Wolo Ni Jɛ Nɔyeli Kuu lɛ Dɛŋ

Wɔjɛɔ wɔtsuiŋ wɔsɔleɔ wɔhaa Nyɔŋmɔ akɛ “Ogbɛi lɛ he atse,” taakɛ Yesu sɔle lɛ. Bɔ ni wɔhiɔ shi wɔhaa akɛ Yehowa Odasefoi lɛ nɔ atsɔɔ ayɔseɔ bɔ ni wɔshweɔ waa akɛ wɔhi shi yɛ nakai sɔlemɔ lɛ kɛ gbeekpamɔ naa. Yɛ anɔkwale mli lɛ, babaoo he miihia fe Nyɔŋmɔ gbɛi lɛ kɛkɛ ni wɔɔle. Esa akɛ wɔkɛ hegbɛ fɛɛ hegbɛ ni wɔnáa lɛ awo egbɛi lɛ hiɛ nyam. Yɛ anɔkwale mli lɛ, woo ni fe fɛɛ ni wɔteŋ mɔ ko baanyɛ aná ji ni atsɛ lɛ akɛ Yehowa Odasefonyo.—Mat. 6:9; Yes. 43:10.

Yɛ Lala 110:3 lɛ kɛ gbeekpamɔ naa lɛ, Yehowa webii jɛɔ amɛsuɔmɔ mli amɛtsuɔ nitsumɔ ni Yehowa efã akɛ atsu lɛ. Mɛni hewɔ gbekɛbii kɛ onukpai kɛ mɛi ni jɛ shihilɛi srɔtoi amli lɛ kɛ amɛhe woɔ shiɛmɔ nitsumɔ lɛ mli kɛ ekãa lɛ? Nɔ̃ titri hewɔ ni amɛfeɔ nakai ji akɛ, amɛyɛ suɔmɔ kɛha Nyɔŋmɔ ni amɛtuu amɛhe amɛha lɛ. Akɛ famɔ haa wɔ yɛ 5 Mose 6:5, 6 lɛ koni wɔsumɔ Yehowa kɛ ‘wɔtsui fɛɛ kɛ wɔsusuma fɛɛ kɛ wɔhewalɛ fɛɛ.’ Suɔmɔ ni tamɔ nɛkɛ ni jɛ tsuiŋ lɛ tsirɛɔ wɔ koni wɔkɛ wɔbe, wɔhewalɛ, kɛ wɔnibii fɛɛ atsu nii ni wɔkɛha Nyɔŋmɔ Maŋtsɛyeli lɛ he nibii lɛ aya hiɛ, ni wɔhe ni wɔkɛaawo shiɛmɔ nitsumɔ lɛ mli jogbaŋŋ bɔ ni wɔshihilɛ aaaŋmɛ wɔ gbɛ lɛ fata he.

Suɔmɔ ni Yehowa yɔɔ kɛha adesai lɛ hewɔ ni efã koni ashiɛ e-Maŋtsɛyeli sanekpakpa lɛ yɛ jeŋ fɛɛ lɛ. Esumɔɔɔ akɛ mɔ ko hiɛ akpata, shi moŋ eesumɔ akɛ mɛi fɛɛ atsake kɛjɛ amɛgbɛ fɔŋ lɛ nɔ kɛba amɛ-Bɔlɔ lɛ ŋɔɔ koni amɛná naanɔ wala. (2 Pet. 3:9) Yehowa kɛɛ: “Mináaa efɔŋfeelɔ gbele he miishɛɛ, shi moŋ akɛ efɔŋfeelɔ akpale kɛjɛ egbɛ lɛ nɔ, ní eyi aná wala!” (Ezek. 33:11) Kɛ́ wɔkɛ wɔhe wo shiɛmɔ nitsumɔ lɛ mli lɛ, eyeɔ odase faŋŋ akɛ Yehowa yɛ suɔmɔ kɛha adesai. Ŋwanejee ko bɛ he akɛ anɔkwa sane nɛɛ ji yiŋtoo kome hewɔ ni wɔnáa miishɛɛ ni wɔmli filiɔ wɔ kɛ́ wɔmiitsu nitsumɔ ni he hiaa nɛɛ lɛ.

Suɔmɔ ni mli kwɔ ni wɔyɔɔ kɛha Yehowa lɛ hu jeɔ kpo yɛ bɔ ni wɔbuɔ e-Wiemɔ ni ajɛ mumɔŋ aŋma, ni ji Ŋmalɛ Krɔŋkrɔŋ lɛ wɔhaa lɛ. Kɛjeee Biblia lɛ hewɔŋ kulɛ, wɔleŋ Nyɔŋmɔ koni wɔbɛŋkɛ lɛ taakɛ Yakobo 4:8 lɛ woɔ wɔ hewalɛ ni wɔfee lɛ. Ni asaŋ wɔleŋ nɔ hewɔ ni wɔyɔɔ wala mli kɛ nɔ ni baaba wɔsɛɛ. Wɔleŋ akɛ wɔnaagbai lɛ fɛɛ jɛ wɔ fɛɛ wɔblematsɛ Adam. (Rom. 5:12) Kulɛ wɔleŋ suɔmɔ kpele ni Nyɔŋmɔ jie lɛ kpo kɛtsɔ e-Bi koome lɛ ni ekɛha wɔ akɛ kpɔmɔnɔ lɛ nɔ lɛ. Ni Yehowa miitsɔ gbɛ̀i babaoo anɔ eeha wɔ enilee, ŋaalee, kɛ eniiashishinumɔ lɛ eko. Kwɛ bɔ ni wɔhiɛ sɔɔ nikeenii ni ji e-Wiemɔ ni ajɛ emumɔ lɛŋ aŋma lɛ wɔhaa! Hiɛsɔɔ ni wɔyɔɔ kɛha nikeenii kpele nɛɛ kanyaa wɔ koni ‘wɔhe be’ kɛkane ewiemɔi lɛ, wɔkase ni wɔjwɛŋ nɔ. (Efe. 5:15, 16; Lala 1:1-3) Esaaa akɛ edɔɔ wɔ akɛ wɔkɛ wɔbe aaatsu nii kɛkane Nyɔŋmɔ Wiemɔ lɛ daa. Yɛ no najiaŋ lɛ, esa akɛ suɔmɔ ni wɔyɔɔ kɛha Nyɔŋmɔ lɛ aha wɔkane e-Wiemɔ lɛ, koni wɔnu lɛ shishi jogbaŋŋ ní suɔmɔ ni wɔyɔɔ kɛha lɛ lɛ mli akwɔ.

