Fã 2: Bɔ Ni Esa Akɛ Kristofoi Ahi Shi Ahã

1. Mɛɛ gbalashihilɛ Nyɔŋmɔ kpɛlɛɔ nɔ? Mɛni ji nɔ kome pɛ ni atsɔɔ yɛ Ŋmalɛ lɛ mli akɛ abaanyɛ adamɔ nɔ atse gbãla?

• “Ani nyɛkaneko akɛ mɔ ni bɔ amɛ yɛ shishijee lɛ, ebɔ amɛ nuu kɛ yoo ni ekɛɛ akɛ: ‘Enɛ hewɔ lɛ, nuu baashi epapa kɛ emami ni ebaakpɛtɛ eŋa he, ni amɛyi enyɔ lɛ fɛɛ amɛbaatsɔ heloo kome’? No hewɔ lɛ, amɛjeee mɛi enyɔ dɔŋŋ, shi moŋ heloo kome. No hewɔ lɛ, nɔ ni Nyɔŋmɔ kɛtsa lɛ, gbɔmɔ ko akagbála mli. . . . Mɔ fɛɛ mɔ ni shwieɔ eŋa, ni jeee akɛ eŋa lɛ ebɔ ajwamaŋ, ni ekɛ mɔ kroko boteɔ gbalashihilɛ mli lɛ, efite gbãla.”​—Mat. 19:4-6, 9.

2. Mɛni hewɔ kɛ́ nuu kɛ yoo ko yɛ akɛ wu kɛ ŋa shi amɛboteko gbalashihilɛ mli yɛ kusum naa loo yɛ nɔ ni amralo lɛ najiaŋdamɔlɔ kwɛɔ nɔ lɛ naa lɛ, esaaa lɛ? Kɛ́ obote gbalashihilɛ mli lɛ, ani obote mli yɛ nɔ ni amralo lɛ najiaŋdamɔlɔ kwɛɔ nɔ lɛ naa loo ofee oŋa lɛ he nii loo owu lɛ efee ohe nii, ni maŋ lɛ kpɛlɛɔ nɔ?

• “Yaa nɔ okai amɛ ni amɛba amɛhe shi amɛwo nɔyelii kɛ hegbɛi ashishi, ni amɛbo amɛ toi hu.”​—Tito 3:1.

• “Awo gbalashihilɛ hiɛ nyam yɛ mɛi fɛɛ ateŋ, ni akabule gbalashihilɛ saa lɛ, ejaakɛ ajwamaŋbɔlɔi kɛ gbalafitelɔi lɛ, Nyɔŋmɔ baakojo amɛ.”​—Heb. 13:4.

3. Mɛni ji osɔ̃ yɛ weku lɛ mli?

• “Mibi, bo opapa tsɔsemɔ lɛ toi, ni kaaku ohiɛ ofɔ̃ omami gbɛtsɔɔmɔ lɛ nɔ.”​—Abɛi 1:8.

• “Wu lɛ ji eŋa lɛ yitso, tamɔ bɔ ni Kristo lɛ hu ji asafo lɛ yitso . . . Wumɛi, nyɛyaa nɔ nyɛsumɔa nyɛŋamɛi, tamɔ bɔ ni Kristo lɛ hu sumɔ asafo lɛ.”​—Efe. 5:23, 25.

• “Tsɛmɛi lɛ, nyɛkawoa nyɛbii amlifu, shi moŋ nyɛyaa nɔ nyɛkwɛa amɛ yɛ Yehowa tsɔsemɔ kɛ eŋaawoo lɛ mli.”​—Efe. 6:4.

• “Nyɛ bii lɛ, nyɛboa nyɛfɔlɔi atoi yɛ nɔ fɛɛ nɔ mli, ejaakɛ enɛ sa Nuŋtsɔ lɛ hiɛ jogbaŋŋ.”​—Kol. 3:20.

• “Nyɛ ŋamɛi lɛ hu, nyɛbaa nyɛhe shi nyɛwoa nyɛwumɛi ashishi.”​—1 Pet. 3:1.

