NIKASEMƆ 34
Mɛni Wɔbaanyɛ Wɔfee Koni Yehowa Ana Akɛ Wɔsumɔɔ Lɛ?
Ani suɔmɔ ni oyɔɔ kɛhã Nyɔŋmɔ lɛ mli ewa fe bɔ ni eji dani akɛ bo bɔi Biblia lɛ kasemɔ lɛ? Ani obaasumɔ ni oya nɔ ofee nibii ni baahã naanyobɔɔ ni yɔɔ okɛ lɛ teŋ lɛ mli awa? Kɛ́ nakai ni lɛ, no lɛ kaimɔ akɛ babaoo ni Yehowa naa akɛ suɔmɔ ni oyɔɔ kɛhã lɛ lɛ miida lɛ, babaoo ni ebaasumɔ bo ni eye ebua bo ji no. Mɛni obaanyɛ ofee koni ena akɛ osumɔɔ lɛ?
1. Mɛɛ gbɛ nɔ wɔhãa Yehowa naa akɛ wɔsumɔɔ lɛ?
Kɛ́ wɔbo Yehowa toi lɛ, no hãa enaa akɛ wɔsumɔɔ lɛ. (Kanemɔ 1 Yohane 5:3.) Enyɛɛɛ mɔ ko mɔ ko nɔ ni ebo lɛ toi. Moŋ lɛ, ehãa wɔteŋ mɔ fɛɛ mɔ hegbɛ ni etsɔɔ kɛji ebaabo lɛ toi loo eboŋ lɛ toi. Mɛni hewɔ efeɔ nakai? Yehowa sumɔɔ ni ‘wɔjɛ wɔtsui mli wɔbo lɛ toi.’ (Romabii 6:17) Enɛ tsɔɔ akɛ, esumɔɔ ni obo lɛ toi, jeee akɛni akɛfi onɔ lɛ hewɔ, shi moŋ akɛni osumɔɔ lɛ lɛ hewɔ. Ato wolo nɛɛ fã 3 kɛ 4 lɛ he gbɛjianɔ koni ewa bo ni ofee nibii ni Yehowa nyaa he, ni otsi ohe kɛje nibii ni enyaaa he lɛ hu ahe koni ena akɛ osumɔɔ lɛ.
2. Mɛni hewɔ jeee be fɛɛ be wɔnáa lɛ mlɛo akɛ wɔbaahã Yehowa ana akɛ wɔsumɔɔ lɛ lɛ?
“Jalɔ tsɔɔ shihilɛi babaoo ni mli wawai amli.” (Lala 34:19) Akɛni wɔyeee emuu hewɔ lɛ, jeee be fɛɛ be wɔnyɛɔ wɔfeɔ nɔ ni ja. Ni bei komɛi lɛ, wɔkɛ shika he naagbai kpeɔ, ayeɔ wɔ sane fɔŋ, ni wɔkɛ naagbai krokomɛi hu kpeɔ. Kɛ́ wɔkɛ shihilɛ ni mli wa kpe lɛ, ekolɛ, wɔnáŋ lɛ mlɛo akɛ wɔbaafee nɔ ni Yehowa sumɔɔ ni wɔfee. Nɔ hewɔ lɛ ji akɛ, efeɔ tamɔ nɔ ni kɛ́ wɔfee nɔ ni Yehowa sumɔɔɔ lɛ, no moŋ baahã wɔhe ajɔ wɔ. Shi kɛ́ ojɛ otsuiŋ ofee nɔ ni Yehowa sumɔɔ lɛ, ebaana akɛ osumɔɔ lɛ fe nɔ fɛɛ nɔ. Ni no baahã ena akɛ oyeɔ lɛ anɔkwa. Kɛkɛ lɛ, lɛ hu ebaaye bo anɔkwa. Eshiŋ bo kɔkɔɔkɔ.—Kanemɔ Lala 4:3.
KASEMƆ PII OFATA HE
Obaana nɔ hewɔ ni kɛ́ obo Yehowa toi lɛ enáa miishɛɛ lɛ, kɛ nɔ ni baawa bo ni oya nɔ obo lɛ toi.
3. Sane ko ni kɔɔ ohe
Abɔ amaniɛ yɛ Biblia mli wolo ni ji Hiob lɛ mli akɛ, Satan kɛ sane ko fɔ̃ Hiob kɛ mɛi fɛɛ ni miisumɔ ni amɛjá Yehowa lɛ anɔ. Nyɛkanea Hiob 1:1, 6–2:10 lɛ, ni nyɛsusua sanebimɔi nɛɛ ahe:
Mɛni Satan kɛɛ no hewɔ Hiob boɔ Yehowa toi lɛ?—Kwɛmɔ Hiob 1:9-11 lɛ.
Mɛɛ sane Satan kɛfɔ̃ adesai fɛɛ ni bo hu ofata he lɛ anɔ?—Kwɛmɔ Hiob 2:4 lɛ.
