Mɔdɛŋbɔɔ ní Akɛshɛɔ Tsui lɛ He

KƐFATA odase ni obaaye mɛi lɛ ahe lɛ, ehe miihia ni obɔ mɔdɛŋ ni oshɛ amɛtsui he. Yɛ Biblia lɛ mli lɛ, bei pii lɛ atsɔɔ bɔ ni tsui lɛ yɔɔ srɔto yɛ bɔ ni gbɔmɔ ji yɛ kponɔ gbɛ lɛ he. Mfonirifeemɔŋ tsui lɛ damɔ shi kɛha bɔ ni mɔ ko ji yɛ mligbɛ—bɔ ni enuɔ nii ahe, nɔ fɛɛ nɔ ni esusuɔ he, nɔ hewɔ ni esusuɔ he, kɛ bɔ ni nakai susumɔi lɛ naa enifeemɔi anɔ hewalɛ ehaa. Nɛkɛ mfonirifeemɔŋ tsui nɛɛ mli aduɔ anɔkwale wu lɛ yɛ. (Mat. 13:19) Ni tsui lɛ mli ji he ni esa akɛ ajɛ ni afee toiboo aha Nyɔŋmɔ yɛ.—Abɛi 3:1; Rom. 6:17.

Bɔni afee ni onitsɔɔmɔ lɛ anyɛ abote tsui lɛ mli lɛ, gbalamɔ ojwɛŋmɔ kɛma saji otii nɛɛ anɔ: (1) Yɔsemɔ nɔ ni ená otoibolɔ lɛ tsui nɔ hewalɛ momo lɛ. (2) Wó sui kpakpai ahe hewalɛ, tamɔ suɔmɔ kɛ Nyɔŋmɔ gbeyeishemɔ. (3) Wó otoibolɔ lɛ hewalɛ koni epɛi susumɔ ni yɔɔ emli gbɛ lɛ he bɔni afee ni enyɛ esa Yehowa hiɛ kɛmɔ shi.

Okɛ Sɛɛyoomɔ Atsu Nii. Yiŋtoi ahewɔ ni mɛi ekpɛlɛko anɔkwale lɛ nɔ lolo lɛ yɛ srɔtoisrɔtoi. Kɛ́ oofee shia Biblia mli nikasemɔ lɛ, ehe baahia ni ojie mɛi ahe jwɛŋmɔ fɔŋ namɔ kɛya ni okɛ anɔkwa saji ajie susumɔi gbohii ni nikaselɔ lɛ hiɛ lɛ, loo ekolɛ ehe baahia ni okɛ odaseyeli ko atsu nii ni okɛtsɔɔ akɛ nɔ ni okɛɛ lɛ ji anɔkwale. Bi ohe akɛ: ‘Ani mɔ lɛ le akɛ, ákɛ adesa lɛ, eyɛ mumɔŋ hiamɔ nii? Nibii enyiɛ eheɔ eyeɔ momo? Mɛni eheee eyeee? Mɛni hewɔ emuɔ saji anaa nakai? Ani yelikɛbuamɔ he miihia lɛ koni eye henumɔi ni baanyɛ etsĩ enaa koni ekakpɛlɛ sɔ̃i ni fataa anɔkwale lɛ nɔkpɛlɛmɔ he kɛbaa lɛ anɔ lɛ nɔ kunim?’

Jeee be fɛɛ be eyɔɔ mlɛo akɛ ooona nɔ hewɔ ni mɛi komɛi heɔ nɔ ko amɛyeɔ lɛ. Abɛi 20:5 kɛɔ akɛ: “Gbɔmɔ tsuiŋ yiŋtoo tamɔ nu ni mli kwɔ; shi mɔ ni kɔɔ sane sɛɛ, egbalaa kɛjeɔ kpo.” Sɛɛyoomɔ ji nyɛmɔ ni akɛnaa nɔ ni bɛ faŋŋ lɛ. Enɛ biɔ ni okwɛ nii kɛya shɔŋŋ ni oná su ni tsɔɔ akɛ osusuɔ mɔ he.