4. Mɛni hewɔ esa akɛ wɔbu wala?

• “[Nyɔŋmɔ hãa] mɛi fɛɛ wala kɛ mumɔ kɛ nibii fɛɛ. . . . Emli wɔyɔɔ wala ni wɔtsiɔ wɔhe ni wɔyɔɔ shihilɛ mli yɛ.”​—Bɔf. 17:25, 28.

5. Mɛni hewɔ esaaa akɛ wɔgbeɔ mɔ ko, kɛ́ eji gbekɛ ni yɔɔ emami musuŋ po?

• “Kɛ́ hii miinɔ ni amɛyapila yoohɔlɔ ko, ni . . . gbele ko jɛ mli kɛba lɛ, no lɛ, okɛ wala ato wala najiaŋ.”​—2 Mo. 21:22, 23.

• “Be ni aŋɔ mi hɔ beebe lɛ, ohiŋmɛii na mi; aŋmala ehe nibii lɛ fɛɛ yɛ owolo lɛ mli​—gbii ni ashɔ̃ amɛ​—dani amɛteŋ eko fɛɛ eko ba shihilɛ mli.”​—Lala 139:16.

• “Yehowa nyɛɔ . . . niji ni shwieɔ mɔ ko ni efeko nɔ ko lɛ lá shi.”​—Abɛi 6:16, 17.

6. Mɛɛ famɔ Nyɔŋmɔ kɛhã yɛ lá he?

• “Nyɛyaa nɔ nyɛtsia nyɛhe . . . kɛjea lá he, kɛjea kooloi ni ashɔ̃tɔ ahe.”​—Bɔf. 15:29.

7. Mɛni hewɔ esa akɛ wɔsumɔ wɔnyɛmimɛi Kristofoi lɛ?

• “Miihã nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ. Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.”​—Yoh. 13:34, 35.

8. Bɔ ni afee ni mɔ ko ni miiye tsɛŋemɔ hela ko loo hela kroko ni baanyɛ ekɛ mɛi awala awo oshãra mli lɛ kɛ ehela lɛ akatsɛŋe mɛi krokomɛi lɛ: (a) Mɛni hewɔ esaaa akɛ efuaa mɔ ko, eshɔɔ mɔ ko naa, loo efeɔ nibii krokomɛi ni tamɔ nakai ni tsɔɔ mɔhedɔɔ lɛ? (b) Mɛni hewɔ esaaa akɛ emli fuɔ kɛ́ mɛi efɔ̃ɔɔ lɛ nine kɛbaaa amɛshĩa? (d) Mɛni hewɔ esa akɛ mɔ ko ni kɛ ehe ewo shihilɛ ko ni baanyɛ ahã ená tsɛŋemɔ hela lɛ ayakwɛ elá mli dani ekɛ mɔ ko aje nyiɛmɔ ni tsɔɔ gbalashihilɛ hiɛ shishi lɛ? (e) Mɛni hewɔ esa akɛ mɔ ko ni miiye tsɛŋemɔ hela lɛ ahã onukpai akuu lɛ saji ahe gbɛjianɔtolɔ lɛ ale enɛ dani abaptisi lɛ lɛ?

• “Nyɛkahiɛa mɔ ko mɔ ko nɔ ko kwraa he nyɔmɔ, ja suɔmɔ ni nyɛaasumɔsumɔɔ nyɛhe lɛ kɛkɛ; . . . ‘Suɔmɔ onyɛmi gbɔmɔ tamɔ bo diɛŋtsɛ ohe.’ Suɔmɔ efeee enyɛmi gbɔmɔ efɔŋ.”​—Rom. 13:8-10.

• “[Nyɛtaoa] nibii ni hi hã mɛi krokomɛi, shi jeee nibii ni hi hã nyɛ pɛ.”​—Fip. 2:4.

