Wolo Ni Jɛ Nɔyeli Kuu Lɛ Dɛŋ
Suɔmɔ Nyɛmimɛi Yehowa Odasefoi:
Kwɛ hegbɛ kple ni wɔná ákɛ akɛ Yehowa, ni ji Jeŋ Muu fɛɛ Maŋtsɛ lɛ gbɛi aaatsɛ wɔ. Nakai gbɛi lɛ yɛ kɛmiiya naanɔ, efiteee, ni anyɛŋ akɛ nɔ ko ato he. Yehowa diɛŋtsɛ kɛ egbɛi lɛ fɔ̃ wɔ nɔ, ni titri lɛ kɛjɛ afi 1931 kɛbaa nɛɛ lɛ, akɛ nakai gbɛi ni yɔɔ srɔto nɛɛ yɔseɔ wɔ. ( Yes. 43:10) Wɔyɛ he miishɛɛ waa ákɛ wɔɔha ale wɔ akɛ Yehowa Odasefoi.
Abonsam miibɔ mɔdɛŋ fɛɛ ni eeenyɛ ni efite Nyɔŋmɔ gbɛi lɛ. Akɛni jeŋmaji lɛ yɛ ekudɔmɔ shishi hewɔ lɛ, amɛhu amɛkpoɔ Yehowa gbɛi lɛ. Babilon Kpeteŋkple lɛ, ni ji apasa jamɔi fɛɛ ni yɔɔ je lɛŋ fɛɛ lɛ sumɔɔɔ Nyɔŋmɔ gbɛi lɛ, ni amɛjie kɛjɛ Biblia shishitsɔɔmɔi babaoo mli. Nɔ ni tamɔɔɔ nakai lɛ, Yesu jie bulɛ kpo yɛ etsɛ gbɛi lɛ he, ni ekɛ no ye klɛŋklɛŋ gbɛhe yɛ sɔlemɔ he nɔkwɛmɔnɔ ni etsɔɔ esɛɛnyiɛlɔi lɛ mli. Ekɛɛ akɛ: “No hewɔ lɛ nyɛsɔlea nɛkɛ: Wɔtsɛ ni yɔɔ ŋwɛi, ogbɛi lɛ he atse.” (Mat. 6:9) Sɛɛ mli beni ejɛ etsui mli esɔle eha etsɛ lɛ, ekɛɛ akɛ: “Mijie ogbɛi lɛ ashi mitsɔɔ gbɔmɛi ni oŋɔ amɛ kɛjɛ je lɛŋ oha mi lɛ.” ( Yoh. 17:6) Akɛni wɔnyiɛ nɔkwɛmɔnɔ fɛfɛo ni Yesu fee lɛ sɛɛ hewɔ lɛ, wɔtswa wɔfai shi akɛ wɔkɛ ekãa baaha ale Yehowa gbɛi lɛ yɛ jeŋ fɛɛ.
Afi 2009 afi ŋmalɛ lɛ, ni ji “Ye sanekpakpa lɛ he odase faŋŋ” lɛ tsirɛ wɔ ni wɔgbe wɔsɔɔmɔ lɛ naa kwraa. (Bɔf. 20:24) Ŋwanejee ko bɛ he akɛ Yehowa ejɔɔ wɔmɔdɛŋbɔi lɛ anɔ diɛŋtsɛ yɛ sɔɔmɔ afi ni ho nɛɛ mli. Aye odase kpele yɛ jeŋ fɛɛ kɛwo Yehowa gbɛi lɛ hiɛ nyam. Shiɛlɔi ayifalɛ ni fe fɛɛ, ni ji 7,313,173 lɛ fee ekome kɛshiɛ amɛha mɛi fɛɛ, ni amɛtsɔɔ mɛi ni hiɛ tsui ni ja, ní miitao naagbai babaoo ni amɛkɛkpeɔ gbi fɛɛ gbi lɛ naa tsabaa lɛ anii. Mɛi ni naa shɛɔ 18,168,323 ni ba Kristo gbele lɛ Kaimɔ lɛ tsɔɔ akɛ, ekolɛ mɛi akpekpei abɔ yɛ lolo ni baatsɛ Yehowa gbɛi lɛ dani nibii agbɛjianɔtoo fɔŋ nɛɛ naagbee lɛ baashɛ.
Wɔbaaya nɔ wɔkɛ ekãa ashiɛ Maŋtsɛyeli lɛ he sanekpakpa lɛ kɛyashi be ni Yehowa baaŋmɛ gbɛ, ni wɔbaatsɔ gbɛ fɛɛ gbɛ ni wɔɔnyɛ nɔ wɔnine ashɛ mɛi anɔ yɛ wɔshikpɔŋkuku lɛ mli. (Mat. 24:14; Mar. 13:10) Kɛ́ wɔmiishiɛ yɛ shĩa kɛ shĩa, gbɛjegbɛi anɔ, kɛtsɔ woloŋmaa kɛ tɛlifoŋtswaa nɔ, loo wɔmiiye trukaa odase jio lɛ, eba akɛ wɔbaabɔ mɔdɛŋ wɔha mɛi babaoo ale Yehowa gbɛi kɛ eyiŋtoo lɛ.
Wɔyɛ yiŋtoi fɛɛ ni wɔɔdamɔ nɔ wɔhe wɔye akɛ etsɛŋ ni Yehowa baatse egbɛi lɛ he. (Ezek. 36:23) Be ni akɛbaakpata mɛi ni gbeɔ gbɛi lɛ he guɔ lɛ miibɛŋkɛ oyayaayai. Kwɛ miishɛɛ gbi ni no baafee aha Yehowa anɔkwa tsuji fɛɛ, ni eha ale Yehowa gbɛi lɛ ní amɛfi ejeŋ muu fɛɛ nɔyeli lɛ sɛɛ lɛ!
Ana bɔ ni Yehowa jɛɔ sumɔɔ mli ekwɛɔ ewebii lɛ faŋŋ yɛ “Nyɛyaa Nɔ Nyɛsaraa!” Kpokpaa Wuji kɛ Majimaji ateŋ Kpeei ni afee yɛ je lɛŋ hei babaoo yɛ afi 2009 mli lɛ. Kpeei wuji nɛɛ tsɔɔ hiɛyaa ni sa kadimɔ waa yɛ wɔteokrase yinɔsane mli, ni ehaa wɔnaa nɔ hewɔ ni esa akɛ wɔhiɛ ahi wɔhe nɔ yɛ Yehowa gbi lɛ he lɛ.—Mar. 13:37; 1 Tes. 5:1, 2, 4.
Anɔkwa sane ji akɛ, Yehowa mli hi ha wɔ; ehaa wɔtsui tɔɔ kɛ nyamɔ. Ehaa wɔbumɔɔ shi yɛ lɛɛhei ni yɔɔ frɔ̃frɔ̃, ni ekɛ wɔ yaa nui ni he jɔ lɛ ahe.—Lala 23:1, 2; 100:2, 5.
Nyɛnáa nɔmimaa akɛ Yehowa baaya nɔ ajɔɔ nyɛ beni nyɛkɛ ekãa tsuɔ Maŋtsɛyeli sɔɔmɔ nitsumɔ lɛ yɛ nyɔji ni jwere wɔhiɛ lɛ mli lɛ!
Wɔkɛ wɔ-Kristofoi asuɔmɔ ŋamɔi miimaje nyɛmimɛi ni yɔɔ je lɛŋ fɛɛ lɛ,
Nyɛnyɛmimɛi,
Yehowa Odasefoi a-Nɔyeli Kuu