Jeee sanegbaa fɛɛ ji naabu wiemɔ. Saneyitso ko ni nyɛsusuɔ he lɛ baanyɛ aha nikaselɔ lɛ hiɛ su atsake loo egbee atsake. Kɛ́ oji fɔlɔ lɛ, ŋwanejee ko bɛ he akɛ tsakemɔ ko yɛ ni kɛ́ ona yɛ obi lɛ su he lɛ, ebaanyɛ etsɔɔ akɛ eejie su ko ni ená eshihilɛ nɔ hewalɛ lɛ lɛ kpo. Kaaku ohiɛ ofɔ̃ okadii nɛɛ anɔ. Amɛji nibii ni jieɔ bɔ ni mligbɛ gbɔmɔ lɛ ji lɛ kpo.

Sanebimɔi ni ahala lɛ jogbaŋŋ lɛ baanyɛ aye abua bo koni ona nɔ ni yɔɔ mɔ ko tsui mli. Obaanyɛ obi akɛ: “Te onuɔ he tɛŋŋ yɛ . . . ?” “Mɛni haa onáa nɔmimaa akɛ . . . ?” “Te obaafee onii oha tɛŋŋ kɛji . . . ?” Ni kɛlɛ, kwɛmɔ ni okɛ sanebimɔi babaoo akatutua mɛi. Obaanyɛ okɛ ŋaa akpa osanebimɔi lɛ ahiɛ akɛ, “Ani kɛ́ mibi bo akɛ . . . lɛ, ebaagba onaa?” Ní ooona nɔ ni yɔɔ mɔ ko tsui mli lɛ ji nɔ ko ni wa waa, ni no hewɔ lɛ ehe ehiaaa ni oyeɔ ohe oyai. Yɛ shihilɛi babaoo mli lɛ, ehe miihia ni mɔ lɛ aná hekɛnɔfɔɔ be babaoo, no dani ebaasumɔ ni ejie nɔ ni yɔɔ etsui mli lɛ kpo. Yɛ no po mli lɛ, esa akɛ okwɛ jogbaŋŋ koni mɔ lɛ akanu he akɛ ootao ni ole eteemɔŋ sane.—1 Pet. 4:15.

Bɔ ni ofeɔ onii yɛ nɔ ni onuɔ lɛ he lɛ hu biɔ sɛɛyoomɔ. Kaimɔ akɛ, oti ni ma ohiɛ lɛ ji ní onu mɛi ashishi bɔni afee ni onyɛ ona nɔ̃ Biblia mli saji ni baanyɛ akanya amɛ. Okɛ oyaiyeli atsĩ henumɔ ní oooná akɛ ojie amɛsusumɔi lɛ akpo akɛ ejaaa lɛ naa. Yɛ no najiaŋ lɛ, kwɛmɔ ni oyɔse henumɔi ni yɔɔ wiemɔi lɛ asɛɛ. Kɛkɛ lɛ obaale bɔ ni esa akɛ oha hetoo; ni onikaselɔ lɛ baanu he akɛ onuɔ lɛ shishi, ni ebaaha ekɛ hiɛdɔɔ asusu nɔ ni okɛɔ lɛ he.—Abɛi 16:23.

Kɛ́ eshɛ he ko lɛ, obaanyɛ okanya aŋkroaŋkroi po beni owieɔ otsɔɔ kuu babaoo lɛ. Kɛ́ onyɛ okwɛ toibolɔi lɛ ahiɛ jogbaŋŋ, ni okwɛ bɔ ni amɛhiɛ su yɔɔ, ni obi saji ni haa mɔ susuɔ nii ahe ni okpaaa hetoo gbɛ lɛ, no lɛ eeenyɛ eba akɛ obaale bɔ ni otoibolɔi lɛ nuɔ nɔ ni okɛɔ lɛ he amɛhaa. Kɛ́ ole otoibolɔi lɛ jogbaŋŋ lɛ, susumɔ shihilɛi amli ni amɛyɔɔ lɛ he. Be mli ni okɛ asafo lɛ susuɔ saji ahe kɛjɛɔ Nyɔŋmɔ Wiemɔ lɛ mli lɛ, susumɔ amɛnifeemɔ hu he.—Gal. 6:18.