9. Mɛni hewɔ Yehowa miisumɔ ni wɔkɛ mɛi atɔmɔi ake amɛ lɛ?

• “Kɛ́ mɔ ko yɛ sane yɛ mɔ ko he po lɛ, nyɛyaa nɔ nyɛnáa tsui nyɛhãa nyɛhe ni nyɛkɛkea nyɛhe tswaa. Bɔ ni Yehowa kɛke nyɛ tswaa lɛ, nyɛ hu nyɛfea nakai nɔŋŋ.”​—Kol. 3:13.

10. Kɛ́ nyɛmi ko wie ohe efɔŋ loo eshishiu bo lɛ, mɛni esa akɛ ofee?

• “Kɛ́ onyɛmi fee esha ko lɛ, yaa ni oyatsɔɔ lɛ etɔmɔ lɛ, okɛ lɛ yi enyɔ lɛ pɛ. Kɛ́ ebo bo toi lɛ, no lɛ, onine eshɛ onyɛmi lɛ nɔ. Shi kɛ́ ebooo toi lɛ, okɛ mɔ kome loo mɛi enyɔ afata ohe koni yɛ odasefoi enyɔ loo etɛ awiemɔ naa lɛ, sane fɛɛ sane ama shi. Shi kɛ́ ebooo amɛ toi lɛ, kɛɛmɔ asafo lɛ. Kɛ́ ebooo asafo lɛ hu toi lɛ, buu lɛ tamɔ jeŋmajiaŋbii lɛ ateŋ mɔ ko, kɛ toohelɔ.”​—Mat. 18:15-17.

11. Te Yehowa naa eshai nɛɛ ehãa tɛŋŋ?

▪ Ajwamaŋbɔɔ

▪ Amagai ni akɛtsuɔ nii yɛ jamɔ mli

▪ Hii kɛ hii loo yei kɛ yei ni kɛ amɛhe náa bɔlɛ

▪ Juu

▪ Asɔshwɛmɔ

▪ Dãatɔɔ

• “Nyɛkahãa alakaa nyɛ. Ajwamaŋbɔlɔi loo amagajalɔi, loo gbalafitelɔi, loo hii ni hãa hii krokomɛi kɛ amɛ náa bɔlɛ, loo hii ni kɛ hii krokomɛi náa bɔlɛ, loo julɔi, loo amimyelɔi, loo dãatɔlɔi, loo mɛi ajɛlɔi, loo ojotswalɔi anine shɛŋ Nyɔŋmɔ Maŋtsɛyeli lɛ nɔ.”​—1 Kor. 6:9, 10.

12. Akɛni osumɔŋ ni obɔ ajwamaŋ, ni tsɔɔ akɛ, osumɔŋ ni okɛ mɔ ko ni jeee ohefatalɔ lɛ náa bɔlɛ loo okɛ lɛ feɔ nifeemɔ ko ni kɛ bɔlɛnamɔ yɔɔ tsakpaa hewɔ lɛ, mɛni otswa ofai shi akɛ obaafee?

• “Nyɛjoa ajwamaŋbɔɔ naa foi!”​—1 Kor. 6:18.

13. Kɛjeee datrɛfoi ni ehã wɔ hegbɛ akɛ wɔkɛ tsofai ni amɛkɛ nitsumɔ kaa mɔ he loo amɛhãa mɔ jwɛŋmɔ naa baa shi lɛ atsu nii kɛtsa hela ko lɛ, mɛni hewɔ esaaa akɛ wɔkɛtsuɔ nii?

• “Nyɛkɛ nyɛgbɔmɔtsei lɛ ahãa akɛ afɔle ni hiɛ kã, ni yɔɔ krɔŋkrɔŋ, ni Nyɔŋmɔ náa he miishɛɛ, ni kɛ́ nyɛfee nakai lɛ, no baatsɔɔ akɛ nyɛmiitsɔ nyɛjwɛŋmɔ nɔ nyɛkɛ sɔɔmɔ krɔŋŋ miihã. Ni nyɛkahãa je nɛɛ shɔ̃a nyɛ dɔŋŋ, shi moŋ, nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ, koni nyɛ diɛŋtsɛ nyɛnyɛ nyɛka nyɛkwɛ ni nyɛyɔse nɔ ni ji Nyɔŋmɔ suɔmɔnaa nii kpakpa ni enáa he miishɛɛ ni hi kɛwula shi lɛ.”​—Rom. 12:1, 2.

