Wolo Ni Jɛ Nɔyeli Kuu Lɛ Dɛŋ
Suɔmɔ Nyɛmimɛi Yehowa Odasefoi:
Eji miishɛɛ kpele akɛ wɔɔŋma nyɛ wolo nɛɛ! Bɔfo Yohane kɛɛ akɛ ‘esumɔɔ’ enyɛmimɛi heyelilɔi lɛ jogbaŋŋ, ni ená miishɛɛ akɛ ‘amɛmiinyiɛ yɛ anɔkwale lɛ mli,’ ni nakai ji bɔ ni wɔ hu wɔnuɔ he. (2 Yoh. 1, 4) O, mɛɛ jɔɔmɔ po anɔkwale lɛ ji kɛha wɔ fɛɛ nɛkɛ! Anɔkwale lɛ eha wɔye wɔhe kɛjɛ Babilon Kpeteŋkpele lɛ kɛ etsɔɔmɔi kɛ kusumii ni wooo Nyɔŋmɔ hiɛ nyam lɛ he. Toiboo ni wɔfeɔ wɔhaa Nyɔŋmɔ lɛ eye ebua wɔ ni wɔbatsɔmɔ mɛi ni yɔɔ suɔmɔ, ni mli jɔ, ni naa mɛi mɔbɔ. Ni anɔkwale lɛ eha wɔná shidaamɔ kpakpa yɛ Nyɔŋmɔ hiɛ, ni agbɛnɛ hu eha wɔná naanɔ wala he hiɛnɔkamɔ.
Kɛfata he lɛ, wɔhiɛ sɔɔ Yehowa mumɔ lɛ ni tsɔɔ wɔ gbɛ daa gbi, ni ewajeɔ wɔ hu lɛ waa! Wɔyɛ nɔmimaa akɛ beni nyɛsusuɔ gbɛ̀i srɔtoi anɔ ni Yehowa mumɔ lɛ, ni ejɛ esuɔmɔ mli ekɛha lɛ tsuɔ nii lɛ he yɛ “Nyɔŋmɔ Mumɔ lɛ Tsɔɔ Wɔ Gbɛ” Kpokpaa Wulu nɔ Kpeei ni afee nyɛsɛɛ nɛɛ shishi lɛ, nyɛná miishɛɛ waa. Beni je lɛ shihilɛ yaa nɔ emli woɔ wu nɛɛ, ehe miihia ni wɔkɛ wɔhiɛ afɔ̃ Yehowa mumɔ ni yɔɔ hewalɛ lɛ nɔ koni ekudɔ wɔ kɛtsɔ gbii fɔ̃ji ni kã wɔhiɛ nɛɛ amli.
Wɔyɛ nɔmimaa akɛ beni nyɛkaneɔ Yearbook lɛ mli saji ni taa mɔ tsuiŋ, ni kɔɔ wɔnyɛmimɛi ni eŋmɛ amɛtsui shi yɛ amanehulu babaoo mli yɛ amɛhemɔkɛyeli lɛ hewɔ lɛ he lɛ, nyɛná miishɛɛ babaoo. Agbɛnɛ hu eyɛ miishɛɛ akɛ nyɛaale akɛ, anɔkwafoi nɛɛ ateŋ mɛi babaoo yɛ ni abaptisi amɛ sɛɛ etsɛɛɛ nɔŋŋ ni amɛkɛ naagbai nɛɛ kpe, ni amɛteaŋ mɛi komɛi po yɛ ni no mli lɛ abaptisiko amɛ. Wɔsumɔɔ amɛ waa yɛ amɛnɔkwayeli kɛ amɛshidaamɔ yɛ jalɛnifeemɔ hewɔ lɛ he! Yɛ anɔkwale mli lɛ, amɛnɔkwɛmɔnɔ ni sa kadimɔ lɛ woɔ wɔfaishitswaa akɛ wɔbaaya nɔ wɔye Maŋtsɛyeli lɛ anɔkwa, ekɔɔɔ he eko haomɔ ni wɔkɛbaakpe lɛ mli hewalɛ.—1 Tes. 1:6-8.
Nyɛmimɛi hii kɛ yei, wɔle akɛ ebiɔ ni nyɛye shika he naagbai kɛ naagbai krokomɛi pii anɔ dani nyɛnyɛ nyɛkɛ nyɛwekui lɛ afee ekome kɛhi shi yɛ suɔmɔ mli. Yɛ nyɛteaŋ mɛi komɛi agbɛfaŋ lɛ, ebɛ mlɛo akɛ nyɛkɛ nyɛhe aaawo Maŋtsɛyeli shiɛmɔ nitsumɔ lɛ mli, ni nyɛya asafoŋ kpeei daa. No hewɔ ni beni wɔkɛ sɔlemɔ susu nibii ahe aahu sɛɛ lɛ, wɔfee tsakemɔi komɛi yɛ asafoŋ kpeei amli kɛjɛ January 1, 2009 lɛ. Wɔheɔ wɔyeɔ akɛ nyɛkɛ gbɛjianɔtoo nɛɛ baatsu nii jogbaŋŋ bɔni afee ni nyɛná be babaoo kɛfee aŋkro nikasemɔ kɛ weku jamɔ.