Henumɔi ni Sɛɛnamɔ Yɔɔ He ní Oookanya. Be mli ni ona nɔ ni mɔ ko heɔ eyeɔ, nɔ ni eheee eyeee, kɛ nɔ hewɔ ni eheee eyeee lɛ sɛɛ lɛ, obaanyɛ odamɔ no nɔ ni oye obua lɛ. Yɛ Yesu shitee lɛ sɛɛ lɛ, eshɛ ekaselɔi lɛ atsuii ahe kɛtsɔ ‘Ŋmalɛi lɛ anaa ni egbele’ ni ekɛtsɔɔ amɛ saji ni ba mli etsɛko lɛ nɔ. (Luka 24:32) Bo hu esa akɛ obɔ mɔdɛŋ ni oha tsakpaa ahi nɔ ni mɔ ko ena, nɔ ni etaoɔ ni ena, kɛ nɔ ni enaa yɛ Nyɔŋmɔ Wiemɔ lɛ mli lɛ teŋ. Obaanyɛ oshɛ nikaselɔ lɛ tsui he yɛ gbɛ ni sa nɔ kɛji eyɔse yɛ faŋŋ mli akɛ: “Enɛ ji ANƆKWALE LƐ!”

Kɛ́ oma Yehowa ejurɔfeemɔ, esuɔmɔ, emlihilɛ, kɛ ejalɛ gbɛ̀i lɛ anɔ mi lɛ, belɛ ooye oobua mɛi ni ootsɔɔ amɛ nii lɛ koni amɛná suɔmɔ amɛha Nyɔŋmɔ. Kɛ́ ohe be ni okɛtsɔɔ otoibolɔi lɛ sui kpakpai ní Nyɔŋmɔ naa yɛ amɛhe akɛ aŋkroaŋkroi lɛ, belɛ ooha amɛmiiná yiŋtoo ni amɛaadamɔ nɔ amɛhe amɛye akɛ amɛbaanyɛ amɛná amɛkɛ lɛ teŋ wekukpaa. Obaanyɛ ofee enɛ kɛtsɔ ŋmalɛi tamɔ Lala 139:1-3, Luka 21:1-4, kɛ Yohane 6:44 ní ooosusu he lɛ nɔ, kɛ yelikɛbuamɔ ni okɛaaha otoibolɔi lɛ ni amɛna bɔ ni suɔmɔ ní Yehowa yɔɔ kɛha etsuji anɔkwafoi lɛ mli wa hã. (Rom. 8:38, 39) Tsɔɔmɔ mli akɛ Yehowa kwɛɔ nii kɛtekeɔ wɔtɔmɔi ni enaa wɔshihilɛ gbɛ̀i fɛɛ, ekãa ni wɔyɔɔ kɛha anɔkwa jamɔ, kɛ suɔmɔ ni wɔyɔɔ kɛha egbɛi lɛ. (2 Kron. 19:2, 3; Heb. 6:10) Ekaiɔ nibii ni kɔɔ wɔhe lɛ fɛɛ, ni ekɛ “mɛi fɛɛ ni yɔɔ gbohiiabui lɛ amli lɛ” baaku sɛɛ aba wala mli ekoŋŋ yɛ gbɛ ní sa kadimɔ nɔ. (Yoh. 5:28, 29; Luka 12:6, 7) Akɛni abɔ adesai yɛ Nyɔŋmɔ subaŋ nɔ hewɔ lɛ, bei pii lɛ, esui ni wɔɔsusu he lɛ baakanya tsuiŋ henumɔ yɛ mɔ lɛ mli.—1 Mose 1:27.

Kɛ́ mɔ ko kase akɛ, ebaabu mɛi krokomɛi taakɛ Yehowa buɔ amɛ lɛ, no lɛ ebaanyɛ eshɛ amɛtsui he. Shishinumɔ yɛ mli akɛ, kɛ́ wɔ Nyɔŋmɔ lɛ jieɔ mlihilɛ kpo etsɔɔ wɔ akɛ aŋkroaŋkroi lɛ, no lɛ etsɔɔ akɛ, ejieɔ nakai mɔ he susumɔ kome too lɛ nɔŋŋ kpo etsɔɔ mɛi krokomɛi, ni he ni amɛjɛ, maŋ, loo amɛ hewolonɔ su lɛ kɔɔɔ he eko. (Bɔf. 10:34, 35) Beni mɔ ko emu sane naa nɛkɛ lɛ, Ŋmalɛ mli nɔdaamɔ nɔ yɛ kɛha lɛ akɛ eeejie hetsɛ̃ kɛ mɛi ahe jwɛŋmɔ fɔŋ namɔ kɛjɛ etsui mli. Enɛ baaye abua lɛ koni ekɛ mɛi krokomɛi ahi shi yɛ toiŋjɔlɛ mli yɛ be mli ni ekaseɔ akɛ ebaatsu ŋwɛi suɔmɔnaa nii ahe nii lɛ.