14. Mɛni ji daimonioi anifeemɔi ni Nyɔŋmɔ nyɛɔ lɛ ekomɛi?

• “Akana mɔ ko yɛ nyɛteŋ ni hãa ebinuu loo ebiyoo tsɔɔ la mli, aloo mɔ ni klaa, aloo mɔ ni feɔ majik, aloo mɔ ni biɔ nii, aloo mɔ ni yeɔ ŋkunyaa, aloo mɔ ni tsuɔ mɛi tsofa, aloo mɔ ni yaa mumɔi atsɛlɔ loo klamɔfonyo ŋɔɔ, aloo mɔ ni biɔ gbohii anii.”​—5 Mo. 18:10, 11.

15. Kɛ́ mɔ ko fee esha ni yɔɔ hiɛdɔɔ, ni eesumɔ ni wekukpaa kpakpa abakã ekɛ Yehowa teŋ ekoŋŋ lɛ, mɛni esa akɛ efee amrɔ nɔŋŋ?

• “Mijaje mihe esha lɛ mitsɔɔ bo; mitsĩii mitɔmɔ lɛ nɔ. Mikɛɛ akɛ: ‘Majaje mitɔmɔi lɛ matsɔɔ Yehowa.’”​—Lala 32:5.

• “Ani nyɛteŋ mɔ ko bɛ hewalɛ? Etsɛ asafoŋ onukpai lɛ kɛba eŋɔɔ, ni amɛsɔle amɛhã lɛ, ni amɛkpa lɛ mu yɛ Yehowa gbɛ́i mli. Ni sɔlemɔ ni ajɛɔ hemɔkɛyeli mli asɔleɔ lɛ baahã helatsɛ lɛ aná hewalɛ, ni Yehowa baawó enɔ. Agbɛnɛ hu, kɛ́ efee eshai lɛ, akɛbaake lɛ.”​—Yak. 5:14, 15.

16. Kɛ́ oná ole akɛ onyɛmi Kristofonyo ko efee esha ni yɔɔ hiɛdɔɔ lɛ, mɛni esa akɛ ofee?

• “Kɛ́ mɔ ko nu akɛ aatswa adafi koni mɔ ko abaye odase yɛ sane ko he, ni lɛ ji sane lɛ he odasefonyo loo ena loo ená ele he nɔ ko ni eyawieee lɛ, efee esha, ni ehe sɔ̃ lɛ kã enɔ.”​—3 Mo. 5:1.

17. Kɛ́ atswa adafi akɛ mɔ ko jeee Yehowa Odasefonyo dɔŋŋ lɛ, te esa akɛ wɔkɛ mɔ lɛ aye ahã tɛŋŋ?

• “Nyɛkɛ mɔ fɛɛ mɔ ni atsɛɔ lɛ nyɛmi, ni ji ajwamaŋbɔlɔ loo amimyelɔ loo amagajalɔ loo mɔjɛlɔ loo dãatɔlɔ loo ojotswalɔ lɛ akpa bɔɔ, nyɛkɛ mɔ ni tamɔ nɛkɛ lɛ akayea nii po.”​—1 Kor. 5:11.

• “Kɛ́ mɔ ko ba nyɛŋɔɔ ni ehiɛɛɛ nɛkɛ tsɔɔmɔ nɛɛ lɛ, nyɛkaherea lɛ kɛbaa nyɛshĩai amli, ni nyɛkaŋaa lɛ po.”​—2 Yoh. 10.

