Okɛ Biblia lɛ Atsu Nii Jogbaŋŋ
1. Mɛni hewɔ Biblia lɛ he yɔɔ sɛɛnamɔ waa lɛ?
1 Nyɔŋmɔ Wiemɔ ni jɛ mumɔŋ lɛ ni wɔkɛtsuɔ nii jogbaŋŋ lɛ yeɔ ebuaa wɔ ni wɔjajeɔ ni wɔtsɔɔ anɔkwale lɛ faŋŋ, ni ehaa wɔkpáa apasa tsɔɔmɔi kɛ gbɔmɛi akitai ahe mama.—2 Tim. 2:15; 1 Pet. 3:15.
2. Mɛni baaye abua wɔ koni wɔnyɛ wɔgbele ŋmalɛi yɛ gbɛ ni waaa nɔ?
2 Le Ŋmalɛi lɛ Amli Jogbaŋŋ: Kɛ́ okɛ nitsumɔ dade ko fɔɔ nitsumɔ lɛ, ehaa oleɔ bɔ ni akɛtsuɔ nii jogbaŋŋ. Biblia lɛ ni oookane kɛjɛ shishijee kɛyashi naagbee lɛ baaha onu Biblia muu lɛ fɛɛ saneyitso lɛ shishi. Enɛ feemɔ hu yeɔ ebuaa bo ni okaiɔ ŋmalɛi lɛ kɛ hei ni amɛyɔɔ yɛ Biblia lɛ mli yɛ gbɛ ni waaa nɔ. Kɛ́ ole Ŋmalɛi jogbaŋŋ lɛ, ebaaha okɛ ekãa kɛ nɔmimaa awie yɛ shiɛmɔ nitsumɔ lɛ mli kɛ agbɛnɛ hu beni oyeɔ trukaa odase lɛ.—1 Tes. 1:5.
3, 4. (a) Mɛni ji gbɛ̀i komɛi ni wɔbaanyɛ wɔtsɔ nɔ kɛle Biblia lɛ mli jogbaŋŋ? (b) Ani otsɔ gbɛ̀i krokomɛi anɔ kɛle Ŋmalɛi lɛ amli jogbaŋŋ?
3 Kɛ́ otee asafoŋ kpeei ni atsɛ ŋmalɛ lɛ, gbelemɔ o-Biblia lɛ ni onyiɛ sɛɛ beni akaneɔ lɛ. Kɛ́ oofee aŋkro nikasemɔ loo oosaa ohe kɛha asafoŋ kpee lɛ, gbelemɔ Ŋmalɛ ni atsɛ yisɛɛ lɛ ni ojwɛŋ bɔ ni ooofee okɛtsu nii lɛ nɔ. Mɛi babaoo eyɔse akɛ kɛ́ amɛkane ŋmalɛi lɛ kɛjɛ Biblia lɛ mli tɛ̃ɛ fe nɔ ni amɛaakane yɛ kɔmpiuta nɔ loo nɔ ni ajie kɛjɛ kɔmpiuta nɔ awo wolo nɔ lɛ, efeɔ mlɛo kɛhaa amɛ akɛ amɛaagbele ŋmalɛi lɛ yɛ shiɛmɔ nitsumɔ lɛ mli.—Yoh. 14:26.
4 Wekui komɛi eto be ní amɛkɛkaseɔ Biblia mli ŋmalɛi amɛwoɔ amɛyitsoŋ. Amɛnyɛɔ amɛfeɔ enɛ kɛtsɔ woji bibii ni aŋma ŋmalɛ lɛ yɛ hiɛ kɛ ŋmalɛ lɛ mli wiemɔ lɛ yɛ sɛɛ lɛ nɔ. Amɛtoɔ naa ni amɛkwɛɔ kɛji amɛfɛɛ amɛbaanyɛ amɛkai ŋmalɛ lɛ mli wiemɔi lɛ kɛ he ni ejeɔ kpo yɛ Biblia lɛ mli. Kɛ́ wɔkase shiɛmɔ wiemɔi kɛ bɔ ni wɔkɛ Biblia lɛ aaatsu nii koni wɔnyɛ wɔkɛ mɛi ni tsĩɔ sanegbaa naa lɛ agba sane loo wɔkɛha sanebimɔi ahetoo lɛ, ehaa wɔhesaai lɛ yaa hiɛ.
5. Mɛni hewɔ wɔsumɔɔ ni wɔkɛ Biblia lɛ atsu nii jogbaŋŋ lɛ?
5 Wolo ko bɛ ni he yɛ sɛɛnamɔ fe Biblia lɛ. Emli wiemɔi lɛ pɛ baanyɛ aye abua mɛi koni ‘amɛle nii kɛya yiwalaheremɔ mli.’ (2 Tim. 3:15) Akɛni mɛi babaoo ni yɔɔ wɔshikpɔŋkuku lɛ mli lɛ leee nibii ni he yɔɔ sɛɛnamɔ ni yɔɔ Biblia lɛ mli lɛ hewɔ lɛ, esa akɛ wɔkɛ Biblia lɛ atsu nii jogbaŋŋ kɛtsɔɔ amɛ nɔ ni Biblia lɛ tsɔɔ diɛŋtsɛ.—Abɛi 2:1-5.