Nyɔŋmɔ gbeyeishemɔ ji henumɔ kroko ni esa akɛ oye obua mɛi krokomɛi ni amɛná. (Lala 111:10; Kpoj. 14:6, 7) Nakai gbeyeishemɔ ni woo yɔɔ mli, loo Nyɔŋmɔ gbeyeishemɔ lɛ baanyɛ akanya mɔ ko ní ená nɔ ni enyɛŋ ená yɛ lɛ diɛŋtsɛ ehewalɛ mli. Yɛ be mli ni owieɔ Yehowa nitsumɔi ní haa wɔnáa gbeyeishemɔ kɛ woo wɔhaa lɛ kɛ esuɔmɔ mlihilɛ ni ekaaa lɛ he lɛ, obaanyɛ oye obua mɛi krokomɛi ní amɛshe gbeyei akɛ amɛaafee nii ni esaaa ehiɛ.—Lala 66:5; Yer. 32:40.

Kwɛmɔ akɛ otoibolɔi lɛ nuɔ shishi akɛ bɔ ni amɛbaa amɛjeŋ amɛhaa lɛ he hiaa yɛ Yehowa hiɛ. Eyɛ henumɔi, ni bɔ ni wɔfeɔ wɔnii yɛ egbɛtsɔɔmɔ shishi lɛ baanyɛ awo lɛ awerɛhoo loo ebaaha emii ashɛ ehe. (Lala 78:40-42) Tsɔɔmɔ gbɔmɛi ni amɛna nɔ hewɔ ni amɛ diɛŋtsɛ amɛjeŋba baanyɛ aye abua ni akɛha Satan mpoa ni etswaa Nyɔŋmɔ lɛ hetoo lɛ.—Abɛi 27:11.

Ye obua otoibolɔi lɛ ni amɛna akɛ Nyɔŋmɔ taomɔ nii lɛ ní amɛaashɛ he lɛ he yɛ sɛɛnamɔ kɛha amɛ. (Yes. 48:17) Gbɛ kome ni obaanyɛ otsɔ nɔ ofee enɛ ji kɛtsɔ tsɔɔmɔ ní obaatsɔɔ gbɔmɔtsoŋ kɛ henumɔŋ haomɔ ni baajɛ mli kɛba kɛji akpoo Nyɔŋmɔ nilee lɛ, yɛ be kukuoo mli po lɛ nɔ. Tsɔɔmɔ bɔ ni esha haa wɔkɛ Nyɔŋmɔ teŋ jɛkɛɔ, bɔ ni ehaaa mɛi krokomɛi aná hegbɛ ni amɛkase anɔkwale lɛ kɛjɛ wɔŋɔɔ, kɛ bɔ ni egbeɔ hegbɛi ni amɛyɔɔ lɛ he guɔ lɛ mli. (1 Tes. 4:6) Ye obua otoibolɔi lɛ ni amɛbu jɔɔmɔi ni amɛnáa mli ŋɔɔmɔ momo yɛ Nyɔŋmɔ mlai ni amɛyeɔ nɔ lɛ hewɔ lɛ akɛ nɔ ko ní jara wa. Wó hiɛsɔɔ ni amɛyɔɔ yɛ anɔkwale ni eji akɛ Yehowa jalɛ gbɛ̀i lɛ anɔ nyiɛmɔ haa wɔyeɔ wɔhe kɛjɛɔ haomɔi babaoo he lɛ mli hewalɛ. Beni mɔ ko naa hemɔkɛyeli yɛ nilee ni jɛɔ Nyɔŋmɔ gbɛ̀i lɛ amli kɛbaa lɛ mli lɛ, ebaajie nɔ fɛɛ mɔ ni baatsĩ lɛ gbɛ lɛ kɛjɛ jɛmɛ. (Lala 119:104) Enaŋ toiboo akɛ jatsu, shi moŋ akɛ gbɛ ni ebaatsɔ nɔ ejie hetuu-kɛ-hamɔ ni suɔmɔ yɔɔ mli kɛha Yehowa akɛ gbɔmɔ.

