KƐ́ OYAATSA NƆ
NIKASEMƆ 9
Nu He Ohã Mɔ Lɛ
Shishitoo mla: “Nyɛkɛ mɛi ni nyaa lɛ anyaa; nyɛkɛ mɛi ni fóɔ lɛ afóa.”—Rom. 12:15.
Nɔ Ni Yesu Fee
1. Kwɛmɔ VIDIO lɛ, loo kanemɔ Marko 6:30-34. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
Mɛni hewɔ Yesu kɛ ebɔfoi lɛ shwe ni ‘amɛ pɛ amɛya he ko banee’ lɛ?
Mɛni tsirɛ Yesu ni etsɔɔ mɛi babaoo lɛ nii?
Mɛni Wɔkaseɔ Yɛ Nɔ Ni Yesu Fee Lɛ Mli?
2. Kɛ́ wɔnuɔ he wɔhãa mɛi lɛ, jeee sane kpakpa lɛ ni wɔmiitao wɔkɛhã amɛ lɛ pɛ kɛkɛ he wɔbaajwɛŋ, shi wɔbaajwɛŋ amɛ hu amɛhe.
Kasemɔ Yesu
3. Bo mɔ lɛ toi jogbaŋŋ. Ŋmɛɛ lɛ gbɛ ni ewie nɔ ni yɔɔ etsui mli. Kɛ́ eewie bɔ ni enuɔ he ehãa, nɔ ko ni gbaa enaa, loo nɔ ko ni tsɔɔ akɛ ekɛ bo kpãaa gbee yɛ nɔ ni owieɔ lɛ he lɛ, kaafolɔ ewiemɔ lɛ mli. Agbɛnɛ hu, kaatswa nɔ ni ewieɔ lɛ ofɔ̃. Bo lɛ toi jogbaŋŋ koni ena akɛ oojwɛŋ nɔ ni ewieɔ lɛ he.
4. Susumɔ mɔ lɛ he. Yɛ saji ni okɛ lɛ egba lɛ naa lɛ, bi ohe akɛ:
‘Mɛni hewɔ ehe miihia ni ele anɔkwale lɛ?’
‘Kɛ́ ekase Biblia lɛ, mɛɛ gbɛ nɔ ebaaná he sɛɛ yɛ eshihilɛ mli bianɛ, kɛ wɔsɛɛ hu?’
5. Okɛ lɛ asusu nibii ni baaye abua lɛ lɛ ahe. Kɛ́ hegbɛ ko ba nɔŋŋ lɛ, tsɔ woji ni wɔkɛ mɛi kaseɔ lɛ eko nɔ ohã esanebimɔ ko hetoo. Enɛ baahã ena akɛ, kɛ́ ehã akɛ lɛ je Biblia mli nikasemɔ shishi lɛ, no baaye abua lɛ ni ená esanebimɔi ahetoo, ni ebaaye ebua lɛ yɛ eshihilɛ mli hu.