Biblia Mli Nikasemɔ ni Okɛ Shiatsɛ lɛ Aaaje Shishi yɛ Eshinaa lɛ Naa loo yɛ Tɛlifoŋ Nɔ

1, 2. Mɛɛ gbɛ nɔ wɔbaanyɛ wɔtsɔ wɔtsake bɔ ni wɔfeɔ Biblia mli nikasemɔ wɔhaa lɛ mli koni wɔye wɔbua mɛi ni bɛ dekã lɛ?

¹ Mɔ ko mɔ ko bɛ dekã ŋmɛnɛ. Shi fɛɛ sɛɛ lɛ, mɛi babaoo yɛ mumɔŋ nibii ahe miishɛɛ. Mɛɛ gbɛ nɔ wɔbaatsɔ wɔye wɔbua amɛ kɛtsu amɛmumɔŋ hiamɔ nii lɛ ahe nii? (Mat. 5:3) Shiɛlɔi babaoo nyɛɔ amɛkɛ mɛi kaseɔ Biblia lɛ yɛ mɛi lɛ ashinaai anaa loo yɛ tɛlifoŋ nɔ. Ani obaanyɛ olɛɛ oshiɛmɔ nitsumɔ lɛ mli yɛ nɛkɛ gbɛ nɔ?

² Bɔni afee ni wɔnyɛ wɔje Biblia mli nikasemɔ shishi lɛ, ehe miihia ní wɔfee klalo akɛ wɔbaafee bɔ ni wɔkɛ mɛi feɔ Biblia mli nikasemɔ wɔhaa lɛ he nɔkwɛmɔnɔ be fɛɛ be ni hegbɛ aaaba. Te wɔbaafee enɛ wɔha tɛŋŋ, ni nɛgbɛ wɔbaanyɛ wɔfee enɛ yɛ?

3. Mɛni hewɔ esa akɛ ofee bɔ ni wɔkɛ mɛi feɔ Biblia mli nikasemɔ wɔhaa lɛ he nɔkwɛmɔnɔ kɛ́ otee mɔ ko ŋɔɔ klɛŋklɛŋ kwraa lɛ, ni mɛɛ gbɛ nɔ abaanyɛ atsɔ afee enɛ?

³ Yɛ Shinaa lɛ Naa: Kɛji oyanina mɔ ko ní miisumɔ ní akɛ lɛ agba Biblia mli sane lɛ, gbelemɔ kɛya baafa ko ni osaa ohe oto momo yɛ mli, tamɔ klɛŋklɛŋ kuku ni yɔɔ Taoɔ wolo bibioo lɛ mli nikasemɔ ni ji 1 lɛ ni okɛje shishi. Kanemɔ kuku lɛ, bi sane ni yɔɔ mli lɛ, ni okɛ lɛ asusu ŋmalɛ kome loo enyɔ ni atsɛ yisɛɛ lɛ he. Bei pii lɛ, abaanyɛ afee enɛ yɛ shinaa lɛ naa yɛ minitii enumɔ kɛmɔ nyɔŋma mli. Kɛ́ mɔ lɛ nyá sanegbaa lɛ he lɛ, too gbɛjianɔ ni okɛ lɛ ayasusu kuku kome loo enyɔ ni nyiɛ sɛɛ lɛ he yɛ be kroko mli.—Obaana bɔ ni ajeɔ nikasemɔ shishi tɛ̃ɛ ahaa lɛ he gbɛtsɔɔmɔi krokomɛi yɛ January afi 2002 Wɔ Maŋtsɛyeli Sɔɔmɔ lɛ baafa 6 lɛ.