Wɔkase kɛjɛ Biblia lɛ mli akɛ beni Adam tɔ̃ Yehowa nɔ lɛ, Adam ha eshwiei ni wɔteŋ mɔ fɛɛ mɔ fata he lɛ baje shihilɛ ni yɔɔ mɔbɔ ni hiɛnɔkamɔ bɛ mli lɛ mli. Shi Nyɔŋmɔ baanyɛ afee nɔ ko yɛ shihilɛ nɛɛ he eha adesai, ni efee nakai hu kɛtsɔ gbɛjianɔ ni eto koni eyiŋtoo kɛha shikpɔŋ lɛ aba mli lɛ nɔ.—1 Mose 3:15.

Ŋwanejee ko kwraa bɛ he akɛ wɔteŋ mɔ fɛɛ mɔ miisumɔ waa akɛ etse wɔ-Nyɔŋmɔ lɛ gbɛi ni yɔɔ naakpɛɛ lɛ he. Be mli ni nilee ni wɔyɔɔ yɛ bɔ ni Yehowa ji Nyɔŋmɔ ni he yɔɔ naakpɛɛ lɛ yaa hiɛ lɛ, ekanyaa wɔ koni wɔkɛ lɛ kɛ agbɛnɛ hu egbɛjianɔtoo lɛ afee ekome ni wɔha ale egbɛi kpele kɛ eyiŋtoo kpele lɛ. Wɔnáa hekɛnɔfɔɔ kwraa akɛ ekpɛlɛɔ wɔnɔ ni ejɔɔ wɔ po amrɔ nɛɛ, ni ákɛ ebaaha wɔná naanɔ wala yɛ jeŋ hee lɛ mli.

Suɔmɔ nyɛmimɛi hii kɛ yei, wɔ ákɛ Nɔyeli Kuu lɛ mli bii lɛ miisumɔ ni wɔha nyɛle akɛ wɔsumɔɔ nyɛ waa diɛŋtsɛ. Wɔmiisumɔ hu ni wɔha nyɛle akɛ wɔhiɛ sɔɔ mɔdɛŋ ni nyɛbɔɔ koni nyɛkɛ be ni eshwɛ dani “amanehulu kpeteŋkpele” lɛ aaaba lɛ atsu nii kɛshiɛ sanekpakpa lɛ nyɛha mɛi babaoo ni nine aaanyɛ ashɛ amɛnɔ lɛ waa. (Kpoj. 7:14) No feemɔ haa amɛnáa hegbɛ ni nyɛ hu nyɛná, ni ji Nyɔŋmɔ kɛ Kristo he nilee ni kɛ mɔ yaa naanɔ wala mli lɛ nɔŋŋ eko.—Yoh. 17:3.

Nyɛnyɛmimɛi,

Yehowa Odasefoi a-Nɔyeli Kuu

Jeŋ Fɛɛ Amaniɛbɔɔ Kɛha Afi 2006 Akɔntaabui Fɛɛ Anaabuamɔ

Yehowa Odasefoi Anitsumɔhe Niji: 114

Maji ni Buɔ Amɛshiɛmɔyaa He Akɔntaa: 236

Asafoi Fɛɛ ni Yɔɔ: 99,770

Mɛi ni Ba Kaimɔ lɛ yɛ Jeŋ Fɛɛ: 16,675,113

Mɛi ni Ye Kaimɔ Okadi Nibii lɛ Eko yɛ Jeŋ Fɛɛ: 8,758

Maŋtsɛyeli Shiɛlɔi Ayifalɛ ni Fe Fɛɛ: 6,741,444

Shiɛlɔi ni Shiɛɔ Nyɔŋ Fɛɛ Nyɔŋ Nɔ lɛ Mlijaa: 6,491,775

Oha Mlijaa Yifalɛ ni Fa Fe Afi 2005 Nɔ̃ Lɛ: 1.6

Mɛi Abɔ ni Abaptisi: 248,327

Ŋmɛlɛtswai Abɔ ni Akɛtsu Nii yɛ Shiɛmɔ Mli: 1,333,966,199

Yehowa Odasefoi kɛ nɔ ni fa fe dɔlai akpekpei 111 kwɛ gbɛgbalɔi krɛdɛɛi, maŋsɛɛ sanekpakpa shiɛlɔi, kɛ nɔkwɛlɔi gbɛfalɔi yɛ amɛsɔɔmɔ nitsumɔ lɛ mli yɛ afi 2006 sɔɔmɔ afi lɛ mli.

Shiɛlɔi 19,328 ní abaptisi amɛ ji mɛi ayibɔ ni tsuɔ nii yɛ nitsumɔhe niji ni yɔɔ jeŋ fɛɛ lɛ. Amɛ fɛɛ amɛji Yehowa Odasefoi a-Be-Fɛɛ Sɔɔmɔ Krɛdɛɛ Gbɛjianɔtoo ni Yɔɔ Jeŋ Fɛɛ lɛ mli bii.