18. Mɛni hewɔ esa akɛ okɛ mɛi ni sumɔɔ Yehowa lɛ pɛ abɔ gbagbalii?

• “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ, shi mɔ ni kɛ kwashiai bɔɔ lɛ, egbeŋ naa ekpakpa.”​—Abɛi 13:20.

• “Nyɛkahãa alakaa nyɛ. Naanyobɔɔ gbonyo fiteɔ sui kpakpai.”​—1 Kor. 15:33.

19. Mɛni hewɔ Yehowa Odasefoi kɛ amɛhe wooo pɔlitis loo maŋ saji amli lɛ?

• “Amɛfataaa je lɛ he, tamɔ bɔ ni mi [Yesu] hu mifataaa je lɛ he lɛ.”​—Yoh. 17:16.

20. Mɛni hewɔ esa akɛ obo amralofoi lɛ toi?

• “Mɔ fɛɛ mɔ aba ehe shi awo hegbɛi ni yeɔ nɔ lɛ ashishi, ejaakɛ hegbɛ ko bɛ ni jeee Nyɔŋmɔ ŋɔɔ ejɛ; hegbɛi ni yɔɔ lɛ, Nyɔŋmɔ ji mɔ ni kɛ amɛ to amɛgbɛhei lɛ.”​—Rom. 13:1.

21. Kɛ́ adesai wo mla ko ni teɔ shi ewoɔ Nyɔŋmɔ mla lɛ, mɛni obaafee?

• “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.”​—Bɔf. 5:29.

22. Kɛ́ ookpɛ oyiŋ yɛ nitsumɔ ni obaatsu lɛ he lɛ, mɛɛ ŋmalɛi baanyɛ aye abua bo ni okpɛ yiŋ ni ja koni okafata je lɛ he?

• “Jeŋmaŋ ko wóŋ klante nɔ yɛ jeŋmaŋ ko nɔ, ni amɛkaseŋ tawuu hu dɔŋŋ.”​—Mika 4:3.

• “Nyɛjea [Babilon Kpeteŋkpele lɛ mli], mimaŋ, kɛ́ nyɛsumɔɔɔ akɛ nyɛkɛ lɛ náa gbɛfaŋnɔ yɛ ehe eshai lɛ amli, ni nyɛsumɔɔɔ hu akɛ nyɛnáa ehaomɔi lɛ eko lɛ.”​—Kpo. 18:4.

23. Mɛɛ hiɛtserɛjiemɔi nɛkɛ obaahala, ni te nɔ ni obaakpoo?

• “Yehowa [nyɛɔ] . . . mɔ fɛɛ mɔ ni sumɔɔ yiwalɛ nifeemɔ.”​—Lala 11:5.

• “Nyɛhia efɔŋ; nyɛkpɛtɛa ekpakpa he.”​—Rom. 12:9.

• “Nɔ fɛɛ nɔ ni ji anɔkwale, nɔ fɛɛ nɔ ni sa woo, nɔ fɛɛ nɔ ni ja, nɔ fɛɛ nɔ ni he tse, nɔ fɛɛ nɔ ni hãa ajieɔ suɔmɔ kpo, nɔ fɛɛ nɔ ni awieɔ he ekpakpa, nɔ fɛɛ nɔ ni hi jogbaŋŋ, kɛ nɔ fɛɛ nɔ ni sa yijiemɔ lɛ, nyɛyaa nɔ nyɛsusua enɛɛmɛi ahe.”​—Fip. 4:8.

24. Mɛni hewɔ Yehowa Odasefoi kɛ jamɔi krokomɛi efeee ekome kɛjáaa lɛ?

• “Nyɛnyɛŋ ‘Yehowa okpɔlɔ lɛ’ kɛ daimonioi akpɔlɔ lɛ fɛɛ nɔ nii nyɛye.”​—1 Kor. 10:21.

• “‘Nyɛtsea nyɛhe,’ Yehowa kɛɛ, ‘ni nyɛkpaa nɔ ni he tseee lɛ hetaa’; ‘ni mahere nyɛ atuu.’”​—2 Kor. 6:17.

25. Mɛɛ shishitoo mlai baanyɛ aye abua bo ni okpɛ oyiŋ kɛji okɛ ohe baawo gbijurɔyeli ko mli loo okɛ ohe woŋ mli?

• “Amɛkɛ amɛhe futu jeŋmaji lɛ, ni amɛkɔ amɛgbɛi lɛ. Amɛtee nɔ amɛjá amɛmagai lɛ, ni amagai lɛ tsɔ tsɔne ehã amɛ.”​—Lala 106:35, 36.

• “Mɛi ni egboi lɛ leee nɔ ko nɔ ko kwraa.”​—Jaj. 9:5.

• “Amɛfataaa je lɛ he, tamɔ bɔ ni mi hu mifataaa je lɛ he lɛ.”​—Yoh. 17:16.

• “Efa hã nyɛ akɛ be ni eho momo lɛ mli lɛ nyɛtsu jeŋmajiaŋbii atsuinaa nii, be mli ni nyɛba nyɛjeŋ yɛ jeŋbai gbohii ni efeee mɔ hiɛgbele, kɛ akɔnɔi ni ayeee nɔ, kɛ dãa ni anuɔ kɛtekeɔ nɔ, kɛ henaabuamɔi ni yɔɔ hoo, kɛ dãanumɔ mli akaŋshii, kɛ amagajamɔi ni ahiɔ lɛ amli lɛ.”​—1 Pet. 4:3.

26. Namɛi awie amɛhe yɛ Biblia lɛ mli akɛ amɛye amɛfɔmɔ gbi? Ni mɛni wɔbaanyɛ wɔkase yɛ amɛsaji lɛ amli?

• “Gbi ni ji etɛ lɛ ji Farao fɔmɔ gbi, ni eŋmɛ etsuji lɛ fɛɛ okpɔlɔ, ni ejie dãawolɔnukpa lɛ kɛ nishãlɔnukpa lɛ fɛɛ ni ekɛ amɛ ba etsuji lɛ ahiɛ. Ni ekɛ dãawolɔnukpa lɛ gbɛnaa akɛ dãawolɔ lɛ saa hã lɛ ekoŋŋ . . . Shi esɛŋ nishãlɔnukpa lɛ.”​—1 Mo. 40:20-22.

• “Be ni ayeɔ Herode fɔmɔ gbi lɛ, Herodia biyoo lɛ bajo yɛ nifeemɔ lɛ shishi, ni esa Herode hiɛ jogbaŋŋ aahu akɛ ekã oblayoo lɛ kitã akɛ, nɔ fɛɛ nɔ ni ebaabi lɛ lɛ, ebaahã lɛ. Kɛkɛ ni emami wo lɛ ŋaa, ni ebakɛɛ akɛ: ‘Okɛ Yohane Baptisilɔ lɛ yitso afɔ̃ plɛte mli ohã mi yɛ biɛ.’ No hewɔ lɛ, etsu ni ayafo Yohane yitso yɛ tsuŋwoohe lɛ.”​—Mat. 14:6-8, 10.

27. Mɛni hewɔ oosumɔ ni okɛ gbɛtsɔɔmɔi ni asafoŋ onukpai lɛ kɛhãa wɔ lɛ atsu nii?

• “Nyɛboa mɛi ni nyiɛɔ hiɛ yɛ nyɛteŋ lɛ toi ni nyɛbaa nyɛhe shi nyɛhãa amɛ, ejaakɛ amɛmiibu nyɛhe, ni amɛbaabu enɛ he akɔntaa, koni amɛkɛ miishɛɛ afee enɛ, shi jeee kɛ mligbigblimɔ, ejaakɛ no baaye nyɛ awui.”​—Heb. 13:17.

28. Mɛni hewɔ ehe miihia ni bo kɛ oweku lɛ ahe be kɛkane Biblia lɛ daa ni nyɛkase lɛ?

• “Yehowa mla lɛ he emii shɛɔ, ni ekaneɔ Nyɔŋmɔ mla lɛ ni ejwɛŋɔ nɔ jetsɛremɔ kɛ jenamɔ. Ebaafee tamɔ tso ni adu yɛ fai atoi, ni woɔ yibii yɛ ebe mli, ni enɔ bai gbiii. Ni nɔ fɛɛ nɔ ni efeɔ lɛ yeɔ omanye.”​—Lala 1:2, 3.

29. Mɛni hewɔ osumɔɔ ni oya asafoŋ kpeei ni okɛ ohe awo mli lɛ?

• “Majaje ogbɛ́i lɛ matsɔɔ minyɛmimɛi lɛ; majie oyi yɛ asafo lɛ teŋ.”​—Lala 22:22.

• “Nyɛhãa wɔteŋ mɔ fɛɛ mɔ asusua enyɛmi he bɔ ni afee ni wɔteŋ mɔ fɛɛ mɔ akanya enyɛmi koni wɔjie suɔmɔ kpo ni wɔtsu nitsumɔi kpakpai, ni wɔkakpa kpe ni wɔkpeɔ kutuu lɛ, tamɔ bɔ ni eji mɛi komɛi asu lɛ, shi moŋ wɔteŋ mɔ fɛɛ mɔ awo enyɛmi hewalɛ, ni titri lɛ, akɛni nyɛmiina akɛ gbi lɛ miibɛŋkɛ nɛɛ.”​—Heb. 10:24, 25.

30. Mɛni ji nitsumɔ ni he hiaa fe fɛɛ ni Yesu kɛwo wɔdɛŋ?

• “Nyɛyaa nyɛyafea mɛi ni jɛ jeŋmaji lɛ fɛɛ amli lɛ kaselɔi, nyɛbaptisia amɛ . . . , nyɛtsɔa amɛ ni amɛye nii fɛɛ ni mifã nyɛ lɛ nɔ.”​—Mat. 28:19, 20.

31. Kɛ́ wɔmiitao wɔtsu onia kɛfi Maŋtsɛyeli nitsumɔ lɛ sɛɛ, loo wɔye wɔbua wɔnyɛmimɛi Kristofoi lɛ, te Yehowa miisumɔ ni wɔfee lɛ wɔhã tɛŋŋ?

• “Okɛ onibii ni jara wa lɛ awo Yehowa hiɛ nyam.”​—Abɛi 3:9.

• “Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ loo yɛ nɔnyɛɛ naa, ejaakɛ mɔ ni hãa kɛ miishɛɛ lɛ, lɛ Nyɔŋmɔ sumɔɔ.”​—2 Kor. 9:7.

32. Mɛɛ naagbai Kristofoi le akɛ amɛkɛbaakpe?

• “Mɛi ni awaa amɛ yi yɛ jalɛ hewɔ lɛ yɛ miishɛɛ, ejaakɛ amɛnɔ ji ŋwɛi Maŋtsɛyeli lɛ. Kɛ́ mɛi jɛ nyɛ ni amɛwa nyɛ yi ni amɛmale amɛwie nyɛhe efɔŋ fɛɛ efɔŋ yɛ mihewɔ lɛ, nyɛyɛ miishɛɛ. Nyɛnyaa ni nyɛmli afilia nyɛ, akɛni nyɛjweremɔnɔ lɛ fa babaoo yɛ ŋwɛi lɛ hewɔ, ejaakɛ nakai nɔŋŋ amɛwa gbalɔi ni tsɔ nyɛhiɛ lɛ ayi.”​—Mat. 5:10-12.

33. Mɛni hewɔ eji hegbɛ kpele akɛ abaabaptisi bo ni obatsɔ Yehowa Odasefonyo lɛ?

• “Owiemɔ lɛ tsɔ miishɛɛ kɛ nyamɔ kɛhã mitsui, ejaakɛ akɛ ogbɛ́i efɔ̃ minɔ, bo Yehowa, Nyɔŋmɔ.”​—Yer. 15:16.