ni Yehowa jɛɔ esuɔmɔ mli ekɛkeɔ amɛ koni amɛkã he amɛhi wala mli lɛ ahe sɛɛ daa gbi. (Mat. 5:45) Shi kɛlɛ, amɛteŋ mɛi fioo pɛ ená hegbɛ ni ekaaa nɛɛ akɛ amɛaajie hiɛsɔɔ kpo amɛtsɔɔ amɛ-Bɔlɔ lɛ kɛtsɔ Nyɔŋmɔ Maŋtsɛyeli lɛ he sanekpakpa lɛ shiɛmɔ nɔ. (Mat. 24:14) Te obuɔ hegbɛ kpele ni oná nɛɛ ohaa tɛŋŋ?

² Maŋtsɛyeli shiɛmɔ nitsumɔ lɛ kɛ woo haa Nyɔŋmɔ, ni ehaa mɛi ni jaramɔ shihilɛi ni yɔɔ ŋmɛnɛ lɛ eha amɛhao lɛ náa hiɛnɔkamɔ kɛ toiŋjɔlɛ. (Heb. 13:15) Ehaa mɛi ni tsuɔ shɛɛ sane lɛ he nii lɛ náa naanɔ wala he hiɛnɔkamɔ. (Yoh. 17:3) Mɛɛ nitsumɔ loo ninenaa nitsumɔ yɔɔ ni sɛɛnamɔi yɔɔ he tamɔ enɛ? Bɔfo Paulo jie hiɛsɔɔ ni eyɔɔ kɛha shiɛmɔ nitsumɔ lɛ kpo kɛtsɔ bɔ ni etsu he nii eha lɛ nɔ. Ebu nitsumɔ nɛɛ tamɔ jwetri.—Bɔf. 20:20, 21, 24.

³ Hiɛsɔɔ Kpo ni Wɔɔjie yɛ Hegbɛ Kpele ni Wɔná lɛ He: Gbɛ kome ni wɔtsɔɔ nɔ wɔjieɔ hiɛsɔɔ kpo yɛ hegbɛ ni wɔná akɛ wɔshiɛ lɛ he ji wɔjwɛŋmɔ ni wɔgbalaa kɛyaa bɔ ni wɔtsuɔ wɔsɔɔmɔ lɛ he nii wɔhaa lɛ nɔ. Ani wɔheɔ be kɛtoɔ shiɛmɔ wiemɔ ko ni baasa wɔtoibolɔi lɛ atsui he lɛ he gbɛjianɔ? Ani wɔbaanyɛ wɔha hesai ni wɔyɔɔ yɛ bɔ ni wɔkɛ Ŋmalɛi lɛ tsuɔ nii wɔhaa kɛ bɔ ni wɔkɛ mɛi susuɔ nii ahe wɔhaa lɛ aya hiɛ? Ani wɔtsuɔ shikpɔŋkuku ni akɛwo wɔdɛŋ lɛ mli nii jogbaŋŋ kɛmɔɔ shi? Ani wɔbaanyɛ wɔje Biblia mli nikasemɔ shishi ni wɔtsa nɔ? Taakɛ Kristofoi anɔkwafoi ni hi shi yɛ blema beaŋ kɛ ŋmɛnɛ lɛ ji lɛ, jwɛŋmɔ kpakpa ni wɔnáa yɛ nitsumɔ nɛɛ he lɛ woɔ wɔ hewalɛ, ni no haa wɔhiɛ sɔɔ hegbɛ ni wɔná nɛɛ waa.—Mat. 25:14-23.

⁴ Kɛji akɛ gbɔlɛ, hela, aloo naagbai krokomɛi miihao wɔ po, shi wɔná wɔle akɛ hiɛ sɔɔ ekãa ni wɔkɛbɔɔ mɔdɛŋ koni wɔkɛ wɔhe awo shiɛmɔ nitsumɔ lɛ mli waa diɛŋtsɛ lɛ, ehaa wɔtsui nyɔɔ wɔmli. Nyɔŋmɔ Wiemɔ lɛ maa nɔ aduatsɔ kɛhaa wɔ akɛ Yehowa buɔ mɔdɛŋ ni tamɔ nɛkɛ ni wɔbɔɔ kɛsɔmɔɔ lɛ lɛ, kɛ nɔ ni ekolɛ etamɔ nɔ ni esaaa mɛi komɛi ahiɛ po lɛ akɛ ehe yɛ sɛɛnamɔ.—Luka 21:1-4.

⁵ Maŋtsɛyeli shiɛmɔ nitsumɔ lɛ haa mɔ tsui nyɔɔ emli jogbaŋŋ diɛŋtsɛ. Nyɛmi yoo ko ni eye afii 92 lɛ kɛɛ akɛ: “Kɛ́ misusu nɔ ni fe afii 80 ni mikɛsɔmɔ Nyɔŋmɔ akɛ mɔ ni ejɔɔ ehe nɔ lɛ he lɛ, minaa akɛ eji hegbɛ kpele diɛŋtsɛ—ni mishwako mihe kwraa! Eji manyɛ maje miwala shishi ekoŋŋ kulɛ, mahi shi nakai nɔŋŋ, ejaakɛ yɛ anɔkwale mli lɛ, ‘Nyɔŋmɔ mlihilɛ lɛ hi fe wala kwraa.’” (Lala 63:4) Eba akɛ wɔ hu wɔhiɛ baasɔ hegbɛ kpele ni ji Maŋtsɛyeli shiɛmɔ nitsumɔ lɛ ni Nyɔŋmɔ kɛha wɔ lɛ.

