Kaasusu akɛ Onyɛŋ Ofee—Bɔni Obaafee Oye Henumɔi akɛ Osaaa lɛ Anɔ
1. Mɛni hewɔ mɛi komɛi sumɔɔɔ akɛ amɛfeɔ Biblia mli nikasemɔ lɛ?
1 Ani kɛ́ fee lɛ osumɔɔɔ akɛ ofeɔ Biblia mli nikasemɔ akɛni onuɔ he akɛ onyɛŋ ofee lɛ jogbaŋŋ lɛ hewɔ? Anɔkwafoi komɛi ni hi shi yɛ blema, tamɔ Mose kɛ Yeremia, nu he yɛ bei komɛi amli akɛ amɛsaaa kɛha nitsumɔi ni akɛwo amɛdɛŋ lɛ. (2 Mose 3:10, 11; 4:10; Yer. 1:4-6) No hewɔ lɛ, henumɔi ni tamɔ nɛkɛ lɛ jeee nɔ ko srɔto. Te obaafee tɛŋŋ oye henumɔi nɛɛ anɔ lɛ?
2. Mɛni hewɔ esaaa akɛ wɔhaa wɔshiɛmɔ nitsumɔ lɛ yawaa shĩa kɛ shĩa pɛ kɛkɛ, ni wɔshi Biblia mli nikasemɔi afeemɔi wɔha mɛi krokomɛi lɛ?
2 Esa akɛ wɔkai akɛ Yehowa biŋ kɔkɔɔkɔ akɛ wɔfee nɔ ko ni tekeɔ wɔnyɛmɔ. (Lala 103:14) No hewɔ lɛ, nitsumɔ ni akɛwo wɔdɛŋ akɛ ‘wɔfee mɛi kaselɔi,’ ni ‘wɔtsɔɔ amɛ nii’ lɛ ji nɔ ko ni wɔbaanyɛ wɔtsu tsɔ. (Mat. 28:19, 20) Ejeee hegbɛ ni Yehowa kɛha wɔteaŋ mɛi pɛ ni he esa fe fɛɛ loo mɛi pɛ ni yɔɔ duromɔ keenii pɔtɛɛ ko. (1 Kor. 1:26, 27) No hewɔ lɛ, esaaa akɛ wɔhaa wɔshiɛmɔ nitsumɔ lɛ yawaa shĩa kɛ shĩa pɛ kɛkɛ, ni wɔshi Biblia mli nikasemɔi afeemɔi lɛ wɔha mɛi krokomɛi.
3. Mɛɛ gbɛ nɔ Yehowa esaa wɔ koni wɔnyɛ wɔfee Biblia mli nikasemɔ?
3 Yehowa Haa Wɔsaa Kɛha Nitsumɔ Lɛ: Yehowa ji mɔ ni saa wɔ kɛhaa kaselɔfeemɔ nitsumɔ lɛ. (2 Kor. 3:5) Kɛtsɔ egbɛjianɔtoo lɛ nɔ lɛ eha wɔle Biblia mli anɔkwalei ni je lɛŋ nilelɔi kpanakpanaa lɛ po leee. (1 Kor. 2:7, 8) Yehowa ebaa Yesu ni ji Tsɔɔlɔ Kple lɛ nitsɔɔmɔ gbɛi lɛ ayi eha wɔ koni wɔkase, ní eyaa nɔ etsɔɔ asafo lɛ nɔ etsɔseɔ wɔ. Kɛfata he lɛ, Yehowa shiko wɔ efolo, moŋ lɛ eha wɔ nibii ni he baahia wɔ ni wɔkɛtsɔɔ mɛi Biblia lɛ mli. Eha wɔ nibii tamɔ Biblia lɛ Tsɔɔ wolo lɛ, ni tsɔɔ anɔkwale lɛ mli yɛ gbɛ ni ja nɔ, ni eshishinumɔ waaa. Biblia mli nikasemɔ feemɔ baanyɛ afee mlɛo kwraa fe bɔni wɔsusuɔ.
4. Mɛni hewɔ wɔbaanyɛ wɔná hekɛnɔfɔ̃ɔ akɛ Yehowa baaye abua wɔ lɛ?
4 Yehowa ye ebua Mose kɛ Yeremia ni amɛgbe nitsumɔ ni ekɛwo amɛdɛŋ lɛ naa owula kosɛɛ. (2 Mose 4:11, 12; Yer. 1:7, 8) Wɔ hu wɔbaanyɛ wɔbi Yehowa koni eye ebua wɔ. Ejaakɛ kɛ́ wɔfee Biblia mli nikasemɔ lɛ, wɔmiitsɔɔ mɔ lɛ Yehowa he anɔkwalei lɛ, ni eji nɔ ko ni Yehowa hiɛ sɔɔ waa. (1 Yoh. 3:22) No hewɔ lɛ, ha efee oti ni ma ohiɛ akɛ obaafee Biblia mli nikasemɔ, ejaakɛ eji sɔɔmɔ nitsumɔ lɛ fã ko ni miishɛɛ kɛ jɔɔmɔ yɔɔ mli.