4. Kɛ́ wɔmiifee sɛɛkuu-kɛsaramɔ lɛ, mɛɛ gbɛ nɔ wɔbaanyɛ wɔtsɔ wɔje Biblia mli nikasemɔ shishi yɛ shinaa naa?

⁴ Abaanyɛ atsɔ gbɛ ni tamɔ nakai nɔŋŋ nɔ aje Biblia mli nikasemɔ shishi be mli ni afeɔ sɛɛkuu-kɛsaramɔ lɛ. Ákɛ nɔkwɛmɔnɔ lɛ, obaanyɛ okɛ Taoɔ wolo bibioo lɛ atsɔɔ mɔ lɛ, ni otsɔɔ lɛ Nyɔŋmɔ gbɛi yɛ nikasemɔ ni ji 2, kuku 1-2 lɛ mli. Kɛ́ oku osɛɛ otee be kroko lɛ, obaanyɛ okɛ lɛ asusu nɔ ni Biblia lɛ tsɔɔ yɛ Yehowa sui lɛ ahe yɛ kuku 3-4 lɛ mli. Yɛ nikasemɔ ni baanyiɛ sɛɛ lɛ mli lɛ, obaanyɛ okɛ lɛ asusu kuku 5-6 lɛ kɛ mfoniri ni yɔɔ baafa 5 lɛ he kɛma bɔ ni Biblia lɛ kasemɔ yeɔ buaa wɔ koni wɔle Yehowa lɛ nɔ mi. Abaanyɛ afee enɛ fɛɛ be mli ni adamɔ mɔ lɛ shinaa lɛ naa.

5, 6. (a) Mɛni hewɔ mɛi komɛi baasumɔ waa akɛ amɛkase Biblia lɛ yɛ tɛlifoŋ nɔ lɛ? (b) Mɛɛ gbɛ nɔ wɔbaanyɛ wɔtsɔ wɔkɛ mɛi aje nikasemɔ feemɔ shishi yɛ tɛlifoŋ nɔ?

⁵ Yɛ Tɛlifoŋ Nɔ: Mɛi komɛi baasumɔ akɛ amɛkase Biblia lɛ yɛ tɛlifoŋ nɔ moŋ fe nɔ ni amɛkɛ mɔ ko aaakase hiɛ kɛ hiɛ. Susumɔ niiashikpamɔ ni nyiɛ sɛɛ nɛɛ he okwɛ: Beni nyɛmi yoo ko shiɛɔ yɛ shia kɛ shia lɛ, ekɛ yoofɔyoo ko ni enitsumɔ haaa ená dekã kwraa lɛ yakpe. Beni nyɛmi yoo lɛ nine shɛɛɛ enɔ dɔŋŋ yɛ shia lɛ, eto eyiŋ akɛ ebaatswa lɛ tɛlifoŋ. Yoofɔyoo lɛ ha enu shishi akɛ ebɛ dekã kwraa kɛha Biblia mli sanegbaa. Nyɛmi yoo lɛ kɛɛ lɛ akɛ: “Obaanyɛ okase nɔ hee ko yɛ minitii 10 loo 15 mli yɛ tɛlifoŋ nɔ.” Yoo lɛ kpɛlɛ nɔ akɛ: “Ojogbaŋŋ, kɛ́ yɛ tɛlifoŋ nɔ lɛ, no lɛ masumɔ!” Yeee be ko kwraa lɛ, amɛbɔi nikasemɔ ni yaa nɔ jogbaŋŋ feemɔ yɛ tɛlifoŋ nɔ.

⁶ Ani mɛi ni oyasaraa amɛ lɛ ateŋ mɛi komɛi baasumɔ ni okɛ amɛ akase nii yɛ tɛlifoŋ nɔ? Obaanyɛ oka gbɛ ni atsɔɔ nɔ ashiɛɔ yɛ tɛlifoŋ nɔ ní wɔsusu he nɛɛ okwɛ, aloo obaanyɛ okɛɛ akɛ: “Kɛ obaasumɔ lɛ, wɔbaanyɛ wɔsusu Biblia mli sane ko he yɛ tɛlifoŋ nɔ. Ani no baahi kɛha bo?” Kɛji wɔtsake bɔ ni wɔkɛ mɛi feɔ Biblia mli nikasemɔ wɔhaa lɛ mli ní wɔha ekɔ mɛi lɛ ashihilɛ he lɛ, no baaha wɔnyɛ wɔye wɔbua amɛ ni ‘amɛná Nyɔŋmɔ he nilee.’—Abɛi 2:5; 1 Kor. 9:23.

Nɔ ni Esa akɛ Owie yɛ Woji Tɛtrɛbii lɛ Ahe

Buu-Mɔɔ Aug. 1

“Ŋmɛnɛ, mɛi babaoo nuɔ he akɛ amɛhe bɛ sɛɛnamɔ, ni enɛ haoɔ amɛ. Mɛni osusuɔ akɛ abaanyɛ afee kɛye abua amɛ? [Ŋmɛɛ gbɛ ni eha hetoo.] Wolo tɛtrɛɛ nɛɛ tsɔɔ bɔ ni Biblia lɛ baanyɛ aye abuɔ mɛi ni tamɔ nɛkɛ lɛ ni amɛná anɔkwa miishɛɛ.” Tsĩi ŋmalɛi ni akɛ niŋmaa okadii ni mli ti eŋmala ní akpa amɛ afã ní yɔɔ saneyitso ni ji “Biblia lɛ Baanyɛ Aye Abua Bo Koni Oná Miishɛɛ” lɛ tã.

Awake! Aug. 8

“Mɛi babaoo yɛ ní be fɛɛ be lɛ gbeyei emɔmɔ amɛ. Mɛni osusuɔ akɛ no kɛ gbeyeishemɔ nɛɛ baa? [Ŋmɛɛ gbɛ ni eha hetoo.] Wolo tɛtrɛɛ nɛɛ kɛ ŋaawoi kpakpai ní kɛ́ wɔkɛtsu nii lɛ, no baaha wɔye wɔhe kɛjɛ osharai ni fɔɔ kaa ahe lɛ haa. Egbálaa Biblia mli shiwoo ni kɔɔ jeŋ ni baaba ní gbeyeishemɔ bɛ mli lɛ hu mli.” Kanemɔ Yesaia 11:9.

Gbetakpɔxɔ Aug. 15

“Kɛ́ mɔ ko gbo trukaa lɛ, mɛi babaoo ayiŋ feɔ amɛ kɔshikɔshi yɛ nɔ ni baa mɛi anɔ kɛ́ amɛgboi lɛ he. Ani osusuɔ akɛ abaanyɛ anu nɔ ni gbele ji lɛ shishi? [Ŋmɛɛ gbɛ ni eha hetoo.] Wolo tɛtrɛɛ nɛɛ gbálaa nɔ ni Biblia lɛ kɛɔ yɛ nɔ̃ shihilɛ mli ni gbohii lɛ yɔɔ lɛ mli. Ewieɔ shi ni Nyɔŋmɔ ewo akɛ ebaatee wɔsuɔlɔi ni egboi lɛ ashi lɛ hu he.” Kanemɔ Yohane 5:28, 29.

Ɔwɛn-Aban Aug. 22

“Ani ole akɛ abuɔ nitsumɔi ni toɔ shisharamɔ kɛ hiɛtserɛjiemɔ he gbɛjianɔ lɛ akɛ amɛji nitsumɔi ni aheɔ mɛi awoɔ mli fe fɛɛ yɛ je lɛŋ? [Ŋmɛɛ gbɛ ni eha hetoo.] Bɔ ni nitsumɔi nɛɛ etee hiɛ eha lɛ kɛ sɛɛnamɔi kɛ naagbai fɛɛ eba. Wolo tɛtrɛɛ nɛɛ pɛiɔ sɛɛnamɔi kɛ naagbai ní nitsumɔi ni toɔ shisharamɔ kɛ hiɛtserɛjiemɔ he gbɛjianɔ nɛɛ kɛba lɛ amli. Ekɛ ŋaawoi kpakpai hu haa mɛi ni fãa gbɛ kɛyaa maŋsɛɛ lɛ.”