Fã 12—Ní Wɔɔfee Biblia Mli Nikasemɔi ni Yaa Hiɛ

Ní Wɔɔye Wɔbua Nikaselɔi lɛ Koni Amɛje Biblia Mli Nikasemɔ Shishi ni Amɛtsa Nɔ

¹ Kɛ́ wɔ-Biblia mli nikaselɔi lɛ bɔ̃i shiɛmɔyaa lɛ, ekolɛ amɛbaashe gbeyei akɛ amɛ diɛŋtsɛ amɛkɛ mɛi aaaje Biblia mli nikasemɔi ashishi ni amɛtsa nɔ. Te wɔɔfee tɛŋŋ wɔye wɔbua amɛ koni amɛná hekɛnɔfɔɔ kɛtsu wɔsɔɔmɔ nitsumɔ lɛ mli fã ni he hiaa nɛɛ?—Mat. 24:14; 28:19, 20.

² Kɛ́ akpɛlɛ Biblia mli nikaselɔ ko nɔ akɛ shiɛlɔ ni abaptisiko lɛ lɛ, no tsɔɔ akɛ ekolɛ eje shishi ekɛ ehe miiwo Teokrase Sɔɔmɔ Skul lɛ mli momo. Tsɔsemɔ ni akɛhaa lɛ beni esaa ehe kɛhaa skul nifeemɔi lɛ kɛ beni ekɛ ehe woɔ mli lɛ baaye abua lɛ koni ená nitsɔɔmɔ mli hesai ni esa akɛ “nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ” lɛ aná lɛ eko.—2 Tim. 2:15.

³ Okɛ Onɔkwɛmɔnɔ Atsɔɔ Lɛ Bɔ ni Afeɔ lɛ Ahaa: Yesu tsɔse ekaselɔi lɛ kɛtsɔ gbɛtsɔɔmɔ ni mli kã shi faŋŋ kɛ nɔkwɛmɔnɔ kpakpa ni efee eha amɛ lɛ nɔ. Ekɛɛ akɛ: “Kaselɔ efeee etsɔɔlɔ; shi mɔ fɛɛ mɔ ní ehi kɛwula shi lɛ, eeetamɔ etsɔɔlɔ.” (Luka 6:40) Yesu ni oookase kɛtsɔ nɔkwɛmɔnɔ kpakpa ni ooofee yɛ oshiɛmɔ nitsumɔ lɛ mli lɛ nɔ lɛ he miihia waa. Kɛ́ onikaselɔ lɛ yɔse nɔkwɛmɔnɔ ni ofeɔ yɛ shiɛmɔ nitsumɔ lɛ mli lɛ, no baaha enu shishi akɛ oti hewɔ ni wɔfeɔ sɛɛkuu-kɛsaramɔ ji ní wɔje Biblia mli nikasemɔi ashishi.

⁴ Gbálamɔ mli otsɔɔ lɛ akɛ, kɛ́ wɔmiikɛɛ mɔ ko akɛ wɔbaasumɔ ni wɔkɛ lɛ akase nii lɛ, bei pii lɛ ehe ehiaaa ni wɔtsɔɔ lɛ bɔ ni wɔfeɔ nikasemɔ lɛ wɔhaa lɛ mli fitsofitso. Bei pii lɛ, nɔ̃ pɛ ni he hiaa ji ni wɔkɛ woji ni wɔkɛ mɛi kaseɔ lɛ eko mli kuku kome loo enyɔ afee nikasemɔ lɛ he nɔkwɛmɔnɔ wɔtsɔɔ lɛ. Abaanyɛ ana gbɛtsɔɔmɔi ni hi kɛha enɛ feemɔ lɛ yɛ Wɔ Maŋtsɛyeli Sɔɔmɔ nɛɛ baafa 8 lɛ kɛ January afi 2002 nɔ̃ lɛ baafa 6 lɛ mli.

⁵ Yɛ be ni sa mli lɛ, ha nikaselɔ lɛ afata bo loo shiɛlɔ kroko ni yɔɔ niiashikpamɔ lɛ he kɛyafee Biblia mli nikasemɔi. Ebaanyɛ ewie kuku ko loo ŋmalɛ pɔtɛɛ ko he. Enɛ baaha nikaselɔ lɛ atsɔ onɔkwɛmɔnɔ lɛ nɔ ekase bɔ ni afeɔ Biblia mli nikasemɔi ni yaa hiɛ ahaa lɛ he nii babaoo. (Abɛi 27:17; 2 Tim. 2:2) Jiemɔ eyi, ni okɛ lɛ asusu gbɛ nɔ ni ebaanyɛ etsɔ eya ehiɛ lɛ he.

⁶ Shiɛlɔi heei ni aaatsɔse koni amɛbatsɔmɔ Nyɔŋmɔ Wiemɔ lɛ he tsɔɔlɔi lɛ baasaa amɛ kɛha “nitsumɔ kpakpa” ni ji nikasemɔi ni amɛ diɛŋtsɛ amɛaaje shishi ní amɛtsa nɔ hu lɛ. (2 Tim. 3:17) Kwɛ bɔ ni eyɔɔ miishɛɛ akɛ wɔkɛ amɛ aaafee ekome, ní wɔkɛ ninefɔɔ ni suɔmɔ yɔɔ mli lɛ aha akɛ: “Mɔ ni sumɔɔ lɛ, ha ni ebayɛ wala nu lɛ yaka.”—Kpoj. 22:17.