Nyɛkanea Hiob 27:5b lɛ, ni nyɛsusua sanebimɔ nɛɛ he:
Mɛni Hiob fee kɛtsɔɔ akɛ esumɔɔ Yehowa lɛɛlɛŋ?
Hiob tee nɔ eye Yehowa anɔkwa koni Yehowa ana akɛ esumɔɔ lɛ
Kɛ́ wɔtee nɔ wɔye Yehowa anɔkwa lɛ, no baahã ena akɛ wɔsumɔɔ lɛ
4. Hã Yehowa tsui anya
Nyɛkanea Abɛi 27:11 lɛ, ni nyɛsusua sanebimɔi nɛɛ ahe:
Kɛ́ ohã ohiɛ kã shi ni obo Yehowa toi lɛ, te enuɔ he ehãa tɛŋŋ? Mɛni hewɔ enuɔ he nakai?
5. Obaanyɛ oye Yehowa anɔkwa
Suɔmɔ ni wɔyɔɔ kɛhã Yehowa lɛ hãa wɔgbaa mɛi ehe sane. Ni anɔkwa ni wɔyeɔ lɛ lɛ hãa wɔfeɔ nakai kɛ́ efeemɔ wa po. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
Ani bei komɛi lɛ ewaa kɛhãa bo akɛ obaagba mɛi Yehowa he sane?
Mɛni wa Grayson ni eye egbeyeishemɔ lɛ nɔ?
Kɛ́ wɔsumɔɔ nɔ ni Yehowa sumɔɔ ni wɔnyɛɔ nɔ ni enyɛɔ lɛ, ewaŋ kɛhãŋ wɔ akɛ wɔbaaye lɛ anɔkwa. Nyɛkanea Lala 97:10 lɛ, ni nyɛsusua sanebimɔi nɛɛ ahe:
Yɛ nɔ ni okase kɛbashi bianɛ lɛ naa lɛ, mɛɛ nibii komɛi Yehowa sumɔɔ? Mɛɛ nibii komɛi enyɛɔ?
Te obaafee tɛŋŋ osumɔ nɔ kpakpa ni onyɛ nɔ fɔŋ?
6. Kɛ́ wɔbo Yehowa toi lɛ wɔnáa he sɛɛ
Yɛ shihilɛ fɛɛ shihilɛ mli lɛ, kɛ́ wɔbo Yehowa toi lɛ wɔbaaná he sɛɛ. Nyɛkanea Yesaia 48:17, 18 lɛ, ni nyɛsusua sanebimɔi nɛɛ ahe:
Ani oheɔ oyeɔ akɛ yɛ shihilɛ fɛɛ shihilɛ mli lɛ, ehi jogbaŋŋ akɛ wɔbaabo Yehowa toi? Mɛni hewɔ okɛɔ nakai?
Kɛbashi bianɛ lɛ, te oná Biblia lɛ kɛ Yehowa, ni ji anɔkwa Nyɔŋmɔ lɛ, he nii ni okaseɔ lɛ he sɛɛ ohã tɛŋŋ?
MƐI KOMƐI KƐƆ AKƐ: “Nyɔŋmɔ gbaaa ehe naa yɛ nibii ni mifeɔ lɛ ahe.”
Mɛɛ ŋmalɛi obaanyɛ okɛ mɛi asusu he kɛtsɔɔ akɛ wɔnifeemɔi hãa Yehowa náa miishɛɛ loo ewerɛ hoɔ ehe?
EMLI OTI
Wɔhãa Yehowa naa akɛ wɔsumɔɔ lɛ kɛ́ wɔbo lɛ toi ni wɔfee nɔ fɛɛ nɔ ni ekɛɛ wɔ akɛ wɔfee lɛ, kɛ́ nakai feemɔ wa po.
Mɛni Okase?
Mɛni okase yɛ Hiob sane lɛ mli?
Te ooofee tɛŋŋ ohã Yehowa ana akɛ osumɔɔ lɛ?
Mɛni baawa bo ni oya nɔ oye Yehowa anɔkwa?
EHE SAJI KROKOMƐI
Obaana bɔ ni obaafee oye Yehowa kɛ asafo lɛ anɔkwa.
Obaana saji ni Satan kɛshwie adesai anɔ lɛ he saji krokomɛi.
“Hiob Tee Nɔ Eye Anɔkwa” (The Bible—What Is Its Message? fã 6)
Obaana akɛ gbekɛbii bibii po baanyɛ ahã Yehowa ana akɛ amɛsumɔɔ lɛ.
Kɛ́ oblanyo loo oblayoo ko tipɛŋfoi miinyɛ enɔ ni efee nɔ ko ni ehiii lɛ, te eeefee tɛŋŋ eya nɔ efee nɔ ni Nyɔŋmɔ sumɔɔ lɛ?