Mɛi Krokomɛi ní Oooye Obua Amɛ ni Amɛpɛi Nii Amli. Esa akɛ gbɔmɛi afee nɔ ni yɔɔ amɛtsuii amli lɛ he nɔ ko bɔni afee ni amɛya nɔ ni amɛda yɛ mumɔŋ. Tsɔɔmɔ bɔ ni Biblia lɛ baanyɛ aye abua amɛ ni amɛfee enɛ.

Ye obua otoibolɔi lɛ ni amɛna akɛ jeee mlai, ŋaawoo, yinɔsane mli saji, kɛ gbalɛi pɛ yɔɔ Biblia lɛ mli. Ejieɔ Nyɔŋmɔ susumɔ hu kpo. Akɛ Nyɔŋmɔ Wiemɔ lɛ to ashwishwɛ he yɛ Yakobo 1:22-25 lɛ mli. Kɛtsɔ nɔ ni wɔfeɔ yɛ nɔ ni Biblia mli shɛɛ sane lɛ kɛɔ lɛ he, kɛ gbɛ ni Yehowa tsɔɔ nɔ etsuɔ eyiŋtoo he nii lɛ nɔ lɛ, ehaa wɔnaa nɔ ni yɔɔ wɔtsui mli. No hewɔ lɛ, ejieɔ bɔ ni Nyɔŋmɔ, mɔ ni “kaa tsuii ekwɛɔ” lɛ naa wɔ ehaa lɛ kpo. (Abɛi 17:3) Ye obua otoibolɔi lɛ ni amɛha enɛ ahi amɛjwɛŋmɔ mli. Wó amɛ hewalɛ ni amɛsusu nɔ ni Nyɔŋmɔ ebaa yi kɛha wɔ yɛ Biblia lɛ mli saji amli, kɛ tsakemɔi ni ehe hiaa ni amɛfee yɛ amɛshihilɛ mli bɔni afee ni amɛsa ehiɛ jogbaŋŋ lɛ he. Ye obua amɛ ni amɛbu Biblia kanemɔ akɛ gbɛ ni amɛaatsɔ nɔ amɛna bɔ ni Yehowa buɔ “tsuiiaŋ susumɔi kɛ jwɛŋmɔi lɛ” ehaa, bɔni afee ni amɛnyɛ amɛkɛ Nyɔŋmɔ afee ekome kɛfee tsakemɔi ni he hiaa lɛ.—Heb. 4:12; Rom. 15:4.

Biblia mli nikaselɔi komɛi baasumɔ ni amɛtsu nɔ ni amɛkaseɔ lɛ he nii; ni kɛlɛ, nɔ ni mɛi krokomɛi baajwɛŋ yɛ he lɛ haoɔ amɛ. Ekolɛ amɛmiiwu kɛmiishi helooŋ henumɔi komɛi ni mli wa. Aloo ekolɛ amɛmiisusu gbɛ ni amɛaatsɔ nɔ amɛsɔmɔ Nyɔŋmɔ, yɛ be mli ni amɛkpɛtɛɔ je lɛŋ nifeemɔi komɛi ahe lɛ he. Tsɔɔmɔ amɛ osharai ni yɔɔ nakai yiŋ ní anyɛɛɛ akpɛ lɛ mli. (1 Maŋ. 18:21) Wó amɛ hewalɛ ni amɛsɔle amɛha Nyɔŋmɔ ni epɛi amɛtsuii amli ni etsuu he.—Lala 26:2; 139:24, 25.

Tsɔɔmɔ amɛ akɛ Yehowa nuɔ amɛhepelemɔ lɛ shishi ni akɛ, Biblia lɛ gbalaa nɔ ni yaa nɔ lɛ mli. (Rom. 7:22, 23) Ye obua amɛ ni amɛkwɛ jogbaŋŋ bɔni afee ni amɛkaŋmɛ gbɛ ní tsui ni yeee emuu lɛ henumɔi miiye amɛnɔ.—Abɛi 3:5, 6; 28:26; Yer. 17:9, 10.