Miishɛɛ sane ji akɛ, yɛ kpokpaa nɔ kpeei kɛ kpokpaa wuji anɔ kpeei srɔtoi ni afee yɛ afi ni ho lɛ mli lɛ, abaptisi mɛi babaoo. Mɛi ni abaptisi amɛ lɛ ateŋ mɛi komɛi darako kwraa. Fɔlɔi, nyɛsa yijiemɔ waa akɛ nyɛtsɔse nyɛbii lɛ ni amɛná hiɛsɔɔ amɛha anɔkwale lɛ, ni nyɛwo amɛ hewalɛ koni amɛjɔɔ amɛhe nɔ amɛha Yehowa akɛ amɛbaasɔmɔ lɛ kɛjɛ amɛgbekɛbiiashi. Naagbai babaoo ni gbekɛbii nɛɛ kɛkpeɔ yɛ skul ni fɛɛ sɛɛ lɛ amɛha abaptisi amɛ lɛ tsɔɔ akɛ nyɛtsɔseɔ amɛ jogbaŋŋ yɛ shĩa.—Lala 128:1-6.
Nɔ ni esaaa akɛ wɔhiɛ kpaa nɔ ji wɔmaŋsɛɛ sanekpakpa shiɛlɔi kɛ gbɛgbalɔi krɛdɛɛi lɛ amɔdɛŋbɔɔ ni ha Biblia mli nikasemɔi ni afee lɛ tee hiɛ babaoo lɛ. Wɔ, ni ji Nɔyeli Kuu lɛ mlibii lɛ fɛɛ hiɛ sɔɔ mɔdɛŋbɔɔ ni wɔnyɛmimɛi hii kɛ yei ni yɔɔ je lɛŋ fɛɛ lɛ kɛtsɛɔ mɛi ni hiɛ tsui ni ja lɛ akɛ “Ba!” lɛ waa diɛŋtsɛ, ní amɛfɔ̃ɔ mɛi ni kumai yeɔ amɛ lɛ nine koni ‘amɛbayɛ wala nu lɛ yaka’ lɛ. (Kpoj. 22:17) Wɔkɛ miishɛɛ miifɔ̃ nyɛ mɛi ni naa shɛɔ 289,678 ni nyɛkɛ nu mli baptisimɔ ma nyɛhenɔjɔɔmɔ lɛ nɔ mi yɛ afi ni ho lɛ mli lɛ atuu kɛmiiba wɔjeŋ muu fɛɛ Kristofoi asafo lɛ mli!
Ebaahi akɛ wɔkɛ bɔfo Yohane wiemɔi ni kɛɔ akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ” lɛ akai wɔhe be fɛɛ be. (1 Yoh. 2:17) Ni esa akɛ ehi wɔjwɛŋmɔ mli akɛ wɔyɛ be ni je nɛɛ ‘baaho aya’ lɛ naagbee mli tuuntu! Kwɛ bɔ ni nilee yɔɔ mli akɛ wɔkɛ wɔshihilɛ fɛɛ baafee Nyɔŋmɔ suɔmɔnaa nii, ni ‘wɔya nɔ wɔsara.’ (Mat. 24:42) Kɛ́ wɔfee nakai lɛ, wɔshwaŋ wɔhe kɔkɔɔkɔ, ni wɔbaaná Yehowa mlihilɛ lɛ he sɛɛ.—Yes. 63:7.
Wɔheɔ wɔyeɔ akɛ amaniɛbɔi ni jɛ shikpɔji srɔtoi anɔ ni yɔɔ Yearbook lɛ mli, ni taa mɔ tsuiŋ lɛ baawaje nyɛ fɛɛ koni nyɛkɛ Maŋtsɛyeli lɛ he nibii lɛ aye klɛŋklɛŋ gbɛhe yɛ nyɛshihilɛ mli. Wɔmiisumɔ ni nyɛle akɛ wɔsusuɔ nyɛhe, ni wɔkaiɔ nyɛ daa yɛ wɔsɔlemɔi amli, ni ákɛ, wɔsumɔɔ nyɛ naakpa. Eba akɛ Yehowa aaanɛ jɔɔmɔi babaoo ashwie nyɛnɔ.
Nyɛnyɛmimɛi,
Yehowa Odasefoi a-Nɔyeli Kuu