Mɛɛ Gbɛi Nɛkɛ Oyɔɔ?

YƐ BIBLIA lɛ mli lɛ, wiemɔ ni ji “gbɛi” lɛ tsɔɔ bulɛ ni mɔ ko yɔɔ. Ákɛ nɔkwɛmɔnɔ lɛ, Maŋtsɛ Salomo ŋma akɛ: “Gbɛi kpakpa hi fe mu kpakpa, ni gbele gbi hi fe fɔmɔ gbi.” (Jajelɔ 7:1; okɛto Abɛi 22:1 he.) Taakɛ Salomo wiemɔi lɛ tsɔɔ lɛ, akɛ gbɛi kpakpa fɔɔɔ mɔ ko. Shi moŋ ewala shihilɛ bei amli enaa bulɛ ni shishinumɔ diɛŋtsɛ yɔɔ mli. Egbɛi lɛ tsɔɔ bɔ ni esui ji, kɛji akɛ emli hi aloo efeɔ pɛsɛmkunya, eyɛ musuŋtsɔlɛ aloo eyitsoŋ wa, ebaa ehe shi aloo ewoɔ ehe nɔ, ni ákɛ eji jalɔ aloo efɔŋfeelɔ po.

Susumɔ David he okwɛ. Beni eyeɔ nɔ akɛ maŋtsɛ lɛ, ejie ehe kpo etsɔɔ akɛ mɔ ni he wa ni nijiaŋ ejeee wui. Yɛ nakai beaŋ nɔŋŋ lɛ, David jɛ heshibaa mli ekpɛlɛ etɔ̃mɔi anɔ, ni etsake kɛjɛ eshai wuji ni efee lɛ amli. No hewɔ lɛ, yiŋtoi kpakpai ahewɔ ni Yehowa gbalɔ lɛ tsɔɔ akɛ David ji “Yehowa tsui naa nuu” lɛ. (1 Samuel 13:14) No mli lɛ oblanyo David ená gbɛi kpakpa yɛ Nyɔŋmɔ hiɛ momo.

Nɔ ni tamɔɔɔ nakai lɛ, Yuda Maŋtsɛ Yehoram fee gbɛi gbonyo eha ehe. Eha eshishibii lɛ kpale kɛjɛ Yehowa jamɔ he, ni eha agbe enyɛmimɛi hii ekpaa kɛ lumɛi ni yɔɔ Yuda lɛ ekomɛi po. Yɛ naagbee lɛ, Yehowa kɛ hela ni piŋɔ mɔ tswa Yehoram ni etsɔ mli egbo. Biblia lɛ kɛɔ akɛ, Yehoram “eje mli ni mɔ ko mɔ ko hiɛ etɔɔɔ mli,” aloo taakɛ Today’s English Version tsɔɔ mli lɛ, “mɔ ko mɔ ko yeee awerɛho beni egbo lɛ.”—2 Kronika 21:20.

Shihilɛ gbɛ̀i ni David kɛ Yehoram kɔ lɛ haa anaa anɔkwale ni Biblia abɛ lɛ ji akɛ: “Kɛ akai jalɔ lɛ, ajɔɔ lɛ; shi mɛi fɔji agbɛ̀i aaashara.” (Abɛi 10:7) No hewɔ lɛ, esa akɛ wɔteŋ mɔ fɛɛ mɔ kɛ hiɛdɔɔ asusu sanebimɔ ni ji ‘Mɛɛ gbɛi mifeɔ yɛ Nyɔŋmɔ kɛ minaanyo gbɔmɔ hiɛ’ lɛ he?