Wó mɔ fɛɛ mɔ hewalɛ koni epɛi nɔ hewɔ ni efeɔ nibii komɛi lɛ mli. Tsɔɔmɔ lɛ ni ebi ehe akɛ: ‘Mɛni hewɔ misumɔɔ ni mafee enɛ? Ani ebaatsɔɔ Yehowa akɛ mihiɛ sɔɔ nɔ fɛɛ nɔ ni efee kɛha mi lɛ lɛɛlɛŋ?’ Wó hekɛnɔfɔɔ ni amɛyɔɔ lɛ mli hewalɛ ni otsɔɔ amɛ akɛ wekukpaa kpakpa ni amɛkɛ Yehowa baana lɛ ji gboshinii ni jara wa fe fɛɛ ní mɔ ko baanyɛ aná.

Ye obua otoibolɔi lɛ ni amɛna bɔ ni Yehowa ni amɛaasɔmɔ lɛ kɛ ‘amɛtsui fɛɛ’ lɛ he hiaa ha. (Luka 10:27) Enɛ tsɔɔ akɛ esa akɛ amɛhenumɔi fɛɛ, shwelɛi, kɛ susumɔi fɛɛ kɛ Yehowa gbɛ̀i lɛ akpã gbee. No hewɔ lɛ, tsɔɔmɔ otoibolɔi lɛ, jeee ni amɛpɛi nɔ ni amɛfeɔ lɛ pɛ mli, shi moŋ bɔ ni amɛnuɔ Nyɔŋmɔ taomɔ nii lɛ ahe amɛhaa kɛ susumɔ ni amɛhiɛ yɛ sɔɔmɔ ni amɛsɔmɔɔ lɛ lɛ he lɛ mli. (Lala 37:4) Yɛ be mli ni onikaselɔi lɛ naa hei ni hiɛyaa he hiaa yɛ lɛ, wo amɛ hewalɛ ni amɛsɔle amɛha Yehowa akɛ: “Feemɔ mitsui ekome, ní mashe ogbɛi lɛ gbeyei!”—Lala 86:11.

Kɛ́ nikaselɔ ko ná ekɛ Yehowa teŋ wekukpaa lɛ, ebaabo Nyɔŋmɔ toi yɛ hemɔkɛyeli ni eyɔɔ lɛ hewɔ ni jeee nɔ ni okɛɛ lɛ akɛ efee lɛ hewɔ. Kɛkɛ lɛ, lɛ diɛŋtsɛ ebaaya nɔ ‘eka nɔ fɛɛ nɔ ekwɛ akɛ esa Nuntsɔ lɛ hiɛ lo.’ (Efe. 5:10; Fil. 2:12) Nakai toiboo ni jɛɔ tsuiŋ lɛ saa Yehowa hiɛ.—Abɛi. 23:15.

Ha ni ehi ojwɛŋmɔ mli akɛ Yehowa ji mɔ ni kaa tsuii ekwɛɔ ni egbalaa gbɔmɛi kɛbaa amɛkɛ lɛ teŋ wekukpaa mli. (Abɛi 21:2; Yoh. 6:44) Wɔgbɛfaŋnɔ ji ni wɔye wɔbua. (1 Kor. 3:9) Etamɔ nɔ ni ‘Nyɔŋmɔ etsɔ̃ wɔnɔ ekɛ mɛi miiwie.’ (2 Kor. 5:20; Bɔf. 16:14) Yehowa enyɛɛɛ mɔ ko nɔ ni ekpɛlɛ anɔkwale lɛ nɔ, shi beni wɔkɛ Ŋmalɛi lɛ tsuɔ nii lɛ, ebaanyɛ eha wɔtoibolɔi lɛ ana akɛ nɔ ni amɛnuɔ lɛ ji amɛsanebimɔi lɛ—loo amɛsɔlemɔi lɛ ahetoo. Ha nɛkɛ anɔkwa sane nɛɛ ahi ojwɛŋmɔ mli be fɛɛ be ni oooná hegbɛ akɛ otsɔɔ nii lɛ, ni ojɛ suɔmɔ mli ni obi Yehowa kɛha egbɛtsɔɔmɔ kɛ yelikɛbuamɔ.—1 Kron. 29:18, 19; Efe